Te Auala ke Tauloto ei Koe e Uiga ki te Atua

E mafai ne koe o tauloto e uiga ki a Ieova mai i te faitau sāle ki te Tusi Tapu. I aso mua loa, ne filifili aka ne te Atua a nisi tino ke na tusi ne latou ki lalo ana manatu. E fakaigoa a tusitusiga konā ki te Tusi Tapu. I aso nei, e tau‵loto sāle tatou e uiga ki te Atua mai i te faitau ki te Tusi Tapu. Me e maua te Muna a Ieova, io me ko tena fekau, i te Tusi Tapu, e fakaigoa sāle te tusi tenā e pelā me ko te Muna a te Atua. E mafai o tali‵tonu tatou ki te Tusi Tapu me e se mafai lele eiloa o pati loi a Ieova. ‘E se mafai o loi te Atua.’ (Epelu 6:18) E maua te munatonu i te Muna a te Atua.—Ioane 17:17.

A te Tusi Tapu se meaalofa tafasili i te tāua mō tatou. E fai te tusi tenā e pelā me se tusi alofa a se tamana alofa ki ana tama. E fakailoa mai i ei e uiga ki te folafolaga a te Atua ke ‵fuli te lalolagi mo fai se koga gali ke ‵nofo i ei—se palataiso. E fai mai i ei a tala e uiga ki ana faifaiga i aso mua, mea kolā e fai nei ne ia, penā foki loa mo mea kolā ka fai ne ia i aso mai mua nei mō ana tama fakamaoni. E fesoasoani mai foki i ei ke faka‵lei aka ne tatou ‵tou fakalavelave kae ke maua ne tatou te fiafia.—2 Timoteo 3:16, 17.

A Molimau a Ieova ne taugasoa o te Atua; ka fesoasoani atu latou ke maina koe i akoakoga a te Tusi Tapu. Fai atu fua ki a latou me e fia akoga koe i te Tusi Tapu. E se ‵tau o ‵togi atu a tupe ki a latou ke fai penā. (Mataio 10:8) E mafai foki o kau sāle atu koe ki fakatasiga a Kelisiano. E fai sāle a fakatasiga konā i fale tapuaki ko Kingdom Halls. Kafai e kau sāle atu koe ki fakatasiga a Kelisiano, ka gasolo fakavave ki mua tou malamalama e uiga ki te Atua.

E mafai ne koe o tauloto e uiga ki te Atua mai i mea kolā ne faite ne ia. E pelā mo muna konei i te Tusi Tapu: “Ne faite ne te Atua te lagi mo te lalolagi.” (Kenese 1:1, NW) I te taimi ne faite ei ne Ieova “te lagi,” ne faite ne ia te la. Ne a mea e fakaasi mai i ei e uiga ki te Atua? E fakaasi mai i ei me e lasi ‵ki eiloa te malosi o Ieova. Ko ia fua tokotasi e mafai ne ia o faite se mea malosi e pelā mo te la. E fakaasi mai foki i ei me e poto a Ieova, me ne ‵tau o poto a ia ke faite te la, telā e tuku mai faeloa i ei te mainaga mo te ‵vela kae e se mafai o mate.

E fakaasi mai ne mea kolā ne faite ne Ieova me e alofa mai a ia ki a tatou. Ke mafaufau ki te fia o vaegā fuagālakau kese‵kese kolā e maua i te lalolagi nei. Ne mafai fua ne Ieova o tuku mai se vaega e tasi mō tatou—io me e seai eiloa. Ne seki fai penā, me ne tuku mai ne Ieova te fia o vaegā fuagālakau kolā e kese‵kese olotou foliga, olotou ‵lasi, olotou lanu, mo olotou ma‵nogi. E fakaasi mai i ei me i a Ieova se Atua alofa kae kaimalie kae e atafai mai foki a ia.—Salamo 104:24.