Mataupu e 55

Ne Seki Toe Tau‵tali Atu a Soko e Tokouke ki a Iesu

NE AKOAKO atu a Iesu i te sunako i Kapanaumi e uiga ki tena tulaga e pelā me ko te falaoa tonu mai te lagi. Kāti ne ‵soko atu tena fakamatalaga ki te sautalaga telā ne fai mo tino i te taimi ne maua ei ne latou a ia i te lotou ‵fokimaiga mai te feitu ki saegāla o te Namo o Kalilaia, ko te koga telā ne ‵kai ei latou ki falaoa mo ika kolā ne tuku fakavavega atu ki a latou.

Ne toe fakaopoopo atu ne Iesu a pati konei: “Kae ko te falaoa ka avatu ne au, ko toku foitino; ka avatu ne au ke maua ne tino te ola se gata mai.” I te lua tausaga mai mua atu i ei, i te taimi ne ‵somo aka ei a lakau i te 30 T.A., ne fai atu ei a Iesu ki a Niko­temo me ona ko te alofa o te Atua ne tuku mai ei ne ia tena Tama e pelā me ko te Fakaola. Tela la, i konā loa ne fakaasi atu ei ne Iesu me i so se tino i te lalolagi nei telā e kai ki tena foitino i se auala fakatusa, mai te fakatuanaki ki te taulaga telā ko pili o fai ne ia, ka maua ne ia te ola se-gata-mai.

Kae ne ita a tino konā i pati a Iesu: “E mafai pefea ne te tagata tenei o aumai tena foitino ki a tatou, ke ‵kai tatou ki ei?” ko te lotou fesili. Ne manako a Iesu ke maina ana soko me e kai fua ki tena foitino i se auala fakatusa. Tela la, ke faka‵mafa te manatu tenā, ne taku atu ei ne ia se mea telā e sili atu i te fakatakalialia māfai e fai te mea tenā i se auala tonu.

Muna a Iesu: “Kafai e se ‵kai koutou ki te foitino o te Tama a te Tagata, kae e se inu foki koutou ki toku toto, e se maua ne koutou te ola se gata mai. Ko te tino e kai ki toku foitino, kae inu ki toku toto, ka maua ne ia te ola se gata mai; kae ka fakatu ne au a ia i te aso fakaoti. Me i toku foitino se meakai tonu eiloa, ko toku toto foki se mea inu tonu eiloa. Ko te tino e kai ki toku foitino kae inu ki toku toto, e tumau te tino tenā i a au, e pelā foki au i a ia.”

E tonu, se mea fakatakalialia māfai ne ­fakauiga a akoakoga a Iesu me e ‵tau o fai se tino mo fai se tino kaitino. Kae ko te tonuga loa, ne seki fakamalosi atu a Iesu ki tino ke ‵kai latou ki se foitino tonu io me ke inu ki toto tonu. Ne faka‵mafa mai fua ne ia i ei me i tino katoa kolā e fia maua ne latou te ola se-gata-mai e ‵tau eiloa o fakatuanaki ki tena taulaga telā ka fai ne ia māfai ko tuku atu ne ia tena foitino ‵lei katoatoa kae ko ligi ifo tena toto ola. Kae ke oko eiloa ki nisi tino i ana soko, ne seki taumafai eiloa latou o malamalama i tena akoakoga, kae ne ‵teke atu latou penei: “Se muna faigata tenā; ko oi te tino e mafai o fakalogo ki ei?”

Me ne iloa ne Iesu i ana soko e tokouke ko mui‵mui, ne fai atu a ia penei: “E masei te mea tenei ki a koutou? E pefea la manafai e lavea ne koutou te Tama a te Tagata e fanake ki luga, ki te koga telā ne nofo i ei a ia taumua? . . . A muna ne faipati atu ne au ki a koutou, ko te agaga mo te ola a mea konā. Kae ko nisi tino i a koutou e se tali‵tonu eiloa.”

Ne toe fai atu penei a Iesu: “Tenā te mea ne fai atu ei au ki a koutou, me e seai se tino e mafai o vau ki a au, seiloga ko talia a ia ne te Tamana.” I konā loa, ne olo atu ei a nisi tino e tokouke i ana soko kae ne seki toe tau‵tali atu latou ki a ia. Telā ne fuli atu ei a Iesu ki ana apositolo e toko 12 kae ne fesili atu penei: “Kae pefea koutou, e fia olo foki koutou keatea?”

Ne tali atu a Petelu penei: “Te Aliki, ko oi te tino ka olo matou ki ei? A muna o te ola se-gata-mai e nofo mo koe. Ko tali‵tonu matou, kae ko iloa foki ne matou i a koe ko te Tama Tapu a te Atua.” Ko tafaga la te gali o te fakaasimaiga tenā o te alofa fakamaoni, faitalia me ne seki maina katoatoa a Petelu mo nisi apositolo i akoakoga a Iesu e uiga ki te mataupu tenei!

E tiga eiloa ne fiafia a Iesu i te tali a Petelu, ne fai atu a ia penei: “Ne seki filifili ne au koutou te tinogafulu mo te tokolua? Kae ko te tokotasi o koutou se tiapolo.” Ne faipati a ia e uiga ki a Iuta te Isikaliota. Kāti ne matea atu ne Iesu i konā me i a Iuta ko “kamata” o fai se amioga ‵se.

Ne fatoā fakama‵vale ne Iesu a tino i olotou taumafaiga ke fai a ia mo fai te tupu, kae kāti ko ma‵natu aka latou penei, ‘E mafai pefea o fai te tagata tenei mo fai te Mesia me e se talia ne ia te tulaga tonu o te Mesia?’ Kāti tenā foki loa te suā mea ne mafaufau ‵loto a tino ki ei i te taimi tenā. Ioane 6:51-71; 3:16.

▪ E tuku atu ne Iesu tena foitino ki a ai, kae e “‵kai” pefea latou ki ‘tena foitino’?

▪ Ne a nisi pati a Iesu ne faka‵poi atu ki tino, kae ne a mea ne faka‵mafa ne ia i ei?

▪ I te taimi ne seki toe tau‵tali atu ei a tino e tokouke ki a Iesu, ne a mea ne fai ne Petelu?