Mataupu e 14

I Āi te Pulega e ‵Tau o Talia ne Koe?

1, 2. E mata, e ma‵sei a vaegā pulega katoa? Ke fakamatala mai.

A TE pati “pulega” se pati e se ti fia‵fia ki ei a te tokoukega o tino. Se mea faigofie ke maina i ei, me e sōnafai sāle a pulega​—i galuega, i te kāiga, penā foki loa mo malo. E faipati tonu mai te Tusi Tapu penei: “Ka ko tino kola e nofo i se tulaga malalo, e nofo puapuaga i te pulega a tino ma‵luga.” (Failauga 8:9) E tonu, ko oti ne pule fakasauā atu a tino e tokouke ki nisi tino mai i olotou faifaiga sē a‵lofa mo olotou amioga fāpito.

² Kae e se ko pulega katoa e ma‵sei. E pelā me se mea e tasi, kāti e mafai o fai atu pelā me e pule mai ‵tou foitino ki a tatou. E “fakatonu” mai ke mā‵nava aka tatou, ke ‵kai, ke inu, kae ke ‵moe foki. E mata, ko tō faigata ke fai penā? Ikai. A te fakalogo ki ei e iku atu eiloa ki mea aogā mō tatou. E tiga eiloa e se mafau‵fau sāle tatou ki te fakataunuga o faiga masani konā i ‵tou foitino, e isi aka foki a nisi vaegā pulega kolā e ‵tau o loto ma‵lie tatou o faka‵logo ki ei. Ke na mafaufau malie aka ki nisi vaegā mea penā.

TE ‵TOE PULEGA MALUGA

3. Kaia e ‵tau ei o taku a Ieova ko “te Aliki Sili”?

³ E sili atu i te 300 taimi e taku ei a Ieova i te Tusi Tapu ko te New World Translation, e pelā me ko “te Aliki Sili.” A te aliki sili ko ia telā e tafasili i te maluga tena pulega. Kaia e ‵tau ei o maua ne Ieova te tulaga tenā? E tali mai penei te Fakaasiga 4:11: “E ‵tau eiloa o maua ne koe a te ‵malu, te vikiga, mo te ‵mana. Me ne faite ne koe a mea katoa, kae mai i tou loto foki, ne faite ei ne koe a mea ke tino mai kae ke ola foki.”

4. E fai pefea ne Ieova a tena pulega?

⁴ E pelā me ko te ‵tou Mafuaga, e ‵tau eiloa o fakaaogā ne Ieova a tena pulega e tusa mo tena loto. Kāti e foliga mai pelā me e fakamataku te mea tenā, kae maise eiloa māfai e masaua ne tatou me i “tena mana e se fakatau eiloa i te malosi.” E fakaigoa sāle a ia e pelā me ko “te Atua Tafasili i te Malosi”​—ko te tugāpati faka-Epelu telā e fakauiga pelā me e sili faeloa tena malosi. (Isaia 40:26; Kenese 17:1) Kae e ui i ei, e fakaasi atu eiloa ne Ieova a tena malosi i se auala ‵lei, me i tena uiga lauiloa ko te alofa.​—1 Ioane 4:16.

5. Kaia e se faigata ei ke faka‵logo tatou ki te pulega a Ieova?

⁵ E tiga eiloa ne fakailoa atu ne Ieova me ka aumai ne ia te fakasalaga ki luga i tino agasala kolā e se sala‵mo, ne iloa ne Mose ana uiga masani e pelā me “ko ia eiloa tokotasi ko te Atua, kae ko ia foki eiloa ko fakamaoni. Ka tausi eiloa ne ia tena feagaiga kae fakaasi tena alofa ki tino e alofa ki a ia, kae e tausi ki ana fakatonuga.” (Teutelonome 7:9) Ke na mafaufau ki ei! E se faimālō tatou ne te ‵Toe Pule Maluga i te lagi mo te lalolagi ke tavini atu tatou ki a ia. Kae e tosina atu eiloa ‵tou loto ki a ia ona ko tena alofa. (Loma 2:4; 5:8) Kae e gali foki te fakalogo ki te pulega a Ieova, me e iku atu faeloa ana tulafono ki mea aogā mō tatou.​—Salamo 19:​7, 8.

6. Ne sae aka pefea a te kinauga e uiga ki pulega i te fatoaga o Etena, kae ne a mea ne iku mai i ei?

⁶ Ne ‵teke atu ‵tou mātua muamua ki te pulega a te Atua. Ne ma‵nako laua ke fakaiku aka i a laua eiloa me ne a mea e ‵lei kae ne a mea e ma‵sei. (Kenese 3:​4-6) Ona ko te mea tenā, ne afuli keatea ei laua mai te Palataiso telā ne ‵nofo laua i ei. Fakamuli ifo, ne talia ne Ieova ke faka‵tu aka ne tino a faigā pulega kolā ne fai ei ke mafai ne latou o ola i se olaga tai tokagamalie faitalia te sē ‵lei katoatoa. Ne a nisi pulega konā, kae e pefea te lasi o te tulaga e manako te Atua ki ei ke faka‵logo ei tatou ki mea konā?

“PULE O TE MALO”

7. Ko oi a “pule o te malo,” kae e fetaui pefea olotou tulaga mo te pulega a te Atua?

⁷ Ne tusi mai penei te apositolo ko Paulo: “A tino katoa e ‵tau o faka‵logo ki pule o te malo, i te mea ne aumai katoa mai i te Atua te lotou tulaga pule.” Ko oi a “pule o te malo”? A pati a Paulo i fuaiupu mai mua atu i ei e fakaasi mai i ei me i pule konā ko pule i malo o tino. (Loma 13:1-7; Tito 3:1) Ne seki māfua mai i a Ieova a pule faka-te-malo konā, kae ko ‵tu mai a mea konā me ne talia ne ia ke fai penā. Telā ne mafai ei o tusi mai penei a Paulo: “A tino pule katoa konei e ‵tu nei, ne faka‵tu katoa ne te Atua.” Ne a mea e fakaasi mai i ei e uiga ki vaegā pulega faka-te-lalolagi konā? Me e ‵nofo katoa a mea konā mai lalo i te pulega a te Atua. (Ioane 19:​10, 11) Tela la, kafai ko fepaki se tulafono a tāgata mo te tulafono a te Atua, e ‵tau o takitaki a Kelisiano ne olotou loto lagona kolā ne akoako faka‵lei ki te Tusi Tapu. “E ‵tau mo [latou] o faka‵logo ki te Atua i lo te faka‵logo ki tino.”​—Galuega 5:29.

8. Ne a mea aogā e maua ne koe mai i pule o te malo, kae e fakaasi atu pefea ne koe tou fakalogo ki a latou?

⁸ Kae i te lasiga o taimi, e ga‵lue a pule ma‵luga o te malo e pelā me ‘se tavini a te Atua mō ‵tou ‵lei.’ (Loma 13:4) I auala fea? Ia, ke na mafaufau la ki te uke o galuega aogā e fai ne pule ma‵luga o te malo, e pelā mo te fakatokaga o fale meli, puipuiga mai te kau pulisimani mo te kau tamate afi, te matagaluega tu ‵ma, mo te faiga foki o akoga. “Me e tenei foki eiloa te sua pogai e fai lafoga ei koutou,” ko muna ne tusi mai ne Paulo, “me i pule ko faifekau a te Atua e ga‵lue mō te mea nei.” (Loma 13:6) E ‵tau mo tatou “o fai te mea tonu,” e uiga ki lafoga, penā foki loa mo nisi tiute aka faka-te-tulafono.​—Epelu 13:18.

9, 10. (a) E fetaui pefea a pule o te malo mo te fakatokaga a te Atua? (e) Kaia e se ‵lei ei ke ‵teke atu ki pule o te malo?

⁹ I nisi taimi, e sōnafai fua ne pule ma‵luga o te malo olotou malosi. E mata, ko tena uiga e se toe ai se ‵tou tiute ke faka‵logo ki a latou? Ikai, e se penā. E matea eiloa ne Ieova a faifaiga ‵se a pule konā. (Faataoto 15:3) Me e talia ne ia a pulega a tino e se fakauiga i ei me e se fia saga atu a ia ki olotou amioga piko‵piko; kae e se fai pelā me e fakamoemoe foki a ia ke se ‵saga atu tatou ki ei. A te tonuga loa, ko pili mai te taimi ka “fakatakavale ne ia a malo katoa kona,” kae ka sui foki ne ia a malo konā ki tena malo amiotonu. (Tanielu 2:44) Kae koi tuai o fai penā, e isi ne galuega aogā a pule konā o te malo.

¹⁰ Ne fakamatala mai penei a Paulo: “Ko te tino tela e ‵teke ki pule e ‵teke foki ki te mea ne filifili ne te Atua.” (Loma 13:2) A pule ma‵luga konā “ne filifili” ne te Atua, me e fai ne latou ke tai feoloolo te fakatokaga o mea, kae moi sē fai penā ko fai valevale fua a mea katoa. A te ‵teke atu ki a latou e se fetaui mo manatu faka-te-Tusi Tapu kae e se aogā foki. Ke fai se tala fakatusa: E a māfai ko oti ne ‵tipi koe kae e taofi aka ne uka a te koga telā ne ‵tipi? E tiga eiloa e se fai ‵tonu a uka konā mo fai ne vaega o te foitino, e isi se lotou aogā i se taimi. Kafai e sōna ‵tala fakavave aka a uka konā ka pakia koe i ei. E penā foki loa a pulega a malo o tino, ne seki aofia a mea konā i te fuafuaga muamua a te Atua. Kae koi tuai o pule katoatoa mai tena Malo, e taofi ne malo faka-te-tagata a tino ke ‵nofo fakatasi i te olaga nei, kae e fai ne latou se galuega telā e fetaui tonu mo te loto o te Atua i te vaitaimi tenei. Tela la, e ‵tau o tumau eiloa tatou i te faka‵logo ki pule ma‵luga, kae fakamuamua faeloa ne tatou a te tulafono a te Atua mo tena pulega.

PULEGA I TE KĀIGA

11. Ka fakamatala mai pefea ne koe a te fakatakitakiga e uiga ki te faiga o ulu?

¹¹ A te kāiga ko te vaega fakavae o te olaga tenei. I loto i te kāiga e mafai o maua i ei ne te tagata mo te fafine avaga se va fakataugasoa telā e aogā, kae e mafai foki o puipui i ei a tama‵liki kae fakamasani foki latou ki te olaga e pelā me ne tino ma‵tua. (Faataoto 5:​15-21; Efeso 6:​1-4) E ‵tau o fakatoka faka‵lei a te vaegā fakatokaga ‵malu tenā i se auala telā e mafai ei ne tino taki tokotasi i te kāiga o maua te filemu mo te fealofani. A te auala o Ieova ke fakataunu ei te mea tenā ko te fakatakitakiga e uiga ki te faiga o ulu, telā e fakatoetoe aka penei i pati konei i te 1 Kolinito 11:3: “A Keliso e sili eiloa i tino katoa, a te tagata e sili foki i tena avaga, ka ko te Atua e sili foki i a Keliso.”

12, 13. Ko oi te ulu o te kāiga, kae ne a mea e iloa ne tatou mai i te auala e fai ei a Iesu mo fai te ulu?

¹² A te tagata ko te ulu o te kāiga. Kae e isi foki se tino e sili atu i a ia​—ko Iesu Keliso. Ne tusi mai a Paulo penei: “A koutou e tagata, ke a‵lofa koutou ki otou avaga, e pela eiloa mo Keliso ne alofa ki te ekalesia, kae tuku atu foki tona ola mō te ekalesia.” (Efeso 5:25) E fakaasi tonu atu ne te tagata avaga a tena fakalogo ki a Keliso māfai e amio a ia ki tena avaga e tusa loa mo amioga ne fai sāle ne Iesu ki te fakapotopotoga. (1 Ioane 2:6) Ko oti ne tuku atu se pulega sili ki a Iesu, kae e pule mai a ia i te ‵toe auala uiga filemu, alofa kae uiga faigofie. (Mataio 20:​25-28) E pelā me se tagata, ne seki sōnafai lele eiloa ne ia tena pulega. Ne “filemu kae loto malalo” a ia, kae ne fakaigoa ne ia ana soko ko ana “taugasoa,” i lō te fai atu me i a latou ne “pologa.” “Ka avatu ne au ki a koutou a te malologa,” ko ana pati ne folafola atu ki a latou, kae konā loa a mea ne fai ne ia.​—Mataio 11:​28, 29; Ioane 15:15.

¹³ E akoako atu te fakaakoakoga a Iesu ki tāgata a‵vaga me i te faiga e pelā me se ulu Kelisiano e se se tulaga e pule fakasauā atu i ei. I lō te faiga penā, e ‵tau o fakaasi atu i ei te āva mo te alofa telā e se fakatāua i ei ne te tino a ia eiloa. E manino i ei me e se ‵tau lele eiloa o fakasaunoa atu ki te avaga i faiga io me ko pati. (Efeso 4:​29, 31, 32; 5:​28, 29; Kolose 3:19) Kafai e fakasaunoa atu penā se tagata Kelisiano ki tena avaga, ko se aogā i ei a nisi galuega ‵lei kolā e fai ne ia, kae ka fakalavelave atu foki i ei ki ana ‵talo.​—1 Kolinito 13:​1-3; 1 Petelu 3:7.

14, 15. E fesoasoani atu pefea a te iloaga e uiga ki te Atua ki te fafine avaga ke fakalogo ki tena avaga?

¹⁴ Kafai e fakaakoako atu se tagata avaga ki te fakaakoakoga a Keliso, ko faigofie atu i ei ki tena avaga ke fakalogo ki pati konei i te Efeso 5:​22, 23: “A koutou e fafine, ke faka‵logo ki otou avaga, e pela eiloa mo te otou faka‵logo ki te Aliki. Me i te tagata e isi sena pule i luga i tena avaga, e pela eiloa mo Keliso e isi foki sena pule i te ekalesia.” E pelā mo te tagata avaga e ‵tau o fakalogo ki a Keliso, kae e ‵tau foki o fakalogo te fafine avaga ki tena avaga. E fakaasi manino mai ne te Tusi Tapu me e ‵tau o tavae kae fakaaloalo atu ki fāfine ata‵mai ona ko olotou poto faka-te-Atua mo te lotou ga‵lue malosi.​—Faataoto 31:​10-31.

¹⁵ E se katoatoa te fakalogo o te fafine Kelisiano ki tena avaga. Ko tena uiga, e ‵tau o fakalogo a ia ki te Atua kae e se ko te tagata māfai e solitulafono ki te Atua tena fakalogo ki tena avaga. Kae ke oko eiloa ki vaegā taimi penā, e ‵tau o fetaui ‵lei tena tu mautakitaki mō te tulafono a te Atua mo tena “loto maulalo mo te agaga filemu.” E ‵tau o mautinoa tonu me ko ‵lei atu a ia e pelā me se fafine avaga ona ko tena iloaga e uiga ki te Atua. (1 Petelu 3:​1-4) E penā foki loa te tonuga e uiga ki te tagata Kelisiano telā e se se tino talitonu tena avaga. E ‵tau o ‵lei atu a ia e pelā me se tagata avaga ona ko te talia ne ia a fakatakitakiga faka-te-Tusi Tapu.

16. E mafai pefea ne tama‵liki o fakaakoako atu ki te fakaakoakoga a Iesu a koi talavou a ia?

¹⁶ E fakamatala mai i te Efeso 6:1 a te tulaga o tama‵liki, penei: “Se tiute faka-Kelisiano o koutou, o faka‵logo ki otou matua, me tena eiloa te mea tonu e ‵tau o fai ne koutou.” E tau‵tali atu a tama‵liki Kelisiano ki te fakaakoakoga a Iesu, telā ne fakalogo faka‵lei ki ana mātua a koi tupu aka a ia. E pelā me se tamaliki fakalogo, “ne tupu ake Iesu i te foitino mo te poto, kae ne alofagina ne te Atua mo tino.”​—Luka 2:​51, 52.

17. Ne a mea kāti ka fai ne tama‵liki ona ko te vaegā auala e fai ei ne mātua olotou pulega?

¹⁷ A te auala e tausi ei ne mātua olotou tiute kāti ka fai ei ke āva olotou tama‵liki ki pulega io me ke ‵teke ki ei. (Faataoto 22:6) Tela la, se mea ‵lei ke fesili ifo penei a mātua: ‘E pule atu au i te alofa io me ko uiga fakasauā? E sōna talia fua ne au so se amioga?’ E ‵tau mo te mātua amio Atua o alofa atu mo te atafai, kae e ‵tau foki o tu mautakitaki a ia i te fakalogo ki fakatakitakiga mai te Atua. Se mea ‵tau me ne tusi mai penei a Paulo: “A koutou e tamana, sa fakaitaitagina otou tamaliki, [ko tena uiga, ‘sa fakakaitaua latou’], kae ke puti ake i te olaga ‵lei mo akoakoga faka-Kelisiano.”​—Efeso 6:4; Kolose 3:21.

18. E ‵tau o fai pefea a polopolokiga a mātua?

¹⁸ E ‵tau o iloilo faka‵lei ne mātua te faiga o olotou akoakoga, kae maise eiloa māfai e ma‵nako latou ke faka‵logo mai olotou tama‵liki kae ke fia‵fia latou i ei. (Faataoto 23:​24, 25) I te Tusi Tapu, a te polopoloki e fakauiga sāle ki te faiga o akoakoga. (Faataoto 4:1; 8:33) E fetaui te mea tenā mo te alofa mo uiga faigo‵fie, kae e se ko te kaitaua mo te fakasauā. Tela la, e ‵tau o ‵poto a faiga a mātua Kelisiano, kae e ‵tau o lava te lotou loto pulea māfai e polopoloki atu ki olotou tama‵liki.​—Faataoto 1:7.

PULEGA I TE FAKAPOTOPOTOGA

19. Ne fakatoka pefea ne te Atua ke tokagamalie te fakapotopotoga Kelisiano?

¹⁹ Me i a Ieova ko te Atua o te tokagamalie, se mea ‵tau ke fakatoka ne ia a takitakiga ‵lei kae tokagamalie mō ana tino. Ona ko te mea tenā ne tofi aka ei ne ia a Iesu e pelā me ko te Ulu o te fakapotopotoga Kelisiano. (1 Kolinito 14:​33, 40; Efeso 1:​20-23) Mai lalo i te takitakiga sē matea a Keliso, ko oti ne talia ne te Atua ke fai se fakatokaga ke tausi ne toeaina kolā ne ‵tofi aka a fakapotopotoga takitasi i te loto fiafia, te loto malie mo te alofa. (1 Petelu 5:​2, 3) E fesoasoani atu a tavini fakafaifeau ki a latou i auala kese‵kese kae e fai foki ne latou a galuega aogā i loto i te fakapotopotoga.​—Filipi 1:1.

20. Kaia e ‵tau ei o faka‵logo tatou ki toeaina Kelisiano kolā ne ‵tofi aka, kae kaia e aogā ei te mea tenā?

²⁰ Ne tusi mai penei a Paulo e uiga ki toeaina Kelisiano: “Faka‵logo ki otou takitaki kae sasale foki i olotou fakatonuga. E se mapu eiloa latou i te tausiga o otou agaga, me ‵tau mo latou o avatu se tala a olotou galuega ki te Atua. Kafai e faka‵logo koutou ki ei, e fai olotou galuega mo te fiafia, kae masei te se fakalogo ki ei, ko fai ei olotou galuega mo te se fiafia, ko maumau ei olotou galuega mō koutou.” (Epelu 13:17) Ona ko tena poto, ne tuku atu ne te Atua a te tiute ki ovasia Kelisiano ke tausi ne latou a manakoga faka-te-agaga o tino i te fakapotopotoga. A toeaina konā e se fai pelā me ne takitaki lotu. A latou ne tavini mo pologa a te Atua, kolā e tavini atu ki manakoga o olotou taina tapuaki, e pelā eiloa mo faiga a te ‵tou Matai, ko Iesu Keliso. (Ioane 10:​14, 15) Kafai ko iloa ne tatou me e fia fesoasoani mai a tāgata ata‵mai konā ke gasolo atu tatou ki mua kae ke ‵tupu aka foki i te feitu faka-te-agaga, ko fakamalosi mai i ei ki a tatou ke kaugo‵fie kae faka‵logo.​—1 Kolinito 16:16.

21. E taumafai pefea a toeaina kolā ne ‵tofi aka ke fesoasoani atu latou ki olotou taina Kelisiano i te feitu faka-te-agaga?

²¹ I nisi taimi, e takase‵se keatea a mamoe io me e fakamataku‵taku atu a mea faka-te-lalolagi ki a latou. Mai lalo o te takitakiga a te Tausi Mamoe Sili, e matapula‵pula eiloa a toeaina, e pelā me ne tausi mamoe lago‵lago, ki manakoga o tino kolā e tausi ne latou kae e ‵saga faka‵lei atu latou ki tino konā. (1 Petelu 5:4) E āsi sāle atu latou ki tino i te fakapotopotoga kae e fakama‵losi atu ki a latou. Me e iloa ne toeaina me e taumafai te Tiapolo ke fakamakosu ne ia te filemu o tino o te Atua, e fakaaogā ne latou te poto mai te lagi i te ‵teuga o so se fakalavelave. (Iakopo 3:​17, 18) E kausaki eiloa latou ke tausi faka‵lei te ‵kau fakatasi mo te loto tasi i te fakatuanaki, ko te mea foki eiloa telā ne ‵talo a Iesu ki ei.​—Ioane 17:​20-22; 1 Kolinito 1:10.

22. Ne a fesoasoani e fai ne toeaina māfai ko agasala se tino?

²² E a, māfai ko oko atu se mea masei ki se Kelisiano io me ko loto vāivāi a ia me ne fai ne ia se agasala? A fakamafanafanaga i pati fakatonutonu mai te Tusi Tapu fakatasi foki mo ‵talo a toeaina mai olotou loto mō te tino tenā e mafai o fesoasoani atu ki a ia ke toe maua te malosi faka-te-agaga. (Iakopo 5:​13-15) E isi foki se aiā o tāgata konā, kolā ne ‵tofi aka ne te agaga tapu, ke fakatonutonu kae polopoloki ne latou so se tino telā e fai ne ia se mea ‵se, io me kāti ka fakamakosu ne ia a te tulaga faka-te-agaga mo amioga ‵ma a te fakapotopotoga. (Galuega 20:28; Tito 1:9; 2:15) Kāti e ‵tau o fakaasi mai ne tino a tala o agasala matagā, ko te mea ke tausi ei te fakapotopotoga ke tumau i te ‵mā. (Levitiko 5:1) Kafai e talia ne te Kelisiano telā ne fai ne ia se agasala matagā a fakatonutonuga mo polopolokiga mai te Tusi Tapu kae e fakamaoni mai tena salamō tonu, ka maua ne ia se fesoasoani. Kae e ‵tau eiloa o faka‵tea a tino kolā e solitulafono faeloa ki te Atua kae e se salamō i ei.​—1 Kolinito 5:​9-13.

23. Ne a mea e tuku mai ne ovasia Kelisiano ke manuia ei te fakapotopotoga?

²³ Ne ‵valo mai ne te Tusi Tapu me mai lalo i te pulega a Iesu Keliso e pelā me ko te Tupu, ka ‵tofi aka ei a tāgata ma‵tua ke tuku atu ne latou a fakamafanafanaga, puipuiga, mo fakama‵losiga ki tino o te Atua. (Isaia 32:​1, 2) Ka fai ne latou te takitakiga e pelā me ne tino talai, ne tausi mamoe, mo faiakoga ko te mea ke fakamalosi aka i ei te ‵tupuakaga i te feitu faka-te-agaga. (Efeso 4:​11, 12, 16) E tiga eiloa kāti e isi ne taimi e polopoloki, e fakatonutonu kae e fakama‵losi atu a ovasia Kelisiano ki olotou taina talitonu, kafai e fakagalue aka a akoakoga aogā a toeaina kolā e fakavae ki te Muna a te Atua ka fesoasoani atu i ei ki tino katoa ke tumau eiloa i te auala ki te ola.​—Faataoto 3:​11, 12; 6:23; Tito 2:1.

KE TALIA TE KILOKILOGA A IEOVA E UIGA KI PULEGA

24. Se a te kinauga e tofotofo sāle ki ei tatou i aso takitasi?

²⁴ Ne tofotofo aka te tagata mo te fafine muamua e uiga ki te faka‵logo ki pulega. Tela la, e se ofo tatou me ko fe‵paki tatou mo se vaegā tofotofoga penā i aso takitasi. E fakamalosi aka ne Satani te Tiapolo a uiga ‵teke i tino. (Efeso 2:2) E fai i ei ke gali atu a foliga o te tu tokotasi i lō te fakalogo.

25. Ne a mea aogā e maua māfai e se talia a uiga ‵teke o te lalolagi kae e faka‵logo ki pulega kolā e fai ne te Atua io me e talia ne ia?

²⁵ E se ‵tau lele eiloa o talia ne tatou a uiga ‵teke o te lalolagi. Kafai e fai penā, ka maua aka ne tatou a taui ona ko te fakalogo ki te Atua. E pelā mo te mea e tasi, ka faka‵seke tatou ki te manavase mo te ‵fiu telā e lagona sāle ne tino kolā e faka‵tupu a fakalavelave mō pule o te malo. Ka fakafeoloolo aka ne tatou a fakalavelave kolā e maua sāle i te lasiga o kāiga. Kae ka maua foki ne tatou a mea aogā mai i te ‵kau fakatasi i te fiafia mo te alofa mo ‵tou taina Kelisiano. Kae e sili atu i mea katoa, ona ko te ‵tou faka‵logo ki te Atua ka maua ei ne tatou se fesokotakiga ‵lei mo Ieova, ko te ‵Toe Pule Tafasili i te Maluga.

TOFOTOFO AKA TOU ILOAGA

E fai pefea ne Ieova a tena pulega?

Ko oi a “pule o te malo,” kae e faka‵logo pefea tatou ki ei?

Ne a tiute o tino taki tokotasi i te kāiga ona ko te fakatakitakiga e uiga ki te faiga o ulu?

E mafai pefea ne tatou o fakaasi atu te fakalogo i loto i te fakapotopotoga Kelisiano?

[Pokisi i te itulau e 134]

E FAKA‵LOGO, KAE E SE UIGA ‵TEKE

Mai i te lotou talaiatuga ki tino, e fakasino atu eiloa a Molimau a Ieova ki te Malo o te Atua e pelā me ko te fakamoemoega e tasi fua mō tino ke maua ei te filemu mo te tokagamalie tonu. Kae e se tāitāi o ‵teke atu a tino loto finafinau konā i te folafolaatuga o te Malo o te Atua, ki malo kolā e ‵nofo latou mai lalo i ei. E ‵kese ‵ki, me e aofia te kau Molimau i toe tino fakaaloalo kae tausi ki tulafono i olotou fenua. Ne fai mai penei se ofisa e tokotasi mai i se fenua i Afelika: “Moi ne fai a lotu katoa e pelā mo Molimau a Ieova, e penei e se maua ne tatou ne amioga tatino, amioga kai‵soa, amioga ‵teke a tama‵liki, pagota mo pomu fakaatomika. E se loka faeloa a mataloa.”

Me e iloa ‵lei ne tino ma‵luga i te ukega o fenua a te mea tenā, ko talia ei ne latou ke fai te galuega talai a te kau Molimau e aunoa mo se fakalavelave. I nisi fenua, ko fatoā tuku mai ne te malo te saolotoga i te taimi ko maina ei latou me e ‵lei te galuega a Molimau a Ieova. E pelā mo pati ne tusi mai ne Paulo e uiga ki te fakalogo ki pule o te malo: “Fai ne koe te mea ‵lei, kae ka maua ne koe tena fakamanuiaga.”​—Loma 13:​1, 3.