Mataupu Muamua

Se a te Uiga o te Tapuaki Atu mo te Loto Tasi i ‵Tou Aso Nei?

1, 2. (a) Se a te gasuesuega fakaofoofogia telā e fai i ‵tou aso nei? (e) Se a te fakamoemoega gali telā ko maua ne tino loto fakamaoni?

E ISI eiloa se gasuesuega fakaofoofogia i te lalolagi kātoa i aso nei ke ‵kau fakatasi ei a tino i te faiga o te tapuakiga. E ‵kau fakatasi i ei te fia miliona o tino mai fenua, matakāiga mo ‵gana katoa. E momea aka te tokouke o latou i tausaga takitasi. E fai mai te Tusi Tapu me i tino konei ko fai pelā me ne “molimau” a Ieova, ako latou foki ko “te vaitino tokouke.” E ‘tavini atu latou ki te Atua i te ao mo te po.’ (Isaia 43:10-12; Fakaasiga 7:9-15) Kaia e fai ei latou penā? Me ko iloa ne latou i a Ieova ko te Atua tonu e tokotasi. Ko fakamalosigina i ei latou ke ola e ‵tusa loa mo ana tulafono amio‵tonu. E iloa foki ne latou me ko ‵nofo atu tatou i “aso fakaoti” o te lalolagi masei tenei, telā ko pili o fakaseai ne te Atua, kae ka sui ne ia ki te palataiso i tena lalolagi fou.​—2 Timoteo 3:1-5, 13; 2 Petelu 3:10-13.

² E folafola mai te Muna a te Atua, penei: “E se toe leva nei, ka ‵galo atu ei a tino amio ma‵sei . . . ka ko latou kolā e loto ma‵lalo, ka fai mo latou te fenua, kae ka maua ne latou te manuia mo te filemu kātoatoa.” (Salamo 37:10, 11) “A tino amio‵tonu ka fai mo latou te fenua, kae ka ‵nofo faeloa i ei ki te se-gata-mai.” (Salamo 37:29) “Ka se toe ai ne loimata i olotou mata. Ka se toe ai se mate, se fanoanoa, se ‵tagi io me se ‵mae. Ko palele atu a mea mua.”​—Fakaasiga 21:4.

3. E loto tasi pefea a tino i te faiga o te tapuakiga?

³ A tino kolā e ‵kau fakatasi nei i te faiga o te tapuakiga tonu ka fai mo tino muamua kolā ka ‵nofo atu i te lalolagi fou tenā. Ko iloa ne latou te loto o te Atua kae e faka‵logo foki latou ki ei e ‵tusa eiloa mo mea kolā e mafai ne latou o fai. Ne fakaasi atu penei ne Iesu te tāua o te mea tenei: “Kae tenei te ola se-gata-mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.” (Ioane 17:3) Ne tusi mai penei te apositolo ko Ioane: “A te lalolagi mo mea katoa i ei kolā e ma‵nako ki ei a tino e palele atu katoa; ka ko te tino telā e fai ne ia a te mea e loto ki ei a te Atua e ola ki te se-gata-mai.”​—1 Ioane 2:17.

Te Uiga Tonu o te Loto Tasi

4. (a) Se a te uiga tonu o te fakamaopoopoga o tino e tokouke i ‵tou aso nei ke ‵kau fakatasi i te tapuakiga? (e) E fakamatala mai pefea ne te Tusi Tapu a te fakamaopoopoga tenei?

⁴ Se a te uiga tonu o te fakamaopoopoga o tino e tokouke ki te faiga o te tapuakiga i te ‵tou vaitaimi tenei? A te faiga tenā se fakamaoniga manino me ko pili mai te gataga o te lalolagi masei tenei kae ka fakaoko mai i ei te lalolagi fou a te Atua. Ko ‵kilo tonu atu nei tatou ki te fakataunuga o valoaga i te Tusi Tapu kolā ne ‵valo mai i ei te fakamaopoopoga fakaofoofogia tenei. E tasi te valoaga e fai mai, penei: “I aso mai mua nei [i aso fakaoti konei], te mauga telā e tu ei te Faletapu [ko te tapuakiga tonu a Ieova telā ne fakamaluga aka] ka maluga atu i mauga katoa [ko tena uiga ka maluga atu i so se vaegā tapuakiga]. Ka uke a malo e o‵mai ki ei, ka ko olotou tino ka fai aka penei, ‘‵Tou olo ki luga i te mauga o te Aliki, ki te Faletapu o te Atua o Isalaelu, me ka akoako mai ne ia ki a tatou a mea kolā e manako a ia ke fai ne tatou; ka sa‵sale tatou i auala ne filifili ne ia.’”​—Mika 4:1, 2; Salamo 37:34.

5, 6. (a) E ‵fuli atu pefea a malo e uke ki a Ieova? (e) Ne a fesili e ‵tau o ‵sili ifo ne tatou taki tokotasi?

⁵ E tonu, e se ko tino katoa mai i malo katoa e olo atu ki te fale faka-te-agaga o Ieova ke tapuaki atu i ei. Kae ko lau nei i miliona a tino kolā e olo atu ki ei. Kafai ko iloa ne latou te fuafuaga alofa a Ieova te Atua mo ana uiga ‵gali, ko fakamalosigina i ei olotou loto. E ‵sala atu latou mo te loto maulalo ki mea kolā e manako ki ei te Atua ke fai ne latou. E ‵pau te lotou ‵talo mo te ‵talo a te faisalamo telā ne fai mai, penei: “A koe ko toku Atua; akoako mai au ke fai ne au tou loto.”​—Salamo 143:10.

⁶ Se a tau faka‵tau, e aofia koe i te vaitino tokouke telā e fakamaopoopo fakatasi ne Ieova ke tapuaki atu mo te loto tasi? E mata, e fakaasi atu ne koe mai te lasi o tou fiafia ki akoakoga kolā ko oti ne maua ne koe mai tena Muna me e malamalama ‵lei koe i a Ieova ko te Māfuaga o akoakoga konā? E pefea te lasi o tou fiafia ke ‘sasale i auala e filifili ne ia’?

Te Auala e Maua ei te Loto Tasi

7. (a) Fakamuli loa, ka pefea te tokouke o tino kolā ka ‵kau fakatasi i te tapuakiga? (e) Kaia e tāua ei ke na fai tatou mo fai ne tino kolā e tapuaki atu ki a Ieova, kae e mafai pefea ne tatou o fesoasoani atu ki nisi tino ke fai penā?

⁷ E manako eiloa a Ieova ke loto tasi a tino ola kae ata‵mai katoa i te tapuakiga tonu. E olioli malosi eiloa tatou ke na oko mai te taimi telā ka tapuaki atu ei a tino ola katoa ki te Atua tonu e tokotasi! (Salamo 103:19-22) Kae koi tuai o fai penā, e ‵tau o ave katoatoa keatea ne Ieova a tino katoa kolā e ita ma fai ne latou te mea tonu telā e loto a ia ki ei. Ona ko tena alofa, e fakailoa muamua mai ne ia a mea kolā ka fai ne ia ko te mea ke maua ne tino katoa i so se kogā koga a te avanoaga ke ‵fuli atu ki a ia. (Isaia 55:6, 7) Tela la, ko fai te ‵kamiga tāua tenei ki tino mai ‘fenua katoa, matakāiga, tino valevale, mo ‵gana,’ penei: “Ma‵taku ki te Atua, kae tavae atu ki tona sili! Me ko oko mai te taimi e fakamasino ei ne ia a tino. Ifo o tapuaki ki a ia, ifo ki mua o te Atua, telā ne fai ne ia te lagi, te lalolagi, te tai, mo vaipuna!” (Fakaasiga 14:6, 7) E mata, ko oti ne talia ne koe a te ‵kamiga tenā? Kafai e penā loa, ko taulia nei koe ke ‵kami mai a nisi tino ke mafai foki ne latou o iloa kae tapuaki atu ki te Atua tonu.

8. Kafai ko iloa ne tatou a akoakoga fakavae i te Tusi Tapu, ne a nisi feitu e ‵tau o ga‵solo atu ei tatou ki mua?

⁸ E se manako Ieova ki tino kolā e tapuaki fakaloiloi atu ki a ia, kae e fai fua ne latou a mea kolā e ma‵nako latou ki ei. E manako eiloa te Atua ke iloa ‵lei ne tino ‘tena loto’ kae ke fakaasi atu foki te mea tenā i olotou olaga. (Kolose 1:9, 10) Tenā la, kafai e loto fakafetai a tino ki akoakoga fakavae i te Tusi Tapu kolā ko iloa ne latou, ka ma‵nako foki latou ke na ga‵solo atu ki mua i te feitu faka-te-agaga. Ka fia fakamasani faka‵lei latou ki uiga katoa o Ieova. Ka ma‵nako latou ke fakalauefa atu te lotou malamalama e uiga ki tena Muna, kae ke momea aka foki te lotou āpo i te fakaaogāga o tena Muna i olotou olaga. E taumafai latou o fakaakoako atu ki uiga kolā e fakaasi mai ne te lotou Tamana faka-te-lagi kae e fai foki ke ‵pau olotou kilokiloga mo tena kilokiloga. Ko fakamalosigina ei latou ke ‵sala aka ki nisi auala ke ‵kau atu ei latou ki te galuega faka‵sao tino telā ko oti ne fakatoka ne ia ke fai ne ana tino tapuaki i te lalolagi i aso nei. E mata, e fia kau atu foki koe ki ei?​—Maleko 13:10; Epelu 5:12–6:3.

9. I auala fea e mafai ei ne tatou o maua te tinā loto tasi i aso nei?

⁹ E fakaasi mai ne te Tusi Tapu me e ‵tau o loto tasi a tino kolā e tavini atu ki a Ieova. (Efeso 4:1-3) E tiga eiloa e ‵nofo atu tatou i se lalolagi telā e ‵nofo mavae‵vae kae e fakatau‵fai foki tatou mo ‵tou vāi‵vāiga faka-te-foitino, e ‵tau eiloa o maua ne tatou a te vaegā loto tasi tenā i aso nei. Ne ‵talo malosi atu a Iesu ke tasi ana soko katoa, ko te mea ke loto tasi latou. Se a te uiga o te mea tenei? A te mea muamua, ke maua ne latou se fesokotakiga ‵lei mo Ieova mo tena Tama. Kae ko te lua o mea, ke loto tasi latou katoa. (Ioane 17:20, 21) E akoako ne Ieova ana tino ke fai penā e auala i te fakapotopotoga Kelisiano.

Ne a Mea e Fakamalosi Aka ei te Loto Tasi?

10. (a) Se a te mea ka maua ne tatou māfai e fakaaogā ne tatou taki tokotasi a te Tusi Tapu ke mafau‵fau faka‵lei ki tali o fesili e uiga ki ‵tou olaga? (e) Ke iloilo faka‵lei aka a mea kolā e fakamalosi aka ei te loto tasi o Kelisiano mai i te faiga o au tali ki fesili kolā e fakaasi mai i te palakalafa tenei.

¹⁰ E fakaasi mai i lalo nei a manatu e fitu kolā e fakamalosi aka ei te loto tasi i te faiga o te tapuakiga. Kafai ko tali mai ne koe a fesili kolā e ‵soko atu ki ei, ke na mafaufau malie aka ki te auala e fakamalosi aka ei ne manatu takitasi konā tou fesokotakiga mo Ieova, penā foki loa mo nisi Kelisiano. Kafai ko mafaufau faka‵lei koe ki mea konei kae ‵suke foki koe ki tusi siki kolā ne seki siki mai a pati i te palakalafa, ka aogā ‵ki a mea konā me e maua ne koe i ei te poto mai te Atua, te atamai, mo te loto malamalama​—ko uiga kolā e ‵tau o maua ne tatou katoa. (Faataoto 5:1, 2; Filipi 1:9-11) Ke mafaufau malie aka ki mea takitasi konei.

(1) E amanaia tatou ki te pulega a Ieova ke fai ne ia a tonu e uiga ki mea ‵lei mo mea ma‵sei. “Talitonu ki te Aliki mo tou loto kātoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.”​—Faataoto 3:5, 6.

Kaia e ‵tau ei mo tatou o ‵sala aka a pati fakatonutonu mo fakatakitakiga a Ieova māfai ko fai ne tatou a filifiliga? (Salamo 146:3-5; Isaia 48:17)

(2) E maua ne tatou te Muna a te Atua ke takitaki ei tatou. “I te avatuga ne matou a te talaiga a te Atua, ne lagona kae talia foki ne koutou, e se ona ko te mea se talaiga a se tino, ka ko te talaiga eiloa a te Atua, kae tonu eiloa me e a te Atua. Me i te Atua e galue i loto i a koutou konā e tali‵tonu.”​—1 Tesalonia 2:13.

Kaia e fakamataku ei ke fai fua te mea telā e ma‵natu aka tatou me e ‵lei? (Faataoto 14:12; Ielemia 10:23, 24; 17:9)

Kafai e se iloa ne tatou a pati fakatonutonu mai te Tusi Tapu e uiga ki se mataupu, se a te mea e ‵tau o fai ne tatou? (Faataoto 2:3-5; 2 Timoteo 3:16, 17)

(3) E aogā ki a tatou katoa te fakatokaga e tasi ke fagai ei tatou ki meakai faka-te-agaga. “Ka akoako ne Ieova au tama tā‵gata katoa.” (Isaia 54:13, NW) “Ke mafaufau te suā tino ki te suā tino, ke fakatau fesoasoani foki koutou o fakaasi te alofa mo te fai mea ‵lei. Ke tumau faeloa te maopoopo sāle o tatou, e pelā eiloa mo te mea e masani ei a nisi tino o koutou. A te mea sili ke fakatau fakamalosi eiloa ne tatou o‵tou loto; i te mea ko iloa ne koutou i te Aso o te Aliki [ko te aso o te fakaseaiga] ko pili mai.”​—Epelu 10:24, 25.

Ne a mea aogā e maua ne latou kolā e fakaaogā katoatoa ne latou te fakatokaga a Ieova ke fagai ei a tino ki meakai faka-te-agaga? (Isaia 65:13, 14)

(4) A Iesu Keliso ko te ‵tou Takitaki kae e se se tino i te lalolagi nei. “E se ‵tau koutou o taku katoa ki ‘Faiakoga,’ me i a koutou ne taina, kae tokotasi fua te otou Faiakoga. Ke mo a foki koutou e fakaigoa ne koutou se tino e tokotasi i te lalolagi nei ki te ‘Tamana,’ me e tokotasi fua te otou Tamana telā i te lagi. Ke mo a foki e fakaigoa koutou ko ‘Takitaki,’ me e tokotasi fua te otou takitaki ko te Keliso.”​—Mataio 23:8-10.

E mata, e isi se pogai ‵lei ke tali‵tonu ei tatou me e ‵sili atu tatou i nisi tino? (Loma 3:23, 24; 12:3)

(5) E tali‵tonu tatou me i te Malo o te Atua ko te fakamoemoega mautinoa fua e tasi mō tino katoa i te lalolagi. “Tela la, ke ‵talo koutou penei: ‘Te motou Tamana telā i te lagi: ke tapu tou igoa, ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.’ Ke mua koutou o ‵sala tena Malo mo tena amiotonu; kae ka fakaopoopogina atu a mea katoa konā ki a koutou.”​—Mataio 6:9, 10, 33.

E puipui pefea te ‵tou loto tasi ona ko te fakamuamua ne tatou te Malo? (Mika 4:3; 1 Ioane 3:10-12)

(6) E maua ne tino kolā e tapuaki atu ki a Ieova a uiga tāua mai te agaga tapu, kolā e fakamalosi aka ei te loto tasi o Kelisiano. “Ka ko fua o te Agaga, ko te alofa, te fiafia, te filemu, te kufaki, te mataalofa, te ‵lei, te fakamaoni, te loto malalo, mo te loto pulea.”​—Kalatia 5:22, 23.

Ne a mea e ‵tau o fai ne tatou ko te mea ke maua a fuataga o te agaga o te Atua i ‵tou olaga? (Galuega 5:32)

E fakamalosi aka pefea ne te agaga o te Atua ‵tou fesokotakiga mo ‵tou taina Kelisiano? (Ioane 13:35; 1 Ioane 4:8, 20, 21)

(7) E talai atu ne tino katoa kolā e tapuaki ‵tonu atu ki te Atua a te tala ‵lei o te Malo. “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te gataga.”​—Mataio 24:14.

Se a te mea e ‵tau o fakamalosi mai ki a tatou ke ‵kau tonu atu ki te galuega talai? (Mataio 22:37-39; Loma 10:10)

11. Kafai ko fakaaogā ne tatou a muna‵tonu mai te Tusi Tapu i ‵tou olaga ne a mea ka iku mai i ei?

¹¹ Kafai e loto tasi tatou i te tapuaki atu ki a Ieova, ko fakapilipili atu ei tatou ki a ia kae e maua foki ne tatou te fiafia i te ‵kau fakatasi mo nisi tino tali‵tonu. E fai mai te Salamo 133:1: “Ko oko eiloa i te gali mo te ‵lei, manafai e ‵nofo tasi a tino o te Atua e pelā me ne taina!” E pefea te fakamalosi loto māfai e ‵kalo keatea tatou mai te lalolagi telā e uiga kaiū, e fai amioga sē ‵tau, e amio fakasauā kae ke maopoopo fakatasi tatou mo tino kolā e a‵lofa tonu ki a Ieova kae e faka‵logo foki ki ana tulafono!

‵Kalo Keatea Mai Uiga Kolā e Fakamakosu ei te Loto Tasi

12. Kaia e ‵tau ei o ‵kalo keatea tatou mai te uiga ko te fia tu tokotasi?

¹² E ‵tau mo tatou o ‵kalo keatea mai uiga kolā e fakamakosu ei te loto tasi, ko te mea ke tumau te ‵tou loto tasi i te lalolagi kātoa. E tasi te uiga penā ko te fia tu tokotasi mai te Atua mo ana tulafono. E fesoasoani mai a Ieova ke ‵kalo keatea tatou mai te uiga tenā e auala i te fakaasi faka‵sau mai ne ia a te māfuaga o te uiga tenā, ko Satani te Tiapolo. (2 Kolinito 4:4; Fakaasiga 12:9) Ne fakamalosi atu Satani ki a Atamu mo Eva ke se ‵saga atu laua ki pati a te Atua kae ke fai lā filifiliga kolā ne ‵teke atu ki te loto o te Atua. Ne malaia laua i ei, kae penā foki eiloa tatou. (Kenese 3:1-6, 17-19) Ko lausa valevale i te lalolagi tenei a te uiga ko te fia tu tokotasi mai te Atua mo ana tulafono. Tela la, e ‵tau mo tatou o ‵kalo keatea mai vaegā uiga penā.

13. Se a te mea ka fakaasi mai i ei me ko fakatoka faka‵lei nei tatou ke ola i te lalolagi fou kae amiotonu a te Atua?

¹³ Ke na mafaufau aka ki te folafolaga fakaofoofogia a Ieova ke sui ne ia te lalolagi masei tenei ki te lagi fou mo te lalolagi fou, kolā “e ‵nofo i ei a te amiotonu.” (2 Petelu 3:13) E fakamalosigina tatou i ei ke na fakatoka nei ‵tou olaga ke mafai foki o ola tatou i te taimi telā ka pule mai ei te amiotonu, i ne? Ko tena uiga e ‵tau mo tatou o faka‵logo ki te fakatonuga manino tenei i te Tusi Tapu: “Sa tuku otou loto ki te lalolagi io me ko so se mea faka-te-lalolagi. Kafai e a‵lofa koutou ki te lalolagi, ko tona uiga e se a‵lofa koutou ki te Tamana telā e i loto i a koutou.” (1 Ioane 2:15) Tenā la, e ‵teke atu eiloa tatou ki uiga konei o te lalolagi​—ko te fia tu tokotasi, te kaiū, amioga sē ‵tau mo amioga fakasauā. E tiga eiloa e isi ne ‵tou vāivāiga, e fakalogo‵logo faeloa tatou ki a Ieova kae faka‵logo foki ki a ia mo ‵tou loto kātoa. E fakaasi mai ne ‵tou olaga kātoa me ko fakavae ‵tou mafaufau mo ‵tou manakoga ki te loto o te Atua.​—Salamo 40:8.

14. (a) Kaia e tāua ei ke puke ‵mau nei tatou ki te avanoaga ke fakamasani ki akoakoga a Ieova kae ke fai foki a mea konā i ‵tou olaga? (e) E aogā pefea ki a tatou taki tokotasi a tusi siki i te palakalafa tenei?

¹⁴ Ka se fakatalave Ieova māfai ko oko mai te taimi ke fakaseai atu ei ne ia te olaga masei i te lalolagi tenei, penā foki loa mo tino katoa kolā e fia‵fia ki amioga mo faifaiga kolā e aofia i ei. E se fakatuai ne ia te taimi tenā kae e se ‵fuli foki ne ia ana fakatonuga ko te mea ke fakafiafia atu fua ei ki tino kolā koi ‵piki ‵mau eiloa ki te lalolagi tenei kae koi fakalotolotolua latou i te faiga o te loto o te Atua. Tenei eiloa te taimi e ‵tau ei o gasue‵sue a tino! (Luka 13:23, 24; 17:32; 21:34-36) E pefea te fakafiafia loto ke lavea atu te vaitino tokouke telā ko puke ‵mau ki te avanoaga tāua tenei. E ‵sala aka foki latou mo te loto finafinau ki akoakoga kolā e tuku mai ne Ieova e auala i tena Muna mo tena fakapotopotoga. Kae e fai pelā me e sa‵sale fakatasi atu latou i te auala o te Atua telā e iku atu ei ki te lalolagi fou! Kae ko te uke o mea e iloa ne tatou e uiga ki a Ieova, ko te sili atu foki tenā o ‵tou alofa ki a ia, penā foki loa mo te ‵tou fia tavini atu ki a ia.

Ke Toe Sau‵tala ki Manatu Konei

• Se a te mea e manako ki ei a Ieova e uiga ki te tapuakiga?

• Kafai ko iloa ne tatou a akoakoga fakavae i te Tusi Tapu, ne a nisi feitu e ‵tau o gasolo atu ei tatou ki mua?

• Ne a mea e mafai o fai ne tatou taki tokotasi ke maua ei ne tatou, penā foki loa mo nisi tino kolā e tapuaki atu ki a Ieova, a te loto tasi?

[Fakamatalaga o te Ata i te itulau e 4]

“Ko latou kolā e loto ma‵lalo, ka fai mo latou te fenua, kae ka maua ne latou te manuia mo te filemu katoatoa”