MATAUPU 49
E Mafai Pefea o Fia‵fia Tou Kāiga?—Vaega 1
E fakamoe‵moe a te tauavaga fou ke tumau ki te se-gata-mai a te fiafia ne maua ne lāua i te aso o te lā fakaipoipoga. Kae e mafai eiloa. E iloa ne Kelisiano kolā ko leva ne avaga kae fakagalue ne latou a pati fakatonutonu i te Tusi Tapu me e mafai eiloa o maua.
1. Ne a pati fakatonutonu i te Tusi Tapu ki tāgata a‵vaga?
Ne ‵tofi aka ne Ieova a te tagata ke fai mo ulu o te kāiga. (Faitau te Efeso 5:23.) E manako a Ieova ke fai ne ia a fakaikuga kolā ka aoga ki te kāiga. E fakatonu atu te Tusi Tapu ki tāgata a‵vaga: “Tumau koutou i te a‵lofa ki otou avaga.” (Efeso 5:25) Se a te uiga o te mea tenā? A te tagata avaga alofa e fai faka‵lei ki tena avaga i te fale, kae penā foki loa i mua o tino. E puipui ne ia tou fafine mai i mea fakalogo‵mae kae fai te ‵toe mea e mafai o fai ke tausi atu ki ana manakoga faka-te-foitino mo mea tau lagonaga. (1 Timoteo 5:8) Kae e sili atu i ei, e fai ne ia te takitakiga ke tausi atu ki manakoga faka-te-agaga o tou fafine. (Mataio 4:4) E pelā mo te ‵talo kae fai‵tau fakatasi mo tena avaga ki te Tusi Tapu. Kafai e tausi atu se tagata mo te atafai ki tena avaga, e fakatumau ne ia tena va fakataugasoa mo Ieova.—Faitau te 1 Petelu 3:7.
2. Ne a pati fakatonutonu mai te Tusi Tapu ki fāfine a‵vaga?
E fai mai te Muna a te Atua me i te fafine avaga “e ‵tau o āva malosi ki tena avaga.” (Efeso 5:33) E fai pefea ne ia te mea tenā? E mafai o mafaufau tou fafine ki uiga ‵gali o tena avaga mo ana taumafaiga ke tausi atu ki a ia mo tama‵liki. E mafai foki o fakaasi atu ne ia te āva mai te ‵lago atu ki fakaikuga e fai ne tou tagata, faipati atu mo te atafai, kae taku atu foki a mea ‵lei e uiga ki a ia, faitalia me e sē se tino talitonu.
3. E fakamalosi aka pefea ne se tauavaga te lā olaga avaga?
E fai mai te Tusi Tapu e uiga ki taki tauavaga: “Ka fai lāua mo fai se foitino e tasi.” (Mataio 19:5) Ko tena uiga, e ‵tau mo lāua o ‵teke atu ki so se mea telā e mafai o fakavāivāi atu ki te lā a‵lofa. E fai ne lāua te mea tenei mai te fakamāumāu o taimi e uke ke sau‵tala kae fakatau fakaasi atu mo te alofa lā mafaufauga mo lagonaga. E se talia ne lāua se mea io me se tino—i tafa o Ieova—ke tāua atu i lō tena avaga. E fakaeteete malosi lāua ke mo a ma ati aka se va fakataugasoa sē ‵tau mo se isi tino.
KELI MALOSI IFO
Onoono ki akoakoga fakavae i te Tusi Tapu kolā e mafai o fakamalosi aka ei tou olaga avaga.
4. Tāgata a‵vaga—a‵lofa kae tausi faka‵lei otou avaga
E fai mai te Tusi Tapu me e ‵tau “o a‵lofa a tāgata a‵vaga ki olotou avaga e pelā eiloa me ko olotou foitino ‵tonu.” (Efeso 5:28, 29) Se a te uiga o te mea tenā? Pei te VITIO, ko sau‵tala ei ki te fesili tenei.
Ne a nisi auala e fakaasi mai ne se tagata avaga me e alofa kae atafai a ia ki tena avaga?
Faitau te Kolose 3:12, ko sau‵tala ei ki te fesili tenei:
E fakaasi atu pefea ne se tagata avaga a uiga konei i tena olaga avaga?
5. Fāfine a‵vaga—a‵lofa kae āva ki otou avaga
E fakamalosi atu te Tusi Tapu ke āva se fafine avaga ki tena avaga, faitalia me e tavini atu a ia ki a Ieova io me ikai. Faitau te 1 Petelu 3:1, 2, ko sau‵tala ei ki fesili konei:
Kafai tau avaga se tino sē talitonu, e mautinoa me e manako koe ke tapuaki atu a ia ki a Ieova. Se a tau faka‵tau, tefea te mea e magoi atu—ko te talai atu faeloa ki a ia io me ko te fakaasi atu o uiga ‵lei mo te āva ki a ia? Kaia?
E mafai o fai fakatasi ne taki tauavaga a fakaikuga ‵lei. Kae i nisi taimi, e mafai o se lotomalie te fafine ki tena avaga. E mafai o fakaasi atu ne ia ana mafaufauga i se auala filemu mo te āva, kae e ‵tau foki o masaua ne ia me ne tuku atu ne Ieova ki te tagata a te tiute ke fai ne ia a te ‵toe fakaikuga ‵lei mō te kāiga. E ‵tau o fai ne tou fafine te ‵toe mea e mafai ke ‵lago atu ki te fakaikuga a tou tagata. I te faiga penā, ko fai ne ia ke fiafia te kāiga. Faitau te 1 Petelu 3:3-5, ko sau‵tala ei ki te fesili tenei:
E pefea a lagonaga o Ieova māfai e fakaasi atu ne te fafine te āva ki tena avaga?
6. E mafai o manumalo koe i fakalavelave kolā e ‵sae aka i tou olaga avaga
E seai se olaga avaga e ‵lei katoatoa. Tela la, e ‵tau o ga‵lue fakatasi se tauavaga ke manumalo i fakalavelave. Pei te VITIO, ko sau‵tala ei ki fesili konei.
I te vitio, ne a nisi fakailoga e lavea atu me ko gasolo o se ‵pili te va o se tauavaga?
Ne a mea ne fai ne lāua ke fakamalosi aka te lā olaga avaga?
Faitau te 1 Kolinito 10:24 mo te Kolose 3:13. Kafai ko oti ne faitau ki tusi fai‵tau, sau‵tala ki te fesili tenei:
E fakamalosi aka pefea se olaga avaga mai te fakagaluegaga o te manatu fakatonutonu tenei?
E fai mai te Tusi Tapu me e ‵tau mo tatou o fakatau fakaaloalo. A te fakaasi atu o te fakaaloalo e aofia i ei a te atafai atu mo te āva ki se tino. Faitau te Loma 12:10, ko sau‵tala ei ki fesili konei:
E mata, e ‵tau mo se tauavaga o faka‵tali ke fakaasi atu mua ne te suā tino a te fakaaloalo? Kaia?
MEA E FAI MAI NE NISI TINO: “A maua mo taku avaga ko se ‵pili malosi e pelā mo taimi mua.”
E fakamatala atu pefea ne koe me e mafai o fesoasoani atu te Tusi Tapu ki a lāua?
MANATU AOGA
E mafai o fia‵fia se tauavaga māfai e fakatau a‵lofa, fakatau āva, kae fakagalue a akoakoga fakavae i te Tusi Tapu.
Fesili
E mafai pefea o fesoasoani atu se tagata avaga ke maua se olaga avaga fiafia?
E mafai pefea o fesoasoani atu se fafine avaga ke maua se olaga avaga fiafia?
Kafai koe ko oti ne avaga, se a te akoakoga fakavae i te Tusi Tapu e mafai o fesoasoani atu ke fakamalosi aka tou olaga avaga?
NISI FAKAMATALAGA
Faitau ki manatu aoga kolā e mafai o fesoasoani atu ke maua ne koe se olaga avaga fiafia.
Onoono ki te pese-vitio telā e fakaasi mai i ei a fakamanuiaga e maua māfai e fakagalue a pati fakatonutonu a te Atua e uiga ki te olaga avaga.
Iloilo aka a te uiga o te fakalogo ki te ulu o te kāiga.
“Fafine, Kaia e Faka‵logo ei ki te Ulu o te Kāiga?” (Te Faleleoleo Maluga, Me 1, 2010)
Ne manumalo pefea se tauavaga i fakalavelave faiga‵ta—e aofia i ei te ‵talaga o te lā avaga?
Ne Toe Ati Aka te mā Olaga Avaga Mai te Fesoasoani o te Atua (5:14)