FATATUSI I TE ITANETI a te Faleleoleo Maluga
Faleleoleo Maluga
FATATUSI I TE ITANEI
Tuvalu
  • TUSI TAPU
  • TUSI
  • MEETINGS
  • w10 9/1 itu. 19-23
  • A Te ‵Kau Fakatasi O Kelisiano E Faka‵malu Ei Te Atua

E seai se vitio penei

Fakatoese atu, e isi se fakalavelave ki te peiga o te vitio

  • A Te ‵Kau Fakatasi O Kelisiano E Faka‵malu Ei Te Atua
  • Te Faleleoleo Maluga e Folafola Atu ei te Malo o Ieova—2010
  • Ulutala fo`liki
  • Mataupu
  • Se Tusi Telā ne Faka‵mafa Atu i ei a te ‵Kau Fakatasi
  • Te Pogai e Taumafai ei ke Maua te Loto Tasi
  • E Fakamalosi Aka ne ‘Meaalofa Tino’ Konei a te ‵Kau Fakatasi
  • Ati Aka a Uiga Fou
  • Fakamalosi Aka a Auala ‵Fou ke Fai‵pati Atu
  • A te Alofa ki te Atua e Fusi Fakatasi ne ia Tatou
  • A Te ‵Kau Fakatasi Se Fakailoga O Te Tapuakiga Tonu
    Te Faleleoleo Maluga e Folafola Atu ei te Malo o Ieova—2010
  • Ko “Ieova Tokotasi” e Fakamaopoopo ne ia a Tena Kāiga
    Te Faleleoleo Maluga e Folafola Atu ei te Malo o Ieova—2012
  • Te Gali o te ‵Kau Fakatasi mo te Fakamanatuga
    Te Faleleoleo Maluga e Folafola Atu ei te Malo o Ieova (Sukesukega)—2018
  • ‘Ke Fakatumau te Tasi o te Agaga’
    Te Faleleoleo Maluga e Folafola Atu ei te Malo o Ieova (Sukesukega)—2025
Te Faleleoleo Maluga e Folafola Atu ei te Malo o Ieova—2010
w10 9/1 itu. 19-23

A Te ‵Kau Fakatasi O Kelisiano E Faka‵malu Ei Te Atua

“Ke fia‵fia koutou o fai te loto tasi telā ne tuku atu ne te agaga.”​—EFESO 4:3.

1. Ne faka‵malu pefea ne Kelisiano i te senitenali muamua i Efeso a te Atua?

A TE ‵kau fakatasi o te fakapotopotoga Kelisiano i Efeso i aso mua ne faka‵malu ei te Atua tonu, ko Ieova. I te fa‵kai takutakua tenā, e mautinoa eiloa me i nisi taina Kelisiano ne tino mau‵mea kae e isi ne olotou pologa, a ko nisi tino ne pologa kae ma‵tiva. (Efeso 6:5, 9) A nisi tino ne Iutaia kolā ne tauloto ki te munatonu talu mai te tolu masina telā ne faipati ei a te apositolo ko Paulo i olotou Sunako. Ne tapuaki atu muamua a nisi tino ki a Atemisi kae fai ne latou a mea fakataulaitu. (Galuega 19:8, 19, 26) E manino eiloa, me ne fakamaopoopo ne te Lotu Kelisiano tonu a tino mai telega e uke. Ne lavea ne Paulo me ne faka‵malugina a Ieova e auala i te ‵kau fakatasi o te fakapotopotoga. Ne tusi mai a te apositolo ko Paulo: “Ke i te Atua foki te vikiga i loto i te ekalesia.”​—Efeso 3:21.

2. Se a te mea ne fakamataku ki te ‵kau fakatasi o Kelisiano i Efeso?

2 Kae ne fakamataku eiloa a te tulaga o te ‵kau fakatasi o te fakapotopotoga i Efeso. Ne fakailoa atu ne Paulo ki toeaina, penei: “Ka oko mai foki a te taimi telā ka isi ne tino mai i a koutou ka fai‵pati ki te muna loi, o takitaki a tino tali‵tonu ke tau‵tali i a latou.” (Galuega 20:30) Kae ne seki tiaki eiloa ne nisi taina a te agaga fia fakamavae‵vae, telā ne fakailoa atu ne Paulo me e “pule ne ia a tino kolā e se faka‵logo ki te Atua.”​—Efeso 2:2; 4:22.

Se Tusi Telā ne Faka‵mafa Atu i ei a te ‵Kau Fakatasi

3, 4. E faka‵mafa mai pefea ne Paulo i tena tusi ki te kau Efeso a te ‵kau fakatasi?

3 Ne iloa ne Paulo me kafai e tumau a te fakatau fesoasoani o Kelisiano, e ‵tau mo latou takitokotasi o taumafai ke fakamalosi aka a te ‵kau fakatasi. Ne fakaosofia ne te Atua ke tusi ne Paulo se tusi ki Efeso ki se mataupu tāua e uiga ki te ‵kau fakatasi. E pelā me se fakaakoakoga, ne tusi ne Paulo a mea e uiga ki te fuafuaga a te Atua “telā e tuku fakatasi ne ia a mea katoa . . . ka ko Keliso ko te ulu o mea katoa.” (Efeso 1:10) Ne fakatusa foki ne ia a Kelisiano fakaekegina ki fatu kese‵kese kolā e faite ki ei se fale. “Ko ia eiloa tenā e taofi ‵mau ne ia a te fale kātoa, kae fai foki ne ia ke tupu ake ke fai mo fale tapu ‵malu i te Aliki.” (Efeso 2:20, 21) E se gata i ei, ne faka‵mafa mai ne Paulo a te ‵kau fakatasi o tino Iutaia mo Kelisiano mai Fenua Fakaa‵tea kae ne fakamasaua atu foki ki taina e uiga ki te lotou māfuaga. Ne fakasino atu a ia ki a Ieova e pelā me ko “te Tamana mō koutou, ko ia ko maua mai ei te igoa, ko fakaigoa ei a kāiga katoa i te lagi mo te lalolagi.”​—Efeso 3:5, 6, 14, 15.

4 Kafai e suke‵suke tatou ki te mataupu e 4 o Efeso, ka lavea ne tatou a te pogai e ‵tau ei o taumafai ke ‵kau fakatasi, te auala e fesoasoani mai ei a Ieova ke ‵kau fakatasi, mo te kilokiloga telā ka fesoasoani mai ke tumau tatou i te ‵kau fakatasi. Kaia e se faitau ei a te mataupu kātoa ko te mea ke uke a mea aoga e maua ne koe mai te sukesukega tenā?

Te Pogai e Taumafai ei ke Maua te Loto Tasi

5. Kaia e mafai ei o tavini fakatasi atu a agelu a te Atua, kae kaia e faigata ei ki a tatou ke ‵kau fakatasi?

5 Ne fai atu a Paulo ki ana taina i Efeso ‘ke fia‵fia o fai te loto tasi telā ne tuku atu ne te agaga.’ (Efeso 4:3) Ke malamalama i te pogai e ‵tau ei o taumafai i te feitu tenei, ke mafaufau ki agelu a te Atua. E seai eiloa ne mea ola e lua i te lalolagi nei e ‵pau katoatoa, telā la kāti ne fakamanuia ne Ieova a te fia miliona o ana agelu mai te faiga ke tu ‵kese latou. (Tanielu 7:10) Kae e mafai eiloa o ‵kau fakatasi latou o tavini atu ki a Ieova me e faka‵logo latou ki a ia kae fai tena loto. (Faitau te Salamo 103:20, 21.) Kafai e kese‵kese a uiga o agelu fakamaoni konei, e isi foki ne vāivāiga o Kelisiano. E mafai eiloa o fai ne te mea tenei ke faigata te ‵kau fakatasi.

6. Ne a uiga kolā ka fesoasoani mai ke ‵kau fakatasi tatou mo taina kolā e isi ne olotou vāivāiga kolā e ‵kese mo tatou?

6 Kafai e taumafai a tino sē ‵lei katoatoa o fakatau fesoasoani, e faigofie fua o maua ne latou a fakalavelave. E pelā me se fakaakoakoga, e a māfai e tavini atu se taina loto maulalo telā e talimuli faeloa fakatasi mo te taina telā e oko atu i te taimi tonu kae ko ia loa ko kaitaua vave? E mafai o mafau‵fau lāua taki tokotasi me e se ‵lei a uiga o te suā tino, kae e puli i a lāua me i uiga o tino taki tokotasi e ‵pau eiloa te sē ‵lei. E mafai pefea o tavini fakatasi atu a taina konei e tokolua mo te fealofani? E mafai eiloa o fesoasoani atu ki a lāua a uiga kolā ne fai mai ne Paulo i ana isi pati. Ko mafaufau ei ki te auala e mafai ei o fakamalosi aka ne tatou te ‵kau fakatasi mai te atiakaga o uiga konā. Ne tusi mai a Paulo: “Tela la, ko fakamolemole atu au . . . i te loto malalo mo te filemu, mo te loto kufaki i taimi katoa. Ke fakatau fesoasoani koutou i te alofa. Ke fia‵fia koutou o fai te loto tasi telā ne tuku atu ne te agaga, i te filemu telā e fusi tasi ne ia koutou.”​—Efeso 4:1-3.

7. Kaia e tāua ei ke taumafai tatou ke ga‵lue mo te ‵kau fakatasi tatou mo nisi Kelisiano sē ‵lei katoatoa?

7 A te ‵kau fakatasi mo nisi tino sē ‵lei katoatoa o tavini atu ki te Atua se mea tāua ‵ki eiloa me e tasi fua te foitino o tino tapuaki ‵tonu. “E tasi te foitino, e tasi foki te agaga, e penā foki eiloa a te tasi o te fakamoemoega ne kalagagina ei koutou. E tasi te Aliki, e tasi te fakatuanaki, e tasi foki te papatisoga. E tasi foki te Atua te Tamana o tino katoa.” (Efeso 4:4-6) E isi eiloa se sokoga o te agaga o Ieova mo ana fakamanuiaga ki maopoopoga o te kautaina kolā e fakaaoga ne te Atua. Kafai foki e fakafanoanoa ne se tino i te fakapotopotoga a tatou, e olo atu tatou ki fea? E seai aka foki se koga e lagona i ei ne tatou a muna o te ola se-gata-mai.​—Ioane 6:68.

E Fakamalosi Aka ne ‘Meaalofa Tino’ Konei a te ‵Kau Fakatasi

8. Se a te mea ne fakaaoga ne Keliso ke fesoasoani mai ke ‵teke atu tatou ki fakamalosiga ke fakamavae‵vae?

8 Ne fakaaoga ne Paulo se faifaiga masani i sotia mua ke fakamatala atu ei a te auala ne tuku atu ne Iesu a ‘meaalofa tino’ ke fesoasoani atu ke ‵kau fakatasi a te fakapotopotoga. E mafai o aumai ne se sotia telā ne manumalo, se tino fakaa‵tea ke fai e pelā me se pologa ke fesoasoani atu ki galuega a tena avaga. (Salamo 68:1, 12, 18) I se auala tai ‵pau, ne maua ne Iesu telā ne manumalo i te lalolagi a pologa loto finafinau e tokouke. (Faitau te Efeso 4:7, 8.) Ne fakaaoga pefea ne ia a pologa konā i se auala fakatusa? “Ne ‵tofi foki ne ia a nisi ke fai mo apositolo, a nisi ke fai mo pelofeta, a nisi ke fai mo tino talai te tala ‵lei, a nisi ke fai mo faifeau, ka ko nisi ke fai mo faiakoga. Ne fai ne ia penei o fakatoka a tino o te Atua mō te galuega faka-Kelisiano, o ati ake a te foitino o Keliso. Ko te mea ke oko atu tatou katoa, ki te tasi o tatou i te fakatuanaki.”​—Efeso 4:11-13.

9. (a) E fesoasoani mai pefea a ‘meaalofa tino’ ke tumau a te ‵tou ‵kau fakatasi? (e) Kaia e ‵tau ei o fakatau fesoasoani a tino o te fakapotopotoga ke ‵kau fakatasi?

9 E pelā me ne tausi mamoe a‵lofa, e fesoasoani atu a ‘meaalofa tino’ konei ke fakatumau a te ‵tou ‵kau fakatasi. E pelā me se fakaakoakoga, kafai e lavea ne se toeaina a taina tokolua kolā e ‘fakatau‵fai a te suā tino ki te suā tino,’ e mafai o fesoasoani atu a ia ki te ‵kau fakatasi o te fakapotopotoga māfai e tuku atu ne ia a polopolokiga, ‘ke fakatonu lāua i te agaga o te loto maulalo.’ (Kalatia 5:26–6:1) E pelā me ne faiakoga, e fesoasoani mai a ‘meaalofa tino’ konei ke ati aka ne tatou a te fakatuanaki telā e fakavae ki akoakoga i te Tusi Tapu. Tela la, e fakamalosi atu ne latou a te fakatuanaki kae fesoasoani mai ke ga‵solo ki mua e pelā me ne Kelisiano. Ne tusi mai a Paulo me “ko se toe mafai tatou o fai mo tama‵liki e peipei ne galu, io me agina foki ne matagi o akoakoga a tino fai togafiti, kolā e takitaki ‵se ne latou a tino i olotou togafiti ma‵sei e maua.” (Efeso 4:13, 14) E ‵tau mo Kelisiano katoa o ‵kau fakatasi e pelā me ne taina, e pelā mo vaega katoa o ‵tou foitino kolā e ga‵lue tasi.​—Faitau te Efeso 4:15, 16.

Ati Aka a Uiga Fou

10. E fakamataku pefea a amioga sē lei ki te ‵tou ‵kau fakatasi?

10 E mata, e iloa ne koe me e fakaasi mai i te mataupu e fa o te tusi a Paulo ki tino Efeso me i te alofa ko te kī tāua ke ‵kau fakatasi ei a Kelisiano kolā ko ma‵tua ‵lei? Kae e fakaasi mai i ei a mea kolā e aofia i te alofa. E pelā me se fakaakoakoga, ka se talia ne se tino telā e tautali i auala o te alofa a te uiga finalalolagi mo amioga ma‵sei. Ne fakamalosi atu a Paulo ki ana taina ke mo a ma “ola e pelā mo tino pouliuli.” A tino konā “e tuku atu olotou foitino mō amioga ma‵sei,” kae “fai katoa ne latou amioga fakatakalia‵lia mo te loto se fia ‵foki mai i ei.” (Efeso 4:17-19) A te lalolagi masei tenei e ola ei tatou e fakamataku ki te ‵tou ‵kau fakatasi. E fai ne tino a te finalalolagi e pelā me se mea fai faka‵kata e auala i olotou pese, fakafiafiaga, mo olotou faifaiga fai ‵funa io me tuku faka‵sau mai. A ko te fai famau foki, telā e aofia i ei a te fiafai ki se tino telā e seai ne ou lagonaga fia avaga ki ei, e mafai o ave keatea ne ia se tino mai i a Ieova mo te fakapotopotoga. Kaia? Me e faigofie fua ke iku atu ki te finalalolagi. A te fai famau foki telā e mafai o takitaki ne ia se tino avaga ke mulilua e mafai o fakamavae‵vae ne ia a tama‵liki mai mātua mo tino a‵vaga kolā e seki ‵se mai i olotou avaga. Ao, e iku atu loa te mea tenā ki te mavae‵vae. E se tioa eiloa o tusi mai a Paulo, penei: “E se tenā te mea ne tauloto ne koutou e uiga ki a Keliso!”​—Efeso 4:20, 21.

11. Ne a ‵fuliga e fakamalosi mai i te Tusi Tapu ke fai ne Kelisiano?

11 Ne faka‵mafa mai ne Paulo me e ‵tau o tiakina ne tatou a mafaufauga sē ‵tonu kae ati aka a uiga kolā e ‵lei ki nisi tino. Ne fai mai a ia: “E ‵tau o tiakina otou foitino mua, kolā e fai ne latou a koutou ke ola i otou olaga mua. A te foitino mua ko fakamaseigina valevale ne ona manakoga ma‵sei. E ‵tau o fakafou otou loto mo otou mafaufau katoa. E ‵tau mo koutou o ‵pei ki te foitino fou, telā ne faite i foliga o te Atua i te amiotonu mo te ‵malu.” (Efeso 4:22-24) E mafai pefea o ‘faka‵fou ‵tou loto mo ‵tou mafaufau katoa’? Kafai e mafau‵fau faka‵lei ki mea e tauloto ne tatou mai te Muna a te Atua mo fakaakoakoga ‵lei a Kelisiano ma‵tua ‵lei, e mafai eiloa o maua ne tatou a te foitino fou “telā ne faite ki foliga o te Atua.”

Fakamalosi Aka a Auala ‵Fou ke Fai‵pati Atu

12. E fakamalosi aka pefea ne te faipati ki te mea tonu a te ‵kau fakatasi, kae kaia e faigata ei ke fai‵pati a nisi tino ki te mea tonu?

12 A te faipati ki te munatonu e tāua ‵ki eiloa mō tino i se kāiga io me i te fakapotopotoga. A pati kolā e fai atu i se auala āva kae atafai e fai ne ia ke ‵kau fakatasi a tino. (Ioane 15:15) Kae e a ma loi se tino ki tena taina? Kafai ko iloa aka ne tena taina, ka gasolo ifo eiloa ki lalo a te loto talitonu i te va o lāua. E mafai o malamalama koe i te pogai ne tusi mai a Paulo: “Ke se toe iai se loi. A tino katoa e ‵tau o fai‵pati ki olotou taina ki te mea tonu, i te mea ko tasi katoa tatou i te foitino o Keliso.” (Efeso 4:25) E tai faigata eiloa ki te tino telā ko masani o faipati ki te loi mai te folikiga ke faipati ki te mea tonu. Kae ka talia ne Ieova ana taumafaiga ke ‵fuli kae fesoasoani atu a ia ki ei.

13. Ne a mea e aofia i te kalo keatea mai te pati ma‵sei?

13 E akoako ne Ieova ke fakamalosi aka ne tatou a te āva mo te ‵kau fakatasi i te fakapotopotoga mo te kāiga mai te pule faka‵lei atu ki te auala e fai‵pati ei tatou. “Sa faipati ki muna e ‵mae ei a te loto o te suā tino. . . . Tiaki a uiga fakapiau, a uiga faka‵mae loto, mo uiga fakaitaita. Fakagata te sōna paka‵laga valevale mo te pati ma‵sei! Fakagata foki a uiga katoa o te loto masei!” (Efeso 4:29, 31) A te auala e tasi ke ‵kalo keatea mai pati faka‵mae loto ko te atiakaga o se kilokiloga āva ki nisi tino. E pelā me se fakaakoakoga, e ‵tau o taumafai se tagata telā e pati masei ki tena avaga ke ‵fuli tena kilokiloga ki te fafine, maise loa māfai e lavea ne ia te auala e fakaaloalo ei a Ieova ki fafine. Ne fakaeke foki ne te Atua a nisi fafine ki te agaga tapu, mai te tukuatuga o te fakamoemoega ke pule fakatasi mo Keliso e pelā me ne tupu. (Kalatia 3:28; 1 Petelu 3:7) I se auala tai ‵pau, e ‵tau foki mo se fafine telā e masani o pakalaga atu ki tena avaga o ‵fuli tena uiga tenā i te taimi e iloa ei ne ia a te auala ne kufaki ei a Iesu māfai ko kaitaua.​—1 Petelu 2:21-23.

14. Kaia e fakamataku ei ke fakaasi atu a tou kaitaua?

14 A te mea telā e isi sena sokoga ki te pati ma‵sei ko te kaitaua. E mafai o mavae‵vae i ei a tino kolā ne ‵nofo fakatasi. A te kaitaua e pelā me se afi. E se mafai o pule faka‵lei ki ei kae iku atu ki fakalavelave. (Faataoto 29:22) A te tino telā e toka o fakaasi atu tena sē fiafia e ‵tau o pule faka‵lei atu ki tena kaitaua ko te mea ke mo a ma fakamasei ei a te fesokotakiga tāua. E ‵tau o ga‵lue a Kelisiano ke fakaasi atu te loto fakamagalo, kae ke mo a ma kaitaua kae se toe faipati ki mea konā. (Salamo 37:8; 103:8, 9; Faataoto 17:9) Ne fakatonu atu a Paulo ki tino Efeso: “Kafai koe e kaitaua, ke se takitaki koe ne tou kaitaua ki te agasala; kae sa nofo mo tou kaitaua i te aso kātoa. Sa tukugina se avanoa mō te Tiapolo.” (Efeso 4:26, 27) E mafai o maua ne te Tiapolo a te avanoaga ke fakamakosu ne ia a te ‵kau fakatasi mo kinauga i te fakapotopotoga.

15. Se a ikuga e maua ne tatou māfai e puke ne tatou a kope a nisi tino?

15 A te fakaasiatuga o te āva ki kope a nisi tino e fakaopoopo atu ki te ‵kau fakatasi o te fakapotopotoga. E fai‵tau tatou, penei: “A te tino telā e masani o kaisoa, e ‵tau mo ia o fakagata tena amioga tenā.” (Efeso 4:28) Ko oti ne ati aka ne tino o Ieova te uiga masani ko te loto talitonu. Kafai e fakamasei ne se Kelisiano a te loto talitonu tenā mai te puke ne ia se mea e sē i a ia, e mafai o fakamasei ne ia a te va fealofani tenā.

A te Alofa ki te Atua e Fusi Fakatasi ne ia Tatou

16. E fakaaoga pefea ne tatou a pati fakamalosi ke ati aka ei a te ‵tou ‵kau fakatasi?

16 A te ‵kau fakatasi o te fakapotopotoga Kelisiano ko te ikuga o mea katoa kolā ne fakamalosi aka ne te alofa ki te Atua ke fai faka‵lei atu ki nisi tino mo te alofa. A te loto fakafetai ki te atafai o Ieova e fakamalosi ne ia tatou ke taumafai o fakagalue a te fakatakitakiga tenei: “[Fai‵pati ki] pati fesoasoani, ko vaegā pati kolā e aoga i te puti ake kae maua mai ei foki a mea ‵lei, ko te mea ke fua mai au pati ki te ‵lei, i tino kolā ne fakalogo‵logo ki a koe. E ‵tau mo koutou o fakatau a‵lofa kae fakatau atafai; ke fakatau fakamagalo foki koutou, e pelā eiloa mo te Atua ko oti ne fakamagalo ne ia koutou i a Keliso.” (Efeso 4:29, 32) E fakamagalo mo te atafai ne Ieova a tino sē ‵lei katoatoa e penei mo tatou. E mata, e se ‵tau foki o fakamagalo ne tatou a nisi tino māfai e lavea ne tatou olotou vāivāiga?

17. Kaia e ‵tau ei o taumafai malosi tatou ke fakamalosi aka a te ‵tou ‵kau fakatasi?

17 A te ‵kau fakatasi o tino o te Atua e faka‵malu atu ki a Ieova. E fakagalue ne tena agaga a tatou i auala kese‵kese ke fakamalosi aka ei a te ‵kau fakatasi. E mautinoa eiloa me e se ma‵nako tatou o ‵teke atu a te takitakiga a te agaga. Ne tusi mai a Paulo: “Sa faigina ke fanoanoa te agaga tapu o te Atua.” (Efeso 4:30) A te ‵kau fakatasi se koloa tāua telā e ‵tau o puipuigina. E aumai ne ia a te fiafia ki a latou katoa kolā e ‵kau fakatasi kae ‵viki atu ki a Ieova. Tela la, “ona ko koutou ko fanau atafai a te Atua, e ‵tau ke pelā koutou mo ia. E ‵tau o pule otou olaga ne te alofa.”​—Efeso 5:1, 2.

E Tali Mai ne Koe Pefea?

• Ne a uiga kolā e ati aka ei a te ‵kau fakatasi o Kelisiano?

• E mafai pefea ne ‵tou amioga o fakamalosi aka a te ‵kau fakatasi i te fakapotopotoga?

• E mafai pefea o fesoasoani atu a ‵tou pati e fai ke ‵kau fakatasi tatou mo nisi tino?

[Ata i te itulau e 20]

A tino kolā ne au‵mai i telega e uke ko ‵kau fakatasi nei

[Ata i te itulau e 21]

E mata, e malamalama koe i te fakamataku o te fai famau?

    Tusi Tuvalu (1981-2026)
    Log Out
    Log In
    • Tuvalu
    • Share
    • Nisi Manakoga
    • Copyright © 2025 Watch Tower Bible and Tract Society of Pennsylvania
    • Auala ki te Fakaaogaga
    • Saolotoga Faka-te-Tulafono
    • Privacy Settings
    • JW.ORG
    • Log In
    Share