Mataupu e 105
Ne Kamata se Aso Tāua ‵Ki
I TE taimi ne tiakina ei ne Iesu a Ielusalema i te afiafi o te Aso Gafua, ne toe foki atu a ia ki Petania telā e tu i te feitu ki Saegāla o te Mauga o Olive. Ne oti atu i ei a aso e lua o te ‵toe galuega telā ne fai ne ia i Ielusalema. Kāti e se taumate, ne toe ‵nofo fakatasi a Iesu mo tena taugasoa ko Lasalo i te po tenā. Talu mai te taimi ne oko mai ei a ia mai Ieliko ki konā i te Aso Lima, tenā loa te fa o po ne nofo ei a ia i Petania.
I konā loa, i te tafataeao o te Aso Lua, ko te po 11 o Nisani, ne toe olo atu ei a ia fakatasi mo ana soko. A te aso tenā ne fai mo fai se aso tāua ‵ki i te taviniga a Iesu, ko te ‵toe aso telā e uke a mea e fai i ei ke oko eiloa ki te taimi tenā. Ko te ‵toe aso foki tenā ne sae atu ei a ia ki te faletapu. Kae ko te ‵toe aso foki o tena galuega i mua o tino a koi tuai o fakamasino a ia kae tamate.
Ne toe ‵foki atu latou i te auala masani ki luga i te Mauga o Olive i te feitu ki Ielusalema. I te auala tenā mai Petania, ne matea atu ei ne Petelu te lakau telā ne fetū ne Iesu i te taeao mai mua atu i ei. Ana muna: “Te Faiakoga, kiloke ko mate te mati ne fetū ne koe!”
Kaia ne fai ei ne Iesu ke mate te lakau tenā? Ne fakaasi mai ne ia te pogai i ana pati konei: “Masaua a te mea tenei! Kafai e fakatuanaki koutou e aunoa mo se fakalotolotolua, e mafai ne koutou o fai a te mea ko oti ne fai ne au ki te mati. E se gata fua i te mea nei, kae e mafai foki ne koutou o muna atu ki te mauga tenei [ko te Mauga o Olive telā ne ‵tu latou i ei], ‘Masiki koe o tu i te tai,’ e fai eiloa penā. Kafai e fakatuanaki koutou, e maua ne koutou so se mea e fakatagi koutou ki ei i te ‵talo.”
Tela la, i te faiga o te lakau ke magemage, ne tuku atu ei ne Iesu se fakaakoakoga aogā ki ana soko e uiga ki te manakomia ke maua ne latou te fakatuanaki ki te Atua. E pelā mo ana muna konei: “Kafai e ‵talo koutou o fakatagi atu mō so se mea, e ‵tau o tali‵tonu koutou me e maua eiloa ne koutou, kae ka tuku atu a mea katoa ki a koutou.” E pefea te tāua o te akoakoga tenā ke tau‵loto latou ki ei, kae maise eiloa ona ko tofotofoga faiga‵ta ko pili o oko atu ki a latou! Kae e isi aka foki se isi feitu e fakauiga ei te magemage o te mati ki te fakatuanaki.
A te fenua ko Isalaelu ne fai pelā mo te mati, i ana foliga fakaloiloi. E tiga eiloa ne maua ne te fenua tenā se fesokotakiga fakatasi mo te Atua i te faiga o te feagaiga kae ne foliga mai latou i tua e pelā me ne faka‵logo ki ana fakatonuga, ne fakamaoni i ei me e seai se lotou fakatuanaki, kae e seai lele eiloa ne fuataga ‵lei ne maua i ei. Ona ko te sē lava o te fakatuanaki, ne kamata ei o ‵teke atu latou ki te Tama a te Atua! Tela la, mai te faiga ke magemage te mati telā e se fua mai, ne fakaasi manino mai ei ne Iesu me ne a mea ka ‵tupu ki te fenua telā e seai se fakatuanaki kae e seai foki ne fuataga ‵lei i ei.
Mai tua malie ifo i ei, ne ulu atu a Iesu mo ana soko ki Ielusalema, kae e pelā mo olotou faiga masani, ne olo atu latou ki te faletapu, kae ne kamata o akoako atu a Iesu i konā. Kāti ne mafau‵fau a faitaulaga sili mo toeaina o te fenua ki faifaiga a Iesu ki tino ‵fuli tupe i te aso mai mua atu i ei, kae ne ‵toa atu latou ki a ia penei: “I ai te pule e fai ei ne koe a mea konei? Ko oi foki ne avatu ne ia ki a koe te pule?”
Ne tali atu a Iesu penei: “E isi foki saku fesili e fia taku atu ki a koutou, ke tali mai ne koutou. Kafai e taku mai ne koutou te tali, ko fakaasi atu ei ne au a te pule e fai ei ne au a mea konei. A te papatisoga a Ioane ne maua mai i te Atua io me ne maua mai i tino?”
Ne kamata o fakatau fesilisili a faitaulaga mo toeaina i a latou eiloa me ka tali atu pefea latou ki a ia. “Kafai e tali atu tatou penei, ‘Mai i te Atua,’ ka fai mai a ia, ‘Se a la te mea ne seki tali‵tonu ei koutou ki a Ioane?’ Kae kafai e fai atu tatou, ‘Mai i tino,’ tatou e ma‵taku ki tino i te mea e taofi latou i a Ioane se pelofeta.”
Ne seki iloa ne takitaki konā me se a te lotou tali e ‵tau o fai atu. Tela la, ne tali atu latou penei ki a Iesu: “E se iloa ne matou.”
Kae ne fai atu a Iesu penei: “E se fakailoa atu foki ne au ki a koutou a te pule e fai ei ne au a mea konei.” Mataio 21:19-27; Maleko 11:19-33; Luka 20:1-8.
▪ Kaia ne tāua ei te Aso Lua, i te po 11 o Nisani?
▪ Ne a akoakoga ne tuku mai ne Iesu i te faiga ke magemage te mati?
▪ Ne tali atu pefea a Iesu ki a latou kolā ne fesili atu ki a ia e uiga ki te pule ne fai ei ne ia a mea?