Ko oi a Taugasoa o te Atua?

A Iesu Keliso ko te Tama a Ieova kae ko tena toe taugasoa pele foki. A koi tuai o ola a ia i te lalolagi nei, ne ola muamua a Iesu i te lagi e pelā me se tino faka-te-agaga telā e malosi ‵ki. (Ioane 17:5) Kae ne vau a ia ki te lalolagi ke akoako atu ki tino a te munatonu e uiga ki te Atua. (Ioane 18:37) Ne tuku atu foki ne ia tena olaga pelā me se tagata ke fakaola ei a tino fakalogomuna mai te agasala mo te mate. (Loma 6:23) A Iesu ko te Tupu nei i te Malo o te Atua. Tenā loa te pulega faka-te-lagi telā ka aumai i ei te Palataiso ki te lalolagi nei.—Fakaasiga 19:16.

Te kau agelu ko taugasoa foki o te Atua. Ne seki kamata a olaga o agelu e pelā me ne tino i te lalolagi nei. Ne faite latou ke ola i te lagi a koi tuai o faite ne te Atua te lalolagi nei. (Iopu 38:4-7) E lau i miliona te kau agelu. (Tanielu 7:10) E ma‵nako a taugasoa faka-te-lagi konā o te Atua ke na tau‵loto a tino ki te munatonu e uiga ki a Ieova.—Fakaasiga 14:6, 7.

E isi foki ne taugasoa o te Atua i te lalolagi nei; ko ana molimau konā. A te molimau i se fono fāmasino e taku atu ne ia a mea kolā e iloa ne ia e uiga ki se tino io me se mea. E taku atu ne Molimau a Ieova ki nisi tino a mea kolā e iloa ne latou e uiga ki a Ieova mo tena fuafuaga. (Isaia 43:10) E pelā mo te kau agelu, e fia fesoasoani atu te kau Molimau ki a koe ke iloa ne koe te munatonu e uiga ki a Ieova. E ma‵nako eiloa latou ke fai foki koe mo fai se taugasoa o te Atua.