MATAUPU E 25

E Manumalo Pefea Au i te Faifaiga sē ‵Lei o te Fai Tokotasi?

“Ne kamata au o fai tokotasi i te taimi ko valu ei oku tausaga. Fakamuli ifo ne iloa ne au te kilokiloga a te Atua ki te mea tenei. Ne ma‵sei oku lagonaga i taimi katoa e tosina atu au ki ei. ‘E mafai pefea o alofa te Atua ki se tino penei mo au?’ Ne fesili ifo au ki a au eiloa.”—Luiz.

Kafai ko oko koe ki te kamataga o te tulaga talavou, e gasolo aka o ma‵losi a manakoga fakatauavaga. Ona ko te mea tenā, e mafai o tō atu koe ki te faifaiga sē ‵lei o te fai tokotasi.a E tokouke ka fai mai me e seai se mea masei. “E seai se tino e logo‵mae i ei,” ko olotou pati. Kae e isi se pogai ‵tau, e ‵tau ei o ‵kalo keatea mai te faifaiga masani tenā. Ne tusi mai te apositolo ko Paulo: “Ke tamate a vaega katoa o otou foitino . . . e uiga ki . . . te fina ki manakoga fakatauavaga sē pulea.” (Kolose 3:5) A te fai tokotasi e se tamate ne ia a manakoga fakatauavaga sē pulea kae fakamalosi aka ne ia. I tafa i ei, ke mafaufau ki mea konei:

● E fakamalosi aka ne te fai tokotasi a uiga kolā e fai ei ke fakamuamua ne te tino ana manakoga totino. Me i te taimi e fai tokotasi ei te tino, e saga fua a ia ki a ia eiloa mo ana lagonaga.

● E fai ne te fai tokotasi ke kilo atu te tagata ki se fafine io me ko te fafine ki se tagata e pelā me se mea ke fakamalie aka ei ana manakoga fakatauavaga.

● A te kilokiloga sē ‵lei telā e fakamalosi aka ne faifaiga masani o te fai tokotasi, e mafai o fai ei ke faigata o fakamalie aka a manakoga fakatauavaga māfai ko oti ne avaga se tino.

Taumafai ke ati aka te loto pulea ke mafai o fa‵ki i faifaiga fakatauavaga kolā ne kufaki ne koe i lō te fai tokotasi. (1 Tesalonia 4:4, 5) Ke fesoasoani atu ki a koe ke fai te mea tenā, e fakamalosi mai te Tusi Tapu ke ‵kalo keatea koe mai fakanofonofoga kolā e mafai o fai ei ke ‵sae aka a manakoga fakatauavaga. (Faataoto 5:8, 9) Kae e pefea la māfai ko leva ne nofo pologa koe ki te faifaiga sē ‵lei o te fai tokotasi? Kāti ko oti ne taumafai koe ke fakagata aka kae seki manuia. Ka faigofie fua ke fakaiku aka me ko se mafai ne koe o fai se mea kae ko se mafai ne koe o ola e ‵tusa mo tulaga o te Atua. Tenā te kilokiloga a te tamaliki tagata e igoa ki a Pedro e uiga ki a ia. “Kafai ko tosina atu au ki ei, ne ma‵sei ‵ki oku lagonaga,” ko ana pati. “Ne mafaufau au me ko se mafai o toe fakamagalo te mea ne fai ne au. Ne faigata ki a au ke ‵talo.”

Kafai e penā loa ou lagonaga, ke loto malosi. Koi isi eiloa sou fakamoemoega. E tokouke a talavou—mo tino ma‵tua—ko oti ne manumalo i te faifaiga sē ‵lei o te fai tokotasi. E mafai foki o fai koe penā!

Ke Manumalo i Lagonaga sē ‵Lei

E pelā mo mea ne taku atu mua, e masani o se ‵lei a lagonaga o latou kolā e fai ne latou te faifaiga sē ‵lei ko te fai tokotasi. E aunoa mo te fakalotolotolua a “te fanoanoa telā e fetaui ‵lei mo te loto o te Atua” e mafai o fakamalosi atu ke manumalo i te faifaiga sē ‵lei tenā. (2 Kolinito 7:11) Kae kafai ko tō ma‵sei ou lagonaga, e mafai o maua mai i ei a ikuga sē ‵lei. E mafai o fai ei koe ke loto vāivāi malosi kae fai ei ke seai se manakoga ke taua atu ki ei.—Faataoto 24:10.

Tela la, taumafai ke maua se kilokiloga paleni ki tou tulaga. A te fai tokotasi se vaega o amioga lai‵lai. E mafai o fai ei a koe ke “pologa ki manakoga mo fakafiafiaga kese‵kese,” kae fakamalosi aka ei a uiga sē ‵lei. (Tito 3:3) Kae ko te fai tokotasi e sē se vaega o amioga fakatauavaga matagā, e pelā mo amioga fakatauavaga sē ‵tau. (Iuta 7) Kafai a te fai tokotasi e fai pelā me se fakalavelave ki a koe, e se ‵tau o fakaiku aka ne koe me ko oti ne fai ne koe se agasala telā e se mafai o fakamagalo. A te kī tāua ko te ‵teke atu ki te manakoga tenā kae ke mo a eiloa ma ‵fiu koe i te taua atu ki ei!

E faigofie fua ke loto vāivāi māfai e toe tosina atu koe ki ei. Kafai ko tupu te mea tenā, masaua a pati i te Faataoto 24:16: “Te tino amiotonu e mafai o siga fakafitu taimi, kae ka toe tu aka, kae ko tino amio ma‵sei ka ‵siga ona ko te malaia.” A te ‵toe tosina atu ki ei, e se fakauiga i ei i a koe se tino masei. Tela la, ke mo a ma ‵fiu. I lō te fai penā, iloilo aka me ne a mea ne fai ke toe tosina atu koe ki ei, kae taumafai o ‵kalo keatea mai i ei.

Fakaavanoa se taimi ke mafaufau ‵loto ki te alofa mo te alofa fakamagalo o te Atua. A te faisalamo ko Tavita telā ne masani mo vāivāiga totino, ne fai mai: “E pelā mo te tamana e fakaasi atu te alofa fakamagalo ki ana tama, e fakaasi atu ne Ieova a te alofa fakamagalo ki a latou kolā e ma‵taku ki a ia. Me iloa ‵lei ne ia a te auala ne faite ei tatou, e masaua ne ia i a tatou ne ‵pefu.” (Salamo 103:13, 14) E tonu, e iloa ne Ieova i a tatou ne tino sē ‵lei katoatoa, kae ko ia “e toka o fakamagalo” tatou. (Salamo 86:5) I te suā feitu, e manako a ia ke fakaoti ‵tou mafi ke ‵teke ki ei. Tela la, ne a auala aoga e mafai o fai ne koe ke manumalo i te faifaiga sē ‵lei tenā?

Ke iloilo au fakafiafiaga. E mata e onoono koe ki ata vitio io me ko polokalame i TV io me ko fakatuatusi i te itaneti kolā e fakamalosi aka ei a faifaiga fakatauavaga? Ne ‵talo atu te faisalamo mo te poto ki te Atua: “‵Fuli kea‵tea oku mata mai te kilokilo atu ki mea sē aoga.”b—Salamo 119:37.

Ke faimālō tou mafaufau ke saga atu ki nisi mea. Ne fai mai se Kelisiano e igoa ki a William: “A koi tuai koe o moe, faitau ki mea faka-te-agaga. E tāua ‵ki ke faka‵fonu tou mafaufau ki mea faka-te-agaga i te fakaotiga o te aso.”—Filipi 4:8.

Faipati atu ki se tino e uiga ki te fakalavelave tenā. E mafai o fai ne te mā ke faigata o fakaasi atu a te fakalavelave tenā ki se tino. Kae ko te faiga tenā, ka fesoasoani malosi ke manumalo koe i te faifaiga sē ‵lei tenā! Tenā te mea ne oko ki se Kelisiano e igoa ki a David. “Ne faipati fua au ki toku tamana,” ko ana pati. “E se mafai o puli i a au ana pati ne fai mai. Ne fakamisikata malosi mai a ia ki a au kae fai mai, ‘Ko oko eiloa toku fakamatamata i a koe.’ Ne iloa ne ia te faigata ki a au ke faipati e uiga ki te mea tenā. Konā loa a pati ne fakamalosi ke taumafai au ke momea aka toku ‵lei i te feitu tenei.

“Tenā ne fakaasi mai ei ne toku tamana a nai tusi fai‵tau ke iloa ne au me i a au ‘e sē se tino masei,’ mo nisi tusi fai‵tau ke malamalama au i te matagā o te faifaiga tenā. Ne fai mai a ia mo te atafai ke toe sau‵tala māua ki ei i te suā taimi. Ne fai mai a ia ke mo a ma loto vāivāi au māfai ko toe tosina atu ki ei kae ke toe taumafai mō se taimi leva e aunoa mo te ‵toe tosina atu ki ei.” Se a te mea ne fakaiku aka ne David? Ne fai mai a ia: “A te fakailoa atu ne se isi tino a toku fakalavelave kae fesoasoani mai, ne aoga malosi ‵ki ki a au.”c

[Fakamatalaga fakaopoopo]

TUSI FAITAU TĀUA

“‵Tele kea‵tea mai manakoga masani o talavou, kae kausaki atu ki te amiotonu, te fakatuanaki, te alofa, te filemu, fakatasi mo latou kolā e ka‵laga atu ki te Aliki mo te loto ‵ma.”—2 Timoteo 2:22.

MANATU

‵Talo a koi tuai o ma‵losi ou manakoga. Akai atu ki a Ieova ke tuku atu ki a koe “te malosi telā e sili atu i te malosi masani” ke ‵teke atu ki te fakaosoosoga.—2 Kolinito 4:7.

E ILOA NE KOE . . .?

E mafai o tosina vave atu so se tino vāivāi ki ana manakoga fakatauavaga. Kae e mafai ne se tinā tagata mo se tinā fafine o fakaasi atu te loto pulea ke oko foki loa ki taimi e nofo tokotasi ei.

AKU PALANI!

E mafai o mafaufau au ki mea kolā e ‵ma māfai au e ․․․․․

I lō te tosina atu ki te manakoga, au ka ․․․․․

Mea e manako au o fesili atu ki oku mātua e uiga ki te mataupu tenei ․․․․․

SE A TAU FAKA‵TAU?

● Kaia e tāua ei ke masaua me i a Ieova “e toka o fakamagalo”?—Salamo 86:5.

● Ona ko te mea ne fai mai te Atua, telā ne faite ne ia a manakoga fakatauavaga, me e ‵tau o ati aka ne koe a te loto pulea, se a te mea e talitonu a ia me e mafai ne koe o fai?

[Ko manatu tāua]

I te taimi ne manumalo ei au i te fakalavelave tenei, ne mafai ei o tausi ne au toku loto lagona ke ‵ma i mua o Ieova, kae tenā eiloa te mea ka se mafai o tiaki lele ne au!’’—Sarah

[Ata]

Kafai koe ne siga i te taimi ne tele ei koe, e se fakauiga i ei me e ‵tau o kamata tau tele—kae penā foki māfai e tosina atu ki te fai tokotasi, e se ko tena uiga me ko fakaseaoga i ei au taumafaiga katoa ko oti ne fai