Iesu mo te Fafine i te Vaikeli

NE NOFO malie aka a Iesu i tafa o se vaikeli i Samalia ke malolo ei a ia. Ne olo atu ana soko ki te fakai ke ‵togi mai ne meakai. A te fafine telā e faipati ki ei a Iesu ne vau o asu vai. Ne fai atu a ia ki tou fafine: ‘Tuku mai ne mu vai ke inu aka au.’

Ne fai a te mea tenei ke ofo malosi a te fafine. E iloa ne koe me kaia? Me i a Iesu se tino Iutaia, kae ko tou fafine se Samalia. Kae ko te tokoukega o tino Iutaia e se tī fia‵fia ki tino Samalia. E se tī fai‵pati latou ki ei! Kae ne alofa a Iesu ki vaegā tino katoa. Tela la, ne fai atu tou tagata penei: ‘Moi ne iloa ne koe a te tino telā e fakamolemole atu ke inu a ia, ka fakamolemole atu foki koe ki a ia kae ka tuku atu ne ia ki a koe a te vaiola.’

‘Tou ‵malu,’ ne fai atu te fafine, ‘a te vaikeli tenei ko tō ‵poko, kae e seai foki eiloa sau ‵soni. Ka maua ne koe mai fea a te vaiola tenā?’

‘Kafai e inu koe mai te vaikeli tenei ka toe fia inu koe,’ ne fakamatala atu a Iesu, ‘Kae ko te vai telā ka tuku atu ne au e mafai o fai ei se tino ke ola ki te se-gata-mai.’

‘Tou ‵malu,’ ne fai atu te fafine, ‘tuku mai ki a au a te vai tenā! Telā ka se toe fia inu eiloa au. Kae ka se toe ‵tau o vau au ki konei o asu vai.’

Ne mafaufau a te fafine me ne faipati a Iesu ki se vai tonu. Kae ne faipati a ia ki te munatonu e uiga ki te Atua mo tena Malo. A te munatonu tenei e fai pelā me se vaiola. E mafai o tuku atu i ei ki tino a te ola se-gata-mai.

I konā ne fai atu ei a Iesu ki te fafine: ‘Fano kae kalaga atu ki tau avaga kae toe foki mai.’

‘E seai saku avaga,’ ne tali mai tou fafine.

‘E tonu eiloa koe,’ ne fai atu a Iesu. ‘Kae ko oti ne avaga koe ki tāgata e tokolima, kae ko te tagata tenā e ‵nofo mo koe nei e se ko tau avaga.’

Ne ofo a te fafine, me ne ‵tonu a mea katoa konā. Ne mafai pefea o iloa ne Iesu a mea konā? E tonu, ona ko Iesu ko te Tino ne folafola mai telā ne uga mai ne te Atua, kae ne tuku atu ne te Atua a te fakamatalaga tenei ki a ia. I konā eiloa ne ‵foki mai ei a soko o Iesu, kae ne ofo latou me e faipati atu a ia ki se fafine Samalia.

Se a te mea e tau‵loto ne tatou mai i mea katoa konei? E fakaasi mai i ei me e alofa a Iesu ki tino mai itukāiga katoa. Kae e ‵tau foki o fai tatou penā. E se ‵tau o mafau‵fau tatou me e ma‵sei a nisi tino ona ko te fenua ne fa‵nau mai ei latou. Ne manako a Iesu ke iloa ne tino katoa a te munatonu telā ka takitaki atu ei ki te ola se-gata-mai. Kae e ‵tau foki mo tatou o ma‵nako o fesoasoani atu ki tino ke tau‵loto ki te munatonu.