Auala Tāua e Lua ke Fakatumau ei te Fakaipoipoga

1, 2. (a) E pefea te leva e ‵tau o tumau ei te fakaipoipoga e ‵tusa mo te fuafuaga i te kamataga? (e) E mafai pefea o fakatumau te mea tenei?

I TE taimi ne tuku fakatasi ei ne te Atua te tagata mo te fafine muamua e pelā me se tauavaga, e seai se fakaasiga me ka se tumau te fakatasiga tenā. Ne ‵tau o ‵nofo fakatasi a Atamu mo Eva i te lā olaga kātoa. (Kenese 2:24) A te tulaga o te Atua mō se fakaipoipoga ‵malu ko te tuku fakatasiga o te tagata e tokotasi mo te fafine e tokotasi. Ko te mulilua fua o se tino e tokotasi io me ko laua tokolua e maua ei se pogai faka-te-Tusi Tapu ke ‵tala te avaga kae mafai o toe avaga.​—Mataio 5:32.

² E mata, e mafai o ola fakatasi a tino e tokolua i te fiafia i se taimi leva ‵ki? Ao, kae e taku mai i te Tusi Tapu a auala tāua e lua, io me ko kī e lua kolā e fesoasoani mai ke mafai o fai penā. Kafai e fakaaogā ne se tauavaga a mea e lua konei, ka maua ei ne laua te fiafia mo fakamanuiaga e uke. Ne la a auala tāua konei?

TE AUALA MUAMUA

3. Ne a vaega e tolu o te alofa kolā e ‵tau o fakamalosi aka ne te tauavaga?

³ A te auala muamua ko te alofa. E isi ne vaega kese‵kese o te alofa kolā e fakamatala mai i te Tusi Tapu. E tasi mai ei ko te alofa telā e lagona ne koe ki se isi tino, ko te vaegā alofa telā e maua i te vā o taugasoa ‵pili. (Ioane 11:3) A te suā alofa ko ia telā e maua i vā o tino o se kāiga. (Loma 12:10) A te tolu ko te alofa fakafāmau i te vā o te tagata mo te fafine. (Faataoto 5:15-20) E tonu, e ‵tau o maua a vaega katoa konei o te alofa i se tauavaga. Kae ko te fa o vaega o te alofa, e sili atu i te tāua i lō nisi vaega katoa.

4. Se a te fa o vaega o te alofa?

⁴ I te ‵gana mua telā ne fakaaogā i te Tusi Tapu i te ‵gana Eleni, a te fa o vaega o te alofa ko te a·gaʹpe. E fakaaogā te pati tenā i te 1 Ioane 4:8, telā e fai mai i ei ki a tatou: “I te Atua ko te alofa eiloa a ia.” E tonu, “a tatou e a‵lofa me i te Atua ne mua o alofa mai ki a tatou.” (1 Ioane 4:19) E ati aka muamua ne se Kelisiano a te vaegā alofa tenā ki a Ieova te Atua kae fakamuli ki ana tuakoi. (Maleko 12:29-31) E fakaaogā foki te pati ko te a·gaʹpe i te Efeso 5:2, telā e fai mai penei: “E ‵tau o pule otou olaga ne te alofa, e pelā mo Keliso ne alofa mai ki a tatou, ne tuku atu foki tona ola mō tatou.” Ne fai mai Iesu me e mafai o lavea ‵lei atu ana soko ‵tonu ona ko te vaegā alofa tenei: “Tenā te mea e iloa ei ne tino katoa ko oku soko koutou, manafai e fakatau a‵lofa [a·gaʹpe] koutou!” (Ioane 13:35) Ke onoono foki la ki te fakaaogāga o te a·gaʹpe i te 1 Kolinito 13:13: “E iai a mea konei e tolu: te fakatuanaki, te fakamoemoe, mo te alofa; ka ko te alofa [a·gaʹpe] e tulaga muamua eiloa i mea konei.”

5, 6. (a) Kaia e sili atu i ei te alofa i lō te fakatuanaki mo te fakamoemoe? (e) Ne a nisi pogai e fakatumau ei ne te alofa a te fakaipoipoga?

⁵ Kaia e sili atu ei te alofa tenei ko te a·gaʹpe i lō te fakatuanaki mo te fakamoemoe? Ona ko te mea e takitakigina ne tulaga fakavae​—ko tulaga amio‵tonu​—kolā e maua i te Muna a te Atua. (Salamo 119:105) Ko te faiga o mea ‵tonu kae ‵lei ki nisi tino e aunoa mo se manatu fakapito e ‵tusa mo te kilokiloga a te Atua, faitalia me e ‵tau io me e se ‵tau o maua ne tino konā. E fai ne te vaegā alofa tenā ke tau‵tali atu te tauavaga ki pati fakatonutonu a te Tusi Tapu: “Ke fakatau fesoasoani koutou i a koutou eiloa, ke fakatau fakamagalo foki koutou i a koutou eiloa, manafai e isi se mea e se malie ei te suā tino ki te suā tino. E pelā mo [Ieova] ko oti ne fakamagalo ne ia koutou, e ‵tau foki mo koutou o fakatau fakamagalo.” (Kolose 3:13) E maua kae ‵toki foki ne taki tauavaga a‵lofa a te “a‵lofa fakamaoni [a·gaʹpe] [te suā tino ki te suā tino], me i te alofa e ‵tao ne ia a te ukega o agasala.” (1 Petelu 4:8) Onoono la me e ‵tao ne te alofa a mea ‵se e uke. E se fakaseai katoatoa ne ia a mea ‵se, me e seai se tino agasala e mafai o sao mai te faiga o mea ‵se.​—Salamo 130:3, 4; Iakopo 3:2.

⁶ Kafai ko maua te vaegā alofa tenā ki te Atua mo te suā tino ki te suā tino i te tauavaga, ka tumau kae fakafiafia foki te lā kāiga fakaipoipo me “e se mafai o gata a te alofa.” (1 Kolinito 13:8) A te alofa “e fusi fakatasi . . . ne ia a mea katoa ke ‵lei.” (Kolose 3:14) Kafai koe ko avaga, e mafai pefea ne koulua mo tau avaga o fakamalosi aka te vaegā alofa tenei? Fai‵tau kae sau‵tala fakatasi ki te Muna a te Atua. Suke‵suke fakatasi ki fakaakoakoga o te alofa o Iesu kae taumafai ke tau‵tali, mafaufau kae fai pelā mo ia i ana faiga. E se gata i ei, ‵kau atu ki fakatasiga faka-Kelisiano, me e akoako mai i ei a mea e uiga ki te Muna a te Atua. Kae ‵talo mō te fesoasoani o te Atua ke ati aka ne koulua te vaegā alofa tenei, telā se fuataga o te agaga tapu o te Atua.​—Faataoto 3:5, 6; Ioane 17:3; Kalatia 5:22; Epelu 10:24, 25.

TE LUA O AUALA

7. Se a te āva, kae ko oi e ‵tau o fakaasi atu te āva i te fakaipoipoga?

⁷ Kafai e fakatau a‵lofa tonu te tauavaga, ka fakatau fakaasi atu foki ne laua te āva, telā ko te lua o auala ke maua ei te fiafia i te kāiga fakaipoipo. E fakamatala mai te uiga o te āva e pelā me ko te “mafaufau ki te ‵lei o nisi tino, kae fakaaloalo atu ki a latou.” E polopoloki mai te Muna a te Atua ki Kelisiano katoa, e aofia i ei a taki tauavaga: “Ke fakatau fia‵fia foki koutou, i te āva o te suā tino ki te suā tino.” (Loma 12:10) Ne tusi mai te apositolo ko Petelu: “A koutou e tāgata, i te otou ‵nofo tasi mo otou avaga, e ‵tau o iloa ne koutou me vāi‵vāi latou; tela la, e ‵tau mo koe o atafai ki ei mo te āva.” (1 Petelu 3:7) E polopoloki atu ki a‵vaga fāfine ke “āva ki olotou avaga.” (Efeso 5:33) Kafai e fia fakaaloalo atu koe ki se tino, ka atafai atu eiloa koe ki te tino tenā, mai te fakaasi atu o te āva ki tena tulaga mo ana manatu, kae toka o fai so se mea ‵tau telā e manako a ia ki ei.

8-10. Ne a nisi auala e fesoasoani atu te āva ke fai ei te fakaipoipoga ke tumau kae fakafiafia?

⁸ A latou kolā e fia maua ne latou se fakaipoipoga fiafia e fakaasi atu ne latou te āva ki olotou avaga mai te “kilokilo ki mea e ‵lei ei [olotou avaga], kae se ko mea fua e ‵lei ei [latou].” (Filipi 2:4) E se mafau‵fau fua latou ki mea e ‵lei ei latou​—telā ko te manatu fakapito. I lō te fai penā, e mafau‵fau foki latou ki toe mea ‵lei mō olotou avaga. A te ‵tonuga loa, e fakamuamua ne latou a manakoga o olotou avaga.

⁹ A te āva ka fesoasoani atu ki taki tauavaga ke āva latou ki te kese‵kese o olotou kilokiloga. E se se mea ‵lei ke mafaufau me e ‵pau faeloa a kilokiloga a tino e tokolua i mea katoa. E mafai o tāua se mea e tasi ki te tagata avaga kae e se tāua malosi ki tena avaga, kae e mafai o fiafia te fafine avaga ki se mea kae e se fiafia ki ei tena avaga. Kae e ‵tau o fakatau āva a laua ki kilokiloga mo filifiliga a laua taki tokotasi, maise eiloa māfai e fetaui a mea konei mo tulafono mo akoakoga fakavae a Ieova. (1 Petelu 2:16; fakatusa ki te Filemoni 14.) E se gata i ei, e ‵tau o fakaasi atu ne laua taki tokotasi te āva ki te tulaga o te suā tino i te ‵kalo keatea mai te faiga o pati sele io me ko pati fai fa‵kata e uiga ki te suā tino, i mua o tino io me i a laua eiloa.

¹⁰ E tonu, a te alofa ki te Atua mo laua foki eiloa mo te lā fakatau āva ko auala tāua e lua konā ke maua ei se fakaipoipoga manuia. E mafai pefea o fakagalue aka a uiga konei i nisi vaega tāua o te olaga fakatauavaga?

KE PELĀ MO TE TULAGA PULE O KELISO

11. E ‵tusa mo te Tusi Tapu, ko oi te ulu o te kāiga?

¹¹ E fai mai te Tusi Tapu me ne faite te tagata mo uiga kolā e mafai ei o manuia a ia e pelā me ko te ulu o te kāiga. Ona ko tena tulaga, ka fakamasino eiloa a ia ne Ieova e uiga ki te ‵lei o tena avaga mo ana tama‵liki i te feitu faka-te-agaga mo te feitu faka-te-foitino. Ko ‵tau ei o fai ne ia a fakaikuga paleni kolā e fakaata mai i ei a mea e loto a Ieova ki ei kae fai foki a ia mo fakaakoakoga ‵lei i mea tau amioga. “A koutou e fāfine, ke faka‵logo koutou ki otou avaga, e pelā eiloa mo te otou faka‵logo ki te Aliki. Me i te tagata e isi sena pule i luga i tena avaga, e pelā eiloa mo Keliso e isi foki sena pule i te ekalesia.” (Efeso 5:22, 23) Kae e fai mai te Tusi Tapu me e isi foki se ulu o te tagata, ko te Tino telā e pule atu ki a ia. Ne tusi mai te apositolo ko Paulo: “Au e manako ke iloa ne koutou i a Keliso e sili eiloa i tino katoa, a te tagata e sili foki i tena avaga, ka ko te Atua e sili foki i a Keliso.” (1 Kolinito 11:3) E taumafai te tagata avaga poto o fakagalue tena tulaga pule i te kāiga mai te fakaakoako atu ki tena pule, ko Keliso Iesu.

12. Se a te fakaakoakoga ‵lei ne tuku mai ne Iesu i te fakaasiatuga o te fakalogo mo te fakagaluegāga o tena tulaga pule?

¹² E isi foki se ulu o Iesu, ko Ieova, kae e fakalogo faka‵lei eiloa tou tagata ki a Ia. Ne fai mai Iesu: “Me se fai ne au i toku loto, ka ko te loto o ia telā ne uga mai ne ia au.” (Ioane 5:30) Ko tafaga la te gali o te fakaakoakoga tenā! A Iesu ko “te uluaki o mea katoa ne faite.” (Kolose 1:15) Ne fai a ia mo fai te Mesia. Ne filifili a ia ke fai mo Ulu o te fakapotopotoga o Kelisiano fakaekegina mo te Tupu filifilia i te Malo o te Atua, telā e maluga atu i agelu katoa. (Filipi 2:9-11; Epelu 1:4) E tiga eiloa te maluga o tena tulaga mo mea kolā ka fai ne ia, ne seki faigatā, loto ‵fika, io me e fakatonu mālō atu a ia. Ne seki pule fakasauā atu a ia, mai te fakamasaua atu faeloa ki ana soko me e ‵tau o faka‵logo latou ki a ia. Ne alofa kae atafai atu a Iesu, maise eiloa ki tino fakaa‵lofa. Ana muna: “O‵mai ki a au a koutou katoa kolā e fi‵ta i te ‵mafa otou amoga, me ka avatu ne au ki a koutou a te malōlōga. Ke amo ne koutou taku amoga, kae fakaakoako mai ki a au, me i a au e filemu kae loto malalo; e maua foki i ei ne koutou a te tokaga malie otou agaga. Me amogofie taku amoga, kae māmā foki.” (Mataio 11:28-30) Se mea fakafia‵fia ‵ki a te nofo atu i ana tafa.

13, 14. E fakagalue aka pefea ne se tagata alofa tena tulaga e pelā me ko te ulu o te kāiga, i te fakaakoako atu ki a Iesu?

¹³ Se mea ‵lei mo te tagata avaga telā e manako ki se kāiga fiafia ke mafaufau faka‵lei ki uiga ‵gali o Iesu. E se sauā kae pule mālō atu se tagata avaga ‵lei, mai te fakaaogā ‵se o tena tulaga pule ke fakamatakutaku atu ei ki tena avaga. I lō te fai penā, e alofa kae fakaaloalo atu a ia ki tou fafine. Kafai e “loto malalo” a Iesu, e ‵tau o silia atu te loto maulalo o te tagata avaga, me e se pelā mo Iesu, e fai mea ‵se a ia. Kafai e fai ne ia se mea ‵se, e manako a ia ke maua ne tena avaga fafine te loto malamalama. Tela la, e taku ‵tonu atu ne se tagata avaga loto maulalo ana mea ‵se, faitalia eiloa te faigatā ke fai atu, “Au ko ‵se; e tonu koe.” Ka faigofie atu ke āva se fafine avaga ki te takitakiga a tena avaga fatauvā kae loto maulalo i lō se avaga fakamatamata kae fai tonu. I te suā feitu la, e fakatoese atu foki te fafine avaga telā e āva māfai ko ‵se a ia.

¹⁴ Ne faite ne te Atua te fafine mo uiga ‵lei kolā e mafai o fakaaogā ne ia ke fesoasoani atu ei ki te faiga o se fakaipoipoga manuia. Ka lavea ne se tagata avaga poto te mea tenei kae ka se fai mālō ne ia tou fafine. E foliga mai me e sili atu te alofa mo te mafaufau ‵lei foki o fāfine, ko uiga kolā e manakogina i te tausiga o te kāiga mo te fakamalosiakaga o fesokotakiga ‵lei i vā o tino. I te ukega o taimi, ko te fafine eiloa telā e fai ne ia te fale o te kāiga mo fai se koga gali ke ‵nofo i ei. A te fafine “avaga telā e fakatuagagina” telā e fakamatala mai i te Faataoto mataupu e 31, e maua ne ia a uiga mo taleni tafasili i te gali kae e maua ne tena kāiga a mea aogā katoa mai i ei. Kaia? Me i te loto o tena avaga “e talitonu katoatoa” ki tou fafine.​—Faataoto 31:10, 11.

15. E mafai pefea o fakaasi atu ne se tagata avaga te alofa faka-Keliso mo te āva ki tena avaga?

¹⁵ I nisi tuu mo aganuu, e fakatāua malosi i ei te pulega a te tagata avaga, telā e mafai o sē āva se tino i te ‵sili atu fua o se fesili ki a ia. E mafai eiloa o fai ne ia tena avaga e pelā me se pologa. A te fakaaogāga ‵se penā o te pulega e iku atu eiloa ki se fesokotakiga masei, e se mo tena avaga fafine fua kae e pelā foki mo te Atua. (Fakatusa ki te 1 Ioane 4:20, 21.) I te suā feitu la, e fakata‵mala a nisi tāgata a‵vaga o fai te takitakiga, mai te taliaga o olotou avaga fāfine ke pule atu ki te kāiga. A te tagata avaga telā e fakalogo faka‵lei ki a Keliso e se fai valevale ne ia tena avaga io me e se amanaia ki tulaga fakaaloalogina o tou fafine. I lō te fai penā, e fakaakoako a ia ki te alofa sē fakapito o Iesu kae fakagalue ne ia a pati fakatonutonu a Paulo konei: “A koutou e tāgata, ke a‵lofa koutou ki otou avaga, e pelā eiloa mo Keliso ne alofa ki te ekalesia, kae tuku atu foki tona ola mō te ekalesia.” (Efeso 5:25) Ne alofa malosi a Keliso Iesu ki ana soko telā ne mate ei a ia mō latou. A te tagata avaga ‵lei ka taumafai o fakaakoako atu ki te uiga sē fakapito tenā, mai te taumafai o ‵sala atu ki mea e ‵lei ei tena avaga, i lō te faimālō atu ke fai faeloa a mea e manako a ia ki ei. Kafai e fakalogo te tagata avaga ki a Keliso kae fakaasi atu ne ia te alofa mo te āva e pelā mo Keliso, ka fakamalosigina ei tena avaga ke fakalogo foki ki a ia.​—Efeso 5:28, 29, 33.

TE FAKALOGO E PELĀ ME SE AVAGA FAFINE

16. Ne a uiga e ‵tau o fakaasi atu ne se fafine avaga i tena fesokotakiga mo tena avaga?

¹⁶ Mai tua malie o te taimi ne faite ei Atamu, “muna a [Ieova] te Atua, ‘E se ‵lei māfai e nofo tokotasi te tagata. Ka faite ne au se soa mo ia ke fesoasoani ki a ia.’” (Kenese 2:18) Ne faite ne te Atua a Eva e pelā me se “fesoasoani,” kae e se pelā me sena nafa. Ne seki fai te fakaipoipoga e pelā me se vakamutu telā e tokolua a kapeni kolā e fakatau‵fai i ei. Ne ‵tau mo te avaga tagata o fakagalue tena pulega mo te alofa, kae ne ‵tau o fakaasi atu ne te fafine a te alofa, te āva, mo tena loto fiafia o fakalogo.

17, 18. Ne a nisi auala e fai ei se fafine mo fai se fesoasoani tonu ki tena avaga?

¹⁷ Kae e uke atu a mea e fai ne se fafine avaga ‵lei i lō te fakalogo fua. E taumafai a ia ke fai pelā me se tinā fesoasoani tonu, mai te ‵lago atu ki tena avaga i fakaikuga kolā e fai ne ia. E tonu, e faigofie ki a ia ke fai penā māfai e lotomalie a ia ki ana fakaikuga. Kae kafai foki loa e se lotomalie tou fafine, a tena ‵lago malosi atu e mafai eiloa o fesoasoani atu ki te iku manuia o te fakaikuga tenā.

¹⁸ E mafai foki o fesoasoani atu te fafine avaga ke fai tena avaga mo fai se ulu ‵lei i nisi feitu. E mafai o fakaasi atu ne ia tena loto fakafetai mō ana taumafaiga i te faiga o te takitakiga, i lō te munasele atu io me ko te faiga ke mafaufau tou tagata me e se mafai lele eiloa o fakafiafia ne ia tena avaga. I ana faifaiga aogā ki tena avaga tagata, e ‵tau o masaua ne tou fafine me i “te loto malalo mo te agaga filemu . . . ne mea tāua i mua o te Atua” kae e se ki tena avaga fua. (1 Petelu 3:3, 4; Kolose 3:12) Kae e a māfai te tagata e se se tino talitonu? Faitalia me se tagata talitonu io me ikai, e fakamalosi mai te Tusi Tapu ki fāfine a‵vaga ke “a‵lofa ki olotou avaga mo tama‵liki, ke loto pulea kae amio ‵lei, ke fai latou mo fāfine ‵lei o te kāiga, e a‵lofa kae faka‵logo foki ki olotou avaga, ko te mea ke se fakamasei ne latou a te muna a te Atua.” (Tito 2:4, 5) Kafai e isi ne mea tau te loto lagona e ‵sae aka, kāti e faigofie o āva se tagata avaga sē talitonu ki te tulaga o tena avaga māfai e fakaasi atu te mea tenā mo te “loto malalo mo te āva” lasi. E isi ne avaga tāgata sē tali‵tonu ko oti ne “tosina mai latou ke tali‵tonu ona ko [olotou] amioga. E se manakogina foki te fai‵pati o [olotou avaga] ki ei, me e matea eiloa ne latou te ‵ma mo te ‵tonu o [olotou] amioga.”​—1 Petelu 3:1, 2, 15, 16; 1 Kolinito 7:13-16.

19. Kae e a māfai ko fai atu te tagata ki tena avaga ke ofa ne ia te tulafono a te Atua?

¹⁹ Kae e a māfai ko fai atu te tagata ki tena avaga ke fai ne ia se mea telā e fakatapu ne te Atua? Kafai e tupu se mea penā, e ‵tau o masaua ne te fafine me i tena toe Pule sili ko te Atua. E tautali atu a ia ki te fakaakoakoga a te kau apositolo i te taimi ne fakatonu atu ei ke ofa ne latou te tulafono a te Atua. E fai mai te Galuega 5:29: “Ne tali atu a Petelu mo nisi apositolo, olotou muna, ‘E ‵tau mo matou o faka‵logo ki te Atua i lō te fakalogo ki tino.’”

FESOKOTAKIGA ‵LEI

20. Se a te feitu tāua telā e manakogina malosi ei te alofa mo te āva?

²⁰ E tāua foki te alofa mo te āva i se isi feitu o te fakaipoipoga​—ko fesokotakiga. Ka sau‵tala fakatasi te tagata avaga alofa mo tena avaga e uiga ki ana galuega, ana fakalavelave, ana kilokiloga e uiga ki mea kese‵kese. E manako eiloa tou fafine ki ei. A te tagata avaga telā e fakaaogā ne ia ne taimi ke fai‵pati mo tena avaga kae fakalogologo faka‵lei atu ki ana muna, e fakaasi atu eiloa ne ia tena alofa mo tena āva ki tena avaga. (Iakopo 1:19) E fāmeo sāle a nisi fāfine a‵vaga me e se lava a taimi e fakamāumāu ne olotou avaga ke sau‵tala mo latou. E fakafanoanoa eiloa te mea tenā. E tonu, i taimi fakalave‵lave konei, kāti ka ga‵lue a tāgata a‵vaga i itula e uke, kae e mafai foki o iku atu a tulaga i mea tau tupe ki te ga‵lue o nisi fāfine a‵vaga. Kae e ‵tau eiloa o fakaavanoa ne te tauavaga se taimi mō laua eiloa. Kafai e se fai penā, e mafai o iku atu ki te tu tokotasi o te suā tino mai te suā tino. E mafai o iku atu te mea tenā ki fakalavelave ‵lasi māfai ko taumafai laua o ‵sala atu ki ne taugasoa fakafia‵fia i tua o te fakaipoipoga.

21. Ka fakatumau aka pefea ne pati ‵lei a te fiafia i te fakaipoipoga?

²¹ E tāua eiloa te auala e fai ei a fesokotakiga a te tauavaga. “A muna alofa e . . . ‵lei ki te foitino.” (Faataoto 16:24) Faitalia me se tino talitonu tau avaga io me ikai, e aogā eiloa a pati fakatonutonu konei mai te Tusi Tapu: “Ke isi se alofa i otou pati e fai sāle, ke faka‵kona foki ki te masima,” ke ‵lei i te kai. (Kolose 4:6) Kafai ko fi‵ta malosi se tino mai te galue i te aso kātoa, a nāi pati fakaalofa‵lofa mai tena avaga ka uke ‵ki eiloa a mea ‵lei e mafai o maua mai i ei. “A te manatu telā ne gali te fakaasiga, e pelā me se mea ne faite ki aulo mo siliva.” (Faataoto 25:11) E tāua ‵ki eiloa te tulaga o te leo mo te filifiliga o pati kolā e ‵tau o fai atu. E pelā me se tulaga fakaitaita kae faimālō, e mafai o fai atu se tino ki te suā tino: “‵Pono te mataloa!” Kae e sili atu māfai e ‘faka‵kona au pati ki masima,’ kae fai atu i se leo filemu mo te loto malamalama, “Fakamolemole, e mafai o ‵pono aka ne koe te mataloa tenā?”

22. Ne a lagonaga e ‵tau o maua ne se tauavaga ko te mea ke fakatumau aka ei te lā fesokotakiga ‵lei?

²² E masani loa o ‵gali a fesokotakiga māfai e ata faipati atu, te tulaga ou foliga mo au tāga, te mataalofa, te loto malamalama, mo uiga atafai. Mai te ga‵lue malosi o fakatumau te lā fesokotakiga, ka mafai ei o se ma‵taku te tauavaga o fakatau fakaasi atu lā manakoga, kae ko mafai ei o fakatau fakamafanafana kae fakatau fesoasoani laua i taimi fanoa‵noa io me ko taimi faiga‵ta. E fakamalosi mai te Muna a te Atua: “Fesoasoani io me fakamafanafana ki tino [loto] vāi‵vāi.” (1 Tesalonia 5:14) E isi eiloa ne taimi e loto vāivāi ei se tino i te tauavaga. E mafai eiloa o fakatau “fesoasoani,” io me faipati fakamafanafana atu mai te fakatau fakamalosi atu o te suā tino ki te suā tino.​—Loma 15:2.

23, 24. Ka fesoasoani atu pefea te alofa mo te āva māfai ko isi ne kese‵kesega i lā manatu? Ke fakaasi mai se fakaakoakoga.

²³ A te tauavaga telā e fakatau fakaasi atu ne laua te alofa mo te āva ka se mafai eiloa o ‵kilo atu ki te kese‵kesega o lā manatu katoa e pelā me ne fakalavelave faiga‵ta. Ka taumafai malosi laua ke mo a ma fakatau “fakasauā” atu laua. (Kolose 3:19) E ‵tau o masaua ne laua tokolua me i “te tali i te leo filemu e galo ei te kaitaua.” (Faataoto 15:1) Fakaeteete ke mo a ma fakamā io me taku fakamasei ne koe tau avaga telā e fakaasi atu ana lagonaga ‵loto. I lō te fai penā, kilo atu ki vaegā fakaasiga penā e pelā me se avanoaga ke malamalama ‵lei koe i te kilokiloga a te suā tino. Taumafai eiloa o faka‵lei aka a kese‵kesega konā kae ke maua mai i ei se fakaikuga ‵lei.

²⁴ Masaua te taimi ne fakaasi atu ei ne Sala ki tena avaga, ko Apelaamo, se faka‵leiga ki se fakalavelave kae ne seki fiafia tou tagata ki ei. Kae ne fai atu a te Atua ki a Apelaamo: “Fai so se mea e fai atu ne Sala.” (Kenese 21:9-12) Ne fakalogo Apelaamo kae ne fakamanuiagina ei a ia. E penā foki tatou, kafai e fakaasi atu ne te avaga fafine se mea telā e ‵kese mai te mea telā e mafaufau ki ei tena avaga, e ‵tau eiloa mo te tagata o mafaufau ki ei. Kae e se ‵tau foki mo te fafine o ‵losi mālō māfai ko sau‵tala laua e uiga ki ei, kae e ‵tau o fakalogologo a ia ki pati a tena avaga. (Faataoto 25:24) Me kafai e ‵losi mālō atu te tagata io me ko te fafine ke fai te mea e loto a ia ki ei i taimi katoa, e se se faifaiga alofa te mea tenā kae e se fakaasi atu foki i ei te āva.

25. Ka fesoasoani atu pefea a fesokotakiga ‵lei ki te lā fia‵fia i te ‵toe fesokotakiga pili tenei i te olaga fakatauavaga?

²⁵ E tāua foki a fesokotakiga ‵lei i faifaiga fakatauavaga a te tauavaga. A te uiga kaimanako mo te sē lava o te loto pulea e mafai o iku atu ki te fakamaseiga o te ‵toe fesokotakiga pili tenei i te fakaipoipoga. E tāua ‵ki eiloa te sau‵tala faka‵lei, fakatasi mo te onosai. Kafai e mafau‵fau faeloa a tino takitokotasi ki te ‵lei o te suā tino, e faigatā eiloa o fai a faifaiga fakatauavaga mo fai se fakalavelave lasi. E ‵tusa mo te mea tenei, penā foki loa mo nisi mea aka, “e se ‵tau mo se tino o kilokilo faeloa ki tena ‵lei, ka ko te ‵lei foki o [te suā] tino.”​—1 Kolinito 7:3-5; 10:24.

26. E tiga eiloa e isi ne fakalavelave e fe‵paki mo taki tauavaga, ka fesoasoani atu pefea a te fakalogo ki te Muna a te Atua ki tauavaga ke maua ne latou te fiafia?

²⁶ Ko tafaga la te ‵gali o pati fakatonutonu kolā e tuku mai i te Muna a te Atua! E tonu, e isi faeloa ne fakalavelave i kāiga fakaipoipo katoa. Kae kafai e talia ne te tauavaga a mafaufauga o Ieova, kolā e fakaasi mai i te Tusi Tapu, kae fakavae te lā fesokotakiga ki te alofa mo te āva, e mafai eiloa o tali‵tonu laua me ka tumau kae fakafiafia te lā kāiga fakaipoipo. I te fai penā, ka se gata fua i te fakatau fakaasi atu ne laua te fakaaloalo ki a laua eiloa kae e fakaasi atu foki ne laua te āva ki te Māfuaga o te fakaipoipoga, ko Ieova te Atua.