Mataupu e 128
Ko Ola Mai a Iesu!
I TE taimi ne maua atu ei ne fāfine konā me e seai se foitino i te tānuga o Iesu, ne tele atu a Malia te Makatala ke fakailoa atu te mea tenā ki a Petelu mo Ioane. Kae kāti ne ‵nofo atu a nisi fāfine i te tānuga. Ne seki leva, kae ne sae mai se agelu kae ne ‵kami mai latou ki loto.
I konā loa ne matea atu ei ne fāfine konā a te suā agelu, kae ne fai atu penei se agelu e tokotasi ki a latou: “Sa ma‵taku koutou; me e iloa ne au i a koutou e salasala ki a Iesu telā ne fakasataulo. E galo a ia i konei, kae ko toetu, e pelā eiloa mo ana muna. O‵mai o kilo‵kilo ki te koga ne takato ei a ia. Olo fakavave nei o taku atu ki ana soko: ‘Ko toetu a ia mai te mate.’ ” Telā ne ‵tele atu foki a fāfine konā i te ma‵taku fakatasi mo te fia‵fia lasi.
I te taimi tenā ko oti ei ne fetaui a Malia mo Petelu mo Ioane, ana muna ki a laua: “Ko oti ne ave keatea ne latou a te Aliki, kae e se iloa foki ne au a te koga ko oti ne tuku ne latou ki ei.” Se mea vave o ‵tele atu laua. Ne tai makini atu a Ioane—me kāti koi foliki a ia—kae ne oko atu muamua a ia ki te tānuga. Ko oti ne tiakina ne nisi fāfine a te tānuga, kae e seai se tino e ‵toe mai i konā. Ne punou malie ifo a Ioane kae ne fātiotio atu ki te koga i loto i te tānuga kae ne matea atu ne ia i ei a litaga, kae ne nofo atu a ia i tua.
I te okoatuga o Petelu ki konā, se mea vave o ulu atu a ia ki loto. Ne matea atu ne ia a litaga ko tiaki i konā, penā foki loa mo te laugatu telā ne kofu ki ei te ulu o Iesu. Ko oti ne pelupelu faka‵lei. I konā loa, ne ulu atu ei a Ioane ki loto i te tānuga, kae ne talitonu eiloa a ia ki te tala a Malia. Kae ne seki maina Petelu mo Ioane me ko oti ne toetu mai a Iesu, faitalia me ko oti ne taku fakafia atu ne ia me ka toetu mai a Ia. Ne fui maina laua i ei, telā ne toe ‵foki atu ei laua ki te fale, kae ko oti ne toe foki atu a Malia ki te tānuga, telā ne nofo atu loa a ia i konā.
A koi fai penā, kae ne ‵tele fakavave atu a nisi fāfine ke fakailoa atu ki te kau soko me ko oti ne toetu mai a Iesu, e pelā mo te fakatonuga a te avā agelu ki a latou. A koi ‵tele fakama‵kini atu latou, kae ne fetaui latou mo Iesu, ana muna: “Ke manuia koutou!” Ne faka‵siga latou i ana mua, kae ne ifo atu latou ki a ia. Kae ne fai atu a Iesu penei: “Sa ma‵taku! Olo o taku atu ki oku taina ke olo atu ki Kalilaia, me ka fetaui matou i konā.”
Mai mua atu i ei, i te pokoga o te mafuie mo te ‵saemaiga o agelu, ne ‵poi malosi i ei a sotia leoleo kae ne fai pelā me ne tino ‵mate. Ko toe ‵lei latou, kae ne olo fakavave atu latou ki loto i te fakai kae ne fakamatala atu a mea ne ‵tupu ki faitaulaga sili. Ko oti ne fono fakatasi latou mo “toeaina” o te kau Iutaia, kae ne fai te fakaikuga ke taumafai o ‵funa aka te mea tenā mai i te avatuga o se ‵togi fakakolekole ki sotia konā. Ne fakatonu atu penei ki a latou: “Fai atu ki tino i soko o Iesu ne o‵mai i te po o kaisoa tena foitino ka koi ‵moe koutou.”
Me e mafai o fakasala ki te mate a sotia Loma kolā ko ‵moe māfai ko ‵tu latou o leoleo se mea, ne folafola atu penei a faitaulaga: “Kafai foki e lagona ne te kovana a te tala tenā [me ne ‵moe koutou], e fakatalitonu ne matou ki a ia; ko seai ei se mea e tupu ki a koutou.” Ona ko te mea kāti ne tai pāpā ‵lei te lasi o te ‵togi fakakolekole tenā, ne faka‵logo te kau sotia ki te fakatonuga tenā. Ona ko te mea tenā ne salalau valevale ei te tala ‵loi me ne kaisoa te foitino o Iesu.
Ne otia malosi te loto o Malia te Makatala, kae koi nofo atu a ia i te tānuga. Tefea te koga e nofo ei a Iesu? Ne punou malie ifo a ia ke kilo atu ki loto i te tānuga, kae ne matea atu i ei ne ia a agelu e tokolua kolā ne ‵pei ki gatu ‵kena. Ko toe ‵sae mai a agelu konā. Ne sagasaga mai te suā agelu i te fogaulu kae ko te suā agelu i te mulivae o te koga telā ne takato mai ei te foitino o Iesu. Ne fesili atu penei laua: “Te fafine, se a te mea e tagi ei koe?”
Ne tali atu a Malia penei: “I te mea ko oti ne ave keatea ne latou a toku Aliki, kae e se iloa foki ne au a te koga ko oti ne tuku ne latou ki ei.” Kae ne fuli atu a ia kae ne matea atu ei ne ia te suā tino telā ne toe fai atu foki te fesili tenā: “Te fafine, kaia e tagi ei koe?” Kae ne toe fesili atu penei te tino tenā: “Ko oi tenā e ‵sala ne koe?”
Ne leake tou fafine me i te tino tenā ko te tino e tausi te togālakau ne tu i ei te tānuga, telā ne fai atu penei a ia: “Te aliki, kafai ne ave ne koe a ia keatea, taku mai la me tefea te koga ne tuku ne koe a ia ki ei, ke ave ne au a ia keatea.”
“Malia!” ko muna a te tino tenā. Kae se mea vave o iloa ne ia me ko Iesu tenā, ona ko tena vaegā leo telā ne masani a ia ki ei. Ana muna: “Laponi!” (ko tena uiga “Te Faiakoga!”) Me ko fai valevale tena fiafia, ne ‵sai atu tou fafine ki a ia. Kae ne fai atu penei a Iesu: “Sa taofigina au, me i a au nei e seki fanake ki toku Tamana; kae fano ki oku taina kae fai atu penei ki a latou, ‘Au e fanake ki a ia telā ko toku Tamana, ko te otou Tamana foki, ko toku Atua, ko te otou Atua foki.’ ”
Ne tele atu eiloa a Malia ki te koga telā ne maopoopo mai i ei te kau apositolo mo soko. Ne fakaopoopo atu ne ia tena tala ki tala kolā ko oti ne taku atu ne nisi fāfine me ko oti ne matea atu ne latou a Iesu ko toetu mai. Kae ne seki tali‵tonu a tāgata konā ki fāfine kolā ne ‵mua mai, kae kāti ne seki tali‵tonu foki latou ki a Malia. Mataio 28:3-15; Maleko 16:5-8; Luka 24:4-12; Ioane 20:2-18.
▪ Ko oti ne maua atu ne Malia te Makatala me e seai se foitino i te tānuga, kae ne a ana mea ne fai, kae ne a mea ne ‵tupu ki nisi fāfine i konā?
▪ Ne a mea ne fai ne Petelu mo Ioane i te taimi ne maua atu ei ne laua me e seai se foitino i te tānuga?
▪ Ne a mea ne ‵tupu ki nisi fāfine i te lotou oloatuga ke fakamatala atu ki te kau soko me ko toetu mai a Iesu?
▪ Ne a mea ne ‵tupu ki sotia leoleo, kae ne a mea ne ‵tupu i te avatuga o te lotou tala ki te kau faitaulaga?
▪ Ne a mea ne ‵tupu a koi nofo tokotasi Malia te Makatala i te tānuga, kae ne a mea ne fai ne te kau soko e uiga ki tala a fāfine konā?