Mataupu e 92

Te Faka‵leiga o Lepela e Tokosefulu i te ‵Toe Malaga a Iesu ki Ielusalema

NE FAKAMAVALE ne Iesu a taumafaiga a te Sanetulini ke tamate a ia, me ne tiakina ne ia Ielusalema kae ne faimalaga atu ki te fa‵kai ko Efalaima, kāti e 15 maila tena ‵mao i te feitu ki mātū saegāla o Ielusalema. Ne ‵nofo a ia i konā fakatasi mo ana soko, ke ‵mao atu mai ana fili.

Ko pili o oko atu ki te taimi o te Paseka i te 33 T.A., ne seki leva kae ne toe kamata o faimalaga atu a Iesu. Ne ui atu a ia i Samalia i tena malaga ki Kalilaia. Tenei te ‵toe āsiga ne fai ne ia ki te koga tenā a koi tuai o mate a ia. A koi nofo a ia i Kalilaia, kāti ne ‵kau atu a ia mo ana soko ki tino kolā ne olo atu ki Ielusalema o fakamanatu ki te Paseka. Ne olo atu latou i te auala i te fenua ko Pelea, i te feitu ki Saegāla o te Vaitafe o Iolitana.

I te kamataga o te malaga tenā, ne ulu atu ei a Iesu ki se fa‵kai i Samalia io me i Kalilaia, kae ne fetaui a ia mo tāgata e toko­sefulu kolā e lepela. A te masaki fakamataku tenā e fai ei ke gasolo o ‵pala a vaega o te foitino o te tino​—⁠ko ana lima, ana vae, ana taliga, tena isu, mo ana laugutu. Ke puipui a nisi tino ke mo a ma ‵poko i ei, ne fakatonu atu penei te Tulafono a te Atua ki te tino lepela: “E ‵tau o ufi te feitu ki lalo o ana mata kae kalaga atu a ia penei: ‘Sē ‵mā! Sē ‵mā!’ A ia e se ‵mā eiloa i aso e nofo ei a te masaki tenā i a ia, kae e ‵tau a ia o nofo i tua o te fa‵kai, keatea mai tino.”

Ne faka‵logo a lepela e tokosefulu konā ki fakatonuga a te Tulafono e uiga ki tino lepela kae ne ‵tu ‵mao latou mai i a Iesu. Kae ne paka‵laga malosi atu latou penei: “Iesu e te Aliki, a koe ke alofa mai ki a matou!”

Ne kilo atu a Iesu ki a latou e ‵tu ‵mao mai, kae ne fakatonu atu a ia penei: “Olo o fakaasi atu koutou ki faitaulaga.” Ne fai ne Iesu ana pati konā me e talia ne te Tulafono a te Atua ke faka‵pula atu ne faitaulaga me ko ‵lei a lepela kolā ne ma‵saki. Ona ko te faiga tenā ne talia ei a tino konā ke toe ‵nofo fakatasi mo tino ma‵losi.

Ne tali‵tonu eiloa a lepela e tokosefulu konā ki te malosi fakavavega o Iesu. Tela la, ne olo fakavave atu latou ki faitaulaga, faitalia me koi tuai o faka‵lei latou. A koi olo atu latou, kae ne taui atu ki te lotou fakatuanaki ki a Iesu. Ne kamata o matea atu kae lagona foki ne latou me ko toe ma‵losi latou!

Ne olo atu eiloa a lepela e tokoiva kolā ne faka‵māgina, kae ko te suā lepela, se tino Samalia, ne toe foki atu o ‵sala a Iesu. Kaia? Ona ko tena loto fakafetai e uiga mō mea kolā ne ‵tupu ki a ia. Ne ‵viki atu a ia ki te Atua i se leo lasi, kae i te taimi ne maua ei ne ia a Iesu, ne fakasiga ifo a ia ki ana vae, kae ne fakafetai atu eiloa ki a ia.

Ne tali atu a Iesu penei: “E tokosefulu a tino ne faka‵lei olotou lepela: Kofea la te tokoiva? Kaia ne vau tokotasi ei te tino o fenua fakaatea o fakafetai ki te Atua?”

I konā loa ne fai atu a ia ki te tino Samalia: “Tu ki luga kae fano; ona ko tou fakatuanaki ko ‵lei ei koe.”

Kafai e fai‵tau tatou ki te tala e uiga ki te faka‵leiga ne Iesu o lepela e tokosefulu, e ‵tau o ‵teu aka ne tatou i ‵tou loto a te akoakoga telā e maua mai i tena fesili tenei: “Kofea la te tokoiva?” Ne ‵se ‵ki eiloa a tāgata e tokoiva konā me ne seki loto fakafetai latou. E mata, ka amio tatou pelā mo te tino Samalia, kae fakafetai atu tatou e uiga ki mea kolā e maua ne tatou mai te Atua, e aofia foki i ei te folafolaga mautinoa e uiga ki te ola se-gata-mai i te lalolagi fou kae amiotonu a te Atua? Ioane 11:54, 55; Luka 17:11-19; Levitiko 13:16, 17, 45, 46; Fakaasiga 21:3, 4.

▪ Ne fakamavale pefea ne Iesu a taumafaiga ke ta­mate a ia?

▪ Tefea te koga ne toe faimalaga atu a Iesu ki ei, kae tefea te koga ne fia fanatu a ia ki ei?

▪ Kaia ne ‵tu ‵mao mai ei a lepela, kae kaia ne faka­tonu atu ei a Iesu ki a latou ke olo atu ki faitaulaga?

▪ Se a te akoakoga aogā e maua ne tatou mai te tala tenei?