Mataupu e 84

Te Tiute o Soko

KO OTI ne tiakina ne Iesu te fale o te Falesaio takutakua, telā kāti se tino o te Fono Maluga, kae ne fanatu eiloa a ia i tena auala ki Ielusalema. Ne tau‵tali atu ki a ia a tino e tokouke. Mo ā la? Ne a mea e aofia i te faiga pelā me se soko tonu o ia?

A koi faima‵laga atu latou, kae ne mafuli atu a Iesu ki te vaitino, kae kāti ne fakapoi atu foki a ia ki a latou i ana pati konei: “So se tino e vau ki a au, e se mafai o fai mo oku soko, manafai e se takalialia a ia ki tena tamana, tena mātua, tena avaga mo ana tama, ana taina mo ana tuagane, mo ia ei.”

Se a te uiga o pati konā a Iesu? E se ‵tau o takalia‵lia tonu atu a soko ki olotou kāiga. Kae ko te takalia‵lia o latou ki tino konā e fakauiga pelā me e se ‵tau o ‵pau olotou a‵lofa ki vaegā tino penā mo te lotou a‵lofa ki a ia. Ne fai mai me i te tupuga mua o Iesu, ko Iakopo, ne “takalialia” ki a Lea kae ne alofa ki a Lasela. Kae ne fakauiga i ei me ne seki ‵pau tena alofa ki a Lea mo tena alofa ki tena taina ko Lasela.

Kae mafaufau foki la, me ne fai mai a Iesu me e ‵tau o takalialia te soko ki “a ia” eiloa, io me ko tena ola. Kae ne fakauiga foki i ei a pati a Iesu pelā me e ‵tau o sili atu te alofa o te soko tonu ki a Ia i lō tena alofa ki tena ola. Ne faka‵mafa mai i ei ne Iesu te tiute tāua o te faiga pelā me se soko o ia. E se se mea e sōnafai fua.

E aofia a mea faiga‵ta mo fakasauāga i te faiga pelā me se soko o Iesu, e pelā mo mea kolā ne fakauiga ki ei ana pati konei: “A ia telā e se amo tena sataulo, kae e se tautali mai i a au, e se mafai o fai a ia mo oku soko.” Tela la, e ‵tau o lotomalie te soko tonu ke amo aka te amoga o fakamaseiga telā ne kufaki eiloa a Iesu i ei. Kae kāti ka tamate latou ne fili o te Atua, e pelā eiloa mo mea ne oko atu ki a Iesu.

Tela la, a te faiga pelā me se soko o Keliso, se mea ne ‵tau o mafau‵fau faka‵lei ki ei a tino e tokouke kolā ne tau‵tali atu ki a ia. Ne faka‵mafa mai ne Iesu a te manatu tenā i te tala fakatusa tenei. Ana muna: “Kafai foki se tino i a koutou ko mafaufau o faite se taoa, e ‵tau eiloa o nofo muamua a ia ki lalo o fuafua te ‵togi, ke iloa me ko lava ana tupe e fakaoti ei tena galuega. Kafai e se fai penā, ka se mafai o fakapalele te taoa telā ko oti ne fakatu te fakavae; kae ka fakatauemu atu ki a ia a tino katoa kolā ne lavea ne latou. Kae ka fai ake latou penei: ‘A te tino tenei ne kamata o fai te galuega kae e se mafai ne ia o fakapalele!’”

Ne fakaasi mai i ei ne Iesu ki te vaitino telā ne tau‵tali atu ki a ia me koi tuai o fai latou mo fai ne ana soko, e ‵tau o fakaiku muamua aka ne latou me ka fakataunu faka‵lei ne latou a mea kolā e manakomia i ei. E pelā mo te tagata telā e fia fakatu aka ne ia se olo, ka onoono muamua a ia me e lava ana mea ke fakaoti ei te olo tenā a koi tuai o kamata ne ia te galuega tenā. Kae ne toe tuku mai foki ne Iesu a te suā tala fakatusa:

“Kafai foki se tupu e olo mo tena kautau e toko sefulu afe tāgata, o taua mo te suā tupu telā e o‵mai mo tena kautau e toko lua sefulu afe tāgata, e ‵tau mo ia o nofo muamua ki lalo, o mafaufau me lava tena malosi o fakafetaui ki te suā tupu. Kafai e se mafai ne ia, e ‵tau mo ia o uga atu ne ana avefekau o fakafetaui ki te suā tupu, ka koi tuai o oko mai, ko te mea ke fai se feagaiga e maua i ei se filemu.”

Kae ne faka‵mafa mai ne Iesu a te ‵kanotonu o ana tala fakatusa, penei: “E penā foki eiloa mo koutou, e se mafai o fai se tino mo oku soko seiloga ko tiakina ana mea katoa.” Tenā loa te mea e ‵tau o fai ne te vaitino tokouke o tino kolā ne tau‵tali atu ki a ia, kae e penā foki loa mo nisi tino katoa kolā e tau‵loto e uiga ki te Keliso. E ‵tau o loto ma‵lie latou o tuku atu olotou mea katoa pelā me ne taulaga​—⁠ko ­olotou kope katoa, e aofia foki i ei olotou ola​—⁠māfai e ma‵nako latou ke fai mo ana soko. E fiafia koe o fai penā?

“Se mea ‵lei te masima,” ko nisi muna a Iesu. I tena Lauga i luga i te Mauga ne fai atu ei a ia me i ana soko ko “te masima mō tino katoa.” Ko tena uiga, ka fai ne latou ke ola leva a tino e pelā mo te masima e tausi leva ei a mea. Kae ne fakaoti penei a pati a Iesu: “Kae kafai e masei, e seai eiloa se auala e mafai ei o fai ke ‵lei. Ko se aogā mō te laukele, e se aogā foki o fai kaiao ki ei, na ko te ‵pei keatea. Kafai e isi ne otou taliga, na faka‵logo mai.”

Ne fakaasi mai i ei ne Iesu me e se ‵tau o loto vāi‵vāi a latou kolā ko leva ne fai mo fai ne ana soko. Kafai e fai ne latou penā, ka se aogā ei latou, ka fakatauemu atu te lalolagi ki a latou kae ka se talia foki latou ne te Atua. Kae ko te tonuga loa, ka taku fakamaseigina te Atua ona ko latou. Ka ‵pei keatea latou, e tonu, ka fakaseaigina latou, e pelā me ne masima kolā ko ma‵sei kae ko lai‵lai foki. Luka 14:25-35; Kenese 29:30-33; Mataio 5:13.

▪ Se a te uiga o te “takalialia” o te tino ki ana kāiga, penā foki loa mo ia?

▪ Se a te avā tala fakatusa ne tuku mai ne Iesu, kae se a te uiga o mea konā?

▪ Se a te uiga o pati fakaoti a Iesu e uiga ki masima?