Galuega Fesoasoani

1, 2. (a) Ne a mea faiga‵ta ne fe‵paki mo Kelisiano i Iuta? (e) Ne a faifaiga a‵lofa ne fakaasi atu ki Kelisiano i Iuta?

KĀTI ko te 46 T.A., kae ko tu poloki eiloa te ogegā meakai i Iuta. Ne seki mafai ne soko Iutaia o Keliso kolā ne ‵nofo atu i konā o ‵togi a nai saito ‵togi ‵mafa. E fia‵kai latou kae kāti ko fakatau kilo‵kilo fua latou mo te liki‵liki. Kae ko pili eiloa o maua ne latou te puipuiga a Ieova i se auala telā ne seki iloa aka eiloa muamua ne nisi soko o Keliso. Kae se a te mea ko pili o tupu?

² Ona ko te a‵lofa ki logo‵maega o Kelisiano Iutaia i Ielusalema mo Iuta, ne tuku fakatasi ne Kelisiano Iutaia mo Fenua Fakaatea i Anitioka, Sulia, a tupe ke avatu ki olotou taina tali‵tonu. Oti aka, ne filifili aka ei ne latou ne taina fakatuagagina i a latou, ko Panapa mo Saulo, ke avatu ne lāua a tupe fesoasoani konā ki toeaina o te fakapotopotoga i Ielusalema. (Faitau te Galuega 11:27-30; 12:25.) Mafaufau ki te auala ne otia ei a loto o ‵tou taina fakaa‵lofa i Iuta i faifaiga a‵lofa a olotou taina i Anitioka!

3. (a) Koi tau‵tali atu pefea a tino o te Atua i aso nei ki te fakaakoakoga ne tuku mai ne Kelisiano mua i Anitioka? Tuku mai se fakaakoakoga. (Ke onoono foki ki te pokisi “Te ‵Tou Galuega Fesoasoani Lasi Muamua Eiloa i Aso Nei.”) (e) Ne a fesili ka mafau‵fau tatou ki ei i te mataupu tenei?

³ A te mea ne tupu i te senitenali muamua T.A., ko te mea muamua ne fakamau ki lalo i te olaga o te kau Kelisiano, i te avatuga o fesoasoani mai i se koga e tasi o te lalolagi ki Kelisiano kolā ne ‵nofo atu i te suā koga. I aso nei, e tau‵tali atu tatou ki te fakaakoakoga ne tuku mai ne ‵tou taina i Anitioka. Kafai e iloa ne tatou me ko pokotia ‵tou taina tali‵tonu i te suā koga i fakalavelave ‵tupu io me se tofotofoga, e fesoasoani atu tatou ki a latou.a Ke malamalama tatou i te auala e iku atu ei ‵tou taumafaiga ke fesoasoani atu ki nisi galuega tāua, ke na mafau‵fau tatou ki fesili e tolu e uiga ki ‵tou galuega fesoasoani. Kaia e ‵kilo atu ei tatou ki ei e pelā me se galuega fesoasoani? Ne a fakamoemoega o ‵tou galuega fesoasoani? Ne a mea aoga e maua ne tatou mai i galuega fesoasoani?

Te Pogai e Fai ei te Galuega Fesoasoani mo Fai se “Taviniga Tapu”

4. Ne a pati a Paulo ki te kau Kolinito e uiga ki te galuega faka-Kelisiano?

⁴ I tena tusi i te lua ki te kau Kolinito, ne fakamatala atu ne Paulo me e lua a vaega o te ‵tou galuega. E tiga eiloa ne fakasino atu a te tusi a Paulo ki te kau fakaekegina, e aoga foki ana pati i aso nei ki “nisi mamoe” a Keliso. (Ioa. 10:16) A te vaega e tasi o ‵tou galuega ko “te galuega o te faka‵leiga,” telā ko te galuega talai mo te galuega ko te akoako atu. (2 Koli. 5:18-20; 1 Timo. 2:3-6) E aofia i te suā vaega o te galuega telā e fai ne tatou ko te fesoasoani atu ki ‵tou taina tali‵tonu. Ne fakasino fakapito atu a Paulo ki se ‘galuega fesoasoani.’ (2 Koli. 8:4) E pelā mo te tugapati ko te “galuega o te faka‵leiga” mo te “galuega fesoasoani,” a te pati “galuega” telā e sae mai i taimi e lua konei, ko te ‵fuliga o se vaega o te pati Eleni ko te di·a·ko·niʹa. Kaia e tāua ei te mea tenā?

5. Kaia e tāua ei a te takuga ne Paulo a te galuega fesoasoani e pelā me se vaega o te taviniga?

⁵ Mai te fakaaogaga o te pati foki tenā i te ‵gana Eleni mō galuega e lua konei, ne tuku fakatasi ne Paulo a te galuega fesoasoani mo nisi vaega o te galuega kolā e fai i te fakapotopotoga Kelisiano. Ne fai atu muamua a ia: “E uke foki a vaegā taviniga kese‵kese kae e tokotasi fua te Aliki. . . Kae ko galuega katoa konei e fai ne te agaga eiloa e tasi.” (1 Koli. 12:4-6, 11) A te ‵tonuga loa, ne ‵soko tasi ne Paulo a galuega kese‵kese i te fakapotopotoga mo te “taviniga tumau.”b (Loma 12:1, 6-8) E se tioa eiloa o mafaufau tou tagata me se mea ‵lei ke tuku atu se vaega o tena taimi ke “tavini atu ki tino tapu”!​—Loma 15:25, 26.

6. (a) E pelā mo te mea ne fakamatala mai ne Paulo, kaia e fai ei te galuega fesoasoani mo fai se vaega o te ‵tou tapuakiga? (e) Fakamatala mai te auala e fai ei a te ‵tou galuega fesoasoani i te lalolagi kātoa i aso nei. (Ke onoono ki te pokisi “Te Taimi e Tupu ei se Fakalavelave!”)

⁶ Ne fesoasoani atu a Paulo ki te kau Kolinito ke lavea ne latou a te pogai e fai ei a te lotou galuega fesoasoani, mo fai se vaega o te taviniga mo te tapuakiga ki a Ieova. Mafaufau la ki ana fakamatalaga: A Kelisiano kolā e fesoasoani atu e fai penā ona ko te lotou “faka‵logo ki te tala ‵lei telā e folafola atu . . . e uiga ki a Keliso.” (2 Koli. 9:13) Tela la, ona ko te fia fakagalue aka ne latou o akoakoga a Keliso, ne fesoasoani atu a Kelisiano ki olotou taina tali‵tonu. A te faifaiga atafai ne fakaasi atu ne latou mō olotou taina, ko muna a Paulo, ne fakaasiga ‵tonu eiloa o “te alofa tauanoa sē fuafuagina o te Atua.” (2 Koli. 9:14; 1 Pe. 4:10) Tela la, i te fakamatalaga e uiga ki te tavini atu ki ‵tou taina fakaa‵lofa, telā e aofia i ei a galuega fesoasoani, ne fai mai a The Watchtower i a Tesema 1, 1975: “E se ‵tau o fakalotolotolua tatou me ne fakatāua malosi ne Ieova te Atua mo tena Tama ko Iesu Keliso a te vaega tenei o te taviniga.” Ao, a te galuega fesoasoani se vaega tāua o te taviniga tapu.​—Loma 12:1, 7; 2 Koli. 8:7; Epe. 13:16.

Galuega Fesoasoani mo Fakamoemoega ‵Lei Katoatoa

7, 8. Se a te fakamoemoega muamua o te ‵tou galuega fesoasoani? Fakamatala mai.

⁷ Ne a fakamoemoega o ‵tou galuega fesoasoani? Ne fakasino atu a Paulo ki te fesili tenā i te lua o ana tusi ki te kau Kolinito. (Faitau te 2 Kolinito 9:11-15.) I fuaiupu konei, ne fakaasi mai ne Paulo a fakamoemoega e tolu konei, kolā e taumafai ki ei i te taimi e ‵kau atu ei tatou ki te “galuega fesoasoani tenei ki tino katoa.” Ke onoono tatou ki fakamoemoega takitasi konei.

⁸ Muamua la, e tuku atu ne te ‵tou galuega fesoasoani a tavaega ki a Ieova. Onoono ki te auala ne takitaki atu ei ne Paulo i fuaiupu e lima konei ana taina ki a Ieova te Atua. Ne fakamasaua atu a te apositolo ki a latou e uiga ki “te fakafetai ki te Atua” mo “te avatuga o fakafetai e uke.” (Fuaiupu e 11, 12) E taku mai i ei a taumafaiga fesoasoani kolā ne fai ei a Kelisiano ke “‵viki atu ei latou ki te Atua” mo “te alofa tauanoa sē fuafuagina o te Atua.” (Fuaiupu e 13, 14) Kae ne fakaoti ne Paulo ana pati e uiga ki te galuega fesoasoani mai te fai atu: “Fakafetai atu ki te Atua.”​—Fuaiupu e 15; 1 Pe. 4:11.

9. Se a te mea e mafai o fai ne te galuega fesoasoani ke ‵fuli ei a mafaufauga o tino? Tuku mai se fakaakoakoga.

⁹ E pelā mo Paulo, e ‵kilo atu a tavini a te Atua i aso nei ki taumafaiga fesoasoani e pelā me ne avanoaga ke fakaaloalo atu ei ki a Ieova kae fakagaligali foki ana akoakoga. (1 Koli. 10:31; Tito 2:10) A te ‵tonuga loa, e masani o aoga a te galuega fesoasoani ki te avega keatea o manatu sē ‵lei kolā e maua ne nisi tino e uiga ki a Ieova mo ana Molimau. Ke fai se fakatusaga: Ne nofo atu se fafine i se koga telā ne poko i ei a te alikeni, kae e isi se fakailoga penei e ‵piki i tena mataloa, “Molimau a Ieova​—Ko Tapu Koutou i Toku Fale.” Kae i te aso e tasi, ne lavea ne tou fafine a tino ga‵lue fesoasoani e toe faite ne latou se fale i te suā feitu o te auala mai tena fale. Ne onoono atu eiloa tou fafine i nai aso ki tino ga‵lue mata fia‵fia, kae ne fanatu ei a ia ke ‵sili atu me ko oi latou. I te iloaga ne ia me i volenitia konā ne Molimau a Ieova, ne ofo masei tou fafine kae fai atu: “Ne ‵se taku kilokiloga ki a koutou.” Se a te mea ne iku mai i ei? Ne tuku ifo ne ia ki lalo te fakailoga tenā mai i tena mataloa.

10, 11. (a) Ne a fakaakoakoga e fakaasi atu ei me ko oko atu tatou ki te lua o fakamoemoega o te ‵tou galuega fesoasoani? (e) Se a te tusi ne fesoasoani atu ki tino ga‵lue fesoasoani? (Ke onoono ki te pokisi “Se Mea Faigaluega Fakaopoopo mō Tino Fai Galuega Fesoasoani.”)

¹⁰ A te lua o mea, e aofia eiloa tatou i “te galuega fesoasoani” ki tino katoa. (2 Koli. 9:12a) E loto fia‵fia tatou ke fesoasoani fakavave atu ki manakoga tāua kae fesoasoani atu ke fakamāmā aka a logo‵maega o ‵tou taina mo tuagane. Kaia? Ona ko tino katoa i te fakapotopotoga Kelisiano e “tasi fua te foitino,” kae “kafai e logo‵mae se vaega e tasi, e logo‵mae ana vaega katoa.” (1 Koli. 12:20, 26) Tela la, a te atafai mo te alofa atafai ne fakamalosi aka ei a taina mo tuagane e tokouke i aso nei, ke taofi fakavave aka a mea e fai ne latou, fakatoka olotou mea faigaluega, kae fesoasoani atu ki taina tali‵tonu i koga e ‵tupu ei a fakalavelave. (Iako. 2:15, 16) E pelā mo te tsunami ne poko i Tiapani i te 2011, ne lafo atu ne te ofisa lagolago o te Iunaite Sitete se tusi ki Komiti Fakatū‵tu i te Iunaite Sitete, kae fesili atu me e mafai o fesoasoani atu a “nai taina ata‵mai” ki te ‵toe faitega o Kingdom Hall i konā. Ne ‵saga atu pefea latou ki ei? I loto i nai vaiaso, toeitiiti ko kātoa te 600 o volenitia kolā ne fia fesoasoani atu​—kae ne lotoma‵lie ke ‵togi eiloa olotou pasese ke ‵lele atu latou ki Tiapani! “Ne ōfo malosi matou i te auala ne ‵saga mai ei a taina,” ko mea ne matea ne te ofisa lagolago i te Iunaite Sitete. Kafai e fesili atu se taina i Tiapani ki se tino fesoasoani mai i nisi fenua me se a te pogai ne fanatu ei a ia o fesoasoani, ne fai atu a ia: “E fai eiloa omotou taina i Tiapani mo fai ne vaega o ‘omotou foitino.’ E lagona foki ne matou te tigaina mo te logo‵mae o latou.” Ona ko te alofa sē fakapito, ne ‵tu eiloa a ola o tino ga‵lue fesoasoani i se tulaga fakamataku ke fesoasoani atu ki olotou taina tali‵tonu.c​—1 Ioa. 3:16.

¹¹ Ne fakaasi mai foki ne tino kolā e se ne Molimau a te lotou loto fakafetai ki te ‵tou galuega fesoasoani. E pelā mo te fakalavelave ne tupu i te sitete o Arkansas, U.S.A., i te 2013, ne lipoti mai se nusipepa ki te ‵vave o volenitia Molimau, penei: “A te fakatokaga o Molimau a Ieova ne fai ei ke ‵saga fakavave atu a volenitia ki fakalavelave ‵tupu i se auala tafasili i te gali.” A te ‵tonuga loa, e pelā mo mea ne matea ne Paulo, e aofia eiloa tatou i “galuega fesoasoani” mō ‵tou taina tali‵tonu.

12-14. (a) Kaia e tāua ‵ki a ‵tou taumafaiga ke fakataunu a te ‵tolu o fakamoemoega o te ‵tou galuega fesoasoani? (e) Ne a fakaasiga e faka‵mafa mai i ei a te tāua ke fakatumau i polokalame faka-te-agaga?

¹² A te tolu o mea, e fesoasoani atu tatou ki tino kolā ko logo‵mae ke toe ‵foki atu ki olotou faifaiga faka-te-agaga tumau. Kaia e tāua ei te mea tenei? Ne fai mai a Paulo me i tino kolā e maua ne latou a te fesoasoani tenei, ka fakaosofia ke avatu a “fakafetai e uke ki te Atua.” (2 Koli. 9:12e) Se a foki te ‵toe auala ‵lei ke fakaasi atu ne tino kolā ne logo‵mae, a te lotou fakafetai ki a Ieova i lō te ‵toe fai fakavave olotou polokalame masani faka-te-agaga? (Fili. 1:10) Ne fai mai The Watchtower i te 1945: “Ne talia ne Paulo . . . a te fakaputuga o meaalofa tupe me ne fesoasoani atu. . . ki Kelisiano fakaa‵lofa i te feitu faka-te-foitino ko te mea ke mafai o ‵kau malosi atu latou ki te galuega talai a Ieova.” E penā foki ‵tou fakamoemoega i aso nei. Mai i te ‵toe ‵kau atu ki te galuega talai, e se fakamalosi aka fua ne ‵tou taina olotou tuakoi fanoa‵noa kae e penā foki loa mo latou.​—Faitau te 2 Kolinito 1:3, 4.

¹³ Mafaufau ki nisi fakamatalaga mai i tino kolā ne fesoasoani atu ki a latou, ne toe ‵kau atu ki te galuega talai, kae ne fakamalosi aka ei latou. “Se fakamanuiaga eiloa mō te motou kāiga ke olo atu i te galuega talai,” ko pati a se taina. “E tuku mai i ei se tamā fakatapūga mai i te manavase ki motou fakalavelave i te taimi e taumafai ei matou o fakamafanafana atu ki nisi tino.” Ne fai mai se tuagane: “A te saga tonu atu ki galuega faka-te-agaga ne ave keatea ei toku mafaufau mai i fakamaseiga i oku feitu. E fai ei ke tokagamalie oku lagonaga.” Ne fai mai ne te suā tuagane ana mea ne lavea: “E tiga eiloa ne seki mafai ne au o fai a mea e uke, ne tuku mai eiloa ne te galuega talai a fakatakitakiga ‵lei mō toku kāiga. A te faipati atu ki nisi tino e uiga ki ‵tou fakamoemoega ki te lalolagi fou, ne fakamalosi aka ei toku loto talitonu me ka faka‵fou eiloa a mea katoa.”

¹⁴ A te kau atu ki fakatasiga ko te suā polokalame faka-te-agaga e ‵tau o toe fai fakavave ne ‵tou taina tali‵tonu kolā ne logo‵mae. Mafaufau ki mea ne ‵tupu ki a Kiyoko, se tugane telā ko 50 tupu ana tausaga. I te otiga ne ‵galo atu ana mea katoa i te tsunami, kae na ko ana gatu mo ana taka ne pei ei tou fafine, ne seki iloa ne ia me ne a ana mea ka fai ke tausi ei a ia. Ne fai atu ei se toeaina ki tou fafine me ka fai olotou fakatasiga Kelisiano masani i tena motoka. E fai mai a Kiyoko: “Ne saga‵saga fakatasi matou mo se toeaina, tena avaga, mo te suā tuagane i te motoka. Ne faigofie fua te fakatasiga, kae e pelā eiloa me se vavega, ne ‵galo fakavave atu eiloa i toku mafaufau a mea ne ‵tupu i te tsunami. Ne lagona ne au te filemu o toku mafaufau. Ne fakaasi mai ne te fakatasiga tenā a te aoga o fakatasitasiga faka-Kelisiano.” Ne fai mai a te suā tuagane e uiga ki fakatasiga ne kau atu tou fafine ki ei mai tua o se fakalavelave ne tupu: “Ne fesoasoani mai eiloa ke kufaki au i mea ‵tupu!”​—Loma 1:11, 12; 12:12.

E Maua a Mea Aoga Mai i Galuega Fesoasoani

15, 16. (a) Ne a mea aoga ne maua ne Kelisiano i Kolinito mo nisi koga mai i te ‵lago atu ki taumafaiga fesoasoani? (e) E mafai pefea o maua ne tatou a mea aoga tai ‵pau mai i te galuega fesoasoani i aso nei?

¹⁵ I tena mafaufau ki te galuega fesoasoani, ne fakamatala atu foki ne Paulo ki te kau Kolinito a mea aoga e maua ne latou mo nisi Kelisiano mai te ‵kau atu ki te galuega tenei. Ana muna: “Kae fakatasi mo olotou ‵talo mō koutou, e fakaasi atu i ei a te lotou [Kelisiano Iutaia i Ielusalema kolā ne fesoasoani atu ki ei] a‵lofa mō koutou ona ko te alofa tauanoa sē fuafuagina o te Atua tenā i luga i a koutou.” (2 Koli. 9:14) Ao, ne fakamalosi aka ne te kaima‵lie o te kau Kolinito a te kau Kelisiano Iutaia ke ‵talo atu mō olotou taina i Kolinito, e aofia i ei a tino mai Fenua Fakaatea, kae momea aka ei te lotou a‵lofa ki a latou.

¹⁶ Ne fai mai i The Watchtower i a Tesema 1, 1945 me i te fakagalue aka o pati a Paulo e uiga ki mea aoga e maua mai i te galuega fesoasoani i aso nei, penei: “Kafai e fesoasoani atu se vaega e tasi o potukau o tino o te Atua ki manakoga o te suā potukau o latou, mafaufau la ki te lasi o te fealofani e maua mai i ei!” Tenā eiloa te lagonaga e maua ne tino kolā e aofia i galuega fesoasoani. “A te faiga o galuega fesoasoani ne fai ei ke pili atu au ki oku taina i lō aso mua,” ko muna a se toeaina telā ne fesoasoani atu i te ‵tupuga o se lofiaga. Ne fai mai penei se tuagane loto fiafia e tokotasi telā ne maua ne ia se feasoasoani: “A te ‵tou kautaina ko te ‵toe mea tāua e maua ne tatou ke oko atu ki te lalolagi Palataiso.”​—Faitau te Faataoto 17:17.

17. (a) E fakasino atu pefea a pati i te Isaia 41:13 ki te galuega fesoasoani? (e) Taku mai a nai fakaakoakoga o te auala ne fakaaloalo atu ei a te galuega fesoasoani ki a Ieova kae fakamalosi aka ‵tou va fealofani. (Ke onoono foki ki te pokisi “E Fesoasoani Atu a Volenitia Mai te Lalolagi Kātoa.”)

¹⁷ I te taimi e oko atu ei a tino ga‵lue fesoasoani ki te koga ne tupu ei te fakalavelave, e lagona eiloa ne taina kolā ko logo‵mae i se auala fakapito a te ‵tonu o te folafolaga a te Atua: “Au ko te Aliki te otou Atua; e fakamalosi ne au koutou, ‘Sa ma‵taku; au e fesoasoani atu ki a koutou.’” (Isa. 41:13) Mai tua o te saoatuga i se fakalavelave ne tupu, ne fai mai se tuagane: “Ne loto vāivāi eiloa au i te kilo atu ki fakamaseiga, kae ne fakamalosi mai eiloa a Ieova ki a au. E se mafai eiloa o fakamatalagina a te fesoasoani ne maua ne au mai i taina.” Mai tua o te fakamaseiga ne se fakalavelave a te lotou fa‵kai, ne tusi atu a toeaina e tokolua mō te fakapotopotoga ne tavini atu lāua i ei: “Ne logo‵mae malosi matou i te mafuie kae ne lagona eiloa ne matou a te fesoasoani ne tuku mai ne Ieova e auala i ‵tou taina. Ne fai‵tau matou e uiga ki galuega fesoasoani, kae nei la, ko lavea eiloa ne matou ki omotou mata.”

E Mata, e Mafai ne Koe o Fai Sou Tusaga?

18. Ne a au mea e mafai o fai māfai e fia kau atu koe ki te galuega fesoaoani tenei? (Ke onoono foki ki te pokisi “Ne Fakatonutonu Aka ei Tena Olaga.”)

¹⁸ E mata, e fia tami eiloa koe ki te fiafia telā e tuku mai ne te galuega fesoasoani? Kafai e penā loa, masaua me e masani o filifili a tino ga‵lue fesoasoani mai i tino kolā e ga‵lue i galuega fakatū‵tu o Kingdom Hall. Tela la, ke taku atu ki otou toeaina me e fia faka‵fonu ne koe se pepa mō te te avanoaga tenei. E fakamasaua mai penei ne se toeaina telā ne atamai malosi i te galuega fesoasoani tenei: “Ke fanatu fua ki te koga e tupu ei te fakalavelave māfai ko oti ne maua ne koe se ‵kamiga tonu mai i te Komiti mō Mea ‵Tupu.” I te auala tenā, ka mafai ei o fai ‵tou galuega fesoasoani i se auala tokagamalie.

19. Ne ‵lago atu pefea a tino ga‵lue fesoasoani i se auala lasi, ki te fakaasiatuga me e fai eiloa tatou mo soko ‵tonu o Keliso?

¹⁹ A te galuega fesoasoani se auala tu ‵kese e fakaasi atu ei ‵tou faka‵logo ki te fakatonuga a Keliso ke “fakatau a‵lofa.” E auala i te fakaasiatuga o te vaegā alofa penā, e fakaasi atu ei ne tatou me e fai ‵tonu eiloa tatou mo fai a soko o Keliso. (Ioa. 13:​34, 35) Ko oko eiloa i te manuia o tatou i aso nei ke maua atu ne tino ga‵lue mo te loto fia‵fia, kolā e fakaaloalo atu ki a Ieova i te taimi e tuku atu ei ne latou a te fesoasoani ki tino, kolā e ‵lago atu mo te a‵lofa fakamaoni ki te Malo o te Atua!