Mataupu e 127
Ne Tanu a Ia i te Aso Lima—E Seai se Foitino i te Tānuga i te Aso Sa
KO TE afiafi o te Aso Lima, kae e ‵tau o kamata te Sapati i a Nisani 15 māfai ko to te mata o te la. Ne tautau mai fua te foitino mate o Iesu i luga i te sataulo, kae koi ola te avā pagota i ana tafa. Ne fakaigoa sāle a Aso Lima ko te Aso Fakatoka me ko te taimi tenā ne fakatoka sāle ne tino olotou meakai kae ne fakapalele foki ne latou so se galuega e ‵tau o fai a koi tuai o kamata te Sapati.
A te Sapati telā ne kamata i konā e se se Sapati e pelā mo te masani (ko te fitu o aso o te vaiaso) kae e lua sapati ne aofia i ei, se Sapati “sili.” Ne fai penā me i te po 15 o Nisani, ko te aso muamua o aso e fitu ne fakamanatu ei ki te ‵Kaiga o Falaoa sē Faka‵fete (kae e fai faeloa te aso tenā mo fai se Sapati, faitalia me se a te aso e pakū i ei), kae ne pakū tonu te aso tenā i te aso telā ne fai sāle mo fai se Sapati.
E tusa loa mo te Tulafono a te Atua, e se ‵tau o tiaki a foitino ke tautau mai i se pou i te po. Tela la, ne fanoi atu te kau Iutaia ki a Pilato ke na tamate fakavave a tino kolā ne fakasala mai i te ‵fatiga o olotou vae. Tela la, ne ‵fati ne sotia a vae o te avā pagota. Kae ona ko te mea ne foliga mai me ko oti ne mate a Iesu, ne seki ‵fati ana vae. Ko fakataunu mai i ei te tusi siki tenei: “Ka seai eiloa sena ivi e fati.”
Kae ke seai se fakalotolotolua me ko mate a Iesu, ne velo atu ne se sotia tena tao ki tena kaokao. Ne velo atu te tao tenā ki tena fatu, kae se mea vave o tafe mai ei te toto mo te vai. Ne kilo tonu atu ki ei te apositolo ko Ioane, kae ne taku mai ne ia me ne fakataunu mai i ei te suā tusi siki: “Ka kilo‵kilo atu latou ki a ia telā ne velo ne latou.”
Ne nofo atu foki i te faiga tenā o te fakasalaga, a Iosefa mai te fakai ko Alimataia, se tino ‵malu o te Sanetulini. Ne ita tou tagata ma palota ke talia te faiga sē fakamaoni a te fono maluga tenā ki a Iesu. A te tonuga loa, a Iosefa se soko o Iesu, e ui eiloa ne mataku a ia ke fakailoa atu penā ki tino. Ne fatuaki aka ne ia tena loto kae ne fanatu eiloa o fanoi ki a Pilato ke tuku mai te foitino o Iesu. Ne fakatonu atu a Pilato ke vau te takitaki kautau telā ne pule ki te faiga o te fakasalaga, kae ko oti ne fakamaoni aka ne te ofisa tenā me i a Iesu ko mate, kae ne talia ne Pilato ke avatu te foitino mate.
Ne ave ne Iosefa te foitino kae ne kofu ki se sulukafu lino fou ke fakatoka ei ke tanu. Ne fesoasoani atu a Nikotemo ki a ia, ko te suā tino o te Sanetulini. Ne mataku foki a Nikotemo ma fakaasi atu tena fakatuanaki ki a Iesu mana galo i a ia tena tofi. Kae i konā loa ne aumai ne ia se paluga o mulo mo aloe ‵togi‵mafa, telā kāti ko te selau pauna Loma te ‵mafa. Ne kofu te foitino o Iesu ki litaga fakatasi mo mea fakama‵nogi konā, e pelā mo te amioga masani a te kau Iutaia māfai e fakatoka ne latou a foitino ke tanu.
Oti aka loa, ne fakatakato te foitino i te tānuga fou a Iosefa telā ne tuki i kaupapa i te fātoaga telā ko pili mai. Kae ko te ‵toe faiga, ne fakateka atu ei se fatu lasi o ‵pono te tānuga. Ne fakava‵vave te fakatokaga o te foitino, ko te mea ke palele te ‵tanuga a koi tuai o kamata te Sapati. Tela la, a Malia te Makatala, mo Malia te mātua o Iakopo Foliki, kolā kāti ne fesoasoani atu i te fakatokaga tenā, ne ‵tele fakavave atu ki lā fale ke fakatoka ei a nisi mea fakama‵nogi mo sinu ma‵nogi. Kafai ko oti atu te Sapati, ne fakamoe‵moe laua ke toe teuteu faka‵lei te foitino o Iesu ko te mea ke mo a ma pala i se taimi tai mata leva.
I te suā aso, ko te Aso Ono (te Sapati), ne olo atu a faitaulaga pule mo Falesaio ki a Pilato, olotou muna: “Te aliki, e manatua ne matou ka koi ola te tino pati loi tenā ne fai aka pelā ana muna, ‘Mai tua o aso e tolu e toetu mai ei au.’ Tela la, fai sau fakatonuga ke leoleo faka‵lei eiloa a te tānuga ke oko ki te tolu o aso, i te mea ma olo atu ana soko o kaisoa tena foitino ko fai atu ei ki tino, ‘Ko toetu a ia mai te mate.’ A te tala loi tenā, ka sili atu i te tala loi muamua.”
“Konā e ‵nofo i a koutou a sotia,” ko te tali a Pilato. “Olo la o leoleo faka‵lei a te tānuga ke mo a ma vau se tino ki ei.” Telā ne olo atu ei latou o ‵pono faka‵lei te tānuga mai te faka‵mauga o se fakamailoga i te fatu kae ne tuku foki i ei a sotia Loma ke fai mo fai ne leoleo.
I te tafataeao o te Aso Sa ne ave ei ne Malia te Makatala mo Malia te mātua o Iakopo, fakatasi mo Salome, Ioana, mo nisi fāfine aka, a mea fakama‵nogi ke toe fakatoka te foitino o Iesu. A koi olo atu latou ne fakatau fesilisili atu latou penei: “Ko oi ka fakatakafili keatea ne ia te fatu mai te gutu o te tānuga mō tatou?” Kae i te okoatuga ki konā, ne maua aka me ko oti ne poko se mafuie kae ne fakatakafili keatea ne te agelu a Ieova a te fatu tenā. Ne ‵galo i ei a leoleo, kae e seai se foitino i te tānuga! Mataio 27:57–28:2; Maleko 15:42–16:4; Luka 23:50–24:3, 10; Ioane 19:14, Ioane 19:31–20:1; Ioane 12:42; Levitiko 23:5-7; Teutelonome 21:22, 23; Salamo 34:20; Sakalia 12:10.
▪ Kaia ne fakaigoa ei te Aso Lima ko te Aso Fakatoka, kae se a te Sapati “sili”?
▪ Ne a nisi tusi siki ne fakataunu tonu mai e uiga ki te foitino o Iesu?
▪ Ne a mea ne fai ne Iosefa mo Nikotemo e uiga ki te ‵tanuga o Iesu, kae ne masani pefea laua ki a Iesu?
▪ Se a te mea ne fanoi atu a faitaulaga ke fai ne Pilato, kae ne a ana mea ne fai?
▪ Ne a mea ne ‵tupu i te tafataeao o te Aso Sa?