Ne Fai ne Iesu a Galuega Fakaofoofogia i Kapanaumi

Ko oti ne ‵kami ne Iesu a soko e tokofa—ko Petelu, Anitelea, Iakopo, mo Ioane—ke fai mo tino faiika ki tino. Nei la, i te Sapati, ne olo atu latou katoa ki te sunako i Kapanaumi. Ne akoako atu a Iesu i te sunako, kae ne ōfo malosi foki a tino i te auala ne akoako atu ei a ia. Ne fai eiloa a ia e pelā me se tino e isi sena pule kae e se pelā mo failautusi.

I te Sapati tenei, ne nofo mai i ei se tagata telā ne ulufia ne temoni. I konā eiloa i te sunako, ne pakalaga atu a te tagata tenā i se leo lasi: “Ne a motou mea ne fai atu ki a koe, e Iesu, te Nasaleta? E a, a koe ne vau o fakaseai matou? E iloa faka‵lei ne au a koe, ko te Tino Tapu a te Atua.” Ne ‵liko atu a Iesu ki te temoni telā ne pule atu ki te tagata tenā, ana muna: “Filemu, kae fano nei ki tua mai i a ia!”—Maleko 1:24, 25.

Ne fai ei ne te temoni ke ulufia te tagata tenā i te laukele, telā ne pakalaga ei a ia ki te gataga eiloa o tena leo. Ne fano keatea te temoni mai te tagata tenā “e aunoa mo te fakalogo‵mae atu ki ei.” (Luka 4:35) Ne ōfo masei a tino kolā ne ‵nofo atu i ana tafa i te sunako! “Se a te mea tenei?” ko te lotou fesili. “E nofo foki tou tagata mo te ‵mana ke ‵tuli ne ia a agaga ma‵sei, kae e faka‵logo foki a latou ki a ia.” (Maleko 1:27) E malamalama ‵lei, me ne salalau atu te tala fakaofoofogia tenei i Kalilaia kātoa.

Ne tiakina ne Iesu mo ana soko te sunako, kae olo atu ki te fale o Simona, io me ko Petelu. Ne masaki ‵ki te mātua o te avaga a Petelu me ne maluga eiloa tena ‵vela. Ne fakamolemole atu latou ki a Iesu ke faka‵lei aka tou fafine. Telā ne fanatu ei a Iesu, puke ne ia tena lima, kae ne fakatu aka a ia ki luga. I konā loa ne ‵lei ei tena masaki kae ne kamata o faka‵tali tou fafine ki a Iesu mo ana soko, kāti mai te fakatokaga o mea‵kai mō latou.

I te ‵tōga o te mata o te la, ne kamata o olo atu a tino mai kogā koga katoa ki te fale o Petelu fakatasi mo olotou tino ma‵saki. E seki leva kae foliga mai me ne maopoopo mai te fa‵kai kātoa i mua o te fale. Kaia? E ma‵nako eiloa latou ki se faka‵leiga. A te ‵tonuga loa, ne ‘avatu ne tino katoa ki a ia a tino kolā e ma‵saki i masaki kese‵kese kae fakaeke atu ana lima ki luga i a latou taki tokotasi, ‵lei ei latou.’ (Luka 4:40) Ao, faitalia me ne a olotou ma‵saki, ne fesoasoani atu eiloa a Iesu ki a latou, e pelā mo te mea ne ‵valo mai. (Isaia 53:4) Ne fakasaoloto foki ne ia a tino kolā ne ulufia ne temoni. Kae i te taimi e o‵mai ei ki tua a temoni, ne paka‵laga atu latou: “A koe ko te Tama a te Atua.” (Luka 4:41) Ne ‵liko atu a Iesu ki a latou kae ne seki talia ne ia latou ke toe fai‵pati atu. Ne iloa ne latou me i a Iesu ko te Keliso, kae ne seki manako a ia ke fakafoliga atu me e tavini latou ki te Atua tonu.