Ke Takitaki Koe Ne Ieova Ki Te Saolotoga Tonu
“Sukesuke faka‵lei ki te tulafono ‵lei katoatoa o te saolotoga.”—IAKOPO 1:25.
E MAFAI NE KOE O FAKAMATALA MAI?
Se a te tulafono e fakatoka ei a tino ke maua te saolotoga tonu, kae ko oi e maua ne latou a mea aoga mai te tulafono tenā?
Se a te mea e ‵tau o fai ne tatou ke maua te saolotoga tonu?
Se a te saolotoga ka maua ne latou katoa kolā e tumau i te faka‵logo ki a Ieova?
1, 2. (a) Se a te mea ko tupu ki te saolotoga o tino i te lalolagi, kae kaia? (e) Se a te saolotoga e fakamoe‵moe ki ei a tavini a Ieova?
E OLA nei tatou i te taimi ko gasolo aka eiloa o lasi a te kaimanako, solitulafono, mo fakasauāga. (2 Timoteo 3:1-5) Ona ko te mea tenā, ko fai ei ne malo a tulafono e uke, faopoopo te aofaki o pulisimani, kae fakaaoga a mea pei ata o kilo‵kilo ki mea e fai ne tino. I nisi atufenua, e faka‵piki ne tino a pēle fakailoa i olotou fale, faopoopo a ‵loka o mataloa, ke oko foki ki ‵pui iti ke puipui ei latou. E tokouke a tino ko sē fia olo ki tua i te po io me tuku olotou tamaliki ke ta‵fao i tua i a latou eiloa—me se ao io me se po. E manino ‵lei me ko gasolo eiloa o foliki a te saolotoga e maua ne tino, kae e foliga mai me e se fano o ‵lei a te tulaga tenei.
2 I te fatoaga o Etena, ne fai mai a Satani me i tino e mafai fua o saoloto kātoatoa māfai e ‵tu tokotasi latou mai i a Ieova. E fakatalitonu mai ne mea kolā ko oti ne ‵tupu talu mai te taimi tenā me i pati a tou tagata kolā ne fai se ma‵tugā loi matagā ‵ki eiloa! Ko te lasi o te fai ne tino a mea kolā e ma‵nako latou ki ei kae sē ko mea kolā e fai atu te Atua ke fai ne latou, ko te lasi o te logo‵mae o tino katoa. E logo‵mae foki a tavini a Ieova ona ko te tulaga tenei. Kae e fakamoe‵moe eiloa tatou me i se aso e tasi, ka fakasaoloto ei a tino mai te agasala mo te fai valevale kae ka maua ne latou a te mea telā e taku i te Tusi Tapu ko “te saolotoga ‵malu, ko te fai mo fai a fanau a te Atua.” (Loma 8:21) A te tonuga loa, ko oti nei ne kamata o fakatoka ne Ieova ana tavini mō te saolotoga tenā. I te auala fea?
3. Se a te tulafono ne tuku atu ne Ieova ki ana tavini, kae ne a fesili ka mafau‵fau tatou ki ei?
3 Ke fakatoka ana tavini mō te saolotoga tenā i aso mai mua, ne tuku mai ne Ieova ki a tatou a te mea telā e taku ne Iakopo ko “te tulafono ‵lei katoatoa o te saolotoga.” (Faitau te Iakopo 1:25.) E taku a te mea tenei i nisi Tusi Tapu ko “te tulafono ‵lei kātoatoa telā e fakasaoloto ei tatou” (The New English Bible) mo “te tulafono ‵lei kātoatoa o te saolotoga” (The New American Bible). Kafai e mafau‵fau a tino ki te tulafono, e masani o mafau‵fau latou ki fakataputapuga, kae e se ko te saolotoga. Tela la, se a “te tulafono ‵lei kātoatoa o te saolotoga”? Kae e fakasaoloto pefea tatou ne te tulafono tenā?
TE TULAFONO TELĀ E FAKASAOLOTO EI TATOU
4. Se a “te tulafono ‵lei kātoatoa o te saolotoga,” kae ko oi e maua ne latou a mea aoga mai i ei?
4 A “te tulafono ‵lei katoatoa o te saolotoga” e se ko te Tulafono a Mose. Ne tuku atu ne Ieova a te Tulafono a Mose ki te kau Isalaelu ke iloa ne latou i a latou ne tino agasala, kae ne fakataunu ne Keliso a te Tulafono tenā. (Mataio 5:17; Kalatia 3:19) Se a la te tulafono telā ne faipati ki ei a Iakopo? Ne faipati eiloa a ia e uiga ki “te tulafono a Keliso,” telā ne taku foki ko “te tulafono o te fakatuanaki” mo “te tulafono o tino saoloto.” (Kalatia 6:2; Loma 3:27; Iakopo 2:12) Tela la, a te “tulafono ‵lei kātoatoa” e aofia i ei a mea katoa kolā e manako a Ieova ke fai ne tatou. E maua eiloa ne Kelisiano fakaekegina mo “nisi mamoe” a mea aoga mai i ei.—Ioane 10:16.
5. Kaia e se tō faigata ei ke tautali i te tulafono o te saolotoga?
5 A “te tulafono ‵lei kātoatoa” e ‵kese mo tulafono a atufenua e uke. A te mea tenei e faite ki tulafono mā‵ma mo fakatakitakiga faigo‵fie kolā e se tō faiga‵ta ke malama‵lama io me tau‵tali i ei. (1 Ioane 5:3) Muna a Iesu: “Me e māmā taku amo, kae amogofie foki taku amoga.” (Mataio 11:29, 30) E se manakogina foki se fakasologa loa o tulafono fo‵liki mō “te tulafono ‵lei kātoatoa.” E fakavae eiloa ki te alofa kae tusi i mafaufau mo loto o tino, kae e se ki papa fatu.—Faitau te Epelu 8:6, 10.
TE AUALA E FAKASAOLOTO EI TATOU NE “TE TULAFONO ‵LEI KĀTOATOA”
6, 7. Ne a ‵tou muna e mafai o fai atu e uiga ki tulaga o Ieova, kae se a te mea e fakasaoloto ne te tulafono o te saolotoga ke fai ne tatou?
6 A tapulā kolā ne fakatoka ne Ieova mō tino, ne fai ke aoga kae puipui ei latou. E pelā me se fakaakoakoga, mafaufau ki tulafono o te natula kolā e pule atu ki te malosi mo mea i ei. E se fa‵meo a tino me e fai ma‵sei latou ne tulafono konā. E loto fakafetai latou me ko iloa ne latou i tulafono konā ne fai mō te ‵lei o latou. I se auala tai ‵pau, a mea e manakogina ne Ieova, kolā e tauloto ne tatou mai i “te tulafono ‵lei kātoatoa” a Keliso, ne fai ke aoga ki a tatou.
7 A te tulafono o te saolotoga se puipuiga ki a tatou, kae fakasaoloto foki ei tatou ke fakama‵lie aka a ‵tou manakoga ‵tonu katoa e aunoa mo te fakamasei mai ki a tatou eiloa io me sē āva atu ki saolotoga o nisi tino. Tela la, e saoloto eiloa tatou o fai a te mea telā e ma‵nako tatou o fai māfai fua e maua ne tatou a te manakoga tonu. Ko tena uiga e ‵tau o fai ne tatou a te mea telā e fiafia a Ieova ki ei mo te mea telā e manako mai a ia ke fai ne tatou. E ‵tau mo tatou o tauloto ke a‵lofa ki te mea telā e alofa a Ieova ki ei kae takalia‵lia ki te mea telā e takalialia a ia ki ei. E fesoasoani mai te tulafono o te saolotoga ke fai ne tatou a te mea tenā.—Amosa 5:15.
8, 9. E aoga pefea ki a tatou a te faka‵logo ki te tulafono o te saolotoga? Tuku mai se fakaakoakoga.
8 Ona ko ‵tou tulaga sē ‵lei kātoatoa, ko oko eiloa te faigata ke pule atu ki ‵tou manakoga sē ‵tonu. Kae kafai e a‵lofa fakamaoni tatou o faka‵logo ki te tulafono o te saolotoga, ka mafai eiloa o maua nei ne tatou ne nai saolotoga. E pelā me se fakaakoakoga, a te tagata e igoa ki a Jay ne umiti ‵ki eiloa ki paka. I te taimi ne sukesuke ei tou tagata ki te Tusi Tapu, ne tauloto ne ia me e se fakafiafia atu ki te Atua ana amioga masani. Ne ‵tau o fai ne ia se fakaikuga. E mata, ka tumau eiloa te pule atu ki a ia a tena manakoga ke ‵pusi io me ka fakalogo a ia ki a Ieova? Ne fai ne ia se fakaikuga poto ke tavini atu ki te Atua, faitalia te faigata ki a ia ke fakagata te ‵pusi. E pefea a lagonaga o tou tagata i te otiga ne fakagata ne ia a te amioga masani tenei? Ana muna me ko oko eiloa i tena fiafia kae “saoloto kātoatoa.”
9 A te saolotoga telā e ofo mai ne te lalolagi e fakasaoloto i ei a tino ke fakama‵lie aka olotou manakoga. E pelā mo mea kolā ne tauloto ne Jay, ne fai eiloa a tino e pelā me ne pologa ki te agasala. Ne filifili aka ne latou kolā e faka‵logo ki te tulafono o te saolotoga a Ieova ke pule latou ne te agaga o te Atua, ko fakasaoloto latou kae e iku atu i ei ki te “ola mo te filemu.” (Loma 8:5, 6) Ne maua i fea ne Jay a te malosi ke fakagata a tena amioga masani? Ne seki maua ne ia i a ia eiloa, ne maua ne ia mai i te Atua. “Ne sukesuke faeloa tou tagata ki te Tusi Tapu, ‵talo mō te agaga tapu, kae talia a fesoasoani a‵lofa mai taina mo tuagane i te fakapotopotoga Kelisiano,” ko ana muna. E mafai o fesoasoani mai a mea katoa konei ke maua ne tatou katoa a te saolotoga tonu. Ke onoono aka tatou me fai pefea.
SUKESUKE FAKA‵LEI KI TE MUNA A TE ATUA
10. Se a te uiga ke “sukesuke faka‵lei” ki te tulafono a te Atua?
10 I te Iakopo 1:25, e fai‵tau tatou penei: “Kae ko te tino telā e sukesuke faka‵lei ki te tulafono ‵lei katoatoa o te saolotoga kae tumau i ei,” ka “fiafia eiloa a ia i ei.” A te pati Eleni telā e ‵fuli ki te “sukesuke faka‵lei” e fakauiga loa ki te punou ifo ki lalo ke pili te kilo ki se mea. E manakogina i konei se taumafaiga. Tela la, kafai e ma‵nako tatou ke fakama‵losi ‵tou mafaufau mo ‵tou loto ne te tulafono o te saolotoga, e ‵tau o fai ne tatou se taumafaiga ke suke‵suke faka‵lei ki te Tusi Tapu kae fai faeloa kae mafaufau ‵loto ki mea kolā e fai‵tau ne tatou.—1 Timoteo 4:15.
11, 12. (a) Ne faka‵mafa mai pefea ne Iesu a te manakoga ke fai a te munatonu mo fai te auala e ola ei tatou? (e) Se a te mea fakamataku e ‵tau o ‵kalo tatou kea‵tea mai i ei māfai koi talavou tatou?
11 I te taimi foki eiloa tenā, e ‵tau mo tatou o tumau, io me lotomau, i te fakaaogaga o te Muna a te Atua. E ‵tau o fai ne tatou a te munatonu mo fai te auala e ola ei tatou. Ne fai atu foki ne Iesu se manatu tai ‵pau ki nisi tino kolā ne tali‵tonu ki a ia: “Kafai e tumau koutou i aku muna, ko oku soko ‵tonu koutou, kae ka iloa ne koutou te munatonu, a ko te munatonu ka fakasaoloto ne ia koutou.” (Ioane 8:31, 32) Ke “iloa,” e fai mai te mau e tasi, e fakauiga foki i konei ki te mauaga o te loto fakafetai me “i te mea telā ko ‘iloa’ e tāua ki te tino telā e iloa ne ia.” Tela la, e “iloa” kātoatoa ne tatou a te munatonu māfai e fakavae ki ei ‵tou olaga. Ko mafai ei ne tatou o fai atu me i te “muna a te Atua” ko “galue” i loto i a tatou. Ka fesoasoani mai ki a tatou ke tumau i te faiga o ‵fuliga ki ‵tou uiga totino ko te mea ke fakaakoako faka‵lei atu tatou ki te ‵tou Tamana faka-te-lagi.—1 Tesalonia 2:13.
12 Fesili ifo ki a koe eiloa, ‘E mata, e iloa tonu ne au a te munatonu? E mata, ko oti ne fai ne au mo auala e ola ei au? Io me koi manako eiloa au ki nisi saolotoga o te lalolagi?’ Ne fai mai ne se tuagane telā ne puti aka ne mātua Kelisiano se tala e uiga ki a ia. I te taimi koi talavou ei tou fafine, ne talitonu a ia ki a Ieova kae ne seki iloa tonu eiloa ne ia a ia. Ne tusi mai tou fafine: “Ne seki tauloto lele eiloa au ke takalialia ki mea kolā e takalialia a ia ki ei. Ne seki talitonu eiloa au me i mea kolā ne fai ne au ne tāua ki a ia. Kae ne seki tauloto lele eiloa au ke fanatu ki a ia māfai ko fepaki au mo se fakalavelave. Ne fakalagolago au ki toku malamalama totino, telā ko iloa aka ei ne au me se mea valea fua me e seai eiloa se mea e tasi e iloa ne au.” Se mea fakafiafia, me ne iloa fakamuli aka ne te tuagane tenei me i ana mafaufauga ne ‵se ‵ki eiloa, kae ne fai ne ia ne nāi ‵fuliga tāua. Ne kamata foki tou fafine o tavini atu e pelā me se paenia tumau.
E MAFAI NE TE AGAGA TAPU O FAKASAOLOTO KOE
13. E fesoasoani mai pefea te agaga tapu o te Atua ke fakasaoloto tatou?
13 I te 2 Kolinito 3:17, e fai‵tau tatou penei: “I so se koga e nofo ei te agaga o Ieova, e nofo foki i konā te saolotoga.” E fesoasoani mai pefea te agaga tapu ke fakasaoloto tatou? E fesoasoani mai ke maua ne tatou a uiga e pelā mo “te alofa, te fiafia, te filemu, te kufaki, te atafai, te aga‵lei, te fakatuanaki, te agamalu, te loto pulea.” (Kalatia 5:22, 23) E se mafai o saoloto tonu a tino e aunoa mo uiga konei, kae maise eiloa te alofa. E fakaasi manino mai a te mea tenei ne te tulaga o te lalolagi i aso nei. I te otiga ne fakasolo mai ne ia a fuataga o te agaga, ne tusi mai a te apositolo ko Paulo penei: “Ko se ‵nofo koutou mai lalo i te tulafono.” Se a te mea ne fakauiga a ia ki ei? A fuataga o te agaga o te Atua e se fakatapulāgina ne so se tulafono. Ka seai lele eiloa se tulafono e taofi aka ne ia a te ‵tupuakaga o uiga konei. (Kalatia 5:18) E manako a Ieova ke momea aka te fakaasiatuga ne tatou a uiga konei kae ke fakaasi atu ki tino ke oko eiloa ki te se-gata-mai.
14. I auala fea e fakapologa ei ne te agaga o te lalolagi a tino?
14 Kāti e mafau‵fau a tino kolā e pule ne te agaga o te lalolagi me i a latou ko saoloto me e mafai ne latou o fakama‵lie aka olotou manakoga kaima‵nako. (Faitau te 2 Petelu 2:18, 19.) Kae e se iloa ne latou me i a latou ne pologa eiloa. E ‵tau o fai ne malo ne tulafono e uke ko te mea ke pule faka‵lei atu ki manakoga mo amioga masani a tino. Kae fai mai a Paulo me i tulafono e seki faite “mō te tino amiotonu, kae mō tino solitulafono kae uiga ‵teke.” (1 Timoteo 1:9, 10) A latou foki ne pologa ki olotou foitino agasala me e fai ne latou a “mea e manako ki ei te foitino,” kae ko te foitino se matai sauā. (Efeso 2:1-3) E pelā mo tamā manu kolā e ‵tolo ki loto i se pōla hani o kai‵kai i ei ko ‵lave ei i loto, a tino foki konei e tau‵tali eiloa i olotou manakoga ‵se ko fai ei mo pologa ki te agasala.—Iakopo 1:14, 15.
E FAKASAOLOTO I LOTO I TE FAKAPOTOPOTOGA KELISIANO
15, 16. Ne a mea aoga ne maua ne tatou i te ‵tou ‵kau fakatasi mo te fakapotopotoga, kae ne a saolotoga e maua ne tatou i loto i te fakapotopotoga?
15 A te ‵kau fakatasi mo te fakapotopotoga Kelisiano e se ‵pau mo te kau ki se potukau. A koe ne vau ki loto i te fakapotopotoga me i a Ieova e manako ke nofo koe i ei. (Ioane 6:44) Kaia ne filifili ei ne ia koe? E mata, ne lavea ne ia se tino amiotonu telā e mataku ki te Atua? Kāti ka fai mai koe, “ikai!” Kae se a la te mea ne lavea ne te Atua? Ne lavea ne ia me ka loto fiafia eiloa koe o fakalogo ki tena tulafono kae talia a tena takitakiga alofa. Mai te taimi ne fai ei koe mo vaega o te fakapotopotoga, ko oti ne tausi faka‵lei atu a Ieova ki a koe e auala i te akoakoga o koe mai tena Muna. Ko oti ne fakasaoloto ne ia koe mai i loi mo manatu va‵lea o lotu ‵se kae akoako atu a te auala e mafai ei ne koe o fakaakoako ki uiga totino o Keliso. (Faitau te Efeso 4:22-24.) Kae ko te ikuga, ko maua nei ne koe a te tauliaga ke aofia i tino fua kolā e mafai o taku ‵tonu e pelā me ne “tino saoloto.”—Iakopo 2:12.
16 Mafaufau ki te mea tenei: Kafai koe e ‵nofo tasi mo latou kolā e a‵lofa ki a Ieova mo olotou loto kātoa, e mata, ka mataku koe? A koi fai‵pati koe mo ou taina mo tuagane i te Kingdom Hall, e mata, ne manavase koe i te mea ma ‵galo au mea? Ikai! E toka eiloa tou loto kae sē manavase. E mata, ka penā ou lagonaga māfai e nofo atu koe i se potukau o tino i se koga fakaa‵tea? Ailoga! Kae ko te saolotoga telā ko maua nei ne koe i va o tino o te Atua se ata fua o te saolotoga telā ka maua ne koe i te taimi mai mua.
‘TE SAOLOTOGA ‵MALU O FANAU A TE ATUA’
17. Ka fesoasoani mai pefea a ‘te fakaasimaiga o tama a te Atua’ ke saoloto a tino?
17 Ne tusi mai a Paulo e uiga ki te saolotoga ‵malu telā ka tuku mai ne Ieova ki ana tino i te lalolagi. Ana muna: “Me e fakatali‵tali a mea katoa ne faite mo te olioli ki te taimi e fakaasi mai ei a tama a te Atua.” Kae ne toe fai mai tou tagata: “Ka toe fakasaoloto a mea ne faite mai te pologa ki te masei ke maua ne latou a te saolotoga ‵malu, ko te fai mo fai a fanau a te Atua.” (Loma 8:19-21) E fakasino atu “a mea katoa ne faite” ki tino kolā e fakamoe‵moe ke ola i te lalolagi, ko latou kolā ka maua ne latou a mea aoga mai “te taimi e fakaasi mai ei” a tama fakaekegina a te Atua. Ka kamata a te fakaasimaiga tenā i te taimi e toe faka‵tu aka ei a “tama” konei ki te koga o agaga, ‵kau fakatasi mo Keliso i te ‵fulu faka‵maga o te lalolagi mai amioga ma‵sei kae faka‵sao atu “se vaitino tokouke” ki loto i te fakanofonofoga fou.—Fakaasiga 7:9, 14.
18. Ka momea aka pefea a te saolotoga o tino faka‵logo, kae se a te saolotoga ka maua ne latou i te fakaotiga?
18 Ka maua ne tino i ei se saolotoga fakapitoa. Ka saoloto latou mai fakamalosiga a Satani mo te kau temoni. (Fakaasiga 20:1-3) Se fakatapūga lasi ‵ki eiloa tenā! Mai te taimi tenā o fano ki mua, ka fakaaoga ne tupu mo faitaulaga e toko 144,000 a te taulaga togiola ke aoga ki tino ke oko eiloa ki te taimi e fakasaoloto kātoatoa ei a tino mai te agasala mo te sē ‵lei kātoatoa. (Fakaasiga 5:9, 10) Kafai ko oti ne tofotofo aka olotou fakatuanaki, ka maua ei ne tino faka‵logo katoa a te saolotoga ‵lei kātoatoa telā ne manako muamua a Ieova ke maua ne latou, telā ko ‘te saolotoga ‵malu o fanau a te Atua.’ Mafaufau la! Ka sē toe faigata ke fai ne koe se mea telā e tonu i mata o te Atua. Ka ‵lei kātoatoa tou foitino, loto, mo te mafaufau, kae ka mafai o fakaakoako kātoatoa atu koe ki uiga o te Atua.
19. Ne a mea e ‵tau o fai faeloa ne tatou māfai e ma‵nako tatou ke maua a ‘te saolotoga ‵malu o fanau a te Atua’?
19 E mata, e manako koe ki ‘te saolotoga ‵malu o fanau a te Atua’? Kafai e manako koe ki ei, ke na fakamalosi aka faeloa tou mafaufau mo tou loto ne “te tulafono ‵lei kātoatoa o te saolotoga.” Ke sukesuke faka‵lei ki te Tusi Tapu kae fai faeloa. Ke fai a te munatonu mo fakavae o tou olaga. ‵Talo mō te agaga tapu. Taumafai ke maua kātoatoa a mea aoga mai te fakapotopotoga Kelisiano mo mea‵kai faka-te-agaga kolā e tuku mai ne Ieova ki a tatou. Ke mo a eiloa e fakaloiloi koe ne Satani, e pelā mo tena fakaloiloiga ki a Eva, ko mafaufau ei koe i auala o te Atua ko tō faiga‵ta. E tigā eiloa e mafai o poto ‵ki a te Tiapolo, e mafai loa o sē taka‵vale tatou i tou tagata, “me e maina ‵lei tatou i ana togafiti.” E tenei loa te mea ka sau‵tala tatou ki ei i te suā mataupu.—2 Kolinito 2:11.
[Ata i te itulau e 14]
E mata, koi manako eiloa au ki nisi “saolotoga” o te lalolagi?
[Ata i te itulau e 14]
E mata, ko oti ne fai ne au te munatonu mo fakavae o toku olaga?