Mataupu e 95

Akoakoga ki te ‵Talaga o Avaga mo te Alofa ki Tama‵liki

NE OLO atu a Iesu mo ana soko ki Ielusalema ke ‵kau atu ki te Paseka i te 33 T.A. Ne olo atu latou ki te suā feitu o te vaitafe o te Iolitana kae ne ui atu latou i te fenua ko Pelea. Ne nofo atu Iesu i Pelea i ne nāi vaiaso mai mua atu i ei, kae ne toe foki fakavave atu a ia ki Iutaia ona ko te mea ne masaki tena taugasoa ko Lasalo. I te taimi ne nofo atu ei a Iesu i Pelea, ne faipati a ia ki te kau Falesaio e uiga ki te ‵talaga o avaga, kae ne toe fakasae aka ne latou te mataupu tenā i te taimi tenā.

E kese‵kese a vaegā manatu o te kau Falesaio e uiga ki te ‵talaga o avaga. Ne fai mai a Mose me e mafai o ‵tala te avaga a se tagata “māfai e isi se mea ko se fiafia ei a ia ki te fafine tenā.” Ne tali‵tonu a nisi tino me i te mea tenā e fakauiga fua ki ­amiogā ‵mā. Ako nisi tino ne fakaiku aka me i te “sē fia‵fia tenā” ne aofia i ei a tamā agasala fo‵liki. Tela la, ona ko te taumafai ke tofotofo atu ki a Iesu, ne fesili atu penei te kau Falesaio, “E taga i te tulafono a tatou o ‵tala ne se tagata tena avaga i so se mea?” Ne tali‵tonu eiloa latou me faitalia me ne a pati a Iesu ka fe‵paki a pati konā mo Falesaio kolā e ‵kese olotou manatu ki ei.

Ne poto ‵ki eiloa a Iesu i te faiga o te fesili tenā, me ne seki siki mai ne ia a pati a tino, kae ne fakasino atu a ia ki te ­Mafuaga mua o te fakaipoipoga. Ne fesili atu a ia penei: “E a, e seki fai‵tau ne koutou i te Tusi? ‘A ia telā ne faite ne ia a tino i te kamataga, ne faite ne ia a te tagata mo te fafine. Ne fai atu: “Tenā te pogai ko tuku ei ne te tagata a tena tamana mo tena mātua, kae fakatasi mo tena avaga, ko fai ei laua mo foitino e tasi.”’ Tela la, ko se toe tokolua laua, kae ko tasi. A laua kolā ko oti ne fakatasi ne te Atua, e seai se tino e mafai ne ia o ‵tala.”

Ne fakaasi mai ne Iesu me i te fuafuaga muamua a te Atua ne fai pelā me e ‵tau o ‵nofo tasi faeloa a tauavaga, kae e se ‵tau o ‵tala ne latou olotou avaga. Ona ko te mea tenā, ne toe fesili atu penei te kau Falesaio, “Kaia ne fakatonu mai ei a Mose ke avatu se tusi ‵tala avaga ne se tagata, e fakateka ei tena avaga?”

“Ona ko te ma‵keke o otou loto, ne fakataga ei ne Mose ke ‵tala otou avaga. Kae ne seki fai penā mai i te kamataga,” ko te tali a Iesu. E tonu, ne fai ne te Atua te tulaga tonu mō fakaipoipoga i te fatoaga o Etena, kae e seai se avanoaga ne fai ne ia i ei mō te ‵talaga o avaga.

Ne toe fai atu a Iesu penei ki te kau Falesaio: “Au e muna atu ki a koutou, so se tino e ‵tala tena avaga kae seki mulilua [mai te ‵gana Eleni, por·neiʹa], e mulilua eiloa a ia manafai e toe avaga ki se isi fafine.” Tela la, ne fakaasi atu ne ia i ei me e tasi fua te pogai e talia ne te Atua ke ‵tala ei a avaga, ko te por·neiʹa, telā ko amioga ma‵sei katoa i mea fakatauavaga.

Me ne iloa ne te kau soko me e ‵tau o tumau i se taimi leva te faiga o te avaga kae e tasi fua te pogai tenā mō te ‵talaga o avaga, ne pati ‵pole atu latou penei: “Kafai e penā te tulaga i te va o te tagata mo te fafine, e se ‵tau o a‵vaga a tino katoa.” E seai se fakalotolotolua me i te tino telā e fia avaga e ‵tau o mafaufau faka‵lei ki te tumau o te fakaipoipoga!

Kae ne toe faipati foki a Iesu e uiga ki te sē avaga. E fakamatala mai ne ia me i nisi tama‵liki kolā e fa‵nau mai e se mafai o a‵vaga ona ko olotou ‵tupuakaga faka-te-foitino. Ako nisi tino e se mafai o a‵vaga ona ko faifaiga a tāgata, me ne fakapa‵kia olotou foitino. Ako nisi tino e fa‵ki eiloa i te manakoga fia avaga ke maua a fakafiafiaga fakatauavaga ona ko te mea ke tai momea aka te ‵saga katoatoa atu o latou ki mea e uiga ki te Malo o te lagi. “A ia telā e fia talia ne ia te akoakoga tenei [e uiga ki te nofo taka], ke na talia nei,” ko pati fakaoti konā a Iesu.

Ne solo atu a tino o ave olotou tamā tama‵liki ki a Iesu. Kae ne ‵liko atu ana soko ki tama‵liki konā kae ne taumafai o uga atu latou keatea, me kāti e se taumate ne fia puipui ne latou a Iesu mai fakalavelave sē aogā. Kae ne fai atu penei a Iesu: “Tuku mai a tama‵liki ke o‵mai ki a au; sa taofigina latou, i te mea i ō tino penei a te Malo o te lagi. Ke masaua ne koutou, me ko so se tino e se talia ne ia te Malo o te Atua e pelā me se tamaliki, e se mafai lele eiloa o ulu atu ki ei.”

E pefea te ‵gali o akoakoga kolā ne tuku mai ne Iesu i konā! E ‵tau o fakaakoako atu tatou ki te loto maulalo mo te fia tau‵loto o tamā tama‵liki, ko te mea ke maua ei te Malo o te Atua. Kae e fakaasi mai foki ne te tala tenā a Iesu me e pefea te tāua ke fakamāumāu a taimi fakatasi mo tama‵liki, kae maise eiloa ko mātua. Kae ne fakaasi atu ne Iesu tena alofa ki tamaliki fo‵liki konā me ne puke atu a ia ki ei kae ne fakamanuia atu foki ki a latou. Mataio 19:1-15; Teutelonome 24:1; Luka 16:18; Maleko 10:1-16; Luka 18:15-17.

▪ Ne a manatu kese‵kese o te kau Falesaio e uiga ki te ‵talaga o avaga, kae ne taumafai pefea latou o tofotofo atu ki a Iesu?

▪ Ne a mea ne fai ne Iesu ki taumafaiga a te kau Falesaio ke tofotofo aka a ia, kae se a te mea ne fakaasi mai ne ia me ko te pogai e tasi fua e mafai ei o ‵tala te avaga?

▪ Kaia ne fai atu ei a soko o Iesu me e ‵lei atu ke se a‵vaga, kae ne a pati fakamalosi ne tuku mai ne Iesu i ei?

▪ Ne a mea ne akoako mai ne Iesu ki a tatou ona ko ana faifaiga ki tamā tama‵liki?