Mataupu e 22
Ne Kalagagina a Soko e Tokofa
MAI tua ifo o taumafaiga ke tamate a Iesu i tena fa‵kai ko Nasaleta, ne fanatu a ia ki te fa‵kai ko Kapanaumi i tafa o te Namo o Kalilaia. Ne fakataunu mai i ei a te suā valoaga a Isaia. Ko te valoaga telā ne ‵valo mai i ei me i tino Kalilaia kolā e ‵nofo i tafa o te tai, ka matea atu ne latou se mainaga lasi.
I te faiga ne Iesu o tena galuega ke fakamaina atu te mainaga o te talaiga o te Malo, ne maua ei ne ia ana soko e tokofa. Ne faima‵laga muamua latou fakatasi mo ia kae ne toe ‵foki atu latou ki te lotou pisinisi faiika i te taimi ne ‵foki atu ei latou mo Iesu mai i Iutaia. I konā loa kāti ne ‵sala aka ne Iesu a latou me ko te taimi tenā ne ‵tau ei o maua ne ia a tino fesoasoani tumau kolā e mafai o fakaakoako ne ia ke fai ne latou te galuega māfai ko galo atu a ia.
Tela la, i te taimi ne sasale atu ei a Iesu i te matāfaga kae ne matea atu ne ia a Simona Petelu mo ana taugasoa e ‵fulu olotou tili, ne fanatu eiloa a ia ki a latou. Ne sopo a ia i te pōti o Petelu kae ne fakamolemole atu ki a ia ke na usu malie atu te pōti ki tai. Ko tai ‵mao malie latou, kae ne sagasaga a Iesu ki lalo i te pōti kae ne kamata o akoako atu ki te vaitino i te tafātai.
Fakamuli ifo, ne fai atu a Iesu penei ki a Petelu: “Ke na usu atu te pōti ke tai ‵mao atu ki te koga ‵poko, kae ke ‵pei ifo otou tili ko te mea ke maua ne otou ika.”
Muna a Petelu: “Te Faiakoga, ne logofio‵fio eiloa matou i te po, e seai eiloa se ika ne maua ne matou; kae ona ko tau pati, ka ‵pei ifo ei ne au a tili.”
I te peiifoga o tili, ne kamata o masae‵sae olotou tili ona ko te uke o ika ne maua i ei. Ne tālo fakavave atu latou ki olotou taugasoa katoa i te suā pōti telā ne pili atu ke na o‵mai o fesoasoani atu ki a latou. Ne seki leva kae ko ‵fonu te avā pōti konā ona ko te uke o ika kae ne kamata ei o a‵pulu ki lalo. I te mateaga ne ia o te mea tenā, ne totuli ifo a Petelu i mua o Iesu, ana muna: “Te Aliki, fano keatea mai i a au, me i a au se tagata agasala.”
“Sa mataku,” ko te tali a Iesu. “Mai i te taimi nei o fano ki mua ka faiika koe ki tāgata ola.”
Ne ‵kami mai foki ne Iesu te taina o Petelu ko Anitelea. Ne fakamalosi atu a ia penei ki a laua: “O‵mai ‵tou olo, ke fakaakoako ne au koulua ke fai mo tino faiika ki tino.” Ne tuku atu foki te ‵kamiga tenā ki lā taugasoa faiika ko Iakopo mo Ioane ko tama‵liki tāgata a Sepetaio, kae ne talia foki ne laua te ‵kamiga e aunoa mo se fakalotolotolua. Tela la, ne tiakina ne te tokofa konei te lotou pisinisi faiika kae ne fai latou mo fai ne soko e tokofa kolā ne maua ne Iesu i te kamataga ke fai mo fai ne ana soko tumau. Luka 5:1-11; Mataio 4:13-22; Maleko 1:16-20; Isaia 9:1, 2.
▪ Kaia ne kalaga atu ei a Iesu ki ana soko ke tau‵tali mai ki a ia, kae ko oi a latou konā?
▪ Se a te vavega telā ne mataku Petelu i ei?
▪ Se a te vaegā faiva telā ne ‵kami ne Iesu ana soko ke ‵kau atu ki ei?