Ne ‵Sao Latou Ona ko te ‵Saga Tonu Atu

KO LEVA ne fakailoa atu ne Iesu Keliso me ka oko mai te gataga o te olaga masani o te kau Iutaia telā ne fakavae ki te faletapu i Ielusalema. Ne seki tuku atu ne ia se taimi mautinoa telā ka tupu ei te mea tenā. Kae ne fakamatala mai ne ia a mea kolā ka ‵tupu mai mua o te fakamaseiga tenā. Ne fakamalosi atu a ia ki ana soko ke matapula‵pula kae ke olo keatea mai te koga fakamataku tenā.

Ne ‵valo mai a Iesu: “Kafai ko lavea ne koutou a Ielusalema ko nikoi ne kautau, ko iloa ei ne koutou me ko pili tena fakamaofaga.” Ne fai mai foki a ia: “E lavea ne koutou a te ‘Mea Fakamataku,’ . . . e tu i te koga tapu. . . . Ko tino kolā e ‵nofo i Iutaia, e ‵tau o ‵tele ki mauga.” Ne fakamalosi atu a Iesu ki ana soko ke sē toe ‵foki o puke olotou kope. Ne ‵tau o ‵tele fakavave keatea māfai e fia ‵sao latou.​—Luka 21:20, 21; Mataio 24:15, 16.

Ko te mea ke fakagata te ‵teke atu o tino Iutaia i se taimi leva, ne taua atu ei a kautau a Loma ki Ielusalema i te 66 T.A. mai lalo i a Cestius Gallus. Ne ulu eiloa latou ki loto i te fa‵kai kae fakatamilo ne latou te faletapu. Ne makosu kae ‵numi valevale a tino i te fa‵kai. Ne iloa ‵lei ne tino kolā ne tumau i te matapula‵pula me ko pili mai fua tena fakamaseiga. Kae e mata, ne mafai o ‵tele latou keatea? Kae ne ‵poi latou me ko toe ‵foki a Cestius Gallus mo tena kautau e aunoa mo se pogai. Ne tau‵tali atu i olotou tua a tino ‵teke Iutaia. Tenei eiloa te taimi ne ‵tau ei o na ‵tele keatea mai Ielusalema mo Iutaia kātoa!

I te tausaga mai tua ifo i ei, ne toe foki atu a te kautau a Loma mai lalo i a Vespasian mo tena tama ko Tito. Ne aofia i ei te fenua kātoa tenā i taua. I te kamataga o te tausaga ko te 70 T.A. ne faite ne te kau Loma se olo e nikoi i ei te fa‵kai ko Ielusalema. Ne seki mafai ei o sao atu se tino i ei. (Luka 19:43, 44) Ne fakatau tamate ne potukau i loto i te fa‵kai a latou eiloa. A tino kolā ne ‵toe mai i ei kāti ne tamate ne te kau Loma io me ne ave fakapagota. Ne fakamasei katoatoa i ei te fa‵kai mo tena faletapu. E ‵tusa mo te fakamatalaga a se tino tusitala i aso mua ko Josephus, e sili atu i te miliona a tino Iutaia ne logo‵mae kae ne ‵mate i ei. Ne seki toe faite eiloa te faletapu tenā.

Moi ne ‵nofo atu a Kelisiano i Ielusalema i te 70 T.A., penei ko oti ne ‵mate io me ne ave fakapagota latou fakatasi mo nisi tino katoa i konā. Kae e fai mai te lipoti a tino tusitala i aso mua me ne ‵saga tonu atu a Kelisiano ki te fakatonuga a te Atua kae ne ‵tele kea‵tea ei latou mai Ielusalema mo Iutaia kātoa ki mauga i te feitu ki te saegālā o te vaitafe ko te Iolitana. Ne ‵nofo atu a nisi tino i Pela. Ne tiakina ne latou a Iutaia kae ne seki toe ‵foki atu ki ei. Ona ko te lotou faka‵logo ki pati a Iesu ne ‵sao ei latou.

E Mata, ka Saga Tonu Atu Koe ki Fakailoaga Mai se Tino e Fakatuagagina?

I te taimi ne iloa ei ne latou a nisi fakailoaga e uke kolā ne seki fakataunu, ne manatu mā‵mā a tino e tokouke. Kae ui i ei, a te saga tonu atu ki fakailoaga penā e fai ei ke sao koe.

Ne fai se fakailoaga ki tino Saina i te 1975 me ka poko se mafuie. Ne gasue‵sue i ei a ofisa o te malo. Kae penā foki eiloa mo tino. Ne ‵sao atu i ei te fia afe o tino.

I a Apelila, 1991 i Filipaina, ne lipoti mai ne tino kolā ne ‵nofo i te feitu mauga o Pinatubo me ne lavea ne latou a te afusaga mo lefu e ‵puna aka mai loto i te mauga. Mai tua o sukesukega kolā ne fai i masina e lua, ne fakailoa mai ne te Philippine Institute of Volcanology and Seismology me ka tupu se mea fakamataku. I te taimi eiloa tenā, ne tali ei keatea a te fia sefulu afe o tino mai te kogā koga tenā. I te tafataeao ‵malu o Iuni 15, ne ‵pa mai i ei te mauga tenā kae ne silia atu i te lua maila te mao o te koga ne ‵to ei a mea kolā ne ‵puna mai i te mauga tenā. Ne ‵sao i ei te fia afe o tino kolā ne faka‵logo.

E fakailoa mai foki i te Tusi Tapu a te gataga o te olaga tenei. Ko ola nei tatou i aso fakaoti. I te pilipili mai o te gataga, e mata, e matapulapula koe? E mata, e gasuesue koe ke sē nofo atu i te koga fakamataku? Ona ko te fakava‵vave o te mea tenā, e mata, e fakailoa atu ne koe ki nisi tino e uiga ki ei?

[Ata i te itulau e 20]

Ne ‵sao a tino e tokouke i te taimi ne ‵pa ei te Mauga ko Pinatubo ona ko te ‵saga tonu atu ki fakailoaga

[Ata i te itulau e 21]

Ne ‵sao a tino kolā ne ‵saga tonu atu ki te fakailoaga a Iesu i te taimi ne fakamasei ei a Ielusalema i te 70 T.A.