Ko Toe Ola Mai a Iesu

E ILOA ne koe me ko oi te fafine mo te avā tāgata konei? A te fafine ko Malia te Makatala, se taugasoa o Iesu. Kae ko tāgata kolā e ‵pei ki gatu ‵kena ko agelu. A te tamā potu tenei telā e onoono atu a Malia ki loto i ei ko te koga telā ne tuku i ei a te foitino o Iesu mai tua ifo o tena mate. A te mea tenā se tānuga. Kae nei la ko galo a te foitino! Ko oi ne ave ne ia? Ke onoono aka tatou.

Mai tua o te matega a Iesu, ne fai atu ei a faitaulaga ki a Pilato: ‘I te taimi ne ola ei a Iesu ne fai mai me ka fakatu aka a ia mai tua i te tolu o aso. Tela la, fakatonu atu ke leoleo a te tānuga. Kafai e fai penā ka se mafai ei ne ana soko o kaisoa tena foitino kae fai atu me ko oti ne fakatu mai a ia mai te mate!’ Ne fai atu a Pilato ki faitaulaga ke uga atu a sotia ke leoleo a te tānuga.

Kae i te vaveao i te tolu o aso mai tua ifo o te matega a Iesu ne vau ei se agelu a Ieova. Ne fakatakafili ne ia a te fatu kea‵tea mai te tānuga. Ne ma‵taku malosi a sotia, telā ne seki mafai ei o gasue‵sue latou. Oti aka, i te taimi ne onoono atu ei latou ki loto i te tānuga, ko galo a te foitino! Ne olo atu a nisi sotia ki te fa‵kai kae ne taku atu te mea tenā ki faitaulaga. Kae e iloa ne koe me se a te mea ne fai ne faitaulaga ma‵sei konā? Ne ‵togi ne latou a sotia ke pati ‵loi. ‘Fai atu me ko ana soko ne o‵mai i te po, ako ‵to otou ‵moe, kae kaisoa ne latou te foitino,’ ne fai atu a faitaulaga ki sotia.

A koi ‵tupu a mea konā, ne āsi atu a nisi taugasoa fāfine o Iesu ki te tānuga. E pefea te lotou ‵poi ke maua atu a te tānuga ko seai se foitino i ei! I konā eiloa, ne ‵sae faka‵poi mai se avā agelu kolā e ‵pei ki gatu malapulapu. ‘Kaia e salasala ei koutou ki a Iesu i konei?’ ne fesili atu laua. ‘Ko oti ne fakatu aka a ia mai te mate. Olo fakavave atu kae fai atu ki ana soko.’ E pefea te vave o te ‵tele atu o fāfine konā! Kae i te auala ne faka‵tu latou ne se tagata. E iloa ne koe me ko oi a ia? Ko Iesu! ‘Olo o taku atu te tala ki oku soko,’ ne fai atu a ia.

I te taimi ne fai atu ei a fāfine ki soko me ko toe ola mai a Iesu kae ko oti ne lavea ne latou a ia, ne faigata ki soko ke tali‵tonu ki te mea tenei. Ne ‵tele atu a Petelu mo Ioane ki te tānuga ke ‵kilo atu laua ki ei, kae ko galo te foitino mai te tānuga! I te taimi ne olo ei a Petelu mo Ioane, ne nofo i konā a Malia te Makatala. Tenā eiloa a te taimi ne onoono atu ei a ia ki loto kae lavea ne ia a agelu e tokolua.

E iloa ne koe me se a te mea ne tupu ki te foitino o Iesu? Ne fakagalo aka ne te Atua. Ne seki fakatu aka ne Atua a Iesu ki te ola i te foitino faka-te-tagata telā ne mate a ia i ei. Ne tuku atu ne ia ki a Iesu se foitino faka-te-agaga fou, pelā mo foitino o agelu i te lagi. Kae ke fakaasi atu ki ana soko me ko ola a ia, ne mafai o fakaaogā ne Iesu se foitino telā e mafai ne tino o lavea, e pelā mo mea ka tau‵loto tatou ki ei.