Kingdom News No. 36

Te Meleniuma fou—Ne a Mea ka ‵Tupu i ei ki a Koe?

Te Meleniuma fou—Se Kamataga Fou?

TE VALUAPO i a Tesema 31, 1999, ne palele atu ei te 20 senitenali.a E uke a fakalavelave ne ‵tupu i te senitenali tenā. Kae ne maua foki i ei a nisi poto ‵fou, mea fakaofoofogia i mea tau tokitā, te fia o fakamatalaga ‵fou, mo te gasolo fakavave ki mua o mea tau tupe o fenua katoa i te lalolagi. Ne fia‵fia a nisi tino e tokouke ki te meleniuma fou e pelā me se taimi o fakamoemoega mo fakama‵fuliga. E a, ka gata atu i ei a taua, te mativa, fakalailaiga o te lalolagi, mo masaki?

Tenā loa te fakamoemoega o tino e tokouke. Kae e mata, ka ‵tupu a ‵fuliga i te meleniuma fou kolā ka aogā tonu ki a koe​—ko vaegā ‵fuliga kolā ka fai ei ke tokagamalie koutou mo ou kāiga otou olaga mo te olaga o tou kāiga? Ke mafaufau malie aka ki te faigata o nisi fakalavelave kolā e fe‵paki mo tatou.

Fakalailaiga o te Lalolagi

A atufenua faipisinisi ko “fakama‵sei ne latou a mea i te lalolagi kātoa, e fakalailai i ei te lalolagi kae e fakamakosu foki i ei a mea ola katoa.” Kafai e tumau a faifaiga konā “ka gasolo o vāivāi ‵ki a malosi o te lalolagi nei.”​—“Global Environment Outlook​—2000,” te Polokalame a Malo ‵Soko mō te Tausiga o te Lalolagi.

Masaki

“E fakatautau aka pelā me i te tausaga ko te 2020, ka ‵mate sāle ei te taki tokofitu mai te taki tokosefulu o tino i fenua koi ati aka i masaki kolā e se ne famai ‵pisi. Kae e āfa fua te aofaki tenā e ‵mate sāle i ei i aso nei.”​—“The Global Burden of Disease,” Harvard University Press, i te 1996.

E fai mai a nisi tino ‵poto me “mai i te tausaga 2010, e toko 66 miliona [ka ‵mate] i fenua e 23 kolā e fai valevale i ei te masaki [ko te SELAMETE].”​—“Confront­ing AIDS: Evidence From the Developing World,” se lipoti a te Komisinā o Eulopa mo te Pagike o te Lalolagi.

Te Mativa

“E tai kātoa nei te toko 1.3 piliona tino kolā e se maua ne latou te tasi tālā Amelika i te aso, kae ko tai kātoa te piliona o tino e se lava olotou meakai.”​—“Human Development Report 1999,” te Polokalame a Malo ‵Soko mō te Atiakaga.

Taua

“Kāti ka se fuafuagina eiloa a faifaiga fakasauā kolā ka fai [i nisi fenua]. Ona ko [te ‵kese] o fenua, mata­kāiga mo lotu . . . ka fai a vaegā amioga fakasauā penā . . . mo fai te ‵toe fepakiga masani i tausaga e lua-sefulu-lima kolā ka ‵soko mai . . . , kae ka ‵mate sāle i ei te fia selau afe i tausaga takitasi.”​—“New World Com­ing: American Security in the 21st Century,” te Komisinā mō Puipuiga o Atufenua o te Iunaite Sitete i te 21 o Senitenali.

E fakagalo fakanefu aka fua ne te fiafia mo te ‵pole o tino ki te meleniuma fou a te manatu tonu me ko sili atu nei te fakama‵taku o fakalailaiga o te lalolagi, masaki, te mativa mo taua. Kae e māfua mai a fakalavelave katoa konā i te kaimanako, te sē fealofani, mo te kaiū​—ko vaegā uiga kolā e se mafai o ‵solo keatea i sukesukega fakasaienitisi, poto ‵fou, io me ko mea fakapolitiki.

TE MELENIUMA TELĀ KA MANUIA EI A TINO

E FAI mai penei se tino tusitala i aso mua: “E seai se tino e mafai o takitaki tena auala. E se mafai ne te tagata o fakatonutonu te auala e sasale ei a ia.” (Ielemia 10:23, NW) E se gata fua i te sē mafai ne tino o pule ki te lalolagi kae e seai foki se lotou aiā ke fai penā. Ko te ‵tou Māfuaga fua, ko Ieova te Atua, telā e isi sena aiā mo tena poto ke faka‵lei aka ei a fakalavelave o tino.​—Loma 11:33-​36; Fakaasiga 4:11.

I te taimi fea? Kae e pefea la? E lava kae ‵toe a fakamaoniga me ko ola nei tatou i te ‵toe vaega o “aso fakaoti.” Ke na ‵suke ki tau Tusi Tapu, kae faitau ki te 2 Timoteo 3:1-5. E fakamatala manino mai i ei a uiga masani kolā ka fakaasi atu ne tino i aso “faigata” konei. E fakamatala mai foki ne te Mataio 24:3-14 mo te Luka 21:10, 11 a “aso fakaoti” konei. Kae e faka‵mafa mai i ei a mea kolā ne ‵tupu talu mai te 1914, ko vaegā mea pelā mo taua a te lalolagi, famai, penā foki loa mo oge meakai i fenua e uke.

Ko pili o palele atu a “aso fakaoti” konei. E fai mai penei te Tanielu 2:44: “Ka fakatu ne te Atua o te lagi a te malo tela ka se toe gata mai. . . . Ka fakatakavale ne ia a malo [faka-te-lalolagi] katoa kona, kae ka tumau ki te se gata mai.” Tela la, ne ‵valo mai i ei me ka fakatu aka ne te Atua se Malo, io me se pulega, telā ka pule ki te lalolagi. E pelā mo muna i te Fakaasiga 20:4, ka pule mai te malo tenā i te afe tausaga​—ko te meleniuma! Ke mafaufau malie aka ki nisi auala ka ‵lei atu ei te olaga mō tino katoa i te Meleniuma ‵malu tenā:

Mea Tau Tupe. “A tino ka faite olotou fale ko nofo ei i ei​—⁠ka se toe fakaaoga eiloa ne nisi tino fakaatea. Ka toki olotou togāvine kae inu fiafia i te uaina mai i olotou togāvine kona, kae se toe inu ne nisi tino fakaatea.”​—Isaia 65:21, 22.

Te Malosi Faka-te-Foitino. “A tino kivi ka lavea ne latou a mea, mo tino taliga tuli ka lagona ne latou a mea. A tino vae masei ka eva ki luga kae saka, ka ko tino gugu ka kalaga mo te fiafia.” “Ka seai eiloa se tino i luga i te tou fenua e tagi i a ia e masaki.”​—Isaia 33:24; 35:5, 6.

Fakanofonofoga i te Lalolagi. Ka “fakamasei” ne te Atua “latou kola e fakamasei ne latou te lalolagi!”​—Fakaasiga 11:18.

Fesokotakiga i Va o Tino. “Ka seai eiloa se mea fakamataku kae masei i . . . te mauga tapu o te Aliki. A te laukele ka fonu i te malamalama i uiga o te Aliki [ko Ieova].”​—Isaia 11:9.

E tali‵tonu eiloa te fia miliona o tino ki folafolaga konā i te Tusi Tapu kae e fia‵fia eiloa latou ki mea kolā ka ‵tupu i aso mai mua. Ona ko te mea tenā, e momea aka ei te lotou kufaki i fakalavelave mo mea faiga‵ta o te olaga nei. E mafai pefea o fai te Tusi Tapu mo fai se mea e takitaki malosi ei tou olaga?

TE ILOAGA Telā e Iku Atu ei ki te Ola!

E OFO sāle tatou i mea fakasaienitisi mo poto ‵fou! Kae seki fai ne poto o tino ke tokagamalie kae fiafia te olaga mō te tokoukega o tino. E tasi fua te iloaga telā e mafai o fai penā, ko te iloaga telā e fakamatala mai i te Tusi Tapu i te Ioane 17:3, penei: “Kae tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.”

E maua te vaegā iloaga tenā i loto i te Tusi Tapu. E tiga eiloa e uke a manatu kese‵kese o tino e tokouke e uiga ki te Tusi Tapu, e se tokouke a tino ko oti ne sukesuke faka‵lei ki ei. E a koe na? E tonu, e tai faigata ke faitau ki te Tusi Tapu. Kae e aogā eiloa ke fai penā. A te Tusi Tapu ko te tusi fua e tasi telā “ne ­aumai mai te Atua, kae aoga ki te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei.”​—2 Timoteo 3:16.

E mafai pefea ne koe o fakamasani ki te Tusi Tapu? Kaia e se talia ei ne koe te fesoasoani mai i Molimau a Ieova? E fai sāle ne latou a akoga mō te fia miliona o tino i olotou fale, e aunoa mo se ‵togi. Ke fesoasoani atu ki a koe i te feitu tenā, e fakaaogā sāle ne latou a tusi kese‵kese kolā e fakavae ki te Tusi Tapu, e pelā mo te tusi ko te Ne a Mea e Manako ki ei te Atua ke Fai ne Tatou? E tuku mai i ei a tali ki te fia o au fesili e uiga ki te Tusi Tapu, e pelā mo te: Ko oi te Atua? Se a te fuafuaga a te Atua mō te lalolagi? Se a te Malo o te Atua? E mafai pefea ne te Tusi Tapu o fai ke ‵lei atu tou olaga faka-te-kāiga?

Kafai e manako koe ke āsi mai se Molimau a Ieova ki tou fale, fakamolemole ke na faka‵fonu ne koe te vaega mai lalo nei. Ka fia‵fia eiloa latou ke tuku atu ki a koe a nisi fakamatalaga e uiga ki te Pulega ‵Malu o te Malo o te Atua i te Meleniuma!

□ E fia maua ne au te tusi ko te Ne a Mea e Manako ki ei te Atua ke Fai ne Tatou?

□ Ke fesokotaki mai se tino ki a au e uiga ki te faiga o se akoga faka-te-Tusi Tapu telā e se ‵togi

[Fakamatalaga mai lalo]