Mataupu e 110
Ko Palele ‵Lei Tena Galuega i te Faletapu
KO TE ‵toe taimi tenei ne āsi atu ei a Iesu ki te faletapu. A te tonuga loa, ne fakaoti ne ia i konā tena galuega i mua o tino i te lalolagi nei kae ne ‵toe mai fua ko mea kolā ne ‵tupu i tena fakamasinoga mo tena fakasalaga ki te mate i te tolu o aso mai tua ifo i ei. Kae i konā loa ne toe fai ne ia ana pati ‵liko ki faiakoga o te tulafono mo te kau Falesaio.
Ne toe fai fakatolu atu ne ia penei: “Kalofa eiloa i a koutou faiakoga o te tulafono mo Falesaio!” Ne taku fakamasei muamua ne ia latou me “e ‵fulu ne koutou a te tua o te ipu mo te tifa, ka ko te koga i loto e ‵fonu i mea ne pukemālō mo te amio masei.” Tela la, ne polopoloki atu a ia penei: “Mulu taumua a mea kolā i loto o te ipu, ka oti ko ‵mulu ei i tua.”
Ne ‵soko atu ki ei, ne toe taku fakamasei ne ia a faiakoga o te tulafono mo te kau Falesaio ona ko te ma‵sei o olotou loto mo olotou taumafaiga ke ‵funa aka olotou amioga matagā i olotou faifaiga fia amio‵tonu. Ana muna: “A koutou e ‵pau eiloa me ne tanuga ne faka‵kena ke ‵gali mai tua, ka ko loto e ‵fonu i ivi o tino ‵mate mo mea ma‵sei.”
Kae ne fakaasi mai olotou amioga ‵loi mai i te fia‵fia o latou ke faite a tānuga mō pelofeta kae ke fakagali‵gali foki a tānuga konā ko te mea ke tavae ei olotou faifaiga ‵lei. Kae ne fakaasi atu ne Iesu me i a latou “ko mokopuna o latou kolā ne tamate ne latou a pelofeta.” E tonu, e fakamataku ‵ki māfai e fakaasi faka‵sau atu ne se tino olotou amioga ‵loi!
Kae ne toe taku atu foki ne Iesu ana toe pati ‵mafa. Ana muna: “A koutou ne fanau, ko tama foki a gata ma‵sei. A koutou e taofi pelā me e ‵sao koutou mai i te fakasalaga o Kena?” A Kena ko te vanu telā ne fakaaogā ke ‵pei ki ei a kaiga mai Ielusalema. Tela la, ne fai atu a Iesu me ona ko olotou amioga ma‵sei, ka fakasala a faiakoga o te tulafono mo te kau Falesaio ki te fakaseaiga se-gata-mai.
Ne faipati penei a Iesu e uiga ki tino kolā ka uga atu ne ia e pelā me ne sui: “E tamate ne koutou a nisi o latou, kae fakasataulo foki a nisi o latou, e ‵kini foki a nisi i olotou fale tapuaki, kae tulituli foki ne koutou a latou mai i te suā fa‵kai ki te suā fa‵kai. E pakū tonu ki luga i a koutou a te taui mo te tamatega o tino e seai ne olotou ‵se, e kamata mai i te tamatega o Apelu ke oko ki te tamatega o Sakalia, te tama a Palakaio [telā e fakaigoa ko Ieoiata i te 2 Nofoaiga Tupu], telā ne tamate ne koutou i te va o te faletapu mo te fatafaitaulaga. Au e fai atu ki a koutou, a te fakasalaga e uiga mō mea konei, e pakū tonu ki luga i te kautama tenei!”
Ona ko te loto toa o Sakalia ke polopoloki atu ki takitaki o te kau Isalaelu, “ne kau te tupu i te togafiti masei ne fai ki a Sakalia, telā ne fai ei tena fakatonuga ki tino ke peipei a Sakalia ki fatu, i te koga fai fono o te faletapu.” E pelā mo te valoaga a Iesu, ne ‵tau o fakasala te kau Isalaelu ona ko te ‵mate o vaegā tino amio‵tonu katoa penā. Ne fakasala latou i te 37 tausaga mai tua ifo i ei, i te 70 T.A., i te taimi ne fakamaofa ei ne kautau Loma a Ielusalema kae ne ‵mate i ei te toko miliona tupu o tino Iutaia.
Ne fanoanoa a Iesu i te mafaufau atu ki te tulaga fakamataku tenā. Ne toe fai atu a ia penei: “Ielusalema, Ielusalema! Ko uke taimi ne manako au o fakapulupulu koutou ki oku lima, e pelā eiloa mo se moa fafine e fakapulupulu ana tama ki ana kapakau, kae ne seki talia ne koe au! Nei la, e maofa valevale te otou fenua.”
Kae ne toe fai mai a Iesu penei: “E kamata mai i te taimi tenei, e se toe lavea ne koutou au, ke oko eiloa ki te taimi e fai ake ei koutou penei, ‘Ke manuia a ia telā e vau i te igoa o Ieova.’ ” A te taimi tenā ko te fakatasi mai o Keliso i te taimi e oko mai ei a ia i tena Malo faka-te-lagi kae ona ko te fakatuanaki ka matea atu a ia ne tino.
Ne fanatu a Iesu ki te koga telā e mafai ei o onoono a ia ki pusa tupe i te faletapu mo tino e tokouke kolā ne lafo atu olotou tupe ki ei. E uke a tupe a tino maukoloa ne lafo atu ki ei. Kae tokotasi te fafine mativa telā ko mate tena avaga ne vau kae ne lafo atu ne ia se avā tupe fo‵liki kolā e se aogā malosi.
Ne kalaga atu a Iesu ki ana soko ke o‵mai, ana muna: “Au e fai atu ki a koutou, me e uke atu a tupe a te fafine tenei ne lafo ki te pusa tupe i lō latou.” Kāti ne fesili ifo latou me e mafai pefea o fai penā. Kae ne fakamatala atu penei a Iesu: “Me i nisi o latou ne lafo ne latou a olotou tupe mai i te uke o olotou mea; ka ko te fafine tenei, e tiga eiloa tena mativa, ne lafo katoa ne ia a ana mea, ne lafo atu katoa ne ia ana mea e ola ei a ia.” Ko oti atu ana pati konā, kāti ko te ‵toe taimi tenā ke tiakina ei ne Iesu te faletapu.
Me ne ofo ana soko i te lasi mo te gali o te faletapu, ne fai atu se tino e tokotasi mai ana soko, penei: “Te Faiakoga, onoono ake i te ‵gali o fatu mo fale!” E tonu, me e fai mai me i fatu konā ne sili atu i te 35 futu te ‵loa, kae sili atu i te 15 futu te lauefa, kae e 10 tupu futu te ma‵luga!
Ne tali atu a Iesu penei: “E matea ne koutou a fale ‵lasi konei? E seai eiloa se fatu o fatu konei e ‵toe; e ma‵lepe katoa ki lalo.”
Ko oti atu ana pati konā, ne olo atu ei a Iesu mo ana soko i te Vanu ko Ketalono kae ne olo atu ki te Mauga o Olive. Mai konā, ne mafai ei ne latou o ‵kilo atu ki te faletapu mata ‵malu tenā. Mataio 23:25–24:3; Maleko 12:41–13:3; Luka 21:1-6; 2 Nofoaiga Tupu 24:20-22.
▪ Ne a mea ne fai ne Iesu i tena toe āsiga ki te faletapu?
▪ Ne fakaasi mai pefea a amioga ‵loi a faiakoga o te tulafono mo te kau Falesaio?
▪ Se a te uiga o te “fakasalaga o Kena”?
▪ Kaia ne fai atu ei a Iesu me e sili atu a tupe ne lafo ne te fafine ko mate tena avaga i lō tino mauko‵loa?