Mataupu e 23

Nisi Vavega i Kapanaumi

I TE Sapati mai tua ifo o te taimi ne kalaga atu ei a Iesu ki ana soko muamua e tokofa, ko Petelu, Anitelea, Iakopo, mo Ioane​—⁠ne olo atu latou katoa ki te sunako i Kapanaumi. I konā loa ne kamata ei o akoako atu a Iesu, kae ne ofo malosi a tino me ne akoako atu a ia ki a latou e pelā me se tino e isi sena pule kae e se pelā mo faiakoga o te Tulafono.

I te Sapati tenā, ne nofo mai i ei se tagata telā ne ulufia ne temoni. Mai tua malie ifo i ei, ne pakalaga aka a ia penei i se leo lasi: “Iesu te Nasaleta! Se a tau fekau ki a matou? Ko vau koe na o fakapalele matou? E iloa ne au koe! Ko te Tama Tapu a te Atua!”

A te temoni telā ne pule ki te tagata tenā se agelu e tokotasi a Satani. Ne ‵liko atu a Iesu ki te temoni, ana muna: “Filemu, fano nei keatea mai i a ia!”

Tela la, ne fai ne te temoni ke poko te kīkī o te tagata tenā telā ne pakalaga ei a ia ki te gataga eiloa o tena leo. Ne fano keatea te temoni mai te tagata tenā kae ne seki pakia a ia i ei. Ne ofo masei a tino katoa i ei! “Se a te mea nei?” ko te lotou fesili. “A te tagata tenei e isi sena pule ke fakatonu atu ki agaga ma‵sei kae e faka‵logo eiloa a latou ki a ia!” Ne salalau atu te tala tenā ki kogā koga katoa i tafa o te fa‵kai tenā.

Ne tiakina ne Iesu te sunako, kae ne olo atu latou mo ana soko ki te fale o Simona, io me ko Petelu. Ne masaki malosi te mātua o te avaga a Petelu me ne fiva malosi a ia. Ne a‵kai atu latou penei: ‘Fakamolemole ke na fesoasoani atu ki a ia.’ Telā ne fanatu ei a Iesu, ne puke ne ia tena lima, kae ne fakatu aka a ia ki luga. I konā loa ne ‵lei ei tena masaki kae ne kamata o fakatoka ne ia a mea‵kai mō latou!

Fakamuli ifo, i te ‵tōga o te mata o te la, ne kamata o o‵mai a tino mai kogā koga katoa ki te fale o Petelu fakatasi mo olotou tino ma‵saki. E seki leva kae ne maopoopo mai te fa‵kai kātoa i mua o te fale tenā! Ne faka‵lei ne Iesu olotou tino ma‵saki, faitalia me ne a olotou masaki. Ne fakasaoloto foki ne ia a tino kolā ne ulufia ne temoni. Kae kafai ko ‵tuli ki tua a temoni ne paka‵laga atu latou penei: “A koe ko te Tama a te Atua!” Ne ‵liko atu a Iesu ki a latou kae ne seki talia ne ia latou ke fai‵pati atu me ne iloa ne latou i a ia ko te Keliso. Maleko 1:21-34; Luka 4:31-41; Mataio 8:14-17.

▪ Ne a mea ne ‵tupu i te sunako i te Sapati mai tua ifo o te taimi ne kalaga atu ei a Iesu ki ana soko e tokofa?

▪ Tefea te koga ne fanatu ki ei a Iesu i te tiakinaga ne ia o te sunako, kae se a te vavega telā ne fai ne ia i konā?

▪ Ne a mea ne ‵tupu fakamuli ifo i te afiafi po eiloa tenā?