Mataupu e 44
Ne Fakamalū te Afā Fakamataku
E UKE a mea ne fai ne Iesu i te aso tenā, e aofia i ei tena akoako atu ki tino e tokouke i te matāfaga kae fakamuli ifo ne fakamatala atu ne ia ki ana soko, i a latou eiloa, a te uiga o ana tala fakatusa. Ko oko mai te po, kae ne fai atu ei a ia: “Tou olo ki te suā feitu o te namo.”
I te feitu ki saegāla o te Namo o Kalilaia e tu ei te kogā laukele ko Tekapoli, telā e taku faka-Eleni ko deʹka, ko tena uiga “e sefulu,” mo poʹlis, ko tena uiga ko “fa‵kai.” A fa‵kai o Tekapoli ne fai mo fai se laumua o te poto faka-Eleni. Kae kāti e se taumate, e tokouke a tino Iutaia ne ‵nofo foki i ei. Kae e se uke a mea ne fai ne Iesu i konā. Ke oko foki ki te āsiga tenei, e pelā mo mea ka matea ne tatou, ne seki mafai o nofo leva Iesu i ei.
I te faiatuga a Iesu ke olo atu latou ki te suā feitu, ne ave ne ana soko a ia i te pōti. Kae ne iloa ne nisi tino i a latou ka olo. E se leva, kae ko ‵sopo foki a nisi tino ki olotou pōti ke olo fakatasi mo latou. E se na lo ko ‵mao foki te koga e olo latou ki ei. A te Namo o Kalilaia se namo lasi telā e 13 maila tena loa kae e 7 1/2 maila tena lauefa.
E iloa tonu me ne ‵tau o fi‵ta malosi Iesu. Tela la, ne fatoā kamata o olo atu latou, kae ne takato a ia ki lalo i te taumuli, ne aluga tena ulu ki te aluga, kae ne to eiloa tena moe. A nisi apositolo ne fai pelā me ne tautai, me ne faiika sāle latou i te Namo o Kalilaia. Tela la, ne ‵saga faka‵lei latou ki te faiga o te malaga.
E se se malaga faigofie. Ona ko te ea ‵vela i luga i te namo, telā e tu i te 700 futu mai lalo ifo i te maluga masani o te tai, mo te ea ‵moko malosi mai mauga i tafa i ei, i nisi taimi e agi fakafuasei mai i ei a matagi ma‵losi, kae e agi mai foki i ei afā ‵lasi i te namo tenā. Tenā loa te mea ne tupu. E se leva kae ko ‵fati a galu ki luga i te pōti kae ‵fati foki ki loto i ei, toeitiiti ko pulu te poti. Kae e moe eiloa a Iesu!
Ne taumafai malosi a tautai apo konā o uliuli faka‵lei ne latou te pōti. Kāti e se taumate ko oti ne ‵sao latou i nisi afā. Kae ko palele eiloa olotou malosi i te taimi tenā. Ne ‵fagu ne latou a Iesu, me ne ma‵taku i a latou ma ‵mate. Ne ka‵laga atu latou penei: ‘Te Aliki, e se manavase koe? Ko pili o pulu te pōti! Fesoasoani mai, me ka ma‵lemu tatou!’
Ne ala aka Iesu, kae ne fakatonu atu penei ki te matagi mo te tai: ‘Filemu! Ke ‵noga!’ Kae ne ‵noga eiloa te matagi kae ko se sou foki te tai. Ne fuli atu a ia ki ana soko kae ne fesili atu penei: ‘Kaia e ma‵taku ei koutou? E mata, koi tuai o maua ne koutou se fakatuanaki?’
I konā loa, ne ma‵taku ‵ki eiloa te kau soko. Ne fakatau fesili atu latou penei: ‘Ko oi te tagata tenei? Me e fakatonu atu foki a ia ki te matagi mo te tai, kae ne faka‵logo foki ki a ia.’
E pefea te lasi o te malosi ne fakaasi mai ne Iesu! E pefea te gali ke iloa ne tatou me e mafai ne te ‵tou Tupu o pule ki luga i malosi o te lalolagi kae kafai ko saga tonu mai a ia ki te lalolagi i te taimi o tena pulega i te Malo, ka ‵nofo a tino katoa i te tokagamalie e aunoa mo ne mea fakama‵taku!
Ko ‵noga te matagi, kae ne oko atu Iesu mo ana soko ki te feitu ki saegāla o te namo. Kāti ne ‵sao a nisi pōti i te malosi o te matagi tenā kae ne toe ‵foki atu ki olotou fa‵kai. Maleko 4:35–5:1; Mataio 8:18, 23-27; Luka 8:22-26.
▪ Se a te uiga o Tekapoli, kae ne ‵tu i fea a fa‵kai konā?
▪ Ne a mea i te fenua tenā e fai ei ke agi mai sāle a afā i te Namo o Kalilaia?
▪ E se mafai o ‵sao te kau soko i olotou ata‵mai e pelā me ne tautai, kae ne a olotou mea ne fai?