E Mata, e Mafai Eiloa o Toe Ōla Mai a Tino ‵Mate?

FAKAMATALAGA MAI TE TUSI TAPU

“Ka toe‵tu mai a tino amio‵tonu mo tino amio sē ‵tonu.”​—Galuega 24:15, Te Tusi Tapu o te Lalolagi Fou.

MEA AOGA MAI TE FAKAMATALAGA TENĀ

E fakamafanafana mai māfai ko mate se tino pele.​—2 Kolinito 1:3, 4.

E fakasaoloto ei tatou mai i te mataku valea ki te mate.​—Epelu 2:15.

E maua i ei te fakamoemoega tonu ke toe ‵kau fakatasi mo ou tino pele kolā ko oti ne ‵mate.​—Ioane 5:28, 29.

E MATA, E MAFAI EILOA O TALI‵TONU TATOU KI FAKAMATALAGA MAI TE TUSI TAPU?

Ao, ona ko pogai konei e tolu:

• A te Atua ko te Mafuaga o te ola. E taku i te Tusi Tapu a Ieova te Atua ko “te pogai o te ola katoatoa.” (Salamo 36:​9, Tusi Tapu; Galuega 17:24, 25) A te Tino telā ne tuku atu ne ia te ola ki mea ola katoa e mautinoa eiloa me e maua ne ia a te malosi ke toe fakafoki atu te ola ki se tino telā ko oti ne mate.

• Ko oti eiloa ne faka‵tu aka ne te Atua a tino i aso ko ‵teka. E lipoti mai ne te Tusi Tapu a tino e tokovalu​—talavou, tino ma‵tua, tāgata, mo fāfine​—kolā ne toe fakaola aka i te lalolagi nei. A nisi tino ne fatoa ‵mate, kae e tokotasi ko oti ne nofo atu i te tanuga mō aso e fa!​—Ioane 11:39-44.

• E fiafia malosi eiloa te Atua ke toe fai foki ne ia te mea tenā. E takalialia a Ieova ki te mate; e kilo atu ki ei e pelā me se fili. (1 Kolinito 15:26) E “fiafia” malosi io me e olioli eiloa a ia ke fakatakavale a te fili tenā, ke fakaseai atu te mate e auala i te toetuga. E olioli eiloa a ia ke toe fakaola aka a tino kolā e masaua ne ia kae ke kilo atu ki a latou ko toe ola mai i te lalolagi nei.​—Iopu 14:​14, 15, Tusi Tapu.