Mataupu e 32

Ne a Mea e Saoloto i te Sapati?

I TE suā Sapati ne āsi atu ei a Iesu ki te fale tapuaki i tafa o te Namo o Kalilaia. Ne nofo i konā se tagata e piko tena lima fakaatamai. Ne alamati faiakoga o te Tulafono mo te kau Falesaio me ka faka‵lei ne Iesu te tagata tenā. Oti aka loa ne fesili atu latou ki a ia: “E mata, e taga o faka‵lei masaki i te Sapati?”

Ne tali‵tonu a takitaki lotu Iutaia me e saoloto fua ma faka‵lei a ma‵saki i te Sapati māfai e mafai o iku te masaki tenā ki te mate o te tino. Pelā mo te lotou akoakoga, e tapu ma faka‵tonu se ivi ne fati io me ke fai se litaga mō tamā pa‵kiaga i te Sapati. Tela la, ne fesili atu penei faiakoga o te Tulafono mo te kau Falesaio ko te mea ke maua ne latou se mea e ‵se ei a ia.

Kae ne iloa ‵lei ne Iesu olotou mafaufauga. Kae ne iloa foki ne ia me ne talia ne latou se manatu sē ‵lei telā e se maua i te Tusi Tapu, e uiga ki mea kolā e se ‵tau o fai ona ko te Tulafono ne fakatapu ei a galuega i te Sapati. Tela la, ne fakatoka eiloa a Iesu o fe‵paki mo latou me ne fakatonu atu a ia ki te tagata telā ne piko tena lima: “Tu ki luga, vau ki mua nei.”

Kae ne fuli atu a Iesu ki faiakoga o te Tulafono mo te kau Falesaio, ana muna: “Ko oi te tagata i a koutou nā, kafai ko to tena mamoe e tasi ki te lua i te Sapati, e se puke ki ei kae ­avaka ki luga?” Me e lasi te ‵togi o se mamoe, e se mafai ei o tiakina ne latou te mamoe i te lua ke oko ki te suā aso, mana masaki te mamoe io me mana sē ‵lei te ‵togi e maua i ei. Kae e fai mai foki te Tusi Tapu: “E tausi faka‵lei ne te tino amiotonu a te ola o tena manu fagai.”

Ne fai ne Iesu se fakatusaga ki ei kae ne toe fai atu penei: “Kafai e mafaufau ki mea katoa konā, e pefea te sili atu o te tāua o te tagata i lō te mamoe! Tela la, e saoloto te faiga o galuega ‵lei i te Sapati.” Ne ma‵vale a takitaki lotu konā, me ne seki mafai o fakafiti ne latou te fakamatalaga ‵lei kae alofa tenā.

Ne ita Iesu, kae ne fanoanoa foki i te lotou va‵lea mo te lotou loto ma‵keke, kae ne kilo atu a ia ki a latou. Ne fai atu ei a ia ki te tagata: “‵Fola mai tou lima.” Kae ne ‵fola atu ne ia tena lima ko te mea eiloa ko ‵lei.

I lō te fia‵fia me ko toe ‵lei te lima o te tagata tenā, ne olo atu te kau Falesaio kae ne fai fakavave olotou aofaga mo te ­potukau sā Helota ke tamate ne latou a Iesu. E foliga mai me ne aofia i te potukau fakapolitiki tenā a nisi tino failotu ko ­Satukaio. Kae ne seki fealofani sale te potukau fakapolitiki tenā mo te kau Falesaio, kae ne ‵kau fakatasi eiloa latou i te lotou ‵teke atu ki a Iesu. Mataio 12:9-14; Maleko 3:1-6; Luka 6:6-11; Faataoto 12:10; Esoto 20:8-10.

▪ Ne fe‵paki tonu pefea a Iesu mo takitaki lotu ­Iutaia?

▪ Se a te talitonuga o takitaki lotu Iutaia e uiga ki te faka‵leiga o masaki i te Sapati?

▪ Se a te tala fakatusa telā ne fakaaogā ne Iesu ke ‵teke atu ki olotou manatu ‵se?