Ke ‵Lago Atu ki te Malo​—Galuega Fakatū‵tu mō Tapuakiga mo Meaalofa Fesoasoani

KO SASALE atu koe ki te otou Kingdom Hall kae ko se lavea ‵lei ne koe te koga tenā. Ne fakamatamata faeloa koe i te fale tenei. Kāti e masaua ne koe a te fiafia i taimi ne fesoasoani atu ei koe ki tena faitega i nai tausaga ko ‵teka. Kae nei la, ko silia atu eiloa tou fakamatamata me ko fakaaoga te otou Kingdom Hall ki se koga e fakamaopoopo ei a meaalofa fesoasoani mō tino kolā ne pokotia i fakalavelave ‵tupu mō se vaitaimi. Mai tua o te taimi ne fakamāfua aka ei ne se matagi malosi a lofiaga mo fakamaseiga ki te otou fa‵kai, ne fakatoka fakavave ne te Komiti o te Ofisa Lagolago ke avatu a meakai, gatu, vai ‵ma, mo nisi fesoasoani ki tino kolā e pokotia i ei. Ne fakatoka faka‵lei eiloa a meaalofa fesoasoani. Ko olo atu a taina mo tuagane ki te Kingdom Hall, puke a mea e manakogina ne latou, kae ‵solo olotou loimata ona ko te fia‵fia.

Ne fai mai a Iesu me i te fakailoga tu ‵kese o ana tino ko te fakatau a‵lofa. (Ioa. 13:​34, 35) I te vaega tenei, ka mafau‵fau tatou ki te auala ne fakaasi atu te alofa faka-Kelisiano i galuega fakatū‵tu mo taumafaiga ke fesoasoani atu telā e fai ne Molimau a Ieova. A te vaegā alofa penā se fakamaoniga sili me ko ‵nofo tatou mai lalo i te pulega a te Malo o Keliso.