Mataupu e 25

Te Alofa ki te Tino Lepela

ITE asiatuga a Iesu mo ana soko e tokofa ki fa‵kai i Kalilaia, ne salalau valevale a tala e uiga ki mea fakaofoofogia kolā ne fai ne ia i kogā koga katoa i konā. Ne oko atu te tala e uiga ki ana faifaiga i te fa‵kai e tasi telā ne nofo i ei se tagata ne maua ne ia te masaki ko te lepela. Ne fakamatala mai ne te tokitā ko Luka me ne “soko tena foitino i te lepela.” Kafai ko lasi te masaki fakamataku tenā, e gasolosolo malie eiloa tena fakamaseiga ki vaega kese‵kese o te foitino. Tela la, ko oko eiloa i te fakaalofa o te lepela tenā.

I te okoatuga a Iesu ki te fa‵kai tenā, ne fanatu ei te lepela ki a ia. E pelā mo te tulafono a te Atua, e ‵tau o kalaga atu te lepela ki tino katoa ke fakaeteete, penei: “E se ‵mā, e se ‵mā!” ke puipui i ei a nisi tino ke mo a ma fakapili‵pili atu ki a ia kae ‵pisi foki i ei. Ne punou ifo ki lalo te lepela tenā kae ne akai atu penei ki a Iesu: “Te Aliki, kafai e loto koe ki ei, e mafai ne koe o faka‵mā mai au.”

E pefea te lasi o te fakatuanaki o te tagata tenā ki a Iesu! Kae e pefea foki te fakaa‵lofa o ana foliga ona ko te masaki tenā! Ne a mea ne fai ne Iesu? Mafaufau la, moifai ko koe tenā, ne a au mea ka fai? Ona ko tena alofa, ne ‵kapa atu te lima o Iesu kae ne fakapatele atu ki te tagata tenā, ana muna: “Au e loto ki ei, ke ‵mā koe.” Kae i konā eiloa ne galo fakavave atu ei te lepela mai i a ia.

E mata, e manako koe ki se tino alofa penā ke fai mo fai tou tupu? A faifaiga a Iesu ki te lepela tenā e fakatalitonu mai ki a tatou me i Tena pulega i te Malo, ka fakataunu mai i ei te valoaga tenei i te Tusi Tapu: “E alofa a ia ki tino vāi‵vāi mo tino ma‵tiva; e fakasao foki ne ia olotou ola.” E tonu, i konā loa ka fakataunu ei ne Iesu te mea telā e loto a ia ki ei ke fesoasoani atu ki tino fakaa‵lofa katoa.

A koi tuai o faka‵lei ne Iesu te lepela tenā, ne ua‵te valevale a tino ona ko te galuega a Iesu. I te fakataunuga o te valoaga a Isaia, ne fakatonu atu ei ne Iesu te tagata telā ko ‵lei: “Sa faipati ne koe te mea nei ki se tino.” Kae i konā loa ne fakatonu atu a ia penei ki te tagata tenā: “Fano nei eiloa ki te faitaulaga ke onoono ki a koe kae ke tuku atu foki tau taulaga, e pelā eiloa mo te fakatonuga a Mose, e fakatalitonu aka ei ki tino katoa me i a koe ko ‵lei, ko se lepela.”

Kae ona ko te lasi o te fiafia o te tagata tenā ne seki mafai ne ia o taofi te tala e uiga ki te vavega. Ne fanatu a ia kae ne fakasalalau atu ne ia te tala tenā ki kogā koga katoa, kae kāti ona ko te fiafia mo te fia suke‵suke o tino ki te tala tenā, ne seki mafai ei o toe fanatu a Iesu ki loto i se fa‵kai. Tela la, ne nofo atu a Iesu i koga ‵mao kolā e seai ne tino i ei, ako tino mai kogā koga katoa ne olo atu o fakalogo‵logo ki a ia kae ke faka‵lei foki olotou masaki. Luka 5:12-16; Maleko 1:40-45; Mataio 8:2-4; Levitiko 13:45; 14:10-13; Salamo 72:13; Isaia 42:1, 2.

▪ Ne a mea e ‵tupu māfai e lepela se tino, kae se a te faka‵pulaga telā ne ‵tau o fai atu ne te lepela?

▪ Ne fakamolemole atu pefea te lepela ki a Iesu, kae ne a mea e iloa ne tatou mai i te tali a Iesu?

▪ Ne seki fakalogo pefea ki a Iesu a te tino telā ne faka‵lei tena masaki, kae ne a mea ne ‵tupu i ei?