Mataupu e 72
Ne Uga Atu ne Iesu te Toko 70
KO TE tau e ‵to ei a lau o lakau i te 32 T.A., kae ko kātoa i ei a tausaga e tolu talu mai te papatisoga o Iesu. Ne fatoā ‵kau atu latou mo ana soko ki te ‵Kaiga o Fale Fakamalumalu i Ielusalema, kae kāti ne ‵nofo atu latou i tafa o te koga tenā. A te tonuga loa, ne fakamāumāu ne Iesu a te lasiga o masina e ono kolā ne ‵toe mai o tena galuega i Iutaia io me i te suā feitu o te Iolitana i te kogā koga ko Pelea. Ne ‵tau foki o ga‵lue i koga katoa konā.
E tonu, mai tua malie ifo i te Paseka i te 30 T.A., kae ne fakamāumāu ne Iesu a te valu masina i te talaiga i Iutaia. Kae ne fatoā oti ne taumafai te kau Iutaia o tamate a ia i konā i te 31 T.A., kae ne fakamāumāu ne ia te lasiga o te tasi mo te āfa tausaga ne ‵soko atu ki ei i Kalilaia kae e seai aka foki se isi koga. I te vaitaimi tenā, ne fakatoka ei ne ia se fakapotopotoga o tino talai e tokouke kolā ne fakatoka faka‵lei. Kae ne fatoā maua ne ia se potukau penā. Tela la, ne kamata mai i konā ne ia te ‵toe taumafaiga malosi ke molimau katoatoa atu i Iutaia.
Ne kamata ne Iesu te taumafaiga tenā mai te filifiliga o soko e toko 70 kae ne uga atu ne ia ke olo atu taki tokolua. Tela la, ne maua i konā a potukau e 35 o tino talai o te Malo ke ga‵lue i koga konā. Ne ‵mua atu a potukau konā ki fa‵kai mo koga katoa kolā ne fakatoka ei a Iesu o fanatu ki ei, kae kāti ne olo fakatasi atu latou mo ana apositolo.
Ne seki fakatonu atu a ia ki tino e toko 70 ke olo atu ki sunako, kae ne fai atu a Iesu ke ulu atu latou ki fale o tino, ana muna: “So se fale e ulu atu koutou ki ei, te pati muamua e fai atu ne koutou, ‘Ke manuia te fale tenei!’ Kafai e nofo i konā te taugasoa o te filemu, ko te fakamanuiaga a koutou ka tumau i luga i a ia.” Se a te lotou fekau? Ne fai atu a Iesu penei: “Muna atu ki tino i te fa‵kai tenā, ‘A te Malo o te Atua ko pili mai ki a koutou.’” E fai mai penei te tusi ko te Matthew Henry’s Commentary e uiga ki te galuega a tino e toko 70 konā: “E pelā eiloa mo te lotou Matai, i so se kogā koga ne āsi atu ki ei a latou, ne talai atu latou mai fale ki nisi fale.”
E tai ‵pau a fakatonuga a Iesu ki te toko 70 mo ana fakatonuga ki te toko 12, i te taimi ne uga atu ei latou ke talai atu i Kalilaia i te tausaga e tasi mai mua atu i ei. E se gata fua i te fakailoa atu ne ia ki tino e toko 70 me ka fe‵paki latou mo ‵tekemaiga, kae ne fakatoka ne ia latou ke avatu te fekau ki tino i olotou fale, kae ne tuku atu foki ne ia te malosi ki a latou ke faka‵lei aka a tino ma‵saki. Tela la, i se taimi mai tua malie ifo i ei, ne oko atu a Iesu ki koga konā, kae ne fia‵fia te tokoukega o tino ke fetaui mo te Matai telā i a ia a soko kolā ne fai ne latou a vaegā mea fakaofoofogia penā.
E pelā me ne toetoe fua te vaitaimi ne fai ei te talaiga a tino e toko 70 konā mo te galuega a Iesu telā ne ‵soko atu ki ei. Ne seki leva kae ne kamata o toe ‵foki atu a potukau e 35 o tino talai o te Malo ki a Iesu. Konei loa olotou pati fia‵fia: “Te Aliki, a temoni ne faka‵logo foki ki omotou fakatonuga kolā ne fai i tou igoa!” Kāti ne fiafia ‵ki a Iesu i te vaegā tala ‵lei tenā, me ne tali atu a ia penei: “Ne lavea ne au a Satani e ‵to ifo pelā me se uila mai i luga i te lagi. Faka‵logo mai! Ko oti ne tuku atu ne au ki a koutou a te pule, ko te mea ke mafai ne koutou o sa‵sale i luga i gata mo akalava.”
Ne iloa ne Iesu me kafai ko oti ne fakatu aka te Malo o te Atua i te taimi o te gataga, ka ‵pei keatea ei a Satani mo ana temoni mai te lagi. Kae ona ko te tuliga tenā o temoni sē matea ne tino vāivāi ko fakaopoopo atu ei se fakamaoniga me ka tupu te mea tenā. Tela la, ne faipati atu a Iesu e pelā me e mautinoa eiloa te ‵peiifoga o Satani i aso mai mua o te taimi tenā. Tela la, ne avatu i se auala fakatusa te pule ki tino e toko 70 konā ke laka‵laka ne latou a gata mo akalava. Kae ne fai atu a Iesu penei: “Sa fia‵fia ona ko agaga ma‵sei ko faka‵logo ki a koutou; kae ke na fia‵fia i te mea ko tusi otou igoa i te lagi.”
Ne fiafia malosi a Iesu i ei kae ne tavae atu a ia ki tena Tamana i mua o tino me ne fakaaogā ne ia ana tavini ma‵lalo i se vaegā auala ‵mana penā. Ne fuli atu a ia ki ana soko, ana muna: “E manuia a mata kolā e ‵kilo atu ki mea kolā e lavea ne koutou. Au e muna atu ki koutou, me e tokouke pelofeta mo tupu ne ma‵nako o lavea a mea ko ‵kilo nei koutou ki ei, kae ne seki mafai ne latou, kae ne fia faka‵logo foki ki mea ko lagona nei ne koutou, kae ne seki mafai ne latou.” Luka 10:1-24; Mataio 10:1-42; Fakaasiga 12:7-12.
▪ Ko koga fea ne talai a Iesu i ei i tausaga e tolu i te kamataga o tena galuega, kae tefea te koga ne galue a ia i ei i masina e ono i te fakaotiga o tena olaga?
▪ Ne fakatonu atu a Iesu ki te toko 70 ke olo atu ki fea ke maua ei ne latou a tino?
▪ Kaia ne fai atu ei a Iesu me ko oti ne matea atu ne ia a Satani ko ‵to ifo mai te lagi?
▪ Ne fakauiga pefea me ne laka‵laka ne te toko 70 a gata mo akalava?