Mataupu e 131

Toe Saemaiga mo te Penitekoso i te 33 T.A.

E TASI te taimi ne fakatoka ei ne Iesu se taimi ke fetaui ei latou mo ana apositolo katoa e toko 11 i se mauga i Kalilaia. Kāti ne fakailoa atu foki ki nisi soko e uiga ki te maopoopoga tenā, kae e toko 500 tupu a tino ne maopoopo mai i konā. E pefea te fakafiafia loto o te fono tenā i te taimi ne sae mai ei a Iesu kae ne kamata o akoako atu ki a latou!

E atea mo nisi mea, ne fakamatala atu ne Iesu ki te vaitino e tokouke me ko oti ne tuku atu ne te Atua a pulega katoa ki a ia i te lagi mo te lalolagi. Kae ne fakamalosi atu a ia penei: “Tela la, olo atu koutou, ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te agaga tapu. Akoako atu foki latou ke faka‵logo ki mea katoa kolā ne fakatonu atu ne au ki a koutou.”

Ke na mafaufau ki ei! Ne maua ne tāgata, fāfine, mo tama‵liki a te tofiga e tasi tenā i te galuega ko te faiga o soko. Ka tau­mafai a tino ‵teke o taofi aka te lotou talaiga mo faiga o akoakoga, kae ne fakamafanafana atu penei a Iesu ki a latou: “Kiloke! Au e fakatasi faeloa mo koutou, ke oko eiloa ki te gataga o te lalolagi.” E nofo faeloa a Iesu fakatasi mo ana soko e alatu i te agaga tapu, ko te mea ke fesoasoani atu ki a latou ke fakataunu te lotou galuega.

Ne kātoa te 40 aso mai tua ifo o tena toetumaiga kae ne fakaasi sāle atu ne Iesu ki ana soko me i a ia ko toe ola. I saemaiga konā ne akoako atu ei a ia ki a latou e uiga ki te Malo o te Atua, kae ne faka‵mafa ne ia te tāua o olotou tiute e pelā me ne ana soko. E tasi te taimi ne sae aka foki ei a ia ki tena āfa-taina ko Iakopo kae ne fakatalitonu atu ki te tino tenā, telā ne seki talitonu muamua, me i a Ia ko te Keliso.

A koi ‵nofo atu te kau apositolo i Kalilaia, kae kāti ne fakatonu atu a Iesu ki a latou ke toe ‵foki atu ki Ielusalema. I te taimi ne fetaui ei latou i konā, ne fai atu a ia penei ki a latou: “Ke se olo keatea koutou mai Ielusalema, kae ke faka‵tali ki te meaalofa a toku Tamana ne fai atu ne au ki a koutou. A Ioane ne papatiso ki te vai, kae e se leva nei ko papatisogina ei koutou ki te agaga tapu.”

Ne fetaui fakamuli a Iesu mo ana apositolo kae ne takitaki atu ne ia latou mai te fakai ke oko atu eiloa ki Petania, telā e tu i te feitu ki saegāla o te Mauga o Olive. Se mea e fui maina i ei, me faitalia te uke o ana pati me ko pili o fano keatea a ia ki te lagi, ne tali‵tonu eiloa latou me ka fakatu aka tena Malo i te lalolagi nei. Tela la, ne fesili atu latou penei: “Te Aliki, e ­mafai ne koe i te taimi nei o toe fakafoki a te Malo ki ­Isalaelu?”

Ne seki taumafai a Iesu o fakatonu aka olotou manatu ‵se, kae ne fai atu fua a ia penei: “A taimi mo tau o aso ne fai ­eiloa ne toku Tamana i tena pule, kae e se ‵tau mo koutou o fia iloa me ko mafea e ‵tupu ei.” Kae ne toe faka‵mafa ne ia te galuega telā e ‵tau o fai ne latou, ana muna: “Ka faka‵fonugina koutou ki te ‵mana manafai e oko atu ki luga i a koutou a te agaga tapu. Ka fai foki koutou mo molimau ki a au i Ielusalema, i Iutaia kātoa mo Samalia, ke oko eiloa ki kapakapālagi o te lalolagi.”

A koi kilo‵kilo atu latou, kae ne kamata o fanaka Iesu ki te lagi, kae ne ‵pono a ia ne te kaumana ke se matea ne latou a ia. Ko oti ne tapale keatea ne ia tena foitino faka-te-lalolagi, kae ne fanaka eiloa a ia ki te lagi e pelā me se tino faka-te-agaga. A koi kilo‵kilo atu a tino e toko 11 konā ki te lagi, ne ‵sae mai i olotou tafa a tagata e tokolua kolā ne ‵pei ki gatu ‵kena. Ne fesili atu a agelu kolā ne ‵fuli ki foitino matea, penei: “Tāgata Kalilaia, kaia e ‵tu ei koutou i konā o kilo‵kilo ki te lagi? Ko Iesu tenā, telā ne avake ki te lagi mai i a ­koutou, ka penā foki mana foki mai, e pelā mo te otou laveaga i tena fanakaga ki te lagi.”

A te auala telā ne fatoā tiakina ei ne Iesu a te lalolagi ne fai pelā me ne seki fakasalalau atu ki tino valevale kae ne ‵kilo atu fua ki ei ana soko fakamaoni. Tela la, ka toe foki mai a ia i se vaegā auala penā​—⁠e aunoa mo te iloa ne tino e tokouke kae na ko ana soko fakamaoni ka maina me i a ia ko toe foki mai kae ko kamata tena fakatasimaiga i te malosi o tena Malo.

Ne olo ifo te kau apositolo mai te Mauga o Olive, ne olo atu ki te suā feitu o te Vanu o Keta­lono, kae ne toe ulu atu ki Ielusalema. Ne ‵nofo atu latou i konā i te faka‵logo ki te fakatonuga a Iesu. I te sefulu aso mai tua ifo i ei, i te ‵Kaiga a te kau Iutaia ko te Penitekoso i te 33 T.A., a koi maopoopo mai a soko e toko 120 i se potu i luga i se fale i Ielusalema, kae ne lagona ne latou te ‵gulu mai e pelā me se afā ko agi mai i te fale tenā. Ne matea atu i ei a ­ulagā afi e pelā me ne alelo i luga i tino taki tokotasi i konā, kae ne kamata o fai‵pati atu a soko katoa ki ‵gana kes‵kese. Tenā loa te ‵ligiifoga o te agaga tapu telā ne folafola mai ne Iesu! Mataio 28:16-20; Luka 24:49-52; 1 Kolinito 15:5-7; Galuega 1:3-15; 2:1-4.

▪ Ne tuku atu ki a ai ne Iesu a fakatonuga fakamavae i se mauga i Kalilaia, kae ne a fakatonuga konā?

▪ Ne a pati fakamafanafana ne avatu ne Iesu ki ana soko, kae e nofo faeloa pefea a ia fakatasi mo latou?

▪ E pefea te leva mai tua ifo o tena toetumaiga ne sae sāle aka ei a Iesu ki ana soko, kae ne a mea ne akoako atu ne ia ki a latou?

▪ Ko oi te tino ne fakasula aka a Iesu ki ei kae kāti ne seki fai a ia mo fai se soko a koi tuai o mate a Iesu?

▪ Ne a maopoopoga fakaoti e lua ne kau atu a Iesu i ei ki ana apositolo, kae ne a mea ne ‵tupu i te avā taimi konā?

▪ E toe foki mai pefea a Iesu i te vaegā auala telā ne fano keatea ei a ia?

▪ Ne a mea ne ‵tupu i te Penitekoso i te 33 T.A.?