Maupu e 70

Te Faka‵leiga o te Tagata ne Fanau Mai Kae ‵Kivi

I TE taimi ne taumafai ei te kau Iutaia o peipei a Iesu ki fatu a koi nofo a ia i te faletapu, ne ‵muni a ia kae ne sao i ei. Kae ne seki tiakina ne ia Ielusalema. Fakamuli ifo, i te Sapati, ne sa‵sale atu a ia mo ana soko i te fakai kae ne matea atu ne latou te tagata telā ne ‵kivi talu tena fanaumaiga. “Te Faiakoga, ko oi ne agasala,” ne fesili atu te kau soko ki a Iesu, “ko te tagata tenei io me ko ona mātua?”

Kāti ne tali‵tonu te kau soko, pelā mo nisi faiakoga, me e mafai o agasala te tino a koi nofo a ia i te moegātama o tena mātua. Ne tali atu a Iesu penei: “Ne seki agasala a te tagata tenei io me ko ona mātua, kae ko tupu te mea nei ke fakaasi ei te ‵mana o te Atua i te faiga ke ‵lei ana mata.” Ne seki ‵kivi te tagata tenā ona ko te agasala e tasi io me ko te mea ‵se e tasi telā ne fai ne ia io me ko ana mātua. A te agasala a te tagata muamua ne fai ei a tino katoa ke sē ‵lei katoatoa, kae ne ‵tupu mai i ei a vāivāiga pelā mo te tagata tenā ne fanau mai kae ko ‵kivi. A te vāivāiga tenā o te tagata ne tuku mai i ei se avanoaga mō Iesu ke fakaasi atu ne ia a galuega a te Atua.

Ne faka‵mafa ne Iesu a te tāua ke fai fakavave ne ia a galuega konā. “E ‵tau mo tatou o fai a galuega a ia telā ne uga mai ne ia au, ka koi ao,” ko ana muna konā. “Me ka oko mai te po, ko seai ei se tino e mafai o galue i ei. Au ko te mainaga o te lalolagi, i a au koi nofo i te lalolagi.” E se leva kae ko te mate o Iesu ka fakaoko atu ei a ia ki te pouliga o te tānuga telā e se mafai o fai ne ia se mea i ei. A koi tuai o fai penā, ne fai a ia mo fai se mainaga mō te lalolagi.

Ko oti ne fai ne ia a pati konā, kae ne puaki atu a Iesu ki te laukele, kae ne palu ne ia te pela mo ana suāvale. Ne nini ne ia te mea tenā ki mata o te tino ‵kivi, ana muna: “Fano o mulumulu i te vai koukou i Siloama.” Ne fakalogo te tagata ki ei. Oti aka loa, ko toe ‵kite ei ana mata! E pefea te lasi o tena fiafia i tena fokimaiga, me ne fatoā mafai o ile ana mata!

Ne ofo masei i ei ana tuakoi mo nisi tino kolā ne masani mo ia. “E se ko ia tenei ne sagasaga sāle kae akai mea?” ne fesili mai latou. “Ko ia eiloa tenei,” ne tali atu a nisi tino. Kae e se tali‵tonu a nisi tino ki ei: “E se ko ia, kae e tai pelā eiloa mo ia.” Kae ne fai atu te tagata tenā penei: “Ko au eiloa tenei.”

“Ne fai pefea ke ‵pula ou mata?” ne fia iloa ne tino konā.

“Ko te tagata e igoa ki a Iesu ne palu ne ia te pela kae ne nini ki oku mata, kae ne fai mai foki ki a au, ‘Fano ki te vai koukou i Siloama o mulumulu i ei.’ Fano ei au o mulumulu oku mata i konā, kite ei au.”

“Tefea la te tagata tenā?” ko te lotou fesili.

“E se iloa ne au,” ko tena tali.

Ne ‵taki atu ne tino konā a te tino telā ne ‵kivi i aso mua ki olotou takitaki lotu, ko te kau Falesaio. Ne fesili atu foki latou me ne toe ‵pula mai pefea ana mata. “Ne nini ne ia oku mata ki pela kolā ko oti ne palupalu, ‵mulu ei oku mata, tenei ko kite ei au,” ko tena fakamatalaga.

A te tonuga loa, ne ‵tau o fia‵fia te kau Falesaio fakatasi mo te tino akai mea telā ne faka‵lei tena masaki! Kae ne taku fakamasei ne latou a Iesu. “E se mai te Atua te tagata tenei,” ko olotou muna. Kaia ne fai atu ei latou penā? “I te mea e se tausi ne ia te Sapati.” Kae e mafau‵fau a nisi Falesaio penei: “E mafai pefea ne se tagata agasala o fai ne fakailoga penā?” Telā ko ‵kese ei olotou manatu.

Tela la, ne fesili atu penei latou ki te tagata: “Se a tau mau e uiga mō ia, me ne faka‵pula ne ia ou mata?”

“Se pelofeta eiloa a ia,” ko tena tali.

Ne ita te kau Falesaio ma tali‵tonu penā. Ne ma‵natu aka latou me ne fai lēmū ne Iesu mo te tagata tenā se faiga ko te mea ke fakaloiloi aka ei a tino. Ke fakaiku faka‵lei aka te mea tenā, ne ‵kami mai ne latou a mātua o te tino akai mea tenā ko te mea ke fai atu ei olotou fesili ki a laua. Ioane 8:59; 9:1-18.

▪ Se a te pogai ne ‵kivi ei te tagata, kae se a te mea ne seki fai pelā me ko te pogai ne ‵kivi ei a ia?

▪ Se a te po telā e se mafai o galue se tino i ei?

▪ I te taimi ne ‵lei ei te tagata, ne a mea ne fai ne tino kolā ne masani mo ia?

▪ Ne kese‵kese pefea a manatu o te kau Falesaio e uiga ki te faka‵leiga o te tagata tenā?