Ko Kinau Atu a te Kau Falesaio ki te Tagata Telā ne ‵Kivi

Ne seki mafai o talia ne te kau Falesaio me ne faka‵lei ne Iesu a mata o se tagata telā ne fanau mai kae ‵kivi, telā ne ‵kami mai ne latou ana mātua. Ne iloa ne mātua me e mafai lāua o “faka‵tea mai te sunako.” (Ioane 9:22) A te vaegā fakateaga tenā mai te ‵kau fakatasi mo nisi tino Iutaia e mafai o fakamataku ki te ola ‵lei o te kāiga i te feitu faka-te-foitino mo mea tau tupe.

Ne ‵sili atu ne Falesaio a fesili e lua: “Tenei te lua tama ne fai mai koulua me ne fanau mai e ‵kivi? Ne ‵kite pefea ana mata?” Ne tali atu ana mātua: “E iloa ne māua me tenei te mā tama kae ko ia ne fanau mai e ‵kivi. Kae e se iloa ne māua me ko oi ne fai ne ia ke ‵kite ana mata; io me ko oi ne faka‵pula ne ia ana mata.” Faitalia eiloa me ko oti ne taku atu ne te lā tama a mea kolā ne ‵tupu, ne fakaeteete a mātua i te auala e tali atu ei lāua, kae fai atu: “Fesili atu ki a ia. A iako matua ‵lei. E ‵tau o faipati a ia mō ia eiloa.”—Ioane 9:19-21.

Tela la, ne toe ‵kami mai ne te kau Falesaio a te tagata tenā kae fakamatakutaku atu ki a ia me ko oti ne maua ne latou a fakamaoniga i a Iesu se tino agasala. “‵Viki atu ki te Atua,” ne fakatonu atu latou. “E iloa ne matou i te tagata tenei se tino agasala.” I te ‵teke atu ki te lotou ‵losiga, ne fai atu te tagata telā ne ‵kivi: “E se iloa ne au me i te tino tenei se tino agasala io me ikai.” Kae ne toe fai atu a ia: “E tasi fua te mea e iloa ne au, me i a au ne ‵kivi muamua, kae nei ko ‵kite oku mata.”—Ioane 9:24, 25.

I lō te loto fia‵fia o talia te manatu tenā, ne toe fai atu a te kau Falesaio: “Ne a ana mea ne fai ki a koe? Ne faka‵pula pefea ne ia ou mata?” Ne fakaasi malie atu eiloa ne te tagata a te loto toa i tena tali: “Ko oti ne fai atu ne au ki a koutou, kae ne seki fia faka‵logo koutou. Kaia e toe ma‵nako ei koutou ke lagona ne koutou? E a, e ma‵nako foki koutou ke fai koutou mo ana soko?” Ne kaitaua malosi te kau Falesaio i tena tali kae ‵losi atu: “A koe se soko o te tagata tenā, kae ko matou ko soko o Mose. E iloa ne matou i te Atua ne faipati ki a Mose, kae e se iloa ne matou te koga ne vau ei te tagata tenā.”—Ioane 9:26-29.

Ne ofo te tagata akai mea tenā, kae ne fai atu: “E fakaofoofogia eiloa te mea tenei, me e se iloa ne koutou a te koga ne vau ei a ia, kae ne faka‵pula eiloa ne ia oku mata.” Ne fai atu ne te tagata se fakamatalaga tonu e uiga ki tino e fakalogo kae talia ne te Atua: “E iloa ne tatou i te Atua e se fakalogo ki tino agasala, kae ko so se tino e mataku ki te Atua kae fai ne ia tena loto, e fakalogo eiloa a ia ki te tino tenā. Ne seki lagona aka eiloa ne tatou i aso mua me ne faka‵pula ne se tino a mata o se tagata telā ne fanau mai e ‵kivi.” Ne iku atu te mea tenā ki te fakaikuga tenei: “Kafai te tagata tenei e seki vau mai te Atua, e seai eiloa sena mea e mafai o fai.”—Ioane 9:30-33.

Ona ko te sē mafai ne te kau Falesaio o ‵teke atu ki fakamatalaga a te tagata akai mea, ne ‵liko atu latou ki tou tagata: “A koe ne fanau mai i te agasala, kae ko vau koe o akoako matou?” Ne tuli keatea ei ne latou a ia ki tua.—Ioane 9:34.

I te taimi ne logo ei a Iesu i mea kolā ne ‵tupu, ne fetaui lāua mo te tagata tenā kae fai atu: “E a, e fakatuanaki koe ki te Tama a te tagata?” Ne tali atu te tagata telā ko ‵lei: “Kae ko oi a ia, e tou ‵malu, ko te mea ke fakatuanaki au ki a ia?” E aunoa mo se fakalotolotolua, ne fai atu a Iesu: “Ko oti ne lavea ne koe a ia, kae ko te tino telā e faipati atu nei ki a koe ko ia tenā.”—Ioane 9:35-37.

Ne tali atu te tagata: “Te Aliki, e fakatuanaki au ki a ia.” Ke fakaasi atu tena fakatuanaki mo tena āva, ne totuli atu te tagata i mua o Iesu, telā ne fai atu: “Au ne vau ki te lalolagi tenei ko te mea ke mafai o fakamasinogina te lalolagi, ko tino ‵kivi ke ‵kite kae ko tino ‵kite ke ‵kivi.”—Ioane 9:38, 39.

Ne iloa ne te kau Falesaio, kolā ne ‵nofo atu i konā, me i a latou e se ‵kivi. Kae e a olotou tulaga e pelā me ne takitaki i te feitu faka-te-agaga? Ne fesili atu latou mo te ‵toa: “E a, a matou foki ne tino ‵kivi?” Ne fai atu a Iesu: “Moi ne ‵kivi koutou penei e seai ne otou agasala. Kae nei la e fai mai koutou, ‘A matou e ‵kite.’ Tela la, e tumau eiloa otou agasala.” (Ioane 9:40, 41) Ona ko te mea ne fai latou mo fai ne faiakoga i Isalaelu, ne seki ‵tau eiloa o ‵teke atu latou ki a Iesu e pelā me ko te Mesia. Kae ona ko te lotou malamalama i te Tulafono, ne fai eiloa te lotou ‵teke atu ki a ia mo fai se agasala matagā.