Mataupu e 106

Ne Fakaasi Atu Olotou Amioga i Tala Fakatusa ki Togāvine

NE NOFO atu a Iesu i te faletapu. Ne fatoā fakamāvale ne ia a takitaki lotu kolā ne fai atu ki a ia ke fakaasi mai me i a ai te pule e fai ei ne ia a mea. A koi ‵segi latou, kae ne fesili atu a Iesu penei: “Se a te otou manatu ki te mea nei?” Kae i te faiga o se tala fakatusa, ne fakaasi atu ei ne ia ki a latou me i a latou ne vaegā tino pefea.

Ne fai atu a Iesu penei: “E isi se tagata e tokolua ana tamaliki tāgata. Ne fano ki tena tama matua kae ne fai atu, ‘Toku toe, fano koe o galue i te togāvine i te aso nei.’ Ne tali mai a ia, ‘Ikai, au e se fano,’ kae fakamuli ifo, ne mafuli tena mafaufau, fano ei o galue i te togāvine. Ne fano foki ki tena suā tama, penā foki eiloa ana pati ne fai atu ki a ia. Ne tali mai a ia, ‘Ko ‵lei’ kae ne seki fano.’ Ko oi la te tino i a laua ne fai ne ia te loto o te tamana?”

“Ko te tama matua,” ko te tali a ana fili.

Tela la, ne fai atu Iesu penei: “Au e muna ‵tonu atu ki a koutou, me e muamua a tino ao lafoga mo fāfine talitāgata o ulu atu ki te Malo o te Atua i lō koutou.” Ne fai pelā me ne ita muamua a tino ao lafoga mo fāfine talitāgata ma tavini atu ki te Atua. Kae oti aka, e pelā mo te tamaliki muamua, ne sala‵mō latou kae ne tavini atu ki a ia. I te suā feitu la, ne fai a takitaki lotu pelā mo te tokolua o tamaliki, telā ne fai atu me tavini atu latou ki te Atua, kae tagailā e pelā mo muna a Iesu: “A Ioane te Papatiso ne vau o fakaasi atu ki a koutou a te auala tonu e ‵tau o sa‵sale i ei koutou, kae ne seki tali‵tonu koutou ki a ia; kae ko tino ao lafoga mo fāfine talitāgata ne tali‵tonu ki a ia. Ne ‵kilo tonu eiloa otou mata ki ei, kae ne seki sala‵mō koutou, io me ne seki tali‵tonu koutou ki a ia.”

Ne toe fakaasi atu ne Iesu me i te fakata‵mala o takitaki lotu konā e se ko te faka­ta‵mala fua o tavini atu ki te Atua. Ikai, kae ko te tonuga loa ne fai latou mo fai ne tāgata matagā kae ma‵sei. Ne fai atu a Iesu penei: “E isi se tagata ne fai tena togāvine. Ne ‵pui ne ia kae ne keli ne ia se pu mo tuku te mea e ‵tau ei a te sua o te vine. Ne faite foki ne ia se faleleoleo maluga e leoleo ei te togāvine. Ne tuku atu tena togāvine ki tino ga‵lue ke tausi ne latou, kae ne faimalaga atu a ia ki te suā fenua. I te okoga ki aso o te taukai vine, ne uga atu ne ia ana tavini ke olo ki tino kolā e tausi ne latou tena togāvine, ke maua mai tona tusaga. Ne puke ana tavini ne tino ga­‵lue. Ne ‵kini ne latou te suā tino, kae tamate te suā tino, ka ko te suā tino ne peipei ki fatu. Ne toe uga atu ne te tagata tenā a nisi tavini. E tokouke atu i a latou kolā ne muamua. Ne fai foki eiloa penā ne tino ga‵lue.”

A “tavini” konā ko pelofeta kolā ne uga atu ne te “tino i a ia te togāvine,” ko Ieova te Atua, ki “tino ga‵lue” i tena “togāvine.” A tino ga‵lue ko sui lauiloa o te fenua ko Isalaelu, ko te fenua telā e fakaasi mai ne te Tusi Tapu pelā me ko te “togāvine” o te Atua.

Ona ko te mea ne faivalevale kae ne ta­mate foki “ne tino ga‵lue” a “tavini” konā, ne fakamatala mai penei ne Iesu: “Fakamuli ake, ne uga atu ne ia tena tama mo tena manatu, ‘Ka faka‵logo latou ki taku tama!’ I te laveaga ne tino ga‵lue i te togā­vine a te tama, fai ake ei olotou muna penei: ‘Tenei te sui tonu, o‵mai ke na ta ne tatou, ko te mea ke fai ma tatou te togā­vine!’ Telā, puke atu ei latou ki a ia, kae apa ki tua mo te togāvine, kae ne tamate ei ne latou.”

I konā loa, ne faipati atu a Iesu ki takitaki lotu, kae ne fesili atu penei: “Kafai la ko vau te tino i ō ia te togāvine, se a tena mea ka fai ki tino ga‵lue i te togāvine?”

Ne tali atu a takitaki lotu penei: “E tamate eiloa ne ia a tino ma‵sei konā, kae ka tuku atu te togāvine ke ga‵lue ne nisi tino, telā ka maua mai i ei tena tusaga i te taimi tonu o te taukai vine.”

Ne seki iloa ne latou, me ne folafola atu ne latou i ei te lotou fakasalaga, me ne aofia latou i tino Isalaelu kolā “ne ga‵lue” i te “togā­vine” o Ieova ko te fenua ko Isalaelu. A fuataga kolā e fakamoemoe a Ieova ke maua mai i tino ga‵lue konā ko te fakatuanaki ki tena Tama, ko te Mesia tonu. Me ne faka­ta‵mala latou o tuku atu a vaegā fuataga penā, ne fakailoa atu ne Iesu penei: “E seki fai‵tau eiloa koutou ki muna a te Tusi [i te Salamo 118:22, 23], ‘A te fatu telā ne tiakina ne tufuga fai fale ko fai nei mo fatu tafa sili i te aogā. Ne fai ne Ieova, kae se mea faka­ofoofogia ki ‵tou mata!’” Muna a Iesu: “Au e fai atu ki a koutou, i te Malo o te Atua e ave keatea mai i a koutou, kae ka tuku atu ki se fenua e faka­asi mai i ei ne fua ‵lei. So se tino e siga ki luga i te fatu tenei, e fatifati valevale; kae kafai e tō te fatu tenei ki luga i se tino, e maluku‵luku likiliki eiloa a ia.”

Ne fatoā iloa ne faiakoga o te tulafono mo faitaulaga sili me i a Iesu e faipati e uiga ki a latou, kae ne fia tamate ne latou a ia, ko te “sui tonu.” Tela la, ka ave keatea mai i a latou te tauliaga ke fai pelā me ne tino pule i te Malo o te Atua e pelā me se fenua, kae ka faite se fenua fou o “tino ga‵lue i te ­togāvine,” ko te fenua telā ka maua mai i ei a fuataga ‵lei.

Me ne ma‵taku a takitaki lotu ki te vaitino kolā ne mafau‵fau i a Iesu se pelofeta, ne seki taumafai latou o tamate a ia i te taimi tenā. Mataio 21:28-46; Maleko 12:1-12; Luka 20:9-19; Isaia 5:1-7.

▪ Ko oi ne fakauiga ki ei te avā tama‵liki tāgata i te tala fakatusa a Iesu?

▪ I te lua o tala fakatusa, ko oi ne fakatusa ki “te tino i ō ia te togāvine,” “te togāvine,” “tino ga‵lue,” “tavini,” mo “te sui tonu”?

▪ Ne a mea ka ‵tupu ki ‘tino ga‵lue i te togāvine’ kae ko oi ka sui ne latou a tino konā?