Ne Kasa te Vaka i se Fenua

KILOKE! Ko tupu se fakalavelave ki te vaka! Ko maofa valevale! E lavea ne koe a tino kolā ko oti ne eva ki tai? Nisi tino ko oti ne oko atu ki te matāfaga. E mata, ko Paulo tenā e nofo atu i konā? Ke onoono aka tatou me ne a mea ne ‵tupu ki a ia.

Masaua, me ne taofi aka a Paulo mō tausaga e lua e pelā me se pagota i Kaisaleia. Oti aka ne tuku atu ei a ia mo nisi pagota ki se vaka, kae ne kamata te lotou malaga ki Loma. I te taimi ne olo atu ei latou i tafa o te fenua ko Keleta, ne poko atu se matagi malosi ‵ki ki a latou. Ne agi malosi a te matagi telā ne seki mafai ei o uliuli ne tāgata a te vaka. Kae ne seki mafai o lavea ne latou a te la i te ao io me ko fetu i te po. Fakamuli loa, mai tua o aso e uke, ne galo i a latou katoa i luga i te vaka so se fakamoemoega me ka ‵sao latou.

Telā ne tu aka a Paulo ki luga, ana muna: ‘E seai se tino e tokotasi i a koutou ka mate; ko te vaka fua ka galo. Me i te po o te aso anafi ne vau ei se agelu a te Atua ki a au kae fai mai, “Sa mataku, e Paulo! E ‵tau o tu atu koe i mua o te pule o Loma ko Kaisala. Kae ka fakasao ne te Atua a tino katoa kolā e faima‵laga tasi mo koe.”’

Kāti ko te valuāpo i te 14 o aso mai tua o te kamataga o te matagi, ne lavea atu ne kauvaka me ko gasolo o se ‵poko a te tai! Ona ko te ma‵taku i te mea ma poko‵poko latou ki fatu i te po, ne ‵pei ne latou olotou taula. I te taeao ne lavea ne latou se maofega o te fenua mo tena kauone. Ne fakaiku aka ne latou ke taumafai o fakatele atu te vaka ki uta i te matāfaga.

Ia, i te taimi ko pilipili atu ei latou ki te matāfaga, ne poko atu a te vaka ki se kauone telā ne kasa eiloa i ei. Telā ne kamata ei o fati atu a galu ki ei, kae ne kamata o maofa valevale te vaka. Ne fai atu a te ofisa pule o kautau: ‘A koutou katoa kolā e iloa o ‵kau ke na eva atu muamua ki tai kae ‵kau atu ki uta. A te ‵toega o koutou ke olo atu i tua o latou, kae ke puke ne mea mai te vaka ke taofi koutou ki ei.’ Kae tenā eiloa te mea ne fai ne latou. I te auala tenei a te toko 276 o tino kolā ne ‵nofo i te vaka ne oko atu katoa eiloa mo te saogalēmū ki te matāfaga, e pelā eiloa mo te folafolaga a te agelu.

A te fenua ko Melita. Ne atafai atu a tino i konā, kae ne tausi faka‵lei ne latou a tino mai te vaka. I te taimi ne ‵lei ei a te tau o te aso, ne ave a Paulo ki te suā vaka kae avatu ki Loma.