Ne Fai a Soko e Tokofa mo Fai ne Tino Faiika ki Tino

Mai tua ifo o te taumafaiga a tino Nasaleta ke tamate a Iesu, ne fanatu a ia ki te fa‵kai ko Kapanaumi, i tafa o te Tai o Kalilaia telā e taku foki ki “te namo o Kenesaleta.” (Luka 5:1) Ne fakataunu mai i ei a te valoaga i te tusi o Isaia me i tino Kalilaia kolā e ‵nofo i tafa o te tai, ka matea atu ne latou se mainaga lasi.—Isaia 9:1, 2.

Ao, ne tumau eiloa a Iesu i Kalilaia o faka‵pula atu “me ko pili mai te Malo o te lagi.” (Mataio 4:17) Ne maua ei ne Iesu ana soko e tokofa. Ne faima‵laga muamua fakatasi latou, kae ne toe ‵foki atu latou ki te lotou pisinisi faiika i te taimi ne ‵foki atu ei latou mo Iesu mai i Iuta. (Ioane 1:35-42) Tenei eiloa te taimi ko ‵tau ei o ‵nofo fakatasi faeloa mo Iesu ko te mea ke mafai ne ia o fakaakoako latou ke fai te galuega māfai ko galo atu a ia.

I te taimi ne sasale atu ei a Iesu i te matafaga, ne matea atu ne ia a Simona Petelu, tena taina ko Anitelea, mo nisi taugasoa o lāua, e faite olotou tili. Ne fanatu a Iesu ki a latou, sopo atu ki te poti o Petelu, kae ne fakamolemole atu ki a ia ke ūsu malie atu te poti ki tai. I te taimi ko tai ‵mao malie latou, ne sagasaga ifo ki lalo a Iesu kae kamata o akoako atu a muna‵tonu e uiga ki te Malo, ki te vaitino i te tafātai kolā ne ‵nofo atu i te matafaga.

Fakamuli ifo, ne fai atu a Iesu ki a Petelu: “Usu atu ki te koga ‵poko, ko tuku ifo ei otou tili ke maua ne otou ika.” Ne tali atu Petelu: “Te Faiakoga, ne logofiofio eiloa matou i te po kātoa kae seai eiloa se ika ne maua, kae ona ko au pati ka ‵pei ifo eiloa ne au ki lalo a tili.”—Luka 5:4, 5.

Ne ‵pei ifo ne latou a tili, ne kamata o masae‵sae olotou tili ona ko te uke o ika ne maua i ei! Ne tālo fakavave atu latou ki olotou taugasoa i te suā poti telā ne pili atu, ke ‵mai o fesoasoani atu ki a latou. Ne seki leva kae ‵fonu te avā poti konā ona ko te uke o ika kae ne kamata ei o pulu ki lalo. I te mateaga ne ia o te mea tenā, ne totuli ifo a Petelu i mua o Iesu kae fai atu: “Te Aliki, fano keatea mai i a au, i a au se tino agasala.” Ne tali atu a Iesu: “Sa mataku. Mai te taimi tenei o fano ki mua, ka faiika eiloa koe ki tino ola.”—Luka 5:8, 10.

Ne fai atu a Iesu ki a Petelu mo Anitelea: “Tau‵tali mai i a au kae ka fai ne au koulua ke fai mo tino faiika ki tino.” (Mataio 4:19) Ne aofia ne ia a nisi tāgata faiika e tokolua, ko Iakopo mo Ioane, ko tama‵liki tāgata a Sepetaio. Ne talia fakavave foki ne lāua a te ‵kamiga tenā e aunoa mo te fakatalave. Tela la, ne tiakina ne te tokofa konei te lotou pisinisi faiika kae fai latou mo fai a soko tumau muamua e tokofa o Iesu.