Mataupu e 81

Nisi Taumafaiga ke Tamate a Iesu

ME KO oko atu ki te ‵tau ‵moko, ne sasale atu a Iesu i te koga malumalu o te fale fakaoso o Solomona. Ne tu te mea tenā i tafa o te faletapu. Ne mumu atu a tino Iutaia ki a ia kae ne fesili atu penei: “Ka pefea te leva ka ‵nofo ei a matou mo te manatu fakalotolotolua? Kafai ko koe te Keliso, fakaasi tonu mai ki a matou.”

“Ko oti au ne muna atu ki a koutou,” ko pati a Iesu, “kae e se tali‵tonu eiloa koutou.” Ne seki fai tonu atu a Iesu me i a ia ko te Keliso, e pelā mo ana pati ki te fafine Samalia i te vaikeli. Kae e pelā me ne fakaasi atu ne ia ki a latou me ko oi a ia i te taimi ne fakamatala atu ei ne ia me ne vau a ia mai luga nei kae ne ola foki a ia mai mua atu i a Apelaamo.

Kae ne manako eiloa a Iesu ke na fakaiku aka ne tino i a latou eiloa me i a ia ko te Keliso mai te faka‵tusaga o ana galuega ki mea kolā ne ‵valo mai ne te Tusi Tapu me ka fai ne te Keliso. Tenā loa te pogai ne fakatonu mua atu ei a ia ki ana soko ke se taku atu ki tino me i a ia ko te Keliso. Kae tenā foki loa te pogai ne toe fai atu ei a ia penei ki tino Iutaia kolā ne loto ‵teke: “Ko galuega e fai ne au i te igoa o toku Tamana, e molimau latou ki a au; kae e se tali‵tonu eiloa koutou.”

Kaia ne seki tali‵tonu ei latou? Me e se lava a fakamaoniga i a Iesu ko te Keliso? Ikai, kae ona ko te pogai ne fakaasi atu ne Iesu ki a latou, penei: “I te mea i a koutou e se ko aku mamoe. . . . A aku mamoe e faka‵logo ki toku leo kae e iloa ne au latou, kae tau‵tali mai i a au. E avatu ne au ki a latou a te ola se gata mai; kae e se mafai latou o ‵mate; kae e se mafai foki ne se tino o ‵fao latou mai i a au. A toku Tamana telā ne tuku mai ne ia latou ki a au, e sili a ia i tino katoa. E seai se tino e mafai o ‵fao latou mai i lima o toku Tamana.”

I konā loa ne fakamatala atu ei ne Iesu a te va ‵lei o laua mo tena Tamana, penei: “A maua mo toku Tamana e tasi eiloa.” Me ne nofo a Iesu i te lalolagi kae ko tena Tamana ne nofo atu i te lagi, e manino eiloa me ne seki fai mai a ia me e tasi tonu laua mo tena Tamana i te feitu faka-te-foitino. Kae ne fakauiga ne ia me e tasi laua i te faiga o fuafuaga io me e loto tasi eiloa laua.

Ona ko te ita ki pati konā a Iesu, ne puke ne tino Iutaia a fatu ke tamate ei a ia, e pelā mo te lotou faiga i te lua masina mai mua atu i ei, i te taimi o te ‵Kaiga o Fale Fakamalumalu. Ne kilo atu a Iesu mo te loto toa ki tino kolā ne fia tamate ki a ia, ana muna: “Ko uke a galuega ‵lei ne fakaasi atu ne au ki a koutou mai toku Tamana. Tefea la te galuega i mea konā, ko ala ei o peipei au ne koutou ki fatu?”

“E se ko galuega ‵lei e peipei ei koe ne matou,” ko te lotou tali, “ka ko tou muna masei; me i a koe se tagata fua, kae ko fai eiloa ne koe a koe mo fai te Atua.” Kaia ne fai atu ei te kau Iutaia penā, me e seai se pati a Iesu i a ia ko te Atua?

Kāti ona ko te mea ne fai atu a Iesu me e isi sena malosi telā i te lotou talitonuga e mafai fua o maua i te Atua. E pelā mo ana muna ne fatoā fai atu e uiga ki ana “mamoe,” me “e avatu ne au ki a latou te ola se gata mai.” E se mafai ne se tino o fai te mea tenā. Kae ne puli i te kau Iutaia me ne taku atu ne Iesu me ne maua ne ia te pulega tenā mai tena Tamana.

Ne fai atu a Iesu me e se ‵pau laua mo te Atua, i tena fesili tenei: “E tusi i te otou Tulafono [i te Salamo 82:6] me ne muna mai te Atua, ‘A koutou ne atua’? Kafai ne fakaigoa ne te Atua a latou kolā ne oko ki ei te muna, ne atua, e se mafai eiloa o fakasēaogā te Tusi. E a, e taku ne koutou a te tino telā ko oti ne fakatapu ne te Tamana, kae ne uga mai ki te lalolagi, ‘A koe se tino muna masei,’ i te mea i a au ne fai atu, ‘Au ko te Tama a te Atua’?”

E tonu, me ne fai mai te Tusi Tapu i fāmasino sē fakamaoni “ne atua,” se a te mea ‵se e mafai o maua aka ne tino Iutaia konā me ne fai atu a Iesu penei, “Au ko te Tama a te Atua”? Ne toe fai atu penei a Iesu: “Kafai e se fai ne au a galuega a toku Tamana, sa tali‵tonu koutou ki a au. Kae kafai e fai ne au, e ‵tusa eiloa me e se tali‵tonu koutou ki a au, kae ke tali‵tonu koutou ki aku galuega, ko te mea ke iloa ne koutou kae tali‵tonu, i te Tamana e ‵kau fakatasi mo au, mo au foki e ‵kau fakatasi mo te Tamana.”

I te faiga ne Iesu o pati konā, ne taumafai ei te kau Iutaia o puke a ia. Kae ne sao a ia i ei, e pelā mo te faiga mua i te ‵Kaiga o Fale Fakamalumalu. Ne tiakina ne ia Ielusalema kae ne faimalaga atu ki te suā feitu o te Iolitana ki te koga telā ne kamata ei o papatiso ne Ioane a tino i te fa tausaga mai mua atu i ei. Kāti ne seki ‵mao te koga tenā mai i te tafātai i te feitu ki saute o te Namo o Kalilaia, kae kāti e lua aso te ‵mao o te faiga o te malaga mai Ielusalema.

E tokouke a tino ne olo atu ki a Iesu i te koga tenā kae ne fai atu penei: “E seai se fakailoga a Ioane ne fai, kae ko mea katoa ne faipati ki ei a Ioane e uiga mo te tagata tenei, e ‵tonu katoa.” Tela la, e tokouke a tino ne fakatuanaki ki a Iesu i konā. Ioane 10:22-42; 4:26; 8:23, 58; Mataio 16:20.

▪ Se a te faiga ne manako a Iesu ke iloa ei ne tino me i a ia ko te Keliso?

▪ E tasi pefea a Iesu mo tena Tamana?

▪ Kaia kāti ne fai atu ei te kau Iutaia me ne fai ne Iesu a ia eiloa pelā me ko te Atua?

▪ E fakaasi mai pefea ne pati kolā ne siki mai ne Iesu mai te Salamo me i a ia seki fai atu pelā me e ‵pau laua mo te Atua?