Mataupu e 19

Ne Akoako Atu ki te Fafine Samalia

I TE lotou auala mai Iutaia ki Kalilaia, ne olo atu a Iesu mo ana soko i te kogā fenua ko Samalia. Ne fi‵ta latou i te faiga o te lotou malaga, kae i te fakatutonu ne malōlō ei latou i se vaikeli i tafa o Sukala. Ne keli ne Iakopo te vaikeli tenā i te fia selau tausaga mai mua atu i ei, kae ne tumau te vaikeli tenā ke oko mai eiloa ki aso nei, i tafa o te fa‵kai ko Napulusi.

Ne mānava malie aka a Iesu i konā, kae ne olo atu ana soko ki te fa‵kai o ‵togi mai ne meakai. I te taimi ne fanatu ei te fafine Samalia o asu ana vai, ne fakamolemole atu penei a ia: “Aumai ake ne mu vai ke inu au.”

E se ti fesokotaki sāle a te kau Iutaia mo te kau Samalia ona ko olotou lagonaga fakailoga tino. Tela la, ne poi te fafine kae ne fesili atu penei: “A koe se Iutaia, ako au se Samalia. E mafai pefea ne koe o fai mai ki a au ke inu koe?”

Ne tali atu penei a Iesu: “Moi iloa ne koe me ko oi a ia tenei e fai atu ki a koe, ‘Aumai ke inu au,’ penei ko fai mai koe ki a ia, kae ka tuku atu ne ia ki a koe te vai ola.”

“Tou ‵malu,” ko tena tali, “e seai sau ‵soni, kae ko te vaikeli ko tō ‵poko; e maua la ne koe maifea te vaiola? E se sili atu koe i te motou tupuga ko Iakopo, telā ne tuku mai ne ia ki a matou te vai­keli tenei? Ne inu i ei a ia mo ana tama, e pelā foki mo ana manu.”

“So se tino e inu ki te vai tenei, e toe fia inu foki,” ko muna a Iesu. “Ka ko te tino e inu ki te vai telā ka tuku atu ne au ki a ia, e se toe fia inu eiloa. I te mea, a te vai telā ka tuku atu ne au ki a ia, ka fai mo punavai i a ia, kae ka puna aka ki te ola se gata mai.”

Ne tali atu penei te fafine: “Tou ‵malu, tuku mai te vai tenā ki a au ko te mea ke se toe fia inu au, kae ke se toe vau foki au ki konei o asu vai.”

I konā loa, ne fai atu a Iesu penei ki a ia: “Fano la o kalaga ki tau avaga ko toe vau ei koe ki konei.”

“E seai saku avaga!” ko tena tali.

Ne fakamaoni aka ne Iesu tena pati: “E tonu eiloa tau pati tenā me e seai sau avaga. Ko oti koe ne avaga ki tāgata e tokolima, kae ko te tagata tenei e ‵nofo nei koulua, e se ko tau avaga tonu. Tela la, ko ‵tonu ei au pati ne fai mai.”

Ne ofo malosi te fafine tenā, ana muna: “Tou ‵malu, ko iloa ne au i a koe se pelofeta.” Ne fakaasi atu ne ia tena fiafia ki mea faka-te-agaga, me ne fai atu a ia i te kau Samalia “ne tapuaki i te mauga tenei [ko Kelisima telā ne tu pili mai] kae fai mai koutou [ko te kau Iutaia] me ko Ielusalema ko te koga e tapuaki i ei a tino.”

Kae e se tāua te koga telā e tapuaki atu i ei, e pelā mo te mea ne fakaasi mai ne Iesu. Ana muna: “Ka oko mai te taimi, a latou kolā e tapuaki fakamaoni, ka tapuaki ki te Tamana i te agaga mo te munatonu, ko vaegā tino penei e manako ki ei te Atua ke tapuaki atu ki a ia. A te Atua ko te agaga eiloa, ko tino kolā e ­tapuaki ki a ia, e ‵tau o tapuaki i te agaga mo te munatonu.”

Ne ofo malosi te fafine i ei. “E iloa ne au me i te Mesia e vau, telā e igoa ki te Keliso,” ko ana muna. “Kafai e oko mai, ka taku mai ne ia a mea katoa ki a matou.”

Ne taku atu ne Iesu penei: “A te tino telā e faipati koe ki ei, ko au tenā.” Mafaufau ki ei! A te fafine telā ne fanatu i te fakatutonu o asu vai, kāti ne fai penā ko te mea ke mo a ma fetaui a ia mo nisi fāfine i te fa‵kai tenā kolā ne takalia‵lia ki tena vaegā olaga, kae ne taulia malosi a ia i se auala fakaofoofogia ona ko Iesu. Ne taku tonu atu ne Iesu a te mea telā ne seki taku atu ne ia ki so se isi tino. Ne a mea ne iku mai i ei?

Ne Tali‵tonu a Tino Samalia e Tokouke

I te ‵fokiatuga mai Sukala mo olotou mea‵kai, ne maua atu ne te kau soko a Iesu i te vaikeli o Iakopo i te koga ne tiakina ei ne latou a ia. Kae i konā loa ne sau‵tala ei a ia mo te fafine Samalia. I te okomaiga o ana soko, ne fano keatea tou fafine, ne tiakina ne ia tena fagu vai, kae ne fanatu eiloa a ia ki te fakai.

Ona ko tena fiafia malosi ki mea kolā ne taku atu ne Iesu ki a ia, ne fai atu a ia penei ki tāgata i te fakai: “O‵mai ake o onoono ki te tagata telā ne taku mai ne ia ki a au a mea kolā ne fai ne au.” Kae ne fesili atu a ia ke fai ei ke ‵saga mai latou: “E se ko ia tenei ko te Keliso?” Ne magoi ‵ki eiloa te fesili tenā​—⁠ne olo atu a tāgata ke onoono ki ei.

A koi fai penā, kae ne fakamalosi atu a soko ki a Iesu ke kai ki meakai kolā ne aumai ne latou mai te fa‵kai. Kae ne tali atu a ia penei: “E isi saku meakai e se iloa ne koutou.”

Ne fakatau fesilisili te kau soko penei: “E isi nei se tino ne aumai ne ia ki ei ne meakai?” Ne fakamatala atu penei ne Iesu: “A taku meakai, ko te fai ne au a te loto o ia telā ne uga mai ne ia au, kae ke fakapalele foki a te galuega ne tuku mai ne ia ki a au ke fai. E isi se faigāmuna a koutou, ‘E toe fa masina ko ‵kati i ei te saito.’” Kae ne fakasino atu a Iesu ki te ‵katigā saito faka-te-agaga, ana muna: “‵Kilo otou mata ki fatoaga, ko iloa ei ne koutou me ko ‵tau o ‵kati. A ia telā e ‵kati saito e maua ne ia tena ‵togi, kae e fakaputu foki ne ia ana fuagalakau o te ola se gata mai, ko te mea la tenā, ka fiafia fakatasi ei a te tino toki saito mo te tino ‵kati saito.”

Kāti ne maina ‵lei a Iesu i te ikuga ‵lei telā ka maua i te lā ­fetauiga mo te fafine Samalia​—me ka fakatuanaki a tino e tokouke ki a ia ona ko tena molimau. Ne molimau atu a ia ki tino o te fa‵kai tenā, ana muna: “Ne taku mai ne ia ki a au a mea katoa kolā ne fai ne au.” Tela la, i te taimi ne oko atu ei a tāgata ­Sukala ki a ia i te vaikeli, ne fakamolemole atu a latou ki a ia ke nofo mai ke sau‵tala latou ki nisi mea. Ne talia ne Iesu a te ‵kamiga tenā kae ne nofo atu a ia i konā i aso e lua.

A koi fakalogo‵logo te kau Samalia ki a Iesu, kae e tokouke a nisi tino ne tali‵tonu ki a ia. I konā loa, ne fai atu latou penei ki te fafine: “Ko tali‵tonu nei matou, e se mai i au pati, ako matou eiloa ko oti ne fakalogo‵logo ki a ia, ko iloa ei ne matou me ko ia tonu eiloa ko te fakaola o te lalolagi.” A te tonuga loa ne tuku mai ne te fafine Samalia se fakaakoakoga ‵lei, me e mafai pefea o molimau atu e uiga ki a Keliso i te faiga ke ‵saga mai a tino ko te mea ko tino fakalogo‵logo ke suke‵suke ki nisi mea!

Masaua la me e toe fa masina a koi tuai o ‵kati a saito​—kāti ko te ‵katigā kalite, e fai sāle i Palesitina i te taimi e ‵somo aka ei a lakau. Kāti a te masina tenā ko Novema io me ko Tesema. Ko tena uiga mai tua ifo o te Paseka i te 30 T.A., kāti ne fakamaumau ne Iesu mo ana soko a masina e valu tupu i te akoako atu mo te papatiso atu i Iutaia. I konā loa, ne tiakina ei ne latou a te koga tenā kae ne olo atu ki olotou fa‵kai i Kalilaia. Ne a mea ne faka‵tali mai mō latou i konā? Ioane 4:3-43.

▪ Kaia ne ofo ei te fafine Samalia me ne faipati atu a Iesu ki a ia?

▪ Ne a mea ne akoako atu ne Iesu ki a ia e uiga ki te vai ola mo te koga e ‵tau o tapuaki i ei?

▪ Ne fakaasi atu pefea ne Iesu ki a ia me ko oi a ia, kae kaia e fakaofoofogia ei te mea tenā?

▪ Se a te vaegā molimau telā ne avatu ne te fafine Samalia kae ne a mea ne iku mai i ei?

▪ Ne fetaui pefea a meakai a Iesu mo te ‵katigā saito?

▪ E mafai pefea ne tatou o fakaiku aka me e pefea te leva o te galuega a Iesu i Iutaia mai tua ifo o te Paseka i te 30 T.A.?