Mataupu e 29
Te Faiga o Galuega ‵Lei i te Sapati
KO TE kamataga o te tausaga ko te 31 T.A. Ko ‵teka atu ne nāi masina talu mai te taimi ne faipati ei a Iesu ki te fafine i te vai i Samalia i tena auala mai Iutaia ki Kalilaia.
I konā, ko oti ne akoako atu a Iesu i kogā koga katoa i Kalilaia, kae ne toe fanatu foki a ia ki Iutaia, telā ne talai atu ei a ia i se sunako i konā. Kafai e faka‵tusa te uke o fakamatalaga i te Tusi Tapu e uiga ki tena galuega i Kalilaia, e se uke a tala e maua e uiga ki te galuega a Iesu i Iutaia i te āsiga tenā penā foki loa mo masina kolā ne nofo ei a ia i konā mai tua ifo o te Paseka ko teka. Kāti seki talia ‵lei ne tino Iutaia tena galuega e pelā mo tino i Kalilaia.
Ne seki leva kae ne fanatu eiloa a Iesu i tena auala ki te ‵toe fa‵kai lauiloa o Iutaia, ko Ielusalema, ke fakamanatu i ei te Paseka i te 31 T.A. I konā loa i tafa o te Mataloa Mamoe o te fa‵kai, ne tu mai i ei te vai koukou ko Petesa, kae ne olo atu ki ei a tino ma‵saki e tokouke, tino ‵kivi, penā foki mo tino ‵pili. Ne tali‵tonu latou me e mafai o faka‵lei a masaki o tino māfai ko olo atu ki te vai tenā i te taimi ko ‵lepu ei te vai.
Ko te Sapati tenā, kae matea atu ne Iesu se tagata i te vai koukou tenā ne masaki i tausaga e 38. Me ne iloa ne Iesu te leva o te masaki o te tagata tenā, ne fesili atu a ia penei: “E fia ‵lei tou masaki?”
Ne tali atu a ia penei ki a Iesu: “Te Aliki, e seai eiloa se tino e tuku ifo ne ia au ki te vai mafai ko ‵lepu, ka koi fanaifo au, kae ko mua atu te suā tino i a au.”
Muna a Iesu ki a ia: “Tu ki luga, puke tou moega kae fano.” I konā loa ne toe malosi te foitino o te tagata tenā, ne puke ne ia tena moega, kae ne sasale atu!
I te taimi ne matea atu ei ne te kau Iutaia te tagata tenā, ne fai atu latou penei: “Ko te Sapati tenei, e se ‵tau la mo koe o ave tou moega.”
Ne tali atu penei te tagata ki a latou: “A te tagata telā ne faka‵lei ne ia toku masaki, ne fai mai ki a au, ‘Puke tou moega kae fano.’”
Ne fesili atu latou penei: “Ko oi te tino ne fai atu ki a koe ke puke tou moega kae fano?” Ko oti ne fano keatea a Iesu ona ko te tokouke o tino, kae ko te tagata telā ne faka‵lei tena masaki e se iloa ne ia te igoa o Iesu. Kae fakamuli ifo, ne fetaui a Iesu mo te tagata tenā i te faletapu, telā ne iloa ei ne te tagata tenā me ko oi ne faka‵lei ne ia a ia.
Tela la, ne ‵sala aka ne te tagata telā ne faka‵lei tena masaki a te kau Iutaia ke taku atu ki a latou me ko Iesu telā ne faka‵lei tena masaki. I te taimi ne ‵logo ei latou i te mea tenā, ne olo atu ei te kau Iutaia ki a Iesu. Se a te pogai? Ke iloa ne latou te auala e mafai ei ne ia o fai a vaegā mea fakaofoofogia konā? Ikai. Kae ke ‵losi atu ki a ia ona ko te mea ne fai ne ia a mea ‵lei i te Sapati. Kae ne kamata ei latou o fakasauā atu ki a ia! Luka 4:44; Ioane 5:1-16.
▪ Ne pefea te leva talu mai te taimi ne āsi atu ei a Iesu ki Iutaia?
▪ Kaia ne fia‵fia ei a tino o olo atu ki te vai koukou ko Petesa?
▪ Se a te vavega telā ne fai ne Iesu i te vai koukou tenā, kae ne a mea ne fai ne te kau Iutaia?