Mataupu E 15

Te Vavega Muamua a Iesu

KO TE aso muamua io me ko te lua o aso talu mai te taimi ne fai ei a Anitelea, Petelu, Ioane, Filipo, Natanielu, kae kāti ko Iakopo foki mo fai ne soko muamua o Iesu. I konā loa ne toe faima‵laga atu ei latou ki te kogā fenua i tafa o Kalilaia, ko te koga ne o‵mai latou katoa mai ei. Ne faima‵laga atu latou ki Kana, ko te fa‵kai o Natanielu, telā e tu i te tamā mauga e se ‵mao mai Nasaleta, ko te koga telā ne tupu aka ei a Iesu. Ne ‵kami latou ke olo atu ki te ‵kaiga o te fakaipoipoga i Kana.

Ne fanatu foki te mātua o Iesu ki te fakaipoipoga. E pelā me se taugasoa o te kāiga fou, ne foliga mai me ne galue malosi a Malia ke fesoasoani atu ki manakoga o tino e tokouke kolā ne ‵kami. Tela la, ne matea vave ne ia me e se lava a mea i ei, kae ne lipoti atu ne ia penei ki a Iesu: “Ko palele te lotou uaina.”

I te taimi ne fai atu ei a Malia ki a Iesu ke fai aka se faiga e uiga ki te sē lava o te uaina, ne seki fia gasuesue muamua Iesu. “Se a tau mea tenā e taumafai o fai mai ki a au?” ne fesili atu a ia. E pelā me ko te Tupu fakaekegina a te Atua, ne se ‵tau o fakatonu atu ana kāiga io me ko ana taugasoa e uiga ki ana galuega. Tela la, se mea ‵lei me ne tuku atu ne Malia te filifiliga tenā ke fai ne tena tama, kae ne fai atu fua tou fafine ki tino kolā ne fakasoa atu a uaina: “Fai a mea katoa kolā e fakatonu atu ne ia ki a koutou.”

E isi ne fagu kele utu vai ‵lasi e ono i konā, kae e ‵tusa loa mo te taki sefulu kalone e mafai o utu ki ei. Ne fakatonu atu a Iesu ki te kau tavini: “Utu a fagu kele konā ki vai.” Kae ne utu ne tavini a fagu konā ke ‵fonu. Muna a Iesu: “Asu ake ne mu vai kae avatu ki te pule o te ‵kaiga.”

Ne ofo te pule o te ‵kaiga i te ‵lei o te uaina, ne seki iloa ne ia me ne maua te mea tenā mai te faiga o se vavega. Ne kalaga atu a ia ki te tagata telā ne fatoā fakaipoipo, ana muna: “A tino katoa e muamua eiloa o tufa te uaina ‵lei, kae kafai ko inu malosi a tino ki ei ko tufa mai ei te uaina masei; kae ne tausi ne koe te uaina ‵lei ki te taimi tenei.”

Tenā loa te vavega muamua a Iesu, kae i te lotou ‵kilo atu ki ei ne fakamalosigina i ei te fakatuanaki o ana soko ‵fou. Fakamuli ifo, ne faima‵laga atu latou mo tena mātua mo ana āfa taina ki te fakai ko Kapanaumi, telā e tu pili ki te Namo o Kalilaia. Ioane 2:1-12.

▪ I te taimi fea o te galuega a Iesu ne fai ei te fakaipoipoga i Kana?

▪ Kaia ne ‵teke atu ei a Iesu ki te manatu o tena mātua?

▪ Se a te vavega telā ne fai ne Iesu, kae ne a mea ne ‵tupu i ei ki nisi tino?