Mataupu e Ono

Te Kinauga Telā e Aofia Tatou Katoa i ei

1, 2. (a) Se a te kinauga telā ne fakasae aka ne Satani i Etena? (e) Ne fakauiga pefea ana pati i te kinauga tenā?

E AOFIA koe i te ‵toe kinauga tāua eiloa. Kae e aofia foki tou ola ki te se-gata-mai i te faiga o tau filifiliga i te kinauga tenā. Ne kamata te kinauga tenā i te ‵tekeatuga i Etena. I konā loa, ne fesili atu a Satani ki a Eva, penei: “E tonu eiloa i te Atua ne fai atu ke sa ‵kai koulua ki fuaga o so se lakau i te fatoaga?” Ne fai atu tou fafine me ne fakauiga a pati a te Atua ki se lakau e tasi fua, penei: “[E] tapu e ‵kai maua ki fuaga o te lakau tenā . . . kafai e ‵kai maua ki ei, ko maua ka ‵mate.” Ne ‵losi atu Satani me ne loi atu fua te Atua ki a laua. Ana muna me e se fakalagolago te ola o Atamu mo Eva ki te lā faka‵logo ki te Atua. Ne fakauiga foki ne Satani ana pati me ne sōna taofi aka fua ne te Atua se mea ‵lei mai i ana tino​—ko te lotou saolotoga ke fakaiku aka a mea e ‵tau o fai i te olaga. Muna a Satani: “E iloa ne [te Atua] me kafai e ‵kai koulua ki fuaga o te lakau tenā, ko koulua ka ‵pau mo te Atua, ka iloa foki ei ne koulua te mea ‵lei mo te mea masei.”​—Kenese 3:1-5.

² Ne fakauiga a pati konā a Satani me e sili atu te manuia o tino māfai e fai fua olotou tonu i a latou eiloa i lō te faka‵logo ki te Atua. Ne ‵teke atu i ei ki te pulega a te Atua. Ne sae aka ei te ‵toe kinauga tāua e uiga ki te manatu me e sili atu te pulega a te Atua i lō so se isi pulega aka. Ne sae mai i ei te fesili tenei: Se a te mea e ‵lei atu ki tino, ko te pulega a Ieova io me ko te pulega telā e tu tokotasi mai i a ia? E tonu, ne mafai fua ne Ieova o tamate fakavave ne ia Atamu mo Eva, kae moi ne fai penā, e se ‵teu faka‵lei aka i ei te kinauga e uiga ki te pulega sili. Me ne tuku atu ne te Atua te avanoaga ke ola a tino i se taimi tai mata leva, ne mafai ei o fakaasi atu ne te Atua a mea kolā ka iku atu ki tino māfai e ‵tu tokotasi latou keatea mai i a ia mo ana tulafono.

3. Se a te lua o manatu ne fakasae aka ne Satani?

³ Ne seki gata te ‵toa atu o Satani ki te pulega sili a Ieova i mea kolā ne ‵tupu i Etena. Ne fakafesiligina ei ne ia te a‵lofa fakamaoni o nisi tino ki a Ieova. Ne fai te manatu tenā mo fai te lua o vaega i te kinauga muamua. Ne aofia i ei a tama‵liki a Atamu mo Eva, mo agelu katoa a te Atua, penā foki loa mo te Tama toekimua a Ieova telā ne alofa malosi a ia ki ei. I aso o Iopu, ne ‵losi atu ei a Satani me e tavini atu fua a tino ki a Ieova ona ko mea ‵lei kolā e maua ne latou mai i a ia, kae e se ko te lotou a‵lofa mo te lotou amanaia ki tena pulega. Ne kinau atu a ia me kafai ko fe‵paki latou mo mea faiga‵ta, ka ‵sala fua latou ki mea kolā e ‵lei ei latou.​—Iopu 2:1-6; Fakaasiga 12:10.

Mea Kolā ko Oti ne Fakamaoni Aka i Tala Fakasolopito

4, 5. Se a te mea ko oti ne fakamaoni aka i tala fakasolopito me e mafai ne tino o pule atu ki olotou olaga me ikai?

⁴ E tasi te mea tāua i te kinauga e uiga ki te pulega sili ko te mea tenei: Ne seki faite ne te Atua a tino ke ‵tu tokotasi latou mai i tena pulega kae ke manuia. Ne faite ne ia a tino ke fakalago‵lago atu ki a ia ko te mea ke maua ei ne latou a mea aogā. Ne taku ‵tonu mai a te pelofeta ko Ielemia, penei: “Te Aliki [ko Ieova], e iloa ne au me e seai se tino e pule i tena ikuga; e seai se tino e pule i tena ola. Te Aliki [ko Ieova], akoako aka tou fenua.” (Ielemia 10:23, 24) Tela la, e fakamalosi mai a te Muna a te Atua, penei: “Talitonu ki te Aliki [ko Ieova] mo tou loto kātoa. Sa fakalagolago lele eiloa ki tou iloa.” (Faataoto 3:5) Ona ko te auala ne faite ei ne te Atua a tino, e isi ne olotou mea e ‵tau o fai faeloa ko te mea ke tumau latou i te ola, kae ne avatu foki ne ia a tulafono i mea tau amioga kolā e tokagamalie i ei olotou olaga māfai e faka‵logo latou ki ei.

⁵ Ne iloa ‵lei ne te Atua me e se mafai eiloa o manuia a tino e aunoa mo tena pulega. I olotou taumafaiga ke ‵tu tokotasi latou mai te pulega a te Atua, ko oti ne faka‵tu aka ne tino a fakapotopotoga kese‵kese i mea fakapolitiki, mea tau tupe, mo lotu, kae e se aogā eiloa olotou taumafaiga konā. Ko oti ne fai i ei ke se fealofani a tino kae ne iku atu fua ki fakasauāga, taua mo te mate. ‘E ‵nofo puapuagā a tino i te pulega a tino ma‵luga.’ (Failauga 8:9) Konā eiloa a mea ne ‵tupu i tala fakasolopito katoa o tino. E pelā mo te valoaga i te Muna a te Atua, a tino amio ma‵sei mo tino kolā e fakaloi‵loi tino “ka kamata eiloa latou mai te masei o fakasolo o na ma‵sei atu.” (2 Timoteo 3:13) Faitalia me e uke a mea ‵fou ne faite ne saienitisi mo tino fai pisinisi i te selau tausaga ko ‵teka atu nei, kae ne maua fua i ei a toe fakalavelave matagā ‵ki eiloa. Ko oti ne fakamaoni fakafia aka te ‵tonu o pati i te Ielemia 10:23 me ne seki faite a tino ke pule atu latou ki olotou olaga.

6. Ko pili o fakagata atu pefea ne te Atua te ‵tu tokotasi o tino mai i a ia?

⁶ Ko oti ne fakaasi faka‵sau atu ne fakalavelave matagā kolā ne ‵tupu i te fia o tausaga ona ko te ‵tu tokotasi o tino mai te Atua me e se mafai o manuia a pulega a tino. A te pulega a te Atua ko te auala fua e tasi e maua ei te fiafia, te loto ‵kau fakatasi, te malosi faka-te-foitino, mo te ola. Kae e fakaasi mai foki ne te Muna a te Atua me ko pili o palele atu te loto kufaki o Ieova ki pulega a tino kolā e ‵tu tokotasi mai i a ia. (Mataio 24:3-14; 2 Timoteo 3:1-5) Ko pili o fakaoko atu tena pulega ki tino katoa kae ka ‵fuli aka i ei a faifaiga i te lalolagi nei. Ne ‵valo mai penei te Tusi Tapu: “I te taimi o takitaki konā [ko malo kolā e pule mai nei], kae ka fakatu ne te Atua o te lagi a te malo [i te lagi] telā ka se toe gata mai. Ka se toe mafai o takavale a te malo tenā [e se toe pule mai a tino i te lalolagi]. Ka fakatakavale ne ia a malo katoa konā [i aso nei], kae ka tumau ki te se-gata-mai.”​—Tanielu 2:44.

Ka ‵Sao Atu a Tino ki te Lalolagi Fou

7. Kafai ko fakaseai ne te pulega a te Atua a pulega a tino, ko oi la ka ‵sao atu i ei?

⁷ Kafai ko fakaseai ne te pulega a te Atua a pulega a tino, ko oi la ka ‵sao atu i ei? E tali mai te Tusi Tapu, penei: “A tino amio‵tonu kae fai mea ‵tonu [ko tino kolā e ‵lago atu ki te pulega a te Atua] ka ola i te fenua tenei. Ka ko te Atua ka tapale keatea ne ia a tāgata amio ma‵sei [ko tino kolā e se ‵lago atu ki te pulega a te Atua] mai i te fenua, kae unu keatea a tino agasala, e pelā me ne lakau e unu keatea mai i te laukele.” (Faataoto 2:21, 22) Ne fai mai foki te faisalamo, penei: “E se toe leva nei, ka ‵galo atu ei a tino amio ma‵sei; . . . A tino amio‵tonu ka fai mo latou te fenua, kae ka ‵nofo faeloa i ei ki te se-gata-mai.”​—Salamo 37:10, 29.

8. Ka fakamaoni katoatoa aka pefea ne te Atua me e ‵tau o fai a ia mo fai te Pule Sili?

⁸ Kafai ko oti ne fakaseai atu te lalolagi a Satani, ka fakatu aka ne te Atua tena lalolagi fou, telā ka palele katoatoa atu i ei a fakasauāga, taua, te mativa, logo‵maega, ma‵saki mo te mate kolā ne ‵nofo fakaa‵lofa i ei a tino i te fia afe o tausaga. E fakamatala faka‵lei mai penei ne te Tusi Tapu a fakamanuiaga kolā ka maua ne tino faka‵logo: “Ka se toe ai ne loimata i olotou mata. Ka se toe ai se mate, se fanoanoa, se tagi io me se ‵mae. Ko palele atu a mea mua.” (Fakaasiga 21:3, 4) Ka fakamaoni katoatoa aka (io me ka fakatalitonu atu) ne te Atua me e ‵tau o fai a ia mo fai te ‵tou Pule Sili, e alatu i te Malo faka-te-lagi telā e pule mai ei a Keliso.​—Loma 16:20; 2 Petelu 3:10-13; Fakaasiga 20:1-6.

Mea Kolā ne Fai ne Latou e Uiga ki te Kinauga

9. (a) Ne talia pefea ne tino kolā e a‵lofa fakamaoni ki a Ieova a tena muna? (e) Ne fakaasi atu pefea ne Noa tena alofa fakamaoni, kae e aogā pefea ki a tatou tena fakaakoakoga?

⁹ I tala fakasolopito o tino, e isi ne tāgata mo fāfine fakatuanaki kolā ne fakaasi atu te lotou a‵lofa fakamaoni ki a Ieova e pelā me ko te lotou Pule Sili. Ne iloa ne latou me e fakalago‵lago atu olotou ola ki te lotou faka‵logo ki a ia. A Noa se vaegā tino penā. Telā ne fai atu ei te Atua ki a Noa, penei: “Ko tonu i a au me ka ‵solo faka‵mā a tino ola katoa. . . . Faite se vaka mō koe.” Kae ne fakalogo a Noa ki te fakatonuga a Ieova. E tiga eiloa ko oti ne fakailoa atu ki nisi tino a te mea telā ka tupu, ne seki fia ‵saga atu latou ki ei ona ko te lotou mafau‵fau me e seai se mea ka tupu. Ne faite eiloa ne Noa se matugā vaka lasi kae ne talai malosi atu foki a ia ki nisi tino e uiga ki auala amio‵tonu o Ieova. E fai mai te tala, penei: “Ne fai eiloa ne Noa a mea katoa kolā ne fakatonu atu ne te Atua.”​—Kenese 6:13-22; Epelu 11:7; 2 Petelu 2:5.

10. (a) Ne ‵lago atu pefea a Apelaamo mo Sala ki te pulega sili a Ieova? (e) E aogā pefea ki a tatou te fakaakoakoga a Apelaamo mo Sala?

¹⁰ Ne ‵gali ‵ki eiloa te fakaakoakoga a Apelaamo mo Sala i te ‵lago atu faeloa ki te pulega sili a Ieova, me ne fai ne laua so se mea ne fakatonu atu a Ia ki a laua ke fai. Ne ola laua i te fa‵kai maumea ko Ulo i Kaletaia. Kae i te taimi ne fai atu ei a Ieova ki a Apelaamo ke fanatu ki se isi fenua, se fenua telā e se masani a ia ki ei, ne fanatu ei a Apelaamo “e pelā eiloa mo te fakatonuga a te Aliki [ko Ieova] ki a ia.” Kāti ne gali ‵ki eiloa te olaga o Sala i Ulo me ne isi sena fale, ne ana taugasoa mo kāiga i ei. E tiga eiloa e se iloa ne ia me ne a mea ka maua atu ne ia i Kanana, ne fakalogo a ia ki a Ieova mo tena avaga kae ne fanatu ki te fenua tenā.​—Kenese 11:31–​12:4; Galuega 7:2-4.

11. (a) Ne a mea faiga‵ta ne fe‵paki mo Mose i tena ‵lago atu faeloa ki te pulega sili a Ieova? (e) E aogā pefea te fakaakoakoga a Mose ki a tatou?

¹¹ Ne ‵lago atu foki a Mose ki te pulega sili a Ieova. Ne fai eiloa a ia penā, faitalia a mea faiga‵ta kolā ne fe‵paki mo ia​—kae maise eiloa ko te fakafesagai atu ki te tupu o Aikupito ko Falao. Ne seki fia poto a Mose kae ne manavase a ia ki tena sē apo i te faipati atu. Kae ne fakalogo eiloa a ia ki a Ieova. Ona ko te ‵lago atu o Ieova mo te fesoasoani o tena taina ko Alona, ne mafai ei ne Mose o fakaoko fakafia atu te muna a Ieova ki te tino loto makeke ko Falao. Ne munasele atu foki a nisi tino Isalaelu ki a Mose. Kae e tiga eiloa te feitu tenā, ne fakamaoni a Mose i te faiga o mea katoa kolā ne fakatonu atu ne Ieova ki a ia ke fai. Kae ne fakasaoloto te kau Isalaelu mai Aikupito e alatu i a ia.​—Esoto 7:6; 12:50, 51; Epelu 11:24-27.

12. (a) Se a te tala e fakaasi mai ei me i te alofa fakamaoni ki a Ieova e se lava fua i te fakalogo ki mea kolā ne tusi ki lalo? (e) E fesoasoani mai pefea te malamalama i te vaegā alofa fakamaoni tenei, ke ola tatou e ‵tusa mo te fakamatalaga i te 1 Ioane 2:15?

¹² Ne seki ma‵natu aka a tino kolā ne a‵lofa fakamaoni ki a Ieova me e lava fua i te faka‵logo ki mea kolā ne tusi ne te Atua ki lalo. I te taimi ne fakakolekole atu ei a te avaga a Potifala ki a Iosefa ke mulilua laua, ne seki ai eiloa se tulafono kai tusi ki lalo ke fakatapu ei te mulilua. Kae ne iloa ne Iosefa te tala e uiga ki te fakaipoipoga muamua telā ne fakatoka ne Ieova i Etena. Ne iloa ‵lei ne ia me kafai e ‵moe fakatasi a ia mo te avaga a te suā tino ka fakafanoanoa atu ei ki te Atua. Ne seki fia tofotofo ne Iosefa a te lasi o te saolotoga telā ne talia ne te Atua ke amio a ia e pelā mo te kau Aikupito. Ne ‵lago atu a ia ki auala o Ieova mai i te mafaufau ‵loto ki faifaiga a te Atua ki tino katoa, kae ne fakamaoni a ia i te faiga o mea kolā ko iloa ne ia me e fetaui mo te loto o te Atua.​—Kenese 39:7-12; Salamo 77:11, 12.

13. Ne fakaasi atu pefea me i a Satani se tino loi i te tala o (a) Iopu (e) mo te tala o tamataene Isalaelu e tokotolu?

¹³ Ka se ‵fuli kea‵tea mai i a Ieova a tino kolā e iloa ‵lei ne latou a ia, faitalia me ne a tofotofoga faiga‵ta e oko atu ki a latou. Ne kinau atu a Satani me kafai ko ‵galo atu a kope o Iopu, fakatasi mo tena malosi faka-te-foitino, ka fulitua atu ei a ia ki te Atua. E tiga eiloa ne seki maina a Iopu i te pogai ne taotaomaki ei a ia ne fakalavelave, ne fakamaoni mai ne ia me i a Satani se tino loi. (Iopu 2:9, 10) I te fia selau tausaga mai tua ifo i ei, ne tumau eiloa a Satani i tena taumafai ke fakamaoni aka ana pati konā. Ne fai ne ia te tupu kaitaua o Papelonia ke fakamatakutaku atu ki tamataene Isalaelu e tokotolu i ana muna me ka ‵mate latou i te ogāumu ‵ka māfai e se ifo latou ki te tupua telā ne fakatu aka ne ia. Ne faimālō ei latou ke filifili aka me ka faka‵logo latou ki te fakatonuga a te tupu io me ko te fakatonuga a Ieova telā e fakatapu ei te ifo ki tupua. Kae ne taku ‵tonu atu ne latou me e tavini katoatoa atu fua latou ki a Ieova telā ko te lotou Pule Sili. I olotou manatu, ne tāua atu te lotou tumau i te fakamaoni ki te Atua i lō te lotou tumau i te ola!​—Tanielu 3:14-18.

14. E mafai pefea ne tatou o fakaasi atu me e a‵lofa fakamaoni tatou ki a Ieova?

¹⁴ E mata, e fakauiga a tala konā, me e fatoā fakamaoni tatou ki a Ieova māfai ko ‵lei katoatoa tatou, kae kafai e fai ne tatou se mea ‵se ko tena uiga ko se toe aogā tatou? Ikai, e se penā loa! E fai mai te Tusi Tapu me ne fai foki ne Mose a mea ‵se. E tiga eiloa ne seki fiafia a Ieova ki mea konā, ne seki ‵teke atu eiloa a ia ki a Mose. E isi foki ne vāivāiga o apositolo a Iesu Keliso. E masaua faeloa ne Ieova me ne tuku fakasolo mai ki a tatou te tulaga sē ‵lei katoatoa, kae e fiafia eiloa a ia māfai e se loto ma‵keke tatou i te ‵teke atu ki so se mea e loto a ia ki ei. Kafai e agasala tatou ona ko ‵tou vāivāiga, se mea tāua ‵ki ke sala‵mō tonu tatou kae ke se toe fai te agasala tenā. Tenā eiloa te auala e fakaasi atu ei ne tatou me e fia‵fia malosi tatou ki mea kolā e fai mai a Ieova me e ‵lei kae e takalia‵lia malosi foki tatou ki mea kolā e fakaasi mai ne ia me e ma‵sei. E mafai o ‵mā ‵tou tulaga i mua o te Atua ona ko te ‵tou fakatuanaki ki te taulaga a Iesu telā e fakamagalo i ei a agasala.​—Amosa 5:15; Galuega 3:19; Epelu 9:14.

15. (a) Ko oi te tino telā ne fakalogo katoatoa ki te Atua, kae se a te mea e fakamaoni mai i ei? (e) E aogā pefea ki a tatou a mea kolā ne fai ne Iesu?

¹⁵ E mata, e se mafai eiloa o faka‵logo katoatoa a tino ki te pulega sili a Ieova? Ne fai a te tali ki te fesili tenei mo fai se “mea ‵funa” i tausaga e 4,000 tupu. (1 Timoteo 3:16) E tiga eiloa ne faite Atamu e pelā me se tino ‵lei katoatoa, ne seki ‵lei katoatoa tena fakaakoakoga e uiga ki te tapuakiga ki te Atua. Kae ko oi la e mafai o fai penā? E seai se tino e tokotasi mai i ana tama‵liki agasala, kae na ko Iesu Keliso tokotasi fua e mafai o fai penā. (Epelu 4:15) Ne fakamaoni mai ne Iesu i ana mea ne fai i te olaga faigata tenei me ne mafai ne Atamu o tumau i te fakamaoni katoatoa moifai ne manako a ia ki ei. Ko tena uiga, e seai se mea masei i mea kolā ne faite ne te Atua. Tela la, e taumafai eiloa tatou o fakaakoako atu ki a Iesu Keliso mai i te ‵tou faka‵logo ki tulafono a te Atua mo te ‵tou tapuaki fakamaoni atu foki ki a Ieova, te Pule Sili i te lagi mo te lalolagi.​—Teutelonome 32:4, 5.

Ne a ‵Tou Mea ka Fai ki ei?

16. Kaia e ‵tau ei o matapula‵pula faeloa tatou i ‵tou kilokiloga ki te pulega sili a Ieova?

¹⁶ E aofia tatou katoa i te kinauga e uiga ki te pulega sili i te lagi mo te lalolagi. Kafai ko oti ne fakaasi ‵tonu atu ne tatou me e ‵kau tatou ki a Ieova, ko oso fakavave mai ei a Satani ki a tatou. E aumai ne ia a fakaosoosoga i auala kese‵kese kae ka fai eiloa a ia penā ke oko eiloa ki te fakaotiga o te olaga masei tenei. E ‵tau mo tatou o matapula‵pula faeloa. (1 Petelu 5:8) E fakaasi mai ne ‵tou amioga me ko oi e ‵kau atu tatou ki ei i te ‵toe kinauga tāua e uiga ki te pulega sili a Ieova, penā foki loa mo te suā kinauga e uiga ki te ‵tou fakamaoni ki te Atua māfai ko tofotofogina tatou. E se ‵tau mo tatou o manatu mā‵mā ki amioga sē fakamaoni faitalia te lauiloa o vaegā amioga penā i te lalolagi nei. Ke tumau i te fakamaoni, e ‵tau mo tatou o taumafai malosi ke fakaaogā a fakatakitakiga amio‵tonu a Ieova i mea katoa e fai ne tatou i te olaga nei.

17. Se a te mea e iloa ne tatou e uiga ki te māfuaga o te loi mo te kaisoa telā e fai ei ke ‵kalo kea‵tea tatou mai i ei?

¹⁷ E se ‵tau o fakaakoako atu tatou ki a Satani, ‘te tamana o tino ‵loi.’ (Ioane 8:44) E ‵tau o ‵tonu faeloa ‵tou faifaiga katoa. I te lalolagi masei tenei a Satani, e fakaloi‵loi sāle ne te kau talavou olotou mātua. E ‵kalo kea‵tea a talavou Kelisiano mai vaegā amioga penā, kae e fakamaoni atu ne latou a te ‵se o pati a Satani me ka se fakamaoni a tino māfai e tofotofogina latou. (Iopu 1:9-11; Faataoto 6:16-19) E isi foki ne faifaiga fakapisinisi kolā kāti e fakaasi mai i ei me e mafai o ‵kau tatou ki ‘te tamana o tino ‵loi’ i lō te Atua o te munatonu. E ‵kalo kea‵tea tatou mai i vaegā mea penā. (Mika 6:11, 12) E se ‵tau foki o kai‵soa tatou faitalia me e mativa se tino io me e kaisoa mai fua a mea a se tino maumea. (Faataoto 6:30, 31; 1 Petelu 4:15) E solitulafono tatou ki te Atua māfai e kai‵soa tatou, faitalia me se faifaiga masani a ‵tou tuakoi io me e foliki fua te mea telā e kaisoa ne tatou.​—Luka 16:10; Loma 12:2; Efeso 4:28.

18. (a) Kafai ko oti atu te Pulega a Keliso i te Afe Tausaga, se a te tofotofoga telā ka oko atu ki tino katoa? (e) Se a te mea e ‵tau o fakamasani tatou ki ei i te taimi nei?

¹⁸ Ka ‵pei atu a Satani mo ana temoni ki te lua ‵poko i te Pulega a Keliso i te Afe Tausaga, kae ka se mafai ne latou o fakalavelave atu i ei ki tino. Ka pefea la te gali o te taimi tenā! Kafai ko oti atu te afe tausaga ka fakasaoloto ei latou mō se vaitaimi toetoe. Ka tofotofo aka ne Satani mo tena potukau a tino ‵lei katoatoa kolā e tumau i te fakamaoni ki te Atua. (Fakaasiga 20:7-10) Kafai e taulia tatou ke ola i te vaitaimi tenā, ne a ‵tou mea ka fai i te kinauga e uiga ki te pulega sili? Ona ko te mea ka ‵lei katoatoa a tino katoa i te taimi tenā, kafai e se fakamaoni se tino, ko tena uiga ko agasala a ia mo te matafatu kae e ‵tau o fakasala a ia ki te mate se-gata-mai. E pefea te tāua ke fakamasani nei tatou ki te faka‵logo faka‵lei ki so se fakatonuga mai i a Ieova, faitalia me e maua a mea konā mai i tena Muna io me ko tena fakapotopotoga! Kafai e fai penā, ko fakaasi atu i ei ne tatou te ‵tou a‵lofa tonu ki a ia, e pelā me ko te Pule Sili i te lagi mo te lalolagi.

Ke Toe Sau‵tala ki Manatu Konei

• Se a te ‵toe kinauga tāua telā e aofia i ei tatou katoa? Ne aofia pefea tatou i ei?

• I aso mua ne tu ‵kese pefea te fakamaoni o tāgata mo fāfine ki a Ieova?

• Kaia e tāua ei ke faka‵malu ki a Ieova i ‵tou faifaiga i aso takitasi?