Ne ‵Poi a Tino e Tokouke i Pati a Iesu

Ne akoako atu a Iesu i te sunako i Kapanaumi me i a ia ko te falaoa tonu mai te lagi. Kāti ne toe fai tena fakamatalaga tenā ki tino kolā ne ‵foki atu mai te feitu ki saegala o te Tai o Kalilaia, kolā ne ‵kai i falaoa mo ika ne maua atu i konā.

Ne faka‵soko atu ne Iesu te sau‵talaga: “Ne ‵kai otou tupuga ki te manai i te koga lavaki kae e ui i ei ne ‵mate eiloa latou.” E ‵kese mai i a latou, ne fai atu a ia: “Au ko te falaoa o te ola telā ne fanaifo mai te lagi. So se tino e kai ki te falaoa tenei ka ola ki te se-gata-mai; kae e tonu eiloa i te falaoa telā ka tuku atu ne au ko toku foitino ke sui ei a ola o tino i te lalolagi.”—Ioane 6:48-51.

I te tau mafanafana i te 30 T.A., ne fai atu a Iesu ki a Nikotemo me ne alofa te Atua ki te lalolagi telā ne uga mai ei ne ia tena Tama e pelā me se Fakaola. Ne faka‵mafa mai nei ne Iesu te manakoga ke kai ki tena foitino mai te fakatuanaki ki te taulaga ka fai ne ia. Tenā te auala ke maua ei te ola se-gata-mai.

Kae ne ita a tino konā i pati a Iesu. “E mafai pefea o tuku mai ne te tagata tenei a tena foitino ke kai ne tatou?” ko te lotou fesili. (Ioane 6:52) Ne manako a Iesu ke maina latou me ne seki fakauiga tonu ne ia kae ne faipati a ia i se auala fakatusa. E foliga mai me i mea kolā e fakaopoopo mai ne ia ko te uiga eiloa tenā.

“Ka se maua ne koutou te ola seiloga ke ‵kai koutou ki ‵kano o te Tama a te tagata kae inu ki tena toto. So se tino e kai ki oku ‵kano kae inu ki toku toto ka maua ne ia te ola se-gata-mai, . . . me i oku ‵kano ko te mea‵kai tonu eiloa, kae ko toku toto ko te meainu tonu eiloa. So se tino e kai ki oku ‵kano kae inu ki toku toto e tumau i te ‵kau fakatasi mo au.”—Ioane 6:53-56.

Mafaufau la ki te fakatakalialia ki tino Iutaia kolā ne fakalogo‵logo atu ki ei! Kāti ne mafau‵fau latou me i a Iesu ne fakamalosi aka ne ia te kai tino, io me ke ofa te Tulafono a te Atua ki te fakaaogaga o te toto. (Kenese 9:4; Levitiko 17:10, 11) Kae ne seki fakamalosi atu a Iesu ki tino ke ‵kai latou ki se foitino tonu io me ke inu ki toto tonu. Ne faka‵mafa mai fua ne ia i ei me i tino katoa kolā e fia maua ne latou te ola se-gata-mai, e ‵tau eiloa o fakatuanaki ki tena taulaga telā ka fai ne ia māfai ko tuku atu ne ia tena foitino ‵lei katoatoa kae ko ‵ligi ifo tena toto ola. Kae ne seki malamalama foki ana soko i te akoakoga tenei. Ne ‵teke atu a nisi tino: “E fakatakalia‵lia a pati konei; ko oi la e fia fakalogologo ki ei?”—Ioane 6:60.

Ona ko te mea ne iloa ne Iesu i nisi o ana soko ko mui‵mui, ne fesili atu ei a ia: “E a, e ‵poi koutou i te mea tenei? E a la māfai e lavea ne koutou te Tama a te tagata e fanaka ki te koga telā ne nofo muamua ei a ia? . . . A pati kolā ne fai atu ne au ki a koutou ko te agaga mo te ola. Kae e isi ne tino i a koutou e se tali‵tonu.” Ona ko te mea tenā, ne fulitua atu ei a soko e tokouke kae ne seki toe tau‵tali atu i a ia.—Ioane 6:61-64.

Ne fesili atu a Iesu ki ana apositolo e toko 12: “E a, e ma‵nako foki koutou o olo keatea?” Ne tali atu a Petelu: “Te Aliki, ko oi te tino ka olo matou ki ei? A muna o te ola se-gata-mai konā e nofo mo koe. Ko oti ne tali‵tonu kae iloa ne matou i a koe ko te Tino Tapu a te Atua.” (Ioane 6:67-69) Ko tafaga la te fakaasimaiga tenā o te alofa fakamaoni, faitalia me ne seki maina katoatoa a Petelu mo nisi apositolo i akoakoga a Iesu e uiga ki te mataupu tenei!

E tiga eiloa ne fiafia a Iesu ki te tali a Petelu, ne fai atu a ia: “E a, e seki filifili ne au te toko sefululua o koutou? Kae e tokotasi i a koutou se tino fatufatu.” (Ioane 6:70) Ne faipati a Iesu e uiga ki a Iuta te Isikaliota. Kāti ne matea atu ne Iesu i konā me i a Iuta ko kamata o fai amioga sē ‵lei.

Kae koi fakafiafia atu eiloa ki a Iesu ke iloa atu me ne seki fakamalosigina a Petelu mo nisi apositolo ke fulitua atu ki a ia mo te galuega fakaola tino telā e fai ne ia.