Ne a Mea ka ‵Tupu i Aso Mai Mua?
KAIA E TĀUA EI TE TALI KI EI? E pokotia eiloa a fakamoemoega o te tino mō te aso a taeao i ana faifaiga e fai i te aso nei. E pelā me se fakaakoakoga, e mafai o maua ne tino kolā e foliki te lotou fakamoemoega mō aso mai mua a te kilokiloga tenei: “Ke na ‵kai kae inu tatou, me taeao ko ‵mate tatou.” (1 Kolinito 15:32) A te vaegā kilokiloga tenā e masani o iku atu ki te gafula, te inu malosi, mo te manavase—kae e se ki te mauaga o te filemu tonu o te mafaufau.
E tonu, kafai e fakalagolago katoatoa tatou ki taumafaiga a tāgata, ka fakafanoanoa eiloa ‵tou fakamoemoega mō aso mai mua. Ko siliga atu nei a te fakalailaiga ko oko ki te ea, vai mo te laukele i te lalolagi i lō taimi mua. Ko gasolo aka loa ki luga a te fakamataku o taua fakaniukelea mo faifaiga takafia‵toa. Ko pokotia a te fia piliona o tino i te lalolagi kātoa ona ko masaki mo te mativa. Kae, e isi eiloa ne pogai tāua ke maua se fakamoemoega.
E ui eiloa e se mafai o iloa ne tino a mea ka ‵tupu i aso mai mua, e fakamatala mai ne Ieova te Atua a ia e pelā me ko te tino telā e “‵valo ne au te mea ka tupu mai i te kamataga; ne folafola ne au i aso mua eiloa a te mea tenei ko oti ne tupu.” (Isaia 46:10) Ne a pati a Ieova e uiga ki mea ka ‵tupu i aso mai mua?
Pati a te Tusi Tapu
Ka se talia lele eiloa ne Ieova ke fakamasei katoatoa atu a te lalolagi io me ko mea ola i ei. A te tonuga loa, e folafola mai te Tusi Tapu me ka fakamasei ne te Atua a “latou kolā e fakamasei ne latou te lalolagi.” (Fakaasiga 11:18) E auala i tena Malo faka-te-lagi, ka faka‵ma ne Ieova te lalolagi mai amioga ma‵sei katoa kae ka fakataunu i ei tena fuafuaga i te kamataga. (Kenese 1:26-31; 2:8, 9; Mataio 6:9, 10) E tuku mai ne fuaiupu i te Tusi Tapu mai lalo nei se ata manino e uiga ki aso mai mua, kae fakamatala mai i ei a mea ‵tupu kolā ka pili o pokotia i ei a tino taki tokotasi i te lalolagi.
Salamo 46:8, 9. “O‵mai o ‵kilo ki mea ne fai ne te Aliki. ‵Kilo ki mea fakaofoofogia ne fai ne ia i te lalolagi. E fakagata ne ia a taua i te lalolagi kātoa; e fatifati ne ia a kausana, e fakamasei ne ia a tao, kae ‵sunu ne ia a talita ki te afi.”
Isaia 35:5, 6. “A tino ‵kivi ka lavea ne latou a mea, mo tino taliga ‵tuli ka lagona ne latou a mea. A tino vae ma‵sei ka eva ki luga kae saka, ka ko tino gūgū ka ka‵laga mo te fia‵fia. A vaitafe fo‵liki ka ‵tafe i loto i te toafa.”
Isaia 65:21, 22. “A tino ka faite olotou fale ko ‵nofo ei i ei - ka se toe fakaaogā eiloa ne nisi tino fakaa‵tea. Ka ‵toki olotou togāvine kae inu fia‵fia i te uaina mai i olotou togāvine konā, ka se toe inu ne nisi tino fakaa‵tea.”
Tanielu 2:44. “Ka fakatu ne te Atua o te lagi a te malo telā ka se toe gata mai. Ka se toe mafai o takavale a te malo tenā. Ka fakatakavale ne ia a malo katoa konā, kae ka tumau ki te se gata mai.”
Ioane 5:28, 29. “Ko oko mai eiloa te taimi e lagona ei a tena leo [o Iesu] ne latou katoa kolā e i loto i tanuga, kae ka ulu mai latou ki tua.”
Fakaasiga 21:3, 4. “A te Atua ka fakatasi eiloa mo latou, kae ka fai a ia mo olotou Atua. Ka se toe iai ne loimata i olotou mata. Ka se toe iai se mate, se fanoanoa, se tagi io me se ‵mae. Ko palele atu a mea mua.”
Te Auala e Maua ei te Filemu Tonu o te Mafaufau Ona ko Tali Mai te Tusi Tapu
Muamua la, kāti ka faigata o talitonu se tino ki te ‵tonu o fakamatalaga mai luga nei. Kae ko folafolaga konei ne fai mai ne te Atua kae e se ko tāgata. Kae ko Ieova te Atua, “e se mafai o loi.”—Tito 1:2.
Kafai e taumafai koe ke talitonu ki folafolaga a te Atua kae ola e ‵tusa mo ana tulafono, ka tumau eiloa te tulaga filemu i tou mafaufau faitalia a toe tulaga faiga‵ta. Ke oko foki loa ki taua, te mativa, masaki, e pelā foki mo te tulaga matua io me ko te mate—e seai se mea mai mea konei ka fakaseai katoatoa ne ia te ‵tou tulaga filemu. Kaia? Me e talitonu koe me ka toe faka‵lei aka ne te Malo o te Atua a fakalavelave katoa konei.
E mafai pefea o maua ne koe te vaegā fakamoemoega tenā mō aso mai mua? E ‵tau mo koe o ‘fakafou tou mafaufau’ kae fakatalitonu aka ne koe “me se a te loto o te Atua, te mea ‵lei, te mea e logomalie mo te gali.” (Loma 12:2) E ‵tau foki o maua ne koe a nisi fakatalitonuga me e fakatuagagina eiloa a folafolaga mai te Tusi Tapu. Ka aogā eiloa a taumafaiga e fai ke iloilo aka a mea konā. Ka sili atu eiloa te filemu o te mafaufau e maua ne koe mai te faiga fua o nāi mea i te olaga.
[Ata i te itulau e 8]
Ne a pati mai te Muna a te Atua e uiga ki mea ka ‵tupu i aso mai mua?
[Ata i te itulau e 9]
[Ata i te itulau e 9]