Mataupu e 68

Nisi Akoakoga i te Fitu o Aso

I TE ‵toe aso o te ‵Kaiga o Fale Fakamalumalu, ko te fitu o aso, ne akoako atu ei a Iesu i te vaega o te faletapu telā ne taku pelā me ko “te potu telā e ‵teu ei a tupe.” Kāti ne tu te potu tenā i te koga telā ne taku pelā me ko te Koga Ateatea o Fāfine telā ne tuku i ei a pokisi kolā ne lafo atu ne tino ki ei olotou meaalofa.

I po katoa i te faiga o te ‵kaiga tenā, ne ‵ka sāle ei a moli fakapito i te koga tenā i te faletapu. Ne faka‵tu aka i konā a moli gako ‵lasi e fa, kae ne tofu te moli gako mo ana tanoa ‵lasi e fa kolā ne ‵fonu i sinu. A te mainaga o tanoa e 16 kolā ne ‵ka ne oko atu ki koga ‵mao i te po. A pati kolā ne fai atu ne Iesu kāti ne fakamasaua atu i ei ki ana tino fakalogo‵logo e uiga ki te mainaga tenā: “Ko au ko te mainaga o te lalolagi,” ko muna a Iesu. “Ko te tino telā e tautali mai ki a au, e se sasale a ia i te pouliga, kae ka maua ne ia te mainaga o te ola.”

Ne ita i ei te kau Falesaio, olotou muna: “A koe e molimau eiloa ki a koe; e se tonu foki tau molimau.”

Ne toe tali atu penei a Iesu: “Ikai, e tusa eiloa me molimau au ki a au eiloa, e tonu eiloa taku molimau; me e iloa ne au a te koga ne vau au i ei, mo te koga ka fano au ki ei; kae e se iloa ne koutou te koga ne vau au i ei, mo te koga ka fano au ki ei.” Ne toe fai atu foki a ia penei: “Au e molimau ki a au eiloa, kae ko te Tamana telā ne uga mai ne ia au, e molimau foki ki a au.”

“Tefea tou Tamana?” ne fia iloa ne te kau Falesaio.

“E se iloa ne koutou au, e se iloa foki ne koutou toku Tamana,” ko te tali a Iesu. “Moifai ne iloa ne koutou au, e penei ko iloa ne koutou toku Tamana!” E tiga eiloa koi ma‵nako te kau Falesaio ke puke fakapagota ne latou a Iesu, kae e seai eiloa se tino ne puke atu ki a ia.

“Au ka fano keatea,” ne toe fai atu a Iesu. “Ko te koga e fano au ki ei, e se mafai ne koutou o olo atu ki ei.”

I konā loa ne kamata ei o mafau‵fau penei te kau Iutaia: “Ne fai mai ana muna: ‘E se mafai ne koutou o olo ki te koga telā e fano au ki ei.’ Ko te uiga la o tena muna tenei, me ka tamate a ia ne ia eiloa?”

“A koutou ne tino mai lalo nei,” ne fakamatala atu ne Iesu. “Kae ko au se tino mai luga; a koutou ne tino o te lalolagi nei, kae ko au e se se tino o te lalolagi nei.” Kae ne toe fai atu foki a ia, penei: “Kae ka ‵mate eiloa koutou i otou agasala, manafai e se tali‵tonu mai eiloa koutou me ‘ko au tenei ko ia.’”

Ne fakauiga eiloa a Iesu ki tena olaga a koi tuai o liu tagata a ia, penā foki loa mo te manatu tonu me i a ia ko te Mesia, io me ko te Keliso, telā ne folafolagina. Kae e tiga eiloa te feitu tenā, ne fesili atu latou, kae kāti ne fakatauemu atu foki latou penei: “Ko oi koe?”

Ne tali atu penei a Iesu ki olotou pati ‵teke: “Kaia ko faipati atu ei au ki a koutou?” Kae ne toe fai atu foki a ia penei: “Ko ia telā ne uga mai ne ia au, e tonu eiloa a ia. Ko taku atu ne au ki te lalolagi a mea ne lagona ne au mai i a ia.” Ne toe fakaopoopo atu ne Iesu ana pati konei: “Kafai ko palele ne sisi ake ki luga ne koutou au, te Tama a te ­Tagata, ko iloa ei ne koutou me ‘ko au tenei ko ia,’ kae e se fai fua ne au se mea; e taku atu fua ne au a mea kolā ne akoako mai ne toku Tamana ki a au. Kae ko ia telā ne uga mai ne ia au, e ‵nofo tasi maua; me i te Tamana ne seki tuku mai ne ia au ke nofo tokotasi, me e fai sāle eiloa ne au a mea kolā e fiafia a ia ki ei.”

I te taimi ne fai atu ei ne Iesu a pati konā, e tokouke a tino ne fakatuanaki ki a ia. Ana muna ki a latou: “Kafai e faka‵logo ­koutou ki aku akoakoga, ko oku soko tonu koutou. Ka iloa ne koutou te munatonu, ko te munatonu foki ka fakasaoloto ne ia koutou.”

“A matou nei ne ‵tupu mai i a Apelaamo,” ne pati ‵pole atu ana tino ‵teke, “kae ne seki pologa eiloa i se tino. Kae pefea eiloa o fai mai koe, ‘Ka fakasaoloto koutou’?”

E tiga eiloa ne pule sāle a tino fakaa‵tea ki te kau Iutaia, ne seki talia ne latou se vaegā tino pule penā ke fai mo fai te lotou matai. Ne ita latou ma taku pelā me ne pologa. Kae ne fakaasi tonu atu ne Iesu me i a latou ne pologa tonu. I te feitu fea? “Au e muna tonu atu ki a koutou,” ko pati a Iesu, “ko te tino telā e fai ne ia te agasala, ko te pologa eiloa tenā a te agasala.”

Ne oko atu te kau Iutaia ki se tulaga fakamataku ona ko te ita o latou ma taku pelā me ne pologa ki te agasala. “A te pologa foki, e se nofo tumau eiloa i te fale,” ko te fakamatalaga a Iesu. “Kae ko te tama tonu e nofo tumau eiloa i ei ke oko ki te se gata mai.” E mafai o fakatea te pologa i so se taimi, me i a ia e se se tama tonu. Ko te tama telā ne fanau mai io me ne puke mai ki loto i te kāiga ka tumau eiloa i te fale ki “te se gata mai,” ko tena uiga, i tena olaga kātoa.

“Tela la, kafai ko te Tama e fakasaoloto ne ia koutou,” ne toe fai atu a Iesu, “ko te mea eiloa ko maua te otou saolotoga tonu.” Tela la, a te munatonu telā e fakasaoloto i ei a tino ko te munatonu e uiga ki te Tama, ko Iesu Keliso. E tasi fua te auala e mafai ei o fakasaoloto se tino mai te agasala telā e iku atu ki te mate, ko te taulaga o tena ola ‵lei katoatoa e pelā me se tagata. Ioane 8:12-36.

▪ Tefea te koga ne akoako atu ei a Iesu i te fitu o aso? Ne a mea ne ‵tupu i te po i konā, kae ne fetaui pefea te mea tenā mo akoakoga a Iesu?

▪ Ne a mea ne fai atu ne Iesu e uiga ki tena mafuaga, kae se a te mea e ‵tau o fakaasi mai i ei me ko oi a ia?

▪ Ne fai pefea te kau Iutaia e pelā me ne pologa, kae se a te munatonu telā ka fakasaoloto i ei latou?