Mataupu e 69

Te Fesili e Uiga ki Tamana

I TE ‵Kaiga o Fale Fakamalumalu i te 32 T.A., ne gasolo ei o fai te fai‵patiga i te va o Iesu mo takitaki Iutaia e pelā me se kinauga. “E iloa ne au i a koutou ne ‵tupu mai i a Apelaamo,” ne taku tonu atu ne Iesu, “kae ko koutou e fia tamate ki a au, i te mea e se talia ne koutou taku muna. Au e faipati ki mea kolā ko oti ne lavea ne au i toku Tamana; kae ko koutou e fai a mea kolā ko oti ne lagona ne koutou mai te otou tamana.”

E tiga eiloa ne seki taku atu ne Iesu me ko oi te lotou tamana, ne fakaasi manino atu ne ia me e ‵kese te lotou tamana i lō tena Tamana. Ne seki iloa ne takitaki Iutaia me ko oi ne mafaufau a Iesu ki ei, kae ne tali atu latou penei: “A Apelaamo ko te motou tamana.” Ne ma‵natu aka latou me e ‵pau te lotou fakatuanaki mo te fakatuanaki o Apelaamo, telā ne fai mo fai te taugasoa o te Atua.

Kae ne fakapoi atu a Iesu ki a latou i tena tali tenei: “Kafai koutou ko tama a Apelaamo, ke fai la ne koutou a galuega a Apelaamo.” E tonu eiloa, e ‵tau o soko te tama tonu ki tena tamana. “Kae nei, a koutou e fia tamate ki a au,” ko muna a Iesu, “kae ko oti ne faipati atu au ki a koutou i te munatonu telā ne lagona ne au mai te Atua. E se fai penā Apelaamo!” Tela la, ne toe fai atu penei a Iesu: “Ko fai ne koutou a faifaiga a te otou tamana.”

Kae ne seki maina eiloa latou me ko oi ne fakauiga a Iesu ki ei. Ne taku atu ne latou i a latou ne tama tonu a Apelaamo, olotou muna: “E se ne tama sala matou.” Tela la, ne fai atu latou me i a latou ne tino tapuaki ‵tonu pelā mo Apelaamo, olotou muna: “E tokotasi te motou Tamana, ko te Atua.”

E mata, te Atua ko te lotou Tamana? “Kafai ko te Atua te otou Tamana,” ne tali atu a Iesu, “e penei la ko a‵lofa mai koutou ki a au, me i a au ne vau mai te Atua kae ne vau ki konei; ne seki vau foki au i a au eiloa, kae ko au ne uga mai ne ia. Kaia e se maina ei koutou i aku muna?”

Ko oti ne taumafai a Iesu o fakaasi atu ki takitaki lotu konā a mea kolā ka iku atu ki a latou ona ko te ‵teke atu o latou ki a ia. Kae ne faipati ‵tonu atu penei a ia: “A koutou ko fanau a te otou tamana ko te Tiapolo, kae fai foki ne koutou a mea e manako malosi ki ei te otou tamana.” A te Tiapolo se vaegā tamana pefea? Ne fakailoa atu ne Iesu me i tou tagata se tino tatino kae ne fai atu foki penei: “Me i a ia se tino loi, kae ko te tamana foki eiloa o tino ‵loi.” Tela la, ne fakaiku aka penei a Iesu: “Ko te tino telā e vau mai te Atua, e fakalogo ki muna a te Atua; tenā te mea e se faka‵logo ei koutou, i a koutou ne seki o‵mai mai te Atua.”

Ne ita malosi te kau Iutaia i pati ‵toko konā a Iesu, kae ne tali atu penei: “E se tonu te motou pati i a koe se tino Samalia, kae e isi foki se temoni i a koe?” A te pati “se tino Samalia” se tugāpati fakalumaluma kae fakamasiasi me ne takalia‵lia te kau ­Iutaia ki tino Samalia.

Ne seki saga atu a Iesu ki olotou pati fakalīlī i a ia se Samalia, kae ne tali atu penei: “E seai se temoni i a au, kae ko au e āva ki toku Tamana, kae ko koutou e se āva mai ki a au.” Kae ne toe fai atu foki ne Iesu te folafolaga fakaofoofogia tenei: “Kafai se tino e tausi taku muna e se mate eiloa a ia.” A te tonuga loa, ne seki fakauiga ne Iesu ana pati me i a latou katoa kolā e tau‵tali atu ki a ia ka se oko atu eiloa ki te mate tonu. Kae ne fakauiga ne ia me ka se oko atu latou ki te fakaseaiga se-gata-mai, io me ko “te mate fakalua,” telā ka se toe‵tu mai a tino i ei.

Kae ne fakauiga ne te kau Iutaia a pati a Iesu ki te mate tonu. Tela la, ne fai atu latou penei: “Ko iloa nei ne matou me e isi se temoni i a koe! Apelaamo mo pelofeta ko ‵mate; kae pefea eiloa o fai mai koe, ‘Kafai se tino e tausi taku muna e se mate eiloa a ia.’ E sili atu koe i te motou tamana ko Apelaamo telā ko mate? Ko ‵mate foki a pelofeta! Kae ko oi la koe i tou taofi?”

I te fai‵patiga kātoa tenā, e mautinoa eiloa me ne fakasino atu Iesu ki tāgata konā me i a ia ko te Mesia telā ne folafolagina. Kae i lō te taku atu ne Iesu o te tali tonu ki te lotou fesili me ko oi a ia, ne fai a ia penei: “Kafai e tavae au ki a au eiloa, e se aogā taku tavaega. A ia telā e tavae ne ia a au, ko toku Tamana, ko ia tonu eiloa telā ne fai mai ei koutou me ko te otou Atua. E seki iloa ne koutou a ia, kae e iloa ne au a ia. Kafai e fai ake au pelā me e se iloa ne au a ia, ko taku ei au se tino loi e pelā mo koutou.”

Ne toe fai atu a Iesu e uiga ki te tagata fakamaoni ko Apelaamo, ana muna: “Ne fiafia foki te otou tamana ko Apelaamo o kilo ki toku aso. Ne kilo ki ei kae ne fiafia.” E tonu, ona ko tena fakatuanaki, ne kilo atu eiloa Apelaamo ki te okomaiga o te Mesia telā ne folafolagina. Ne seki tali‵tonu te kau Iutaia ki ana muna, olotou pati: “E seki kātoa te lima sefulu o ou tausaga, kae ne lavea pefea ne koe Apelaamo?”

“Au e muna tonu atu ki a koutou, ka koi tuai o fanau mai Apelaamo kae ko leva ne ola au,” ko te tali a Iesu. A te tonuga loa, ne fakauiga a Iesu ki tena olaga pelā me se agaga malosi i te lagi, a koi tuai o ola a ia i te lalolagi.

Ne kaitaūa malosi latou me ne fai atu a ia i a ia ne ola mai mua atu i a Apelaamo, telā ne puke ei te kau Iutaia ki fatu o peipei a ia. Kae ne fakagalo aka ei a ia o fano ki tua mai te Faletapu kae ne seki pakia i ei. Ioane 8:37-59; Fakaasiga 3:14; 21:8.

▪ Ne fakaasi atu pefea ne Iesu me e ‵kese tena Tamana mo te tamana o ana fili?

▪ Se a te uiga o te faiatuga a te kau Iutaia me i a Iesu se tino Samalia?

▪ Se a te mea ne fakauiga a Iesu ki ei me ka se oko atu ana soko ki te mate?