Mataupu e 63

Nisi Pati Fakatonutonu

A KOI ‵nofo atu a Iesu mo ana apositolo i se fale i Kapanaumi, kae e isi aka foki se isi mea ne tupu kae e se ko te kinauga fua a te kau apositolo me ko oi e sili i a latou. Kāti ne tupu foki te mea tenei i te lotou ‵fokimaiga mai Kapanaumi, kae ne seki nofo tonu atu a Iesu i konā. E lipoti mai penei ne te apositolo ko Ioane: “Ne matea ne matou a te tino e tuli ne ia a temoni i tou igoa, kae ne ‵vao ne matou ke se fai ne ia, me e se ‵kau tatou.”

Kāti ne manatu aka a Ioane me i te kau apositolo se potukau fakapito kolā e ‵nofo mo te muna i te faiga o faka‵leiga. Telā ne manatu aka ei a ia me e se ‵lei a galuega ‵mana kolā ne fai ne te tagata tenā me ne seki kau atu a ia ki te lotou potukau.

Kae ne fakatonutonu atu penei a Iesu: “Sa taofigina a ia, me ko so se tino e fai ne ia a vavega konei i toku igoa, e faipati faeloa ne ia a mea ‵lei e uiga ki a au. Me ko te tino e se ‵teke mai ki a tatou e kau mo tatou. Masaua a te mea tenei! So se tino e avatu ne ia ki a koe ne mu meainu ona ko koe e kau ki a Keliso, e maua ne ia te taui.”

E se fai pelā me e ‵tau o sasale fakapilipili atu te tagata tenā ki a Iesu ko te mea ke kau atu ei ki a ia. A koi tuai o fakatu aka te fakapotopotoga Kelisiano i te vaitaimi tenā. Tela la, a tena sē kau mai ki te lotou potukau ne seki fakauiga i ei me e ‵kese tena ­fakapotopotoga. Ne fakatuanaki tonu te tagata tenā ki te igoa o Iesu kae ne ‵tuli ei ne ia a temoni. Ne fai ne ia se mea telā e tai ‵pau mo mea kolā ne fai atu ne Iesu me e ‵tau o maua se taui ‵lei i ei. Ne fakaasi atu ne Iesu me ona ko tena faiga tenā, ka se galo i a ia tena taui.

E a māfai ko fakavāivāi te tagata tenā ona ko pati mo faifaiga a te kau apositolo? E fakamataku ‵ki te mea tenā! Muna a Iesu: “So se tino e fai ne ia se mea ke agasala a tama‵liki konei kolā e tali‵tonu mai ki a au, e sili atu moi fai ne ‵sai tena ua ki se fatu solo lasi kae pei ki te moana ‵poko.”

Ne fai atu a Iesu me e ‵tau o ave keatea ne ana soko so se mea mai olotou olaga telā e fai ei latou ke agasala, faitalia me e ‵pau eiloa te tāua o te mea tenā mo te tāua o se lima, se vae, io me se mata. E ‵lei atu ke galo te mea tāua tenā kae ulu atu ki te Malo o te Atua, i lō te manumanu ki ei kae ‵pei atu ki Kēna (te fakaputugā kaiga telā ne ‵ka i tafa o Ielusalema), telā ne fakaata mai i ei te fakaseaiga se-gata-mai.

Ne fakailoa atu foki a Iesu i ana pati konei: “A koutou ­eiloa, ke mo a ma fakasēaogā ne koutou se tino o tama‵liki konei. Me muna atu au ki a koutou, i olotou agelu i te lagi e matea faeloa ne latou a foliga o toku Tamana i te lagi.” Telā ne fai ei ne se ia tala fakatusa e uiga ki te tāua o “tama‵liki” konā i tena faiatuga e uiga ki te tagata telā e selau ana mamoe, kae ko galo se mamoe e tasi. Ka ­tiakina ne te tagata tenā ana mamoe e 99 kae ka sala ki te mamoe telā ko galo. Kae e pelā mo te fakamatalaga a Iesu, kafai ko toe maua ne ia te mamoe tenā ka sili atu tena fiafia ki ei i lō tena fiafia ki mamoe e 99. Kae ne fakaoti penei a pati a Iesu: “E penā foki ­eiloa te otou Tamana i te lagi. E se manako a ia ke galo se tino o latou konei koi fo‵liki.”

Kāti ne mafaufau a Iesu ki te kinauga a te kau apositolo e uiga ki olotou tulaga, telā ne fakamalosi atu a ia penei: “Ke maua te masima i a koutou, kae ke fakatau ola filemu foki koutou.” E momea aka te ‵gali o meakai sē ‵gali malosi māfai e fakaaogā te masima. Tela la, e fai ne te masima fakatusa ke taliagofie a pati a se tino. Kafai e maua te vaegā masima tenā, ka tumau ei te filemu.

Kae i nisi taimi ona ko te sē ‵lei katoatoa o tino, ko ‵tupu ei a kinauga faiga‵ta. Ne tuku mai foki ne Iesu a fakatakitakiga ke teu aka a vaegā mea penā. Muna a Iesu: “Kafai e agasala mai tou taina, fano ki a ia o fakaasi atu a tena ‵se i a koulua ake eiloa tokolua. Kafai e fakalogo mai ki a koe, ko tena uiga ko maua ne koe tou taina.” Kafai e se fakalogo mai a ia, ne fai mai Iesu penei, “ke olo koulua mo se tino io me se tokolua, ko te mea ke fakamaoni ei a muna katoa eiloa ne se tokolua io me se tokotolu molimau.”

Kae e pelā mo muna a Iesu, ko te ‵toe faiga ko fai pelā me e “taku atu ki te ekalesia,” ko tena uiga, ko ovasia tausi i te fakapotopotoga kolā ka fai se fakamasinoga. Kafai e se talia ne te tino agasala tenā a te fakaikuga, muna a Iesu, “ke taku la ne koe a ia e pelā me se tino o fenua fakaa‵tea io me se tino ao lafoga.”

I te faiga o vaegā fakaikuga penā, e ‵tau o tau‵tali faka‵lei a ovasia ki fakatonuga i te Muna a Ieova. Tela la, kafai ko fakaiku aka ne latou me ko ‵se se tino kae e ‵tau o fakasala a ia, ka fai pelā me ‘ko oti ne faka‵mau aka i te lagi’ te fakaikuga tenā. Kae kafai ko ‘‵tala ne latou se mea i te lalolagi,’ ko tena uiga ko fai atu pelā me e se ‵se te tino, ka fai pelā me ‘ko oti ne ‵tala aka foki te mea tenā i te lagi.’ I vaegā fakamasinoga penā, e pelā mo muna a Iesu, “so se koga e fakapotopoto ei se tokolua, io me se tokotolu i toku igoa, e nofo foki au i konā.” Mataio 18:6-20; Maleko 9:38-50; Luka 9:49, 50.

▪ Kaia ne fai ei pelā me e se ‵tau o ‵nofo fakatasi faeloa se tino mo Iesu i ana aso?

▪ E pefea te fakamataku māfai e fai se tamaliki ke agasala, kae se a te tala fakatusa telā ne fai ne Iesu ke fakaasi mai i ei te tāua o vaegā tama‵liki penā?

▪ Se a te pogai kāti ne fai atu ei ne Iesu se fakamalosiga ki te kau apositolo ke maua ne latou te masima i a latou eiloa?

▪ Se a te uiga tonu o te ‘faka‵mauga o mea’ mo te ‘‵talaga’ o mea?