E Mata, ka Gata Atu Eiloa a Logo‵Maega?

FAKAMATALAGA MAI TE TUSI TAPU

“A te Atua . . . ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi, io me se ‵mae.”​—Fakaasiga 21:3, 4, Te Tusi Tapu o te Lalolagi Fou.

MEA AOGA MAI TE FAKAMATALAGA TENĀ

Fakatalitonuga me e se māfua mai i te Atua ‵tou fakalavelave.​—Iakopo 1:13.

Fakamafanafanaga ke iloa atu me e alofa mai te Atua māfai ko logo‵mae tatou.​—Sakalia 2:8.

Fakamoemoega me ka gata atu a logo‵maega katoa.​—Salamo 37:9-11.

E MATA, E MAFAI EILOA O TALI‵TONU TATOU KI FAKAMATALAGA MAI TE TUSI TAPU?

Ao, ona ko pogai konei e lua:

• E takalialia te Atua ki logo‵maega mo faifaiga sē fakamaoni. Mafaufau ki lagonaga o Ieova te Atua i te taimi ne fai fakamasei ei ana tino i taimi o te Tusi Tapu. E fai mai te Tusi Tapu me ne mafatia a ia ona ko te lotou “‵tagi fi‵ta i olotou puapuaga.”​—Famasino 2:18, Tusi Tapu.

  E se fiafia te Atua ki tino kolā e fakalogo‵mae atu ki nisi tino. E pelā mo muna a te Tusi Tapu me e takalialia a ia ki “lima ne ta ei tino amio‵tonu.”​—Faataoto 6:16, 17.

• E atafai mai te Atua ki a tatou katoa. E se lagona fua ne tino taki tokotasi a “te loto fanoanoa,” kae penā foki a Ieova!​—2 Nofoaiga Tupu 6:29, 30.

  E auala i tena Malo, ka fakagata ei ne Ieova a logo‵maega o tino katoa. (Mataio 6:9, 10) I te vaitaimi tenei, e fakamafanafana atu a ia mo te atafai ki tino kolā e ‵kilo atu ki a ia mo te fakamaoni.​—Galuega 17:27; 2 Kolinito 1:3, 4.