Mataupu e Lima

Te Saolotoga o Tino Kolā e Tapuaki Atu ki a Ieova

1, 2. (a) Se a te vaegā saolotoga telā ne avatu ne te Atua ki te tauavaga muamua? (e) Taku mai aka a nisi tulafono kolā ne pule atu ki te olaga o Atamu mo Eva.

I TE taimi ne faite ei ne Ieova te tagata mo te fafine muamua, ne sili atu i te ‵lei te lā saolotoga i lō so se vaegā saolotoga o tino i aso nei. Ne ‵nofo atu laua i te Palataiso, ko te Fatoaga gali o Etena. E seai ne masaki e fakamakosu ei te lā olaga fiafia, me ne ‵lei katoatoa lā mafaufau mo lā foitino. Ne seki ‵tau o ‵mate laua e pelā mo te mea e tupu sāle ki tino katoa talu mai te taimi tenā. E se gata i ei, ona ko te mea ne isi ne lā mafaufau, ne maua ei ne laua te meaalofa fakaofoofogia, ko te saolotoga io me ko te atamai ke fai ne laua lā filifiliga. Kae ne ‵tau o āva faeloa laua ki tulafono a te Atua ko te mea ke tumau i te lā saolotoga gali tenā.

² Mafaufau aka la ki tulafono kolā ne fai ne te Atua mō te lalolagi. Kāti ne seki tusi ki lalo a tulafono katoa konā. Kae ne faite Atamu mo Eva i te auala telā ne faigofie ei ke faka‵logo laua ki tulafono konā. Ne ‵kai laua māfai ko fia‵kai; ne inu laua māfai ko fia inu; kae ne ‵moe foki laua māfai ko tō te mata o te la. Ne avatu foki ne Ieova se galuega ke fai ne laua. A te galuega tenā ne fai foki pelā me se tulafono ki a laua me ne fakaasi mai i ei a mea e ‵tau mo laua o fai. Ne ‵tau foki o fai lā tama‵liki, ke pule atu laua ki nisi mea ola, kae ke fakalauefa atu foki a tuakoi o te Palataiso ke oko atu ki te lalolagi kātoa. (Kenese 1:28; 2:15) E pefea te aogā mo te fakamalie loto o te tulafono tenā! Ne tuku mai i ei se galuega fakafiafia loto, telā ne mafai ei ne laua o fakaaogā katoatoa lā atamai i auala kese‵kese. Ne saoloto foki laua ke fai lā filifiliga e uiga ki te auala ka fakataunu ei ne laua te galuega tenā. Ne lava kae ‵toe a mea kolā ne ‵tau o maua ne laua, i ne?

3. Ne mafai pefea o iloa ne Atamu mo Eva te auala e ‵tau ei o fakaaogā faka‵lei ne laua te lā saolotoga ke fai a filifiliga?

³ Se mea tonu foki loa me i te taimi ne tuku atu ei te avanoaga ki a Atamu mo Eva ke fai lā filifiliga, ne seki fakauiga i ei me ka iku manuia so se filifiliga e fai ne laua. Ne ‵tau mo laua o fai lā filifiliga e ‵tusa loa mo tulafono mo akoakoga fakavae a te Atua. Ne mafai pefea o iloa ne laua a tulafono konā? Mai i te faka‵logo ki te Atua telā ne faite ne ia laua, penā foki loa mo te ‵kilo sāle atu ki ana galuega. Ne tuku atu ne te Atua ki a Atamu mo Eva te atamai ke mafai ne laua o fakaaogā a mea kolā ko oti ne iloa ne laua. Me ne ‵lei katoatoa laua i te taimi ne faite ei laua, ne faigofie ki a laua ke fakaasi atu a uiga kolā e ‵pau mo uiga o te Atua i te faiga o lā filifiliga. Ko tena uiga, ne ‵tau o fakaeteete malosi laua i te faiga o lā filifiliga māfai e loto fakafetai laua ki te Atua ona ko mea kolā ne fai ne ia mō laua, kae e fia fakafiafia atu foki laua ki a ia.​—Kenese 1:26, 27; Ioane 8:29.

4. (a) E mata, ne fakamakosu te lā saolotoga ona ko te tulafono ke mo a ma ‵kai laua ki fuaga o te lakau? (e) Kaia ne ‵lei ei te tulafono tenā?

⁴ Tela la, se mea ‵tau ke filifili ne te Atua ke tofotofo aka ne ia te lā a‵lofa fakamaoni ki a ia, e pelā me ko te Pogai o te lā ola, mo te lā loto fia‵fia ke ola e ‵tusa mo tulafono kolā e taku mai ne ia. Ne fakatonu atu a Ieova ki a Atamu, penei: “E mafai ne koe o kai a fuaga o so se lakau i loto i te fatoaga, kae tapu koe e kai ki fuaga o te lakau telā e fai ne ia te tino ke iloa te ‵lei mo te masei. E se ‵tau eiloa mo koe o kai ki fuaga o te lakau tenā, me kafai e kai koe ki ei, a koe e mate eiloa i te taimi tenā.” (Kenese 2:16, 17) Ne fakailoa atu foki ki a Eva a te tulafono tenā mai tua o tena faitega. (Kenese 3:2, 3) E mata, ne fakamakosu i ei te lā saolotoga? Ikai, e se tāitāi. Ne seki ‵tau o fia‵kai laua ki fuaga mai te lakau tenā me e malaku loa a nisi meakai ‵gali ne mafai o ‵kai laua ki ei. (Kenese 2:8, 9) Se mea ‵tau foki ke amanaia laua ki te manatu me i te lalolagi e o te Atua me ne faite ne ia a mea katoa i ei. Tenā e saoloto ei a ia ke fai a tulafono kolā e fetaui ‵tonu mo ana fuafuaga kae e aogā foki ki tino katoa.​—Salamo 24:1, 10.

5. (a) Ne galo atu pefea te saolotoga sē fuafuagina o Atamu mo Eva? (e) Se a te mea ne sui ki ei te saolotoga o Atamu mo Eva, kae ne ‵fuli pefea i ei ‵tou olaga?

⁵ Kae se a te mea ne tupu? Ne fakaaogā ‵se ne se agelu tena saolotoga ke fai a filifiliga me ne fakamaualuga a ia. Ne taku ei a ia ki a Satani, ko tena uiga ko “te Tino ‵Teke.” Ne fakaloiloi ne ia a Eva ke fai ne ia se mea telā e ‵teke atu ei ki te loto o te Atua. (Kenese 3:4, 5) Ne kau atu foki Atamu ki a Eva i te solitulafono ki te Atua. Ne galo atu te lā saolotoga ‵malu ona ko te fia puke atu ki te mea telā e seai se lā fekau i ei. Ne fai te agasala mo fai te lā pule, kae e pelā mo muna a te Atua, ne ‵mate atu fakamuli laua. Ne faka‵solo atu ne laua te agasala ki lā fanau​—telā e sae mai i vāivāiga fia fai agasala o tatou talu mai ‵tou fanaumaiga. Ne aumai foki ne te agasala te tulaga vāivāi telā e iku atu ki masaki, te olaga matua, penā foki loa mo te mate. Ona ko olotou vāivāiga fia fai agasala fakatasi mo fakaosoosoga ma‵sei a Satani, ne māfua mai i ei a tino kolā e fakatau takalia‵lia, e solitulafono, e fakasauā, kae e fai foki a taua kolā ne ‵mate atu i ei te fia miliona o tino. E ‵kese ‵mao eiloa mai te saolotoga telā ne tuku atu ne te Atua ki tino i te kamataga!​—Teutelonome 32:4, 5; Iopu 14:1, 2; Loma 5:12; Fakaasiga 12:9.

Te Auala e Toe Maua ei te Saolotoga

6. (a) E maua i fea te saolotoga tonu? (e) Se a te vaegā saolotoga telā ne faipati ki ei a Iesu?

⁶ Ona ko fakalavelave kolā e ‵tupu sāle i aso nei i te lalolagi kātoa, e se ‵poi tatou me e ma‵nako malosi a tino ke momea aka te lotou saolotoga. Kae e maua i fea te saolotoga tonu? Ne fai mai a Iesu penei: “Kafai e faka‵logo koutou ki aku akoakoga, ko oku soko ‵tonu koutou. Ka iloa ne koutou te munatonu, ko te munatonu foki ka fakasaoloto ne ia koutou.” (Ioane 8:31, 32) A te vaegā saolotoga tenā e se ko te saolotoga telā e fakamoe‵moe ki ei a tino māfai e ‵teke atu latou ki se tino pule io me se malo kae e ‵lago atu i ei ki te suā tino. Kae e oko atu te vaegā saolotoga tenā ki te māfuaga tonu o fakalavelave o tino. I konā loa, ne faipati atu a Iesu e uiga ki te saolotoga mai te ‵nofo pologa ki te agasala. (Ioane 8:24, 34-36) Tela la, kafai ko fai se tino mo fai se soko tonu o Iesu Keliso, e lavea atu i ei me ko ‵fuli malosi tena olaga, telā ko saoloto ei a ia!

7. (a) E mafai pefea o saoloto tatou mai te ‵nofo pologa ki te agasala i te taimi nei? (e) Ne a mea e ‵tau o fai ne tatou ke maua ei te saolotoga tenā?

⁷ E se fakauiga i ei me e se toe lagona nei ne Kelisiano ‵tonu a vāi‵vāiga fia fai agasala kolā ne fa‵nau mai fakatasi mo latou. E ‵tau mo latou o ‵teke atu faeloa ki te agasala telā ne tuku fakasolo mai ki a latou. (Loma 7:21-25) Kae kafai e ola se tino e ‵tusa eiloa mo akoakoga a Iesu, ka se toe fai a ia mo fai se pologa ki te agasala. E se toe fai te agasala mo fai se tino pule telā e fakatonu atu kae fakalogo faeloa a ia ki ei. E se toe nofo pologa a ia i se vaegā olaga telā e seai se fakamoemoega i ei kae e se toe logosala faeloa tena loto lagona. Ka maua ne ia se loto lagona ‵mā i mua o te Atua me ko oti ne fakamagalo ana agasala ona ko tena fakatuanaki ki te taulaga a Keliso. Kāti ka toe ‵sae mai a vāivāiga fia fai agasala, kae kafai e ita te tino ma fai a mea konā ona ko te mea e manatua faeloa ne ia a akoakoga ‵mā a Iesu, e fakaasi mai i ei me e se toe pule te agasala ki a ia.​—Loma 6:12-17.

8. (a) Ne a vaegā saolotoga e maua ne tatou i te lotu Kelisiano tonu? (e) E ‵tau o pefea te ‵tou kilokiloga ki tino pule i te malo?

⁸ Mafaufau aka la ki te saolotoga o Kelisiano. Ko oti ne fakasaoloto tatou mai ikuga ma‵sei o akoakoga ‵se, te ‵nofo pologa ki manatu fāpaupau, mo te pule mai o te agasala ki a tatou. Ko fakasaoloto tatou mai te sōna mataku valevale ki te mate ona ko munatonu ‵gali e uiga ki te tulaga o tino ‵mate mo te toetu. Ona ko te mea e iloa ne tatou me ko pili o sui a malo o tino sē ‵lei katoatoa ki te Malo amiotonu o te Atua, e fakasaoloto foki ei tatou mai te ola e aunoa mo se fakamoemoega. (Tanielu 2:44; Mataio 6:10) Kae e se fakauiga te vaegā saolotoga tenā me e ‵lei fua ke se fakaaloalo ki tino pule i te malo mo olotou tulafono.​—Tito 3:1, 2; 1 Petelu 2:16, 17.

9. (a) E fesoasoani mai pefea a Ieova mo te alofa ke maua ne tatou te ‵toe saolotoga ‵lei telā e mafai o maua i te vaitaimi tenei? (e) E mafai pefea o fai ne tatou a filifiliga ‵poto?

⁹ E se tuku tiaki ne Ieova tatou ke tuku taumate fua te ‵toe auala ‵lei ke ola i ei. E iloa ne ia ‵tou uiga, mea kolā e maua i ei te fiafia tonu, mo mea kolā ka aogā ki a tatou ki te se-gata-mai. E iloa ne ia a mafaufauga mo amioga kolā e mafai o fakamakosu ei te ‵tou fesokotakiga mo te Atua, penā foki loa mo nisi tino. Kāti e fai foki ne mea konā ke taofi aka se tino ma ulu atu ki te lalolagi fou. Ona ko tena alofa, e fakailoa mai ne Ieova a mea katoa konā e alatu i te Tusi Tapu mo tena fakapotopotoga i te lalolagi nei. (Maleko 13:10; Kalatia 5:19-23; 1 Timoteo 1:12, 13) Kae ko pānaki tonu eiloa mo tatou te tiute ke filifili aka me ka fakaaogā pefea ne tatou te saolotoga tenā mai te Atua. E ‵kese mo Atamu, ka fai ne tatou a filifiliga ‵poto māfai ko ‵teu aka ne tatou i ‵tou loto a mea kolā e fakamatala mai i te Tusi Tapu. Ka fakaasi atu ei ne tatou me i te ‵toe mea tāua i ‵tou olaga ko te ‵tou fesokotakiga ‵lei mo Ieova.

Ko te Fiafai ki te Suā Vaegā Saolotoga

10. Se a te suā vaegā saolotoga telā e fia‵fai ki ei a nisi Molimau a Ieova?

¹⁰ I nisi taimi e fia maua ne nisi talavou kolā ne Molimau a Ieova​—e penā foki loa mo nisi Molimau kolā e tai mā‵tua​—a te suā vaegā saolotoga. Kāti e foliga gali atu te lalolagi ki a latou kae kafai e mafau‵fau faeloa latou ki ei, ko gasolo o malosi te lotou manakoga ke fai a mea kolā e lauiloa i te lalolagi kae se fetaui mo te olaga faka-Kelisiano. Kāti e se fakamoe‵moe latou ke sōna fakaaogā a vailakau tapu, ke kō‵na, io me ke finalalolagi latou. Kae kāti ko kamata o ‵kau atu latou ki tino kolā e se ne Kelisiano ‵tonu, kae ko fia fakafiafia atu foki latou ki tino konā. Kāti ko kamata foki o fakaakoako atu latou ki pati mo amioga a tino konā.​—3 Ioane 11.

11. I nisi taimi e māfua mai fea a fakaosoosoga ke fai a mea ma‵sei?

¹¹ E māfua mai i nisi taimi a fakaosoosoga ke fai a amioga kolā e se fetaui mo te olaga faka-Kelisiano i se tino telā e fai mai me e tavini atu a ia ki a Ieova. Ne tupu foki te mea tenā ki nisi Kelisiano mua kae e mafai foki o tupu te mea tenā i ‵tou aso nei. E ma‵nako sāle a vaegā tino penā ke fakafia‵fia atu faeloa ki a latou i te faiga o mea kolā e fe‵paki mo tulafono a te Atua. E fakama‵losi sāle atu latou ki nisi tino ke ‵sala faeloa a “fakafiafiaga.” ‘Ne folafola atu ne latou a te saolotoga, ka ko latou ne pologa foki o te amio fakamasei mea.’​—2 Petelu 2:19.

12. Ne a ikuga ma‵sei e maua mai i te faiga o amioga kolā e fe‵paki mo tulafono mo akoakoga fakavae a te Atua?

¹² E ma‵sei faeloa a mea kolā e iku mai i te vaegā saolotoga tenā me e solitulafono i ei ki te Atua. E pelā mo te ‵moe fakatasi kae sē avaga, e mafai o iku atu i ei ki te logo‵sala o lagonaga, ma‵saki, te mate, te faitama fakafuasei, io me ko te ‵talaga o avaga. (1 Kolinito 6:18; 1 Tesalonia 4:3-8) E mafai foki o iku atu te sōna fakaaogāga o vailakau tapu ki te mataitaita, te sē mafaki ‵lei o pati a se tino, te segia o mata, te takamiomio, te itia o te mānava, te masei o te ulu, mo te mate. E mafai o iku atu i ei ki te umiti faeloa ki vailakau mo te kaisoa ke ‵togi ei a vailakau konā. E tai ‵pau eiloa a mea kolā e iku mai i te sōna inu kava malosi. (Faataoto 23:29-35) Kāti e ma‵natu aka a tino kolā e fai ne latou a vaegā amioga penā me ko saoloto latou, kae fakamuli loa ko fatoā iloa ne latou me e ‵nofo pologa latou ki te agasala. Ko oko eiloa i te pule fakasauā mai o te agasala! E mafai o ‵sao tatou mai i se vaegā olaga penā māfai e mafau‵fau faka‵lei tatou ki ei i te vaitaimi tenei.​—Kalatia 6:7, 8.

Te Pogai o Fakalavelave

13. (a) E fakamalosi sāle aka pefea a manakoga kolā e iku atu ei ki fakalavelave? (e) I āi te kilokiloga e ‵tau o maina tatou i ei ke iloa aka ei a “taugasoa ma‵sei”? (i) Kafai ko tali ne koe a fesili i te palakalafa e 13, ke na faka‵mafa mai i ei te kilokiloga a Ieova.

¹³ Ke mafaufau malie aka ki te pogai o nisi fakalavelave. E fakamatala mai te Tusi Tapu penei: “Ka ko te tino e fakaosoosogina manafai ko tō keatea a ia, kae faka‵segina ne ona manakoga ma‵sei. Tela la, kafai ko faitama te manako masei, ko fanau mai ei te agasala; kae kafai ko matua te agasala, ko fanau mai ei te mate.” (Iakopo 1:14, 15) E fakamalosi aka pefea a vaegā manakoga penā? I mea kolā e mafau‵fau tatou ki ei. E masani o tupu te mea tenā māfai ko ‵kau atu tatou ki tino kolā e se ola e ‵tusa mo akoakoga fakavae i te Tusi Tapu. E iloa ‵lei ne tatou me e ‵tau o ‵kalo keatea tatou mai “taugasoa ma‵sei.” (1 Kolinito 15:33) Kae ko oi la a taugasoa ma‵sei? Se a te kilokiloga a Ieova ki ei? Kafai e mafau‵fau faka‵lei tatou ki fesili kolā e ‵soko mai kae ‵suke foki ki tusi siki i ei, ka fesoasoani mai i ei ke fai ne tatou a filifiliga ‵lei.

Kafai e tai mata ‵malu a nisi tino, e mata, e fakauiga i ei me i a latou ne taugasoa ‵lei? (Kenese 34:1, 2, 18, 19)

E mata, e fakaasi mai ne mea kolā e sau‵tala a nisi tino ki ei, io me ko olotou tala faifā‵kata me i a latou ne vaegā tino kolā e ‵tau o fia fai taugasoa tatou ki ei? (Efeso 5:3, 4)

E pefea a lagonaga o Ieova māfai e fia fai taugasoa tatou ki tino kolā e se a‵lofa ki a ia? (2 Nofoaiga a Tupu 19:1, 2)

E tiga eiloa e ‵tau o ga‵lue tasi io me a‵koga fakatasi tatou mo tino kolā e se ‵pau ‵tou talitonuga, kaia e ‵tau ei o fakaeteete tatou? (1 Petelu 4:3, 4)

E mafai o fesokotaki atu tatou ki nisi tino e auala i te TV, tamunei, te Internet, mo te faitau foki ki tusi, mekesini mo nusipepa. Ne a mea e aofia i mea kolā e ‵tau o fakaeteete malosi tatou i ei? (Faataoto 3:31; Isaia 8:19; Efeso 4:17-19)

Ne a mea e iloa ne Ieova e uiga ki a tatou ona ko tino kolā e fia fai taugasoa tatou ki ei? (Salamo 26:1, 4, 5; 97:10)

14. Se a te saolotoga gali telā ko pili o maua ne tino kolā e fakaaogā ne latou a pati fakatonutonu i te Muna a te Atua?

¹⁴ Ko pili eiloa o oko mai te lalolagi fou a te Atua. Ka fakasaoloto a tino mai te pulega a Satani mo tena lalolagi masei e auala i te Malo faka-te-lagi o te Atua. I konā loa, ka gasolo o ‵galo atu a ikuga katoa o te agasala mai tino faka‵logo, ka maua ne latou i ei a mafaufauga mo foitino ‵lei katoatoa, kae ka maua foki ne latou te ola se-gata-mai i te Palataiso. Ka maua fakamuli ne tino katoa a te saolotoga telā e fetaui tonu mo “te agaga” o Ieova. (2 Kolinito 3:17) E mata, se mea ‵lei ke ‵galo atu a mea ‵gali katoa konā ona ko te manatu māmā ki pati fakatonutonu i te Muna a te Atua i te vaitaimi tenei? Ke na fakaasi faka‵lei atu ne tatou katoa me e ma‵nako tonu tatou ki “te saolotoga ‵malu o te fanau a te Atua,” mai i te auala telā e fakaaogā ei ne tatou ‵tou saolotoga i aso nei.​—Loma 8:21.

Ke Toe Sau‵tala ki Manatu Konei

• Se a te vaegā saolotoga telā ne maua ne te tauavaga muamua? E ‵kese pefea te saolotoga tenā mo te vaegā saolotoga telā ko maua ne tino i te vaitaimi tenei?

• Se a te vaegā saolotoga telā ko oti ne maua ne Kelisiano? Kae e ‵kese pefea te saolotoga tenā mo manatu o tino e uiga ki te saolotoga?

• Kaia e tāua ei ke ‵kalo keatea tatou mai taugasoa ma‵sei? I ai te filifiliga e ‵tau o talia ne tatou e uiga ki amioga kolā e ma‵sei, kae e ‵kese mai mea kolā ne talia ne Atamu?

[Ata i te itulau e 46]

E fakailoa mai penei te Muna a te Atua: “Ke se fakaloiloigina koutou: A taugasoa ma‵sei e fakamasei ne latou te amio ‵lei”