FATATUSI I TE ITANETI a te Faleleoleo Maluga
Faleleoleo Maluga
FATATUSI I TE ITANEI
Tuvalu
  • TUSI TAPU
  • TUSI
  • MEETINGS
  • gt mata. 125
  • Logo‵maega i Luga i te Sataulo

E seai se vitio penei

Fakatoese atu, e isi se fakalavelave ki te peiga o te vitio

  • Logo‵maega i Luga i te Sataulo
  • Te ‵Teo Tagata Sili Telā be Ika
  • Mataupu
  • Ko Logo‵mae se Tupu ‵Lei i Luga i te Lakau
    Iesu—Te Auala, te Munatonu, te Ola
  • Ne Tuku Kae ‵Taki Atu a Iesu ke Tamate
    Iesu—Te Auala, te Munatonu, te Ola
  • Ko Tamate a Iesu
    Taku Tusi o Tala Mai te Tusi Tapu
  • Ne Tuku Atu a Ia Kae ne ‵Taki Atu Keatea
    Te ‵Teo Tagata Sili Telā be Ika
Nisi Mea
Te ‵Teo Tagata Sili Telā be Ika
gt mata. 125

Mataupu e 125

Logo‵maega i Luga i te Sataulo

NE ‵TAKI atu fakatasi mo Iesu a tāgata ‵faomea e tokolua ke fakasala foki laua ki te mate. E se ‵mao mai te fakai, kae ne ‵tu te solo tenā i te koga ko Kolokota, io me ko te Koga o te Gatiulupoko.

Ne ave keatea a gatu o pagota konā. Oti aka ne tuku atu a uaina kolā ne palu fakatasi mo te vailakau ko te mulo. Kāti ne fakatoka ne fāfine o Ielusalema te uaina tenā, kae ne talia sāle ne te kau Loma ke inu a tino kolā ka fakasataulo ki te paluga tenā me e fakanoga aka i ei te logo‵mae. Kae i te taimi ne tami ei a Iesu ki ei, ne ita a ia ma inu ki ei. Kaia? Kāti ne manako a ia ke ala ‵lei tena mafaufau i te ‵toe tofotofoga faigata tenā o tena fakatuanaki.

Ne fakatakato Iesu i luga i te sataulo kae ne tuku atu ana lima i te koga i luga i tena ulu. I konā loa, ne ‵tuki ei ne sotia a fao ‵lasi i ana lima mo ana vae. Ne fiti a ia i te logo‵mae i te ‵tukimaiga o fao konā ki ana ‵kano mo ana uaua. I te fakatuakaga o te ­sataulo, ko se fakatau eiloa te logo‵mae malosi ona ko te ‵mafa o tena foitino, ko ‵futi malosi ei ana pakiaga i koga kolā ne ‵tuki ei a fao. Kae ne seki fakamatakutaku atu a Iesu ki sotia Loma konā, kae ne ‵talo atu a ia penei mō latou: “Toku Tamana, fakamagalo latou; me e se iloa ne latou te lotou mea tenei e fai.”

Ne fakatonu atu a Pilato ke faka‵piki atu se faka‵pulaga i luga i te sataulo, telā ne faitau penei: “Ko Iesu te Nasaleta, ko te Tupu o tino Iutaia.” Kāti ne seki tusi fua ne ia te mea tenā ona ko tena āva ki a Iesu kae ona foki ko tena takalialia ki faitaulaga Iutaia kolā ne faimālō ne latou a ia ke fakasala a Iesu ki te mate. Ko te mea ke mafai ne tino katoa o fai‵tau ki ei, ne fai atu a Pilato ke tusi te faka‵pulaga tenā i ‵gana e tolu​—⁠i te ‵gana Epelu, te ‵gana a te Malo ko te faka-Latina, mo te ‵gana lauiloa ko te faka-Eleni.

Ne fanoa‵noa ‵ki i ei a faitaulaga pule, e aofia i ei ko Kaiafa mo Anasa. A te faka‵pulaga ‵lei tenā ne fakamavale atu ki te lotou manumalo. Tela la, ne fakatagi atu latou penei: “Sa tusi penā, ‘Ko te Tupu o Tino Iutaia,’ kae ke tusi penei, ‘Ne fai mai a te tagata tenei, “Ko Au ko te Tupu o Tino Iutaia.”’” Me koi ita ­Pilato me ne fai fua a ia pelā me se mea faigaluega a te kau faitaulaga, ne tali atu ei a ia mo te loto ‵fika penei: “Ko te mea ko oti ne tusi ne au, e tusi eiloa.”

Ne maopoopo fakatasi a faitaulaga mo tino e tokouke i te koga ne fai ei te fakasalaga tenā, kae ne fakafiti atu te kau faitaulaga ki mea kolā ne tusi ki luga i te faka‵pulaga tenā. Ne toe taku atu ne latou te molimau ‵pelo telā ko oti ne taku atu i fakamasinoga kolā ne fai i te Sanetulini. E se tioa eiloa o fakatauemu atu a tino kolā ne solo atu i konā, ne tugakigaki olotou ulu, kae ne fai atu penei: “Ne ofa ne koe a te Faletapu, kae toe faite i aso e tolu! Fakaola la koe ne koe eiloa, manafai ko koe te Tama a te Atua! Fanaifo la ki lalo!”

“Ne fakaola ne ia nisi tino, kae e se maua ne ia o fakaola a ia eiloa!” ko pati ne toe fakaopoopo atu ne faitaulaga pule mo olotou takaga fakalotu. “A ia ko te Tupu o Isalaelu; ke na fanaifo la a ia ki lalo mai te sataulo; ko tali‵tonu ei tatou ki a ia. E talitonu a ia ki te Atua, kae fai ake foki i a ia ko te Tama a te Atua. Tuku aka la ke lavea ne tatou me e vau te Atua o fakaola a ia!”

Ona ko faifaiga konā ne fakatauemu atu foki te kau sotia ki a Iesu. Ne fakalīlī atu latou ki a ia kae ne ofo fakaloiloi atu te uaina ‵kona ki a ia, kae kāti ne tuku fakapilipili atu ki ana laugutu malō. Ne fakatauemu atu latou penei: “Kafai koe ko te tupu o tino Iutaia, fakaola la koe ne koe eiloa.” Ne fakatauemu atu foki te avā tino ‵faomea ki a ia​—⁠e tokotasi ne fakasataulo i te feitu fakaatamai o Iesu, kae ko te suā tino i te feitu fakamaui. Ke na mafaufau ki ei! A te ‵toe tagata sili i tino katoa kolā ne ola, e tonu, ko ia foki telā ne kau fakatasi mo Ieova te Atua i te faitega o nisi mea katoa, ne ‵tau o fa‵ki i faifaiga matagā katoa kona!

Ne puke ne te kau sotia a gatu tafa ki tua o Iesu kae ne ‵vae aka ki vaega e fa. Ne fai ne latou te vili ke onoono aka me ko oi ka maua ne ia a mea konā. Kae ko te gatu e tafa ki loto, e seai sena sokoga, me e ‵lei atu te gatu tenā. Tela la, ne fai atu te kau sotia i a latou eiloa penei: “Mo a mana saesae ne tatou te gatu, kae ke fai ne tatou se vili me ko oi ka maua ne ia.” Tela la, e se iloa ne latou me ne fakataunu ne latou i ei te tusi siki telā e fai mai penei: “Ko tufa ne latou oku gatu i a latou eiloa, ko fai foki ne latou a te vili ki toku gatu lasi.”

Fakamuli loa, ne iloa ei ne te tino ‵faomea e tokotasi me i a Iesu e fai eiloa mo fai te tupu. Tela la, ne ‵liko atu penei a ia ki tena takaga: “E se mataku koe ki te Atua i a taua ko fakasala fakatasi mo ia? Ko tonu eiloa te ta fakasalaga, me ko taui mai a mea ‵se ne fai ne taua; kae ko ia nei, e seai eiloa sena mea ‵se ne fai.” Telā ne faipati atu ei a ia ki a Iesu, kae ne fakamolemole atu penei: “Masaua mai au manafai e vau koe i tou ‵malu fakatupu.”

“Au e muna tonu atu ki a koe i te aso tenei,” ko te tali a Iesu, “ka ‵nofo fakatasi taua i te Palataiso.” Ka fakataunu mai te folafolaga tenā māfai ko pule mai a Iesu e pelā me ko te Tupu i te lagi kae ka toe fakatu mai ne ia te pagota salamō tenā ki te ola i te lalolagi Palataiso telā ka fakatoka ne tino kolā ka taulia o ‵sao atu i Amaketo fakatasi mo olotou taugasoa. Mataio 27:33-44; Maleko 15:22-32; Luka 23:27, 32-43; Ioane 19:17-24.

▪ Kaia ne ita ei a Iesu ma inu ki te uaina telā ne palu fakatasi mo te vailakau ko te mulo?

▪ Kaia kāti ne faka‵piki ei te faka‵pulaga i te sataulo o Iesu, kae se a te kinauga ne tupu i te va o Pilato mo faitaulaga sili?

▪ Ne a nisi faifaiga sē ‵lei ne fai atu ki a Iesu i luga i te sataulo, kae ne māfua mai pefea a faifaiga konā?

▪ Ne fakataunu mai pefea te valoaga i mea kolā ne fai ki gatu o Iesu?

▪ Se a te fuliga telā ne fai ne te tino ‵faomea e tokotasi, kae ka fakataunu mai pefea ne Iesu a te mea telā ne fakamolemole a ia ki ei?

    Tusi Tuvalu (1981-2026)
    Log Out
    Log In
    • Tuvalu
    • Share
    • Nisi Manakoga
    • Copyright © 2025 Watch Tower Bible and Tract Society of Pennsylvania
    • Auala ki te Fakaaogaga
    • Saolotoga Faka-te-Tulafono
    • Privacy Settings
    • JW.ORG
    • Log In
    Share